ATU hatene Maromak nia tesi-lia la hatudu katak nia laran-aat, mai ita haree ezemplu rua kona-ba Maromak nia tesi-lia neʼebé hakerek iha Bíblia. Ida mak Rai-Nabeen iha Noé nia tempu, no ida seluk mak kuandu nia halakon ema Kanaan.

BUAT NEʼEBÉ EMA HANOIN: Ema hanoin kuandu Maromak halo rai-nabeen hodi oho ema hotu no salva deʼit Noé no ninia família, neʼe hatudu katak nia laran-aat.

BUAT NEʼEBÉ BÍBLIA HANORIN: Maromak hatete: “Haʼu haksolok laʼós tanba ema aat mate, maibé haʼu haksolok kuandu ema aat ida fila fali husi ninia dalan no hetan moris.” (Ezequiel [Yehezkiel] 33:11) Neʼe hatudu katak Maromak sente triste kuandu nia tenke halakon ema aat iha Noé nia tempu. Se nuneʼe, tanbasá mak Maromak halo ida-neʼe?

Bíblia fó resposta hodi hatete katak, kuandu Maromak tesi lia ba ema aat iha tempu uluk, nia halo ida-neʼe nuʼudar “ezemplu ida ba ema neʼebé la fiar Maromak”. (2 Pedro 2:5, 6) Ida-neʼe katak sá? Maromak hatudu ezemplu saida?

Primeiru Maromak hatudu katak, maski nia la gosta atu halakon ema aat, maibé nia haree kuandu ema laran-aat sira fó terus ba ema seluk. No ema sira-neʼe tenke hatán ba Maromak. Lakleur tan, nia sei halakon terus no buat hotu neʼebé la justisa.

Segundu, buat neʼebé Maromak halo uluk hatudu katak Maromak, ho domin, fó avizu ba ema antes nia fó kastigu. Noé haklaken Maromak nia avizu, maibé ema lakohi rona. Bíblia hatete: “Sira la hatene buat ida toʼo rai-nabeen mai no sira hotu mate.”—Mateus 24:39.

Maromak troka dalan neʼebé nia tesi lia ka lae? Lae. Porezemplu, nia fó avizu ba ninia povu Israel katak, se sira halo buat neʼebé aat, hanesan nasaun jentiu sira neʼebé haleʼu sira, Maromak sei husik sira-nia inimigu tama sira-nia rai, halakon sira-nia sidade Jerusalém no lori sira nuʼudar dadur. Nasaun Israel halo hahalok aat duni, sira mós sunu sira-nia oan iha ahi nuʼudar sakrifísiu. Saida mak Maromak halo? Antes nia fó kastigu, nia haruka beibeik ninia profeta sira atu fó avizu hodi bele troka sira-nia hahalok. Nia mós hatete: “Naʼi Jeová Ukun-Naʼin Boot Liu sei la halo buat ida só deʼit se nia fó-hatene nia segredu ba ninia atan profeta sira.”—Amós 3:7.

 OINSÁ MAK IDA-NEʼE KONA ITA: Dalan neʼebé Jeová tesi lia iha tempu uluk hametin ita-nia fiar. Ita hein namanas tempu neʼebé Maromak sei tesi lia ba sira neʼebé fó terus ba ema seluk. Bíblia hatete: “Ema aat sira rasik sei lakon hotu . . . Maibé ema laran-maus sei simu rai, no sira sei haksolok tebes ho dame neʼebé la iha rohan.” (Salmo [Mazmur] 37:9-11) Tuir Ita-nia hanoin, kuandu Maromak tesi lia atu halakon terus no fó kmaan ba ema, ida-neʼe hatudu katak Maromak laran-aat ka laran-diʼak?

BUAT NEʼEBÉ EMA HANOIN: Ema hanoin katak, kuandu Maromak halakon ema Kanaan, ninia hakarak mak atu halo mohu nasaun ida hanesan ema nia funu ohin loron.

BUAT NEʼEBÉ BÍBLIA HANORIN: Bíblia hatete katak Maromak nia “dalan hotu mak justisa. Maromak laran-metin, neʼebé sempre iha justisa”. (Deuteronômio [Ulangan] 32:4) Kuandu Jeová halaʼo ninia kastigu, neʼe la hanesan ema nia funu. Tanbasá? Tanba Maromak bele halo buat neʼebé ema la bele halo. Maromak bele haree ema nia laran.

Porezemplu, kuandu Maromak tesi lia ba sidade Sodoma no Gomorra no halo planu atu halakon sira, fiar-naʼin ida naran Abraão hanoin se Maromak hatudu justisa neʼebé loos ka lae. Nia fiar katak Jeová sei nunka ‘halakon ema loos sira hamutuk ho ema aat’. Ho pasiénsia, Maromak dehan ba Abraão katak se Maromak bele hetan ema naʼin-sanulu neʼebé diʼak iha sidade Sodoma, nia sei la halakon sidade neʼe. (Gênesis [Kejadian] 18:20-33) Neʼe hatudu katak Maromak haree ba ema nia laran no nia hatene katak sira laran-aat duni.—1 Crônicas (Tawarikh) 28:9.

Hanesan neʼe mós, Maromak haree katak ema Kanaan laran-aat tebes no nia haruka ema Israel atu halakon sira. Ema barak hatene katak ema Kanaan halo hahalok neʼebé aat. Hanesan sira sunu sira-nia oan iha ahi nuʼudar sakrifísiu. a (2 Reis [Raja-Raja] 16:3) Ema Kanaan hatene katak Maromak Jeová haruka ema Israel atu hadau sira-nia rai. Sira neʼebé hili atu hela iha rai neʼe no halo funu, sira ho neon kontra hasoru ema Israel, maibé sira mós kontra hasoru Jeová, ida neʼebé hatudu katak nia hamutuk ho ninia povu.

Liután neʼe, Maromak hatudu laran-sadiʼa ba ema Kanaan neʼebé troka sira-nia hahalok aat no halo tuir Maromak nia matadalan. Porezemplu, feto-aat husi Kanaan naran Raab, nia ho ninia família hetan salvasaun. No mós, ema neʼebé hela iha sidade Gibeon, iha rai-Kanaan, kuandu sira buka atu troka sira-nia hahalok hodi tuir Maromak, sira no sira-nia oan hotu hetan salvasaun.—Josué [Yosua] 6:25; 9:3, 24-26.

OINSÁ MAK IDA-NEʼE KONA ITA: Ita bele aprende lisaun importante husi dalan neʼebé Maromak tesi lia ba ema Kanaan. Bíblia hatete katak “loron justisa nian no tempu neʼebé Naʼi sei halo lakon ema aat sira” besik ona. (2 Pedro 3:7) Se ita hadomi Maromak Jeová no halo tuir ninia hakarak, ita sei hetan buat diʼak kuandu nia hapara terus hodi halakon ema neʼebé kontra ninia ukun.

Maromak Jeová, ho domin, fó hanoin ita katak desizaun sira neʼebé ita foti, bele mós kona ita-nia oan sira. Maromak nia Liafuan hatete: “Ó tenke hili moris atu ó bele moris nafatin, ó no ó-nia oan sira, hodi hadomi Jeová ó-nia Maromak, hodi rona ba ninia liafuan no hodi laran-metin ba nia.” (Deuteronômio 30:19, 20) Liafuan sira-neʼe hatudu ho klaru katak Maromak laʼós laran-aat, maibé nia hadomi ninia povu no hakarak sira atu foti desizaun neʼebé loos.