LUN wóunabuni álügüdahani le, akutiha wamá bián hénpulu lánina laguseragüdün Bungiu le iridúbei tidan Bíbülia: Guran le lánina lidaani Noé luma lagumuchún hau kananna.

LE HARIÑAGUBEI GÜRIGIA: “Lau furundei lóusera Bungiu dan le lóunahan aban guran le agumuchubei hau sun gürigia ubouagu, Noérügüñein hama liduheñu esefura”.

LE TARIÑAGUBEI BÍBÜLIA: Ariñagati Bungiu: “Mabusenrun [numuti] lounwen le salufuribei, le nabusenrubei lun lasansiruni ligaburi lun lawinwandun” (Esekiéli 33:11). Masandirunti Bungiu ni murusun ugundani lau lagumuchun hau gürigia wuribatiña lidan lidaani Noé. Kati uagu ladügei?

 Ariñagatu Bíbülia dan le lan lóunahanbalin Bungiu abeichúni le kóntüra wuribatiña, adüga lumuti “lun hénpulume houn gürigia wuribatiña ha lúnbaña hayabin hárigiñe” (2 Féduru 2:5, 6). Ariñaga tumuti giñe Bíbülia ida liña lan lawadigimaridun Bungiu, luma ida liña lan lóuserun.

Furumiñe, ígira lumuti Bungiu furangu íbini lan gari lan lun láfaraguniña wuribatiña luagu hadurun, mígirun lumutiña mafayeihanga luagu furundei le aubei hóusera hama amu, ani ligibugiñe lagu gaduruntiña luagu le hadügübei. Ámuñegü, lagumuchuba lau sun asufuriruni luma marichaü.

Libiaman, manera le aubei lóusera Bungiu lidan binadu dan ígirati furangu luagu súnwandan lan leweridiruniña gürigia lubaragiñe ladügün lun hafayeirun luagu hadurun, ladüga hínsiñehabu lan. Kei hénpulu, yusu lumuti Noé lun leweridiruniña gürigia, ani máhatiña haganbun. Aliihatiwa tidan Bíbülia: “Mefentiña, darí ladibirun ubóu, aba hañaradagun súngubei” (Matéu 24:39).

Sansi lumuti san Bungiu ligaburi ladügüni katei lau lásügürün dan? Uá. Wéridi lumutiña ísüraelina ha lumutuniña anhein lan buga háyeiha luriban housan néchanigu ha geyegubaña hau, lígiruba lan lun hebelurun amu néchanigu áganiñu hageiroun, lun hagünrinchaguni Herusalén, uburugu le súdinitimabei lidan hageira, ani barǘ hamañame lidoun amu fulasu kei adaürǘtiña. Madügüntiña ísüraelina gasu lau eweridihani ani aba háyeihani luriban housan néchanigu besinagu. Darí lun hadagaragüdün irahüñü lidan sákürifisiu! Fáyeigüda lumutiña san Heowá? Anha, gama lumoun lubaragiñe abeichúni ligía, óunahati saragu profetagu ayanuha houn lun hasansirun lubaragiñe latarüdün. Ariñagati giñe houn: “Madügünti Wabureme [Heowá] ni kata masubudiragüdüngalei houn lani profetagu” (Amosu 3:7).

KA MINI LUBÉI LE WOUN: Ligaburi labeihan Bungiu lidan dan le sügühalibei ruti emenigini woun. Gayarati wachoururuni luagu lafayeiragüdübaña lan Heowá gürigia furundetiña. Ariñagatu Bíbülia: “Habugúba [o hagumuchaguagüdüwaba] wuribatiña fulasurugugiñe [...]. Ánhaña ha ǘnabubei hanaagun houngua, hagíaba laburiña múa, habagariduba lidan darangilaü le dayarüti” (Sálumu 37: 9-11). Ka hasaminarubei luagu aban abeichúni lúmagiñeti Bungiu le lunbei lesefuruniña gürigia lídangiñe asufuriruni? Hariñaguña hamuga san lóuseruña lan lau furundei o lau gudemehabu?

LE HARIÑAGUBEI GÜRIGIA: “Aban katei wéiriti luriban lagumuchún hau kananna, ítara liña kei lanarime áfarahani le asuseredubei lidan burí wuribu ani gayarati konpararua lan luma hafarawagún lílana aban rasa uguñe weyu”.

LE TARIÑAGUBEI BÍBÜLIA: “Richaguati sun le ladügübei [Heowá] ligía Búngiubei lánina inarüni, úati marichaü lidan” (2 Lúrudu 32:4). Siñati konpararua lan laguseragüdün Bungiu luma wuribu le hadügübei wügüriña, lugundun siñati hasubudiruni le tídanbei hanigi gürigia, ánheinti Bungiu subudi lumuti.

Kéiburi dan le laguseragüdünbaliña Bungiu lílana uburugu Sodoma luma Gomora ani aba desidírü lan lagumuchun hau, nidiheriti meha Abüraámü luéi marichabei lan ligaburi ladügüni Bungiu katei. Aba lálügüdüni: “Bagumuchaguagüdübaña san giñe ha madurunbaña úara hama ha gadurunbaña?” (Agumesehani 18:20-33). Mafiñenti meha ladügüba lan aban Bungiu richati kei Heowá aban katei ítarati. Lau saragu gurasu, aba lachoururuni Bungiu lun luagu anhein lan adarira íbini diisi gürigia richaguatiña Sodoma, feruduna lubéi lan uburugu ligía (Agumesehani 18:20-33). Chóuruti ariha lanu Bungiu hanigi gürigia hagía ani ariha lumuti lanarime hariban (1 Krónikasi 28:9).

Ariha lumuti Bungiu lanarime hariban kananna ani ligía líchugunbei gumadi lun lagumuchún hau. Subudiwatiña meha kananna luagu hágudahan irahüñü wínwanñu lun sákürifisiume houn habungiutegu, luma amu burí katei wuribati (2 Urúeigu 16:3). * Subudi hamuti meha ariñaga lan Heowá houn ísüraelina lun hárügüdüni múa ligía. Ha amahadubaña hederegeruni múa ani áluaha hagía wuribu hama hebedaaguña meha mámarügü houn ísüraelina, íbini giñe lun Heowá, ladüga arufuda laali meha saragu wéiyaasu luagu hámañein lan lumutuniña.

Luagu amu oubaü, gudemehabuti meha Heowá houn kananna ha ígirubalin hariban ani aba  hafalaruni laruman lilurudun Heowá. Kéiburi Raábü, to horu hama tiduheñu, ferudunawati habagari. Ani dan le hamuriahanbei lílana uburugu Gabaón ferudun, móunwenguntiña ni hagía ni harahüñu (Hosué 6:25; 9:3, 24-26).

KA MINI LUBÉI LE WOUN: Gayarati wafurendeirun aban katei súdiniti lídangiñe abeichúni le hasufurirubei kananna. Eibu dan yarafatimahadiwa lun weyu le uágubei tayanuha Bíbülia, “luéyuri guséi luma hagünrinchawagun wuribatiña” (2 Féduru 3:7). Anhein hínsiñe lubéi Heowá woun ani gaganbadi wagía lun, danme le lagumuchun hau sun ha máhabaña lun lagumadihan, wawinwanduba sin asufuriruni.

Haritaguagüda lumutiwa Heowá lau ínsiñeni luagu gani lan le desidírü habéi agübürigu efekütu hawagu hasaanigu. Ariñagati woun tidan Lererun: “Anúadira huméi lubeiti ibagari, lun habagaridun hau sun hadügawagun; hínsiñela Wabureme le Wabungiute hun, aganba huméi, gúnfuli humá luma” (2 Lúrudu 30:19, 20). Hariñaguña hamuga san lererun lan aban Bungiu furundeti le, o lererun aban Bungiu hínsiñehabuti woun ani busenti lun wanúadahan buidu?