Hapeu La Itre Iameköti Akötresie, Ka Catrehnine Kö?

QËMEKENE troa sa la hnyinge celë, tro sa pane ithanatane la lue iameköti Akötresie hna qaja e hnine la Tusi Hmitrötr; ene lo Iwë Atraqatr ngöne lo hneijine i Noa, memine la kola apatrene la angetre Kanana.

IWË ATRAQATR NGÖNE LO HNEIJINE I NOA

ÖNI ITRE XAN: “Ka pë ihnimine Akötresie, ke hnei Nyidrëti hna axulune la Iwë Atraqatr kowe la nöjei atrene la fene hnengödrai, nge hna nue Noa pe kö me hnepe lapa angeice troa mel.”

ÖNI TUSI HMITRÖTR: Hnei Akötresieti ekö hna qaja ka hape: “Tha madine kö ni la meci ne la ate ka ngazo, ngo loi pe troa hmaca la ate ka ngazo qa ngöne la jë i nyën, mate mel.” (Ezekiela 33:11) Kolo hi amamane ka hape, tha madrine kö Akötresieti ekö troa apatrene lo itre atr ka ngazo ngöne lo hneijine i Noa. Ngo hnauëne kö la Nyidrëti a apatrenyi angatr?

Kola sa hnei Tusi Hmitrötr ka hape, ame la amekötine jë Akötresieti la itre atr ka ngazo ekö, tre matre “nyine hatene koi angete troa thina ka ngazo.” (2 Peteru 2:5, 6) Ngo hatrene göi nemen?

Göne la pengö i Akötresie; ame la hnapan, hnei Akötresieti hna amekötine ka hape, ngacama hace koi Nyidrëti troa apatrene la itre atr, ngo tha sihngödri kö koi Nyidrëti la itre hna kuca hnene la itre atr ka pë ihnimin, nge tro kö Nyidrëti a nyithupene koi angatr. Tro kö Akötresieti a apatrene la itre atr ka tha meköti kö me itre akötr, ngöne la ijine hnei Nyidrëti hna sa.

Ame la hnaaluen, kola mama jëne la aqane ujë i Akötresieti ekö, ka hape, Nyidrëti a hnime la itre atr me pane hmekë angatr, qëmekene tro Nyidrëti a apatrenyi angatr. Noa ekö la atr ka cainöjëne la thiina ka meköt, ngo tha semesine angeice kö hnene la itre atr. Kola qaja hnene la Tusi Hmitrötr ka hape: “Tha denge kö angate uti hë traqa ha la iwë, me cengöne thei angat’ asë pi.”—Mataio 24:39, MN.

Ngo hapeu, metrötrëne ju kö Akötresieti lo lai hatren? Eje hi. Hnei Akötresieti hna pane thuemacanyi angetre Isaraela, ka hape, maine tro angatr a kei hmaca kowe la ngazo tune lo itre nöje xötreithi angatr, tro Nyidrëti a nue angatre memine la lapa Ierusalema kowe la itre ithupëjia, matre aponyi angatr e cili. Ngo hnene la angetre Isaraela hna kei hmaca kowe la ngazo, nge goi upe fe angatre la itre nekö i angatre nyipine la eë. Nemene hë la hnei Iehova hna kuca? Hnei Nyidrëti hna pane a nyimu a upe la itre perofeta troa hmekë angatr, me xatua angatr troa saze, qëmekene tro Nyidrëti a nyithupene koi angatr. Öni Nyidrë: “Tha tro kö Joxu Iehova a kuca la kete ewekë, maine tha hnapane amamane la hanengë i nyidë kowe la ite perofeta ite hlue i nyidë.”—Amosa 3:7.

 THANGANE KOI SË: Kola thue mejiune koi së hnene la itre aqane amekötine Iehova ekö la itre atr. Atre hë së ka hape, tro kö Akötresieti a nyithupene kowe la itre atr ka pë ihnimin nge ka iakötrë. Kola qaja e hnine la Tusi Hmitrötr ka hape: “Tro ha thupa tiji angete kuca la ngazo . . . nge tro la ange ka menyike a hetenyi la nöj, nge tro angat’ a madine la tingetinge atraqat.” (Salamo 37:9-11) Maine troa thapa elany la nöjei atr asë qa ngöne la nöjei pengöne akötr, tre nemene fe la mekuna i nyipunie? Hapeu, aqane ujë ne ka pë ihnimine lai, maine ka ihnim?

PENGÖNE LA ANGETRE KANANA

ÖNI ITRE XAN: “Ngazo catre kö la aqane humuthi angetre Kanana ekö, hune la aqane humu atr enehila.”

ÖNI TUSI HMITRÖTR: “Meköti asë la ite jë i [Akötesie] ; [Nyidrëti la] Akötesie ka nyipici, nge pë engazon.” (Deuteronomi 32:4) Thatreine kö tro sa xome ceitunëne la itre iameköti Akötresie, memine la itre isi ne la itre atr. Pine nemen? Pine laka, hetre ewekë hnei Akötresieti hna atrein, ngo thatre pë hë la atr; kola qaja la troa wange la hni ne la atr, ene la pengö i angeic e kuhu hni.

Ame göne lo angetre Sodoma me Gomora ekö, ase hnyawa ha Akötresieti mekune troa apatrene la lue lapa cili. Ngo hnei Aberahama hna pane hnyingë pengöne koi Akötresie, pine laka, jole koi angeice troa mekune ka hape, tro Nyidrëti a “ce apatene la ka meköti me ka ngazo.” Celë hi matre, hnei Akötresieti hna qaja hnyawane koi angeice ka hape, maine ala treene ju lao atr ka meköti e Sodoma, tre tha tro jë kö Nyidrëti a lep apatrene la traone cili. (Genese 18:20-33) Ngo öhne hë Akötresieti la itre aliene hni ne la itre atre ne la lue nöje cili, laka ngazo catr.—1 Aqane lapa ite Joxu 28:9.

Aqane kuca hi Nyidrëti lai kowe la angetre Kanana; thupene jë hi la hnei Nyidrëti hna ameköti angatr, Nyidrëti pë hë a lep apatrenyi angatre jë. Hlemu hë ekö e cailo fen, ka hape, itre atr ka iangazo la angetre Kanana, ke goi nue fe angatre la itre nekö i angatre nyipine la eë. * (2 Ite Joxu 16:3) Atre hi angetre Kanana ekö laka, hnei Iehova hna ahnithe koi angetre Isaraela troa thapa asë la nöje i angatr, nge hetre itre ewekë hë hnei angatr hna öhn, nge ka amamane ka hape, Akötresieti ka catr la ka ce me angetre Isaraela. Ngo hnene kö la angetre Kanana hna lapa catr me cile koi angetre Isaraela, troa isi me angatr.

Hnei Akötresieti hna utipine la angetre Kanana ka nuetrije la itre aqane ujë i angatre ka ngazo ekö, me kapa la itre trepene meköti ka draië i Nyidrë. Rahaba me hnepe lapa i nyiidro, la itre xa hna amelene hnei Nyidrë. Ketre ame fe la kola sipone hnene lo angetre Gibeona koi angetre Isaraela troa utipi angatr, tre tha humuthi angatr ju kö hnei angetre Isaraela.—Iosua 6:25; 9:3, 24-26.

THANGANE KOI SË: Hetre ini ka tru hne së hna kapa qa ngöne la aqane amekötine hnei Akötresieti la angetre Kanana. Calemi catre hë la “drai ne amekötine me hnëjine la nöjei ate thina ka tha ijiji Akötesie.” (2 Peteru 3:7) Maine tro sa hnimi Akötresie, tro kö sa mel elany ngöne la ijine tro Nyidrëti a thele la itre aliene hni ne la itre atr, me lep apatrene la itre ka thipetrije la musi cile i Nyidrë.

Iehova a thuemacanyi së ka hape, troa hetre thangane koi itre kuku la hna xomi mekune hnei keme me thin. Kola qaja hnene la Wesi Ula i Akötresieti ka hape: “Iënejë la mele mate mele eö memine la ite matra i ’ö ; mate tro eö a hni Iehova Akötesi ’ö, me denge thenge la aqane ula i nyidë, me fede koi nyidë.” (Deuteronomi 30:19, 20) Nemene pengöne Akötresieti la ka ewekë tune la, Akötresieti ka pë ihnimin, maine ka ihnimi nge ka ajane la loi koi së?

[Ithueamacany]

[Iatr ne la götran 5]

Qëmekene tro Akötresieti a apatrene la itre atr ka ngazo jëne lo Iwë Atraqatr, hnei Nyidrëti hna pane upi Noa troa tro fë maca

[Hna cinyhan ne la götran 6]

Angetre Kanana ekö la ketre nöje ka pë ihnimin, nge ka icilekeu me Akötresieti me nöje i Nyidrë