HE ZAWHNA chhâng tûr hian, Bible-a Pathian rorêlna pahnih—Nova hun laia Tuilêt leh Kanaan mite a tihchimitna hi tawi têin ilo ngaihtuah ang u.

MI ṬHENKHAT SAWI DAN: “Nova leh a chhûngte tih loh, mi zawng zawng tuilêta a tihboral khân Pathian chu a nunrâwng a ni.”

BIBLE SAWI DAN: Pathian chuan: “Mi suaksual thihnaah hian lâwmna rêng ka nei lo va, mi suaksualin a awm dân a kalsan a, a nun hi ka lawmzâwng a ni zâwk,” tiin a sawi. (Ezekiela 33:11) Chuvângin, Nova hun laia mi suaksualte tihboralna  khân Pathian a tilâwm lo hle a ni. A nih chuan, engvângin nge a tihboral?

Pathianin hun kal tawha amah ngaihsak lotute chunga chutiang rorêlna a thlentîr khân, Bible chuan “amah ngaihsak lo, la awm tûrte entîrnaah a hmang” tiin a sawi a, chu chu a thil tih ṭhin dân târ lan nân a hmang tihna a ni. (2 Petera 2:5, 6) Eng thilte nge a tih ṭhin?

A hmasain, Pathianin mite tihboral chu a lâwmzâwng ni lo mah se, hrehawm tawrhna awmtîrtu mi nunrâwngte chu a hria a, an thiltihte chungah mawh a phurhtîr ṭhîn tih a nemnghet a ni. A hun ruatah chuan dik lohna leh hrehawm tawrhna zawng zawngte chu a titâwp ang.

A pahnihnaah chuan, hun kal tawha Pathian thiltih ṭhin dân chuan rorêlna a thlentîr hmain mite chu hmangaih takin a vaukhân lâwk ṭhîn tih a nemnghet a ni. Nova chu felna thu hriltu a ni a, mahse mi tam zâwkte chuan an ngaihsak lo. Bible chuan “Tui a lo lêt a, an zaa a lâk bo vek hma loh chuan engmah an hre [duh] lo,” tiin a sawi.—Matthaia 24:39.

Pathianin chu a thiltih ṭhin dân chu a hmang zêl em? Hmang zêl e. Entîr nân, Pathian chuan a mi Israelte chu an chhehvêla hnamte tih dân anga suahsualna lama an hawi chuan an ram chu an hmêlmate rûnin a awm ang a; an khawpui Jerusalem tihchhiat a niin; sala hruaia an awm a phal tûr thu a vaukhân a. Chuti chung pawhin Israel mite chuan suahsualna lam an hawi a—naupanga inthawina hial pawh an nei a ni. Jehova chuan thiltih a nei em? Nei e, mahse, a tlai luat hmaa an nun kawng thlâk tûra a mite vaukhân tûrin zâwlneite chu vawi tam tak a tîr nawn a. Ani chuan: “Dik takin Lalpa PATHIAN chuan a rawngbâwltu, a zâwlneite hnênah a thurûk hrilh lovin engmah a ti lo vang,” tiin a insawi hial a ni.—Amosa 3:7.

I TEL VE DAN: Hun kal tawha Pathian Jehova rorêl ṭhin dânte chuan beiseina min pe a. Hrehawm tawrhna thlentîrtu hêng mi nunrâwng takte chunga Pathian rorêlna chu kan beisei tlat thei a ni. Bible chuan: “Thil ṭha lo titute chu tihboralin an awm dâwn si a . . . Thuhnuairawlhte erawh chuan ram hi an luah ang a: remna chênin an hmuingîl ang,” tiin a sawi a. (Sâm 37:9-11) Mihringte hrehawm tawrhna paih botu rorêlna chu engtin nge i ngaih? Nunrâwnna nge ni ang a, zahngaihna zâwk?

MI ṬHENKHAT SAWI DAN: “Kanaan mite tihchimihna chu tûn laia mihring insâmna nêna khaikhin theih tûr indona lama dân bawhchhiatna nunrâwng tak a ni.”

BIBLE SAWI DAN: “[Pathianin] dik takin ro a rêl ṭhîn, Pathian rinawm, khawlohna nei lo . . . a ni.” (Deuteronomy 32:4, C.L. Re-edited) Pathian rorêlna dik chu mihringte indona nêna khaikhin theih a ni lo. Engvângin nge? Mihringte ang lo takin, Pathian chuan thinlung—chhûng lama mite nihna—a hriat theih vâng a ni.

Entîr nân, Pathianin Sodom leh Gomorra khawpui tihboral a tum khân, mi rinawm Abrahama chuan Pathian rorêlna a dik leh dik loh hriat a duh a. Abrahama chuan a Pathian fel takin ‘mi felte chu mi sualte zînga’ a tihboral a ring thei lo a ni. Pathian chuan dawhthei takin, khawpuiah chuan mi fel sâwm chauh an awm pawhin an sualnaah khawpui chu a ngaidam ang tiin a thlamuan a. (Genesis 18:20-33) Ani chuan chûng mite thinlung chu a hre chiangin, an suahsualna nasatzia chu a hmu tih a chiang hle.—1 Chronicles 28:9.

Chutiang bawkin, Pathianin Kanaan mite suahsualzia chu a hmuhin tiboral tûrin thu a pe a. Kanaan mite chu an nunrâwngin an sual hle a, inthawina meiah naupangte chu an hâl hlum hial a ni. * (2 Lalte 16:3) Chûng Kanaan mite chuan Israelte chu Jehova’n ram zawng zawng la tûrin thu a pe tih an hria a. An ram chhuahsan duh lo va, Israel dotute chuan Israelte mai ni lovin, a mite a awmpuizia târ langtu Jehova chu an do a ni.

Chu bâkah, Kanaan mi, an suahsualna hnâwl a, Pathian Jehova tehna nungchang sâng tak pawmtute chungah ani chuan zahngaihna a lantîr a. Entîr nân, Kanaan mi nawhchizuar Rahabi kha a chhûngte nên chhanhim an ni a. Kanaan ram Gibeon khuaa mite’n zahngaihna dawn an tum khân, anmahni leh an fate zawng zawg nunna chu chhandam a ni bawk a ni.—Josua 6:25; 9:3, 24-26.

I TEL VE DAN: Kanaan mite chunga a rorêl dân  aṭangin thil pawimawh tak kan zir thei a ni. Sawi lâwk “Pathian ngaihsak lo mite rorêl leh boral nî “ chu kan hnaih hle tawh a. (2 Petera 3:7) Jehova kan hmangaih chuan, leia a rorêlna fel hnâwltute tihboralna hmanga mihringte hrehawm tawrhna nuai bona chu kan hlâwkpui ngei ang.

Pathian Jehova chuan nu leh pate duh thlannain an fate chungah nghawng a nei tih hmangaih takin min hriat nawntîr a ni. Pathian Thu chuan: “Chutichuan nunna chu thlang rawh u, in nun theih nân, nangni leh in thlahte nên; LALPA in Pathian hmangaih a, a awkâ âwih a, amah vuan tlatin,” tiin a sawi a ni. (Deuteronomy 30:19, 20) Hêng thute hi nunrâwnna Pathian ṭawngkam nge ni ang a, mite hmangaih a, kawng dik thlang tûra duhsaktu Pathian ṭawngkam zâwk? (w13-E 05/01)