MONDO wayud dwoko mar penjoni, we wanon ane kum moko ariyo miwuoyoe e Muma—Ataro mar ndalo Noa kod kaka ne otiek Jo-Kanaan.

GIK MA JI WACHO: “Nyasaye en ng’ama ger nikech ne onego dhano duto gi Ataro moweyo mana Noa gi joode.”

GIMA MUMA WACHO: Nyasaye nowacho kama: “Ok amor ka ng’a marach otho; to adwaro mondo ng’a marach olokre oa e yore obedi mangima.” (Ezekiel 33:11) Mano nyisowa ni Nyasaye ne ok mor kane joma richo otho e kinde Noa. Kare ang’o momiyo ne okethogi?

Muma nyisowa ni kane Nyasaye kumo jomaricho e kinde machon, ne oketo “ranyisi ni jo ma ok luor Nyasaye e ndalo ma biro.” (2 Petro 2:5, 6) En ranyisi mane ma ne oketo?

Mokwongo, Nyasaye nonyiso ni kata obedo ni ketho ji en gima litne, osin gi jomaricho ma timbegi hinyo jomoko kendo ok owe timbegigo odhi kamano. E kindene owuon, obiro tieko gik maricho duto kod chandruok.

Mar ariyo, Nyasaye nonyiso ni okwongo omiyo ji siem kapok okumogi. Noa ne en jayal wach makare to thoth ji ne ok owinje. Muma wacho ni: “Ne ok odonjonigi nyaka ataro nobiro, kendo yuoyogi giduto.”—Mathayo 24:39.

Be kamano e kaka Nyasaye timo kinde duto kapok okelo kum? Ee. Kuom ranyisi, ne osiemo Jo-Israel ni ka gidonjo e timbe maricho mag ogendni ma ne olworogi, ne odhi weyo wasikgi omonjgi, oketh Jerusalem dalagi maduong’, kendo otergi e twech. Jo-Israel notimo gik maricho, ne ginego kata mana nyithindgi ka gichiwogi kaka misengni. Be Jehova ne okawonegi okang’? Ee, ne otimo kamano to mana bang’ oronegi jonabine nyadinwoya mondo onyisgi ni gilok yoregi kapod ne nitie thuolo. Ne owacho kata niya: “Chutho to Jehova Nyasaye ok notim gimoro, to oelo wachne maling’ling’ ni jotichne ma jonabi.”—Amos 3:7.

KAKA WACHNO OMAKI: Yo ma Jehova nong’adogo bura kinde machon miyowa geno. Wanyalo  bedo gadier ni Nyasaye biro tieko joma kelonwa chandruok. Muma wacho niya: “Nimar nogol oko jo ma timgi orochore. . . To jo mamuol ginicham piny; kendo ginimor moloyo kuom kwe mang’eny.” (Zaburi 37:9-11) Ineno nade ka okum jomoko mondo eka ogol chandruok ne dhano? Be kum ma kamano en tim gero koso en tim ng’wono manyiso hera?

GIK MA JI WACHO: “Tieko Jo-Kanaan ne en tim marach minyalo pim gi tim mar mahundu ma jitimo e kindegi mondo gitiekgo oganda moro.”

GIMA MUMA WACHO: Muma wacho ni Jehova en “Nyasaye mar adiera kendo maonge gi ketho.” (Rapar mar Chik 32:4) Kum mar Nyasaye ok nyal pim gi lwenje mag dhano. Ang’o momiyo wawacho kamano? Mano en nikech, mopogore gi dhano, Nyasaye nigi nyalo mar neno gima nie chuny ng’ato.

Kuom ranyisi, kane Nyasaye ong’ado mar ketho Sodom gi Gomorra, Abraham ne dwaro bedo gadier ni Nyasaye ne dhi timo gima kare. Ne openjore kabe Nyasaye makare ne nyalo “tieko jomakare kaachiel gi jomaricho.” Nyasaye ne ohoyo chuny Abraham konyise ni kata kane nitie mana ji apar makare, ne ok odhi kumo Sodom gi Gomorra nikech jogo. (Chakruok 18:20-33) Mano nyiso maler ni Nyasaye ne onono chuny jogo duto moneno kaka ne gisikore e richo.—1 Weche mag Ndalo 28:9.

E yo ma kamano bende, Nyasaye ne onono chuny Jo-Kanaan ma ne richo kendo nong’ado kare ni mondo otiekgi. Jo-Kanaan ne ong’ere kuom timbe mag gero ma ne oriwo wang’o nyithindgi ka ngima e mach kaka misango. * (2 Ruodhi 16:3) Jo-Kanaan ne ong’eyo ni Jehova ne ochiko Jo-Israel mondo okaw pinygino duto. Omiyo, Jo-Kanaan ma ne odong’ mondo giked gi Jo-Israel ne ok ked mana gi Jo-Israel, to ne gikedo gi Jehova bende.

E wi mano, Nyasaye nonyiso ng’wono ne Jo-Kanaan ma ne oyie weyo timbegi maricho kendo oluwo yorene. Kuom ranyisi, Nyasaye ne oreso nyar Jo-Kanaan miluongo ni Rahab ma ne en dhako ma ndhaga, kaachiel gi joode. Bende, kane Jo-Kanaan ma ne odak e dala mar Gibeon okwayo Jo-Israel mondo okechgi, ne oresgi giduto nyaka nyithindgi.—Joshua 6:25; 9:3, 24-26.

KAKA WACHNO OMAKI: Wanyalo puonjore gimoro maduong’ kuom kaka ne okum Jo-Kanaan. “Chieng’ bura kod tho mar jo ma ok luor Nyasaye” okayo machiegni ahinya. (2 Petro 3:7) Ka wahero Jehova, wabiro yudo gweth kinde ma obiro golonwae chandruok kendo tieko dhano duto ma otamore lochne makare.

Nikech Jehova oherowa, onyisowa ni yiero ma jonyuol timo konyo kata hinyo nyithindgi. Muma wacho niya: ‘Yier ngima, ibedi mangima, in kod kothi: mar hero Jehova Nyasachi, mar winjo dwonde, kendo mar padore kuome.’ (Rapar mar Chik 30:19, 20) Be weche ma kamago nyalo wuok kuom Nyasaye maok ohero ji? Koso wechego nyiso ni Nyasaye ohero ji kendo odwaro ni ji otim yiero makare?