Kana Likatulo za Mulimu ne li ze Situhu?

KULI lu fumane kalabo ya puzo yeo ha lu nyakisiseñi ka bukuswani mitala ye mibeli ya likatulo za Mulimu ye ñozwi mwa Bibele, ili Muunda wa mwa miteñi ya Nuwe ni ku bulaiwa kwa Makanana.

MUUNDA WA MWA MITEÑI YA NUWE

ZE BA BULELA BATU BA BAÑWI: “Mulimu naa ezize ka situhu ha naa tahisize Muunda o no bulaile batu kaufela ni ku pilisa feela Nuwe ni lubasi lwa hae.”

ZE I BULELA BIBELE: Mulimu naa bulezi kuli “Ha ni tabeli lifu la ya maswe; kono ni tabela ya maswe ha bakela mizamao ya hae, kuli a pile.” (Ezekiele 33:11) Kamukwaocwalo, Mulimu naa si ka tabela ni hanyinyani batu ba mwa miteñi ya Nuwe ha ne ba bulailwe ki Muunda. Cwale ki kabakalañi Mulimu ha naa tisize Muunda?

Bibele i bulela kuli Mulimu naa file likoto ze cwalo kwa banyefuli ba ne ba li teñi ka nako yeo, mi naa ezize cwalo ka mulelo wa kuli a fe “banyefuli mutala wa lika ze ka taha.” (2 Pitrosi 2:5, 6) Ki mutala mañi wa naa tomile Mulimu ka ku eza cwalo?

Mulimu naa bonisize kuli, nihaike kuli ha tabeli ku fa koto kwa batu ba ba maswe, wa lemuhanga likezo ze ba ezanga batu ba ba situhu ba ba nyandisanga batu ba bañwi, mi ba na ni ku ikalabela ku yena ka za likezo za bona ze maswe. Hona cwale-cwale fa, Mulimu u ka felisa manyando ni bumaswe kaufela.

Sa bubeli, mutala wa likatulo za Mulimu za kwamulaho, u bonisa kuli Mulimu ka lilato wa lemusanga batu pili a si ka ba fa kale koto. Nuwe naa li mukutazi wa ku luka kono batu ba bañata ne ba si ka isa pilu kwa litaba za naa bulela. Bibele i bulela kuli: “Ne ba si ka lemuha se si siñwi ku fitela Muunda u taha ni ku ba kukisa kaufelaa bona.”—Mateu 24:39.

Kana Mulimu u sa zwelapili ku itusisa mutala wo? Eni. Ka mutala, Mulimu naa lemusize Maisilaele kuli haiba ne ba ka kala ku eza lika ze maswe sina mwa naa ezeza macaba a naa yahile kwatuko ni bona, Mulimu naa ka tuhelela lila za bona ku taseza naha ya bona, ku sinya muleneñi wa bona wa Jerusalema, ni ku ba isa mwa butanga. Maisilaele ne ba kalile ku ezanga lika ze maswe, kuli mane ba fita fa ku cisanga bana ba bona sina matabelo. Kana Jehova naa ngile muhato? Eni, kono naa ezize cwalo hamulaho wa ku kuta-kutela ku luma bapolofita kuli ba yo lemusa batu ba hae ku cinca mikwa ya bona ye maswe pili a si ka ba fa ba kale koto. Mane naa bulezi kuli: “Mulena Muñaa Bupilo haa na ku eza se siñwi, a si ka sebela  mulelo wa hae kwa batanga ba hae ba bapolofita.”—Amosi 3:7.

LIBAKA HA LU SWANELA KU ZIBA KALABO: Mutala wa likatulo za Jehova za kwamulaho, u tahisa kuli lu be ni sepo. Lwa kona ku ba ni buikolwiso bwa kuli Mulimu u ka atula batu ba ba situhu ba ba nyandisa ba bañwi. Bibele i bulela kuli: “Ba ba maswe ba ka yundiswa . . . Kono ba ba ishuwa ba ka luwa naha, ba ka ikola kozo ye tuna.” (Samu 37:9-11) Mu ikutwa cwañi ha mu nahana ka za katulo ye imulula batu kwa manyando? Kana ki ye situhu kamba ki ye sishemo?

KU BULAIWA KWA MAKANANA

ZE BA BULELA BATU BA BAÑWI: “Ku bulaiwa kwa Makanana ne li kezo ye situhu ye swana ni likezo za mazazi a, za ku bulaya batu ba mushobo o muñwi.”

ZE I BULELA BIBELE: “Linzila za [Mulimu] kaufela li lukile; ki Mulimu ya sepahala . . . ya eza ka ku luka.” (Deuteronoma 32:4) Katulo ya Mulimu ha i koni ku bapanyiwa ni lindwa za batu. Kabakalañi? Kakuli, Mulimu wa kona ku ziba ze mwa lipilu za batu kono batu bona ha ba koni ku eza cwalo.

Ka mutala, Mulimu ha naa lelile ku yundisa minzi ya Sodoma ni Gomora, Abrahama muuna ya sepahala, naa bata kuli Mulimu a atule ka ku luka. Abrahama naa sa nahani kuli Mulimu wa katulo ye lukile wa kona ku “yundisa ba ba lukile hamoho ni ba ba maswe.” Ka pilu-telele, Mulimu naa mu kolwisize kuli ha naa ka fumana batu ba ba lukile ba lishumi mwa Sodoma, naa si ke a sinya munzi wo bakeñisa ba lishumi bao. (Genese 18:20-33) Ku si na ku kakanya, Mulimu naa tatubile lipilu za batu bao ni ku bona mihupulo ye maswe kaufela ye ne ba na ni yona.—1 Makolonika 28:9.

Ka nzila ye swana, Mulimu naa boni kuli Makanana ne li batu ba ba maswe mi ne ku lukile ha naa laezi kuli ba bulaiwe. Makanana ne li batu ba ne ba zibahala ka situhu se situna hahulu, mi situhu seo ne si kopanyeleza ku cisanga banana mwa mulilo inze ba pila sina matabelo. * (2 Malena 16:3) Makanana ne ba zibile kuli Jehova naa laezi Maisilaele kuli ba luwe naha kaufela. Makanana ba ne ba siyezi mwa naha, ne ba iketezi ka bomu ku lwanisa Maisilaele ni Jehova ya naa bonisize ka maata hae kuli naa li ni sicaba sa hae sa Isilaele.

Kono Mulimu naa bonisize sishemo kwa Makanana ba ne ba tuhezi ku eza lika ze maswe ni ku kala ku pila ka ku lumelelana ni za naa tokwa Jehova. Ka mutala, Rahaba Mukanana wa lihule naa pilisizwe hamohocwalo ni lubasi lwa hae. Hape Makanana ba ne ba pila mwa muleneñi wa Gibioni ha ne ba kupile ku boniswa sishemo, bona ni bana ba bona kaufela ne ba pilisizwe.—Joshua 6:25; 9:3, 24-26.

LIBAKA HA LU SWANELA KU ZIBA KALABO: Lwa kona ku ituta tuto ya butokwa kwa katulo ya naa file Mulimu kwa Makanana. Lu sweli ku atumela hahulu kwa “lizazi la katulo ni la sinyeho ya banyefuli,” le ne li polofitilwe. (2 Pitrosi 3:7) Haiba lwa lata Jehova, lu ka tusiwa hahulu haa ka felisa manyando a batu fa lifasi ka ku yundisa batu ba ba hana puso ya hae ye lukile.

Jehova ka lilato, u lu hupulisa kuli liketo za bashemi li amanga ni bana ba bona. Linzwi la Mulimu li bulela kuli: “Iketele bupilo kuli u pile, wena ni baikulu ba hao. Iketele ku lata Muñaa Bupilo Mulimu wa hao, ku utwa linzwi la hae ni ku mu kumalela.” (Deuteronoma 30:19, 20) Kana manzwi ao, ki manzwi a Mulimu ya situhu kamba ki a Mulimu ya lata batu ni ya bata kuli ba eze liketo ze nde?

[Litaluso za kwatasi]

[Siswaniso se si fa likepe 5]

Pili Mulimu a si ka yundisa kale batu ba ba maswe ka Muunda, naa lumile Nuwe kuli a ba lemuse ka za teñi

[Manzwi a fa likepe 6]

Makanana ne li batu ba ne ba zibahala ka situhu se situna hahulu, mi ne ba lwanisize Mulimu ni batu ba hae ka bomu