ÑAMBOHOVÁI hag̃ua ko porandu, ñahesaʼỹijóta mbaʼépa Ñandejára ojapo vaʼekue ombou mboyve pe ama guasu Noé tiémpope ha ohundipa mboyve umi Canaanguápe.

OJEʼÉVA JEPI: “Ipyʼahatãiterei ningo Ñandejára, upévarente ombou pe ama guasu ohundi hag̃ua yvyporakuérape, ha osalva Noé ha ifamiliakuérapente”.

MBAʼÉPA HEʼI LA BIBLIA: Ñandejára heʼi: “Che ndaipotái omano umi hekoañáva, aipota katu ojevy hape vaígui ha oikove” (Ezequiel 33:11, NM). Ñandejára ningo ndovyʼái ohundipa haguére umi tekove aña oiko vaʼekue Noé tiémpope. Péro, ¿mbaʼérepa ojapo upéicharõ?

La Biblia heʼi Ñandejára okastigárõ guare umi iñañávape ‘ohejaha peteĩ modélo [térã ehémplo] ohechaukáva mbaʼépa oikóta umi hénte añáre amo gotyove’ (2 Pedro 2:5, 6, NM). Heʼi avei mbaʼérepa Ñandejára okastiga yma umi iñañávape ha mbaʼéichapa oñeñandu upévare.

Primero, ohechauka porã Ñandejára ombyasyha okastiga haguére umi iñañávape, péro ndohejareíri avei umi oporombohasa asývape, ha omereséguinte okastiga chupekuéra. Koʼẽrõitéma Ñandejára oipeʼapáta opa mbaʼe ombohasa asýva yvyporakuérape ha umi inhustísia ojejapóva.

Segundo, ohechauka Ñandejára oporohayhúgui oavisa raẽha umi iñañávape okambia hag̃ua, ha naiñeʼẽrendúiramonte okastigataha chupekuéra. Por ehémplo, ou mboyve pe ama guasu, Noé rupive haʼe oavisa kuri umi héntepe okambia hag̃ua, péro ndoikuaaséi hikuái mbaʼeve. La Biblia heʼi: “Haʼekuéra nopenái mbaʼevére ha upéi ou pe ama guasu ha ohundipaite chupekuéra” (Mateo 24:39, NM).

¿Osegípa Ñandejára oavisa raẽ umi héntepe ojapo mboyve peteĩ mbaʼe? Si, haʼe oavisa porã kuri umi isrraelítape oikóramo umi ótro tetãygua oikoháicha, omeʼẽtaha chupekuéra iñenemigokuéra pópe, oñehunditaha Jerusalén ha ojeguerahataha chupekuéra tembiguairã. Péro umi isrraelíta nohendúi Jehovápe ha ojapo umi mbaʼe vai ojapóva umi ótro tetãygua. ¡Mitã jepe ou osakrifika hikuái! ¿Okastigápa chupekuéra Jehová? Si okastiga, péro upe mboyve Haʼe heta vése omondo hendapekuéra iproféta heʼi hag̃ua chupekuéra okambia hag̃ua, ha ndojapóiramo upéicha, oñehunditaha hikuái. Haʼe heʼi voi chupekuéra: ‘Ñandejára [Jehová] ndojapóiva mbaʼe heʼiʼỹre umi iprofétape, haʼe oiporavóva hembijokuairã’ (Amós 3:7).

 MBAʼÉPA ÑAAPRENDE: Tuicha ñanembopyʼaguapy jahechávo Ñandejára okastigaha umi iñañávape ha ndohejareimoʼãiha umi ombohasa asývape hapichápe. Péro katuete oavisa raẽ chupekuéra okambia hag̃ua. La Biblia heʼi: “Umi iñañáva oñehundipáta [...]. Umi ivuénova katu opytáta ko yvy ape ári, ha pyʼaguapýpe oikóta hikuái” (Salmo 37:9-11, NM). ¿Mbaʼépa nde repensa Ñandejára ojapótavare? ¿Erétapa hese ipyʼahatãha ohundíta haguére umi iñañávape omosãso hag̃ua umi ivuénovape?

OJEʼÉVA JEPI: “Ñandejára ohundívo umi Canaanguápe ojapo peteĩ mbaʼe ivaietereíva ha ñambojojakuaa voi umi gérra oikóvare koʼág̃arupi”.

MBAʼÉPA HEʼI LA BIBLIA: ‘[Ñandejára] hekojoja. Haʼe ijeroviapy ha naiñañái’ (Deuteronomio 32:4). Peteĩ gérra oiko jave heta hénte inosénte omano, péro Ñandejára ohundi umi iñañávapente. ¿Mbaʼérepa jaʼe upéva? Yvyporakuéra ningo ndaikatúi oikuaa mbaʼépa oĩ hapicha pyʼapýpe, Ñandejára katu oikuaapaite.

Por ehémplo, Ñandejára odesidírõ guare ohunditaha Sodoma ha Gomorra, Abrahán ojepyʼapy oñehundírõ g̃uarã ijapytepekuéra umi ivuénovape avei. Upévare oporandu Ñandejárape: ‘¿Añete piko rehundíta peteĩcha umi ivuéno ha iñañáva?’. Haʼe oikuaa porã Ñandejára hekojojaha ha noimoʼãi ojapóne hag̃ua upéva. Upévare Ñandejára pyʼaguapýpe porãnte heʼi chupe ojuhúramo Sodómape diez tapichánte jepe hekoporãva, operdonataha upe siudápe (Génesis 18:20-33). Jehová ningo oikuaa porã umi hénte orekóva ipyʼapýpe ha ohecha iñañaitereiha hikuái (1 Crónicas 28:9).

Ñandejára ohecha kuri mbaʼéichapa heta mbaʼe vai ojapo umi Canaangua, upévare ohundikapaite chupekuéra. Umi kananéo opárupi ojekuaa ohapyha umi mitã osakrifika hag̃ua ijarakuérape, ha ojapo hetave mbaʼe ivaietereíva (2 Reyes 16:3). * Haʼekuéra oikuaa porã Jehová heʼi hague umi isrraelítape oipytyvõtaha chupekuéra ojagarra hag̃ua iñenemigokuéra yvy, upéicharõ jepe haʼekuéra oñemohatã ha oñorairõse umi isrraelíta ndive. Péicha umi kananéo oñemoĩ Jehováre voi, ndahaʼéi umi Israelguárente. Ñandejára ningo heta hendáichama ohechauka oĩha umi Israelgua ndive.

Péro Ñandejára oiporiahuvereko kuri umi kananéo ohejávape hembiapo vai ha oikóva haʼe oipotaháicha. Por ehémplo, peteĩ kuña rekovai hérava Rahab ha ihentekuérape ndojejukái kuri oñehundírõ guare hetã. Avei umi gavaoníta ojerurérõ guare ojeporiahuverekomínte hag̃ua chupekuéra, ojesalva kuri hikuái (Josué 6:25; 9:3, 24-26).

MBAʼÉPA ÑAAPRENDE: Jaikuaávo mbaʼérepa Ñandejára ohundi umi kananéope, ñaaprende peteĩ mbaʼe iñimportánteva. Koʼág̃a og̃uahẽmbotaitéma hína “pe ára ojehusga ha oñehundi hag̃ua umi hénte añáme” (2 Pedro 3:7, NM). Péro ñande jahayhu ha ñaneñeʼẽrendúramo Jehovápe, jaikóta vyʼápe haʼe ohundi vove umi tekove aña ko yvy ape árigui.

Ñandejára Jehová omomanduʼa avei tuvakuérape umi mbaʼe odesidíva hikuái ikatuha ou vai térã ou porã ifamíliape. Upévare Iñeʼẽ la Bíbliape heʼi: ‘Peiporavóke jeikove rape, nde ha nde raʼykuéra peikove hag̃ua. Pehayhúke [Jehovápe]. Haʼe Ñandejára. Peneñeʼẽrendúke chupe ha ani pejei hapégui’ (Deuteronomio 30:19, 20). ¿Ndépa ere Ñandejára iñaña ha ipyʼahatãramo heʼitaha ñandéve upéicha? ¿Térãpa ojapo upéva ñanderayhu ha oipotágui jaiporavo porã?