TECHPALEUIS maj tiknankilikan nejin netajtanil komo tikitaj ome tatsakuiltilis tein Biblia kijtoua ke Dios kiualkuik: Tetsaujkakiouit itech itonaluan Noé uan keman kinixpoloj akin nemiaj Canaán.

TEIN SEKIN KIJTOUAJ: “Dios kinextij ke semi amo teiknelia keman kiualkuik se tetsaujkakiouit tein kinmiktij nochin taltikpakneminij uan sayoj mokauak Noé uan ichankauan”.

TEIN KIJTOUA BIBLIA: Dios kiyekijtoua: “Amo nechyolpaktia maj miki akin amo yolkuali, ta maj aksa akin amo yolkuali kikaua ojti tein kitojtokatok uan maj kisentoka yolto” (Ezequiel 33:11). Kemej moita, Dios amo kiyolpaktij kinixpolos akin amo yolkualmej itech itonaluan Noé. Komo ijkon, ¿keyej kichiuak?

 Biblia kimelaua ke ijkuak kinixpoloj akin amo yolkualmej, ‘kinnejmachtij [oso kinkauilij se neskayot] nochi in taltikpakuani’ akin tajtakouaj (2 Pedro 2:5, 6). Ika tein kichiuak Jiova ne uejkauj, ¿toni techmachtia tein kimachilia uan tein kichiua keman kiixtalia taixpolos?

Yekinika, Dios kiyeknextij ke maski kiyolkokoua kinixpolos akin amo yolkualmej, yejuatsin amo kiyolpaktia aksa akin teikamauiltia uan kiita ke moneki tanankilis iixpan. Amo uejkaua yejuatsin kitamis nochi tajyouilis uan teikamauiltilis.

Ojpatika, tein Dios kichiuak ne uejkauj keman taixpoloj kiyeknextia ke yejuatsin, kemej tel tetasojtakej, nochipa kinnejmachtia taltikpakneminij achto ke kiualkuis se tatsakuiltilis. Kemej neskayot, kichiuak maj Noé kinnejmachtiani, sayoj ke yejuan amo kikakkej. Biblia kijtoua: “Amo kineltokakke de ke ualaskia ne tetsaukakiouat. Pero satepan kuak uala ya, ijkuakon nochi kinuiyak uan moaelsimijke” (Mateo 24:39).

Ijkon kemej panokej tonalmej, ¿kipatak Dios tein kichiua keman kiualkui tatsakuiltilis? Amo. Ixolal Israel kinejmachtij ke komo kichiuaya tein tel amo kuali kemej xolalmej tein moajsiaj ompakauin, kikauaskia maj taixnamikinij kinteui, kiixpolokan Jerusalén uan maj kinuikakan okseko. Israelitas amo kikakkej nejon tanejmachtilis uan kichiujkej tein tel amo kuali ijkon kemej okseki xolalmej. ¡Hasta kintemakayaj konemej kemej netetayokolil! ¿Kintatsakuiltij Jiova? Kemaj, sayoj ke achto miakpa kintitanik tanauatianij maj kinnejmachtitij maj kipatakan ininnemilis. Hasta kiniluij: “ToTajtsin Jiova akin okachi Ueyi Taixyekankej amo kichiuas nion teyi komo amo achto kinmatiltia tein amo momati akin kitekitiliaj kemej tanauatianij” (Amós 3:7).

TONI TECHUALKUILIA NEJON: Tein Jiova kichiuak ne uejkauj keman kiualkuik tatsakuiltilis, kichiua maj tikchiakan se taman tein kuali. Uelis tikyekmatiskej ke Jiova kinixpolos akin semi amo teikneliaj. Biblia kijtoua: “Akin kiixtaliaj nochipa kichiuaskej tein amo kuali, ixpoliuiskej [...]. Sayoj ke akin nejmachmej ininaxkatis taltikpak uan yekmelauj yolpakiskej porin kipiaskej ueyi yolseuilis” (Salmo 37:9-11). ¿Toni tikonnemilia tejuatsin? Komo Dios kinixpoloua akin amo yolkualmej uan ijkon kiajchiuas tein kintajyouiltia taltikpakneminij, ¿tikonijtoskia ke semi amo teiknelia oso kemaj?

TEIN SEKIN KIJTOUAJ: “Keman kinixpolojkej akin nemiaj Canaán mochiuak kemej se neteuilis kampa amo monextia teiknelilis, uan tamati kemej ijkuak kinsenixpolouaj axkan”.

TEIN KIJTOUA BIBLIA: “Itech nochi iojuan moajsi melaujkayot. Dios akin amo tekaua, akin amo moajsi tachichikouilis itech” (Deuteronomio 32:4). Keman Dios taixpoloua ika melaujkayot amo uelis se kijtos ke tamati kemej ininneteuilis takamej, porin yejuan amo ueli kimatij toni kipiaj itech ininyolo taltikpakneminij, sayoj ke Dios kemaj kimati.

Kemej neskayot, keman Dios kiitak ke kichiujtoyaj tein amo kuali akin nemiaj Sodoma uan Gomorra uan kiixtalij kinixpolos, Abrahán akin katka yolmelauak kinekia kiyekmatis ke Dios kichiujtoya ika melaujkayot. Yejua kitajtanij: “¿Yekmelauj tikixpolos akin yolmelauak iuan akin amo yolkuali?” (Génesis 18:20-33). Amo uelia kinemiliaya maj nejon kichiua se Dios akin melauak kemej Jiova. Ika miak nejmachkayot, Dios kiyekiluij ke komo moajsiskiaj sayoj majtakti akin yolmelaujkej itech altepet Sodoma, yejuatsin kitapojpoluiskia altepet (Génesis 18:20-33). Moita ke Dios kiitak ininyolo nejon taltikpakneminij uan kiajsik ke katkaj tel amo yolkualmej (1 Crónicas 28:9).

No ijkon panok iniuan akin nemiaj Canaán. Dios kiitak ke tel amo yolkualmej katkaj uan yejua ika tanauatij maj kinixpolokan. Yejuan motelixmatiaj porin kinchichinouayaj konemej yoltokej akin kinmakayaj inintiotsitsin kemej netetayokolil, uan kichiuayaj okseki taman tein tel amo kuali (2 Reyes 16:3). * Yejuan kimatiaj ke Jiova kiniluijka israelitas maj moaxkatilianij nejon talmej. Akin amo kinekkej kitemakaskej tal uan kijtojkej ke moteuiskiaj iniuan, amo sayoj kinixnamikiaj israelitas ta no Jiova, akin kinextijkaya ika miak taman ke kipaleuiaya ixolal.

Okse taman, Dios kiniknelij cananeos akin kikaujkej inintachiualis tein amo kuali uan peuak kitakamatij itanauatiluan tein tel kuali. Kemej neskayot, se siuaauilnenkej akin monotsak Rahab uan ichankauan, kintapojpoluij uan amo ixpoliujkej. Uan keman akin nemiaj Gabaón tajtankej maj kiniknelianij,  yejuan uan nochin ininkoneuan amo ixpoliujkej (Josué 6:25; 9:3, 24-26).

TONI TECHUALKUILIA NEJON: Keman Dios kinixpoloj akin nemiaj Canaán techmachtia se taman tein motelneki. Okachi amo uejka yetok “ne tonal de ueyi tatsakuiltilis, [uan] [...] Dios kinixpolos nochi ne taka tamouiskapoloani” (2 Pedro 3:7). Komo tiktasojtaj Jiova uan tiktakamatij, keman yejuatsin kinixpolos akin kiixtopeuaj itekiuajyo tein melauak, tinemiskej ika yolpakilis keman amo onkasok tajyouilis.

Ika netasojtalis Jiova techelnamiktia ke tein kiixpejpenaj tetatmej kinpaleuia ininkoneuan oso kinijtakoua. Itech iTajtol techiluia: “Moneki tikixpejpenas nemilis uan ijkon tiksentokas tiyoltos, tejua uan mokoneuan, xiktasojta Jiova moDios, xikaki itajtol uan amo xikaua” (Deuteronomio 30:19, 20). ¿Tikonijtoskia ke se Dios akin semi amo teiknelia kijtoskia nejon tajtolmej oso se Dios akin techtasojta uan kineki maj kuali titaixpejpenakan?