DIA nkadimola dimbola sɔ, nyɛsɔ tɔsɛdingole lo tshena pe bɛnyɛlɔ pende diendana la dombwelo diaki Nzambi diɔtɛkɛtami lo Bible, Mvula k’ekola ka lo nshi ya Nɔa ndo elanyelo k’ase Kanana.

KƐNƐ KATA ANTO AMƆTSHI: “Nzambi ekɔ kanga esehe nɛ dia nde akadiake anto tshɛ wa lo nshi y’edjedja la mvula k’elola, onyake paka Nɔa nde la nkumbo kande ato mbakake.”

KƐNƐ KETSHA BIBLE: Nzambi akate ate: “Dimi hangenangena nyoi k’untu a kolo! Dimi nangaka ndi nkalula uma lu kolo kandi, la ndi ndjala la lumu.” (Ezekiyele 33:11) Mbokɛmaka hwe dia elanyelo k’atshi wa kɔlɔ wa lo nshi ya Nɔa kɔngɛnyangɛnya Nzambi. Ko lande na kakandasale dui sɔ?

Bible kadimolaka ɔnɛ etena kakela Nzambi elombwelo kande le anto asɔ, “nde akatshikɛ anto wa kɔlɔ ɛnyɛlɔ k’akambo wokoya.” (2 Petero 2:5, 6) Ɛnyɛlɔ kakɔna kakatshikɛ Nzambi anto wa kɔlɔ?

Ntondotondo, kaanga mbaki Nzambi la lonyangu dia ndanya atshi wa kɔlɔ wa lo nshi y’edjedja, nde akeyaka woho wakawasoyaka anto ndo akeyaka dia nde ayoyokoya la wɔ l’ɔtɛ w’etsha awɔ wa kɔlɔ. L’etena kakashikikɛma, nde ayokomiya akambo tshɛ wa wɛngiya ndo wasoya anto.

Dui dia hende ele, kaanga mbakalanya Nzambi anto wa kɔlɔ, la ngandji tshɛ nde akaahɛmɔla ntondo. Kaanga mbakasambishaka Nɔa laki osambisha w’akambo w’ɛlɔlɔ, anto kombetawɔka. Bible mbutaka ɔnɛ: “Vɔ kombidja yimba edja ndo lam’akaye Mvula k’elola, ko tɔ kakawakumɛ vɔ tshɛ.”​—Mateo 24:39.

Onde Nzambi akaatshikɛ ɛnyɛlɔ? Eelo. Ɛnyɛlɔ, nde akahɛmɔla wodja w’Isariyɛlɛ dia naka vɔ ndjasha l’akambo wa kɔlɔ wakasalaka wedja wakaadinge, kete nde ayetawɔ di’atunyi awɔ mbɔsa nkɛtɛ yawɔ, ndanya Jɛrusalɛma kapitalɛ kawɔ, ndo ayetawɔ di’anto akina mbatɔla lo lɔhɔmbɔ. Koko ase Isariyɛlɛ wakayatambiya tshavu l’akambo wa kɔlɔ, ndo wakayokoma polo lo nambola anawɔ. Onde Jehowa akasale dui dimɔtshi? Eelo, koko la ntondo ka nde nsala dui sɔ, Jehowa akatome amvutshi ande dia vɔ tɔhɛmɔla wodja ande mbala la mbala dia vɔ ntshika akambo awɔ wa kɔlɔ, koko vɔ komboka. Jehowa akakome polo ndo lo mbuta ɔnɛ: “Khumadiondjo [Jehowa] hatutshaka nduku dikambu, tshikima ndi ambutashudi dikambu diandi dia lu usheshe le ekambi andi amvutshi.”​—Amose 3:7.

WOHO WENDANAYƐ LA DIKAMBO SƆ: Woho wakela Jehowa elombwelo kande le atshi wa kɔlɔ toshaka  elongamelo. Sho kokaka ndjashikikɛ ɔnɛ Nzambi ayela elombwelo kande le anto wasoyana. Bible mbutaka ɔnɛ: “Atshi wa kolo wayuhimbwama . . . keli akanga a memakana wayukita kete, ndu wayongenangena la etshoko efula wa ki.” (Osambu 37:9-11) Kakɔna kafɔnyayɛ lo dikambo di’elombwelo kayotshungola anto oma l’asui? Onde onto layela elombwelo kɛsɔ ekɔ kanga esehe, ko kana kanga kɛtshi?

KƐNƐ KATA ANTO AMƆTSHI: “Elanyelo k’ase Kanana kaki ta dia l’esehe lo mbɛdika l’ata wadiakawɔ anto efula nshi nyɛ.”

KƐNƐ KETSHA BIBLE:“Mbuka yandi [Nzambi] tshe yeli sambu k’ololo. [Nde ekɔ Nzambi] ka kolamelu, aha la kolo, ndi eli ololo ndu usimbwi.” (Euhwelu k’Elembe 32:4) Elombwelo kaki Nzambi ka losembwe hakoke mbɛdikama pondjo l’ata w’ana w’anto. Lande na? Nɛ dia otshikitanyi l’anto, Nzambi ekɔ l’akoka wa mɛna kɛnɛ kele l’etema aso, mbuta ate lonto la l’etei kaso k’otema.

Ɛnyɛlɔ, etena kakela Nzambi elombwelo kande le anto wakadjasɛka l’osomba wa Sɔdɔma la Gɔmɔra ndo kakandaashile oshiki, Abrahama laki pami ka kɔlamelo akayakiyanya efula dikambo diakɔ. Nde akayakiyanyaka dia kana Nzambi “ayudiaka antu w’ololo kame la antu wa kolo.” Koko la solo dia lotutsha tshɛ, Nzambi akooshikikɛ dia naka nde ntana kaanga anto w’ɔlɔlɔ dikumi la Sɔdɔma, kete Nde holanya osomba ɔsɔ. (Etatelu 18:20-33) Mbokɛmaka hwe dia Nzambi akeyaka kɛnɛ tshɛ kaki l’etema w’anto asɔ ndo nde akɛnyi dia awui wa kɔlɔ wakawasalaka wakatambe elelo.​—1 Ekondo 28:9.

Woho akɔ waamɛ mbele, Nzambi akɛnyi di’ase Kanana wakayasha efula l’akambo wa kɔlɔ, diakɔ diakandɔshi yɛdikɔ ya mbalanya. Ase Kanana wakaleke ndjasha tshɛ l’akambo wa kɔlɔ ndo ndjokoma polo lo ntatɛ ntshumba anawɔ lo dja dia mbalambola tozambizambi tawɔ. * (2 Khumi ya Dikanga 16:3) Ase Kanana wakeyaka dia Jehowa akadjangɛ wodja w’Isariyɛlɛ dia mbɔsa nkɛtɛ yawɔ tshɛ. Wanɛ wakasɔnɛ dia ntshikala ndo ndɔsha ase Isariyɛlɛ, wakikɔ lo ndɔshana aha tsho l’ase Isariyɛlɛ, koko ndo la Jehowa lakɛnyaka oma l’akambo wakandasalaka dia nde aki la wodja ande.

Lo wedi okina, Nzambi akɛnya kɛtshi kande le ase Kanana wanɛ wakatshike mboka yawɔ ya kɔlɔ ndo mbetawɔ nɔmbwama la atɔndɔ wa Jehowa wendana la lɔkɛwɔ. Ɛnyɛlɔ, numba kɛmɔtshi k’ose Kanana kakawelɛka Rahaba akake nde la nkumbo kande. Ndo nto, etena kakoke Jashua ase Kanana waki l’osomba wa Ngibiyɔna kɛtshi, vɔ tshɛ mbidja ndo anawɔ wakatshikala la lɔsɛnɔ.​—Jashua 6:25; 9:3, 24-26.

WOHO WENDANAYƐ LA DIKAMBO SƆ: Sho kokaka nkondja wetshelo w’ohomba efula oma lo woho wakalanya Nzambi ase Kanana wakayashaka l’akambo wa kɔlɔ. Tekɔ lo taleke nsukana otsha l’ekomelo ka “lushi la kilombo ndo l’elanyelo k’anto wa kɔlɔ.” (2 Petero 3:7) Naka sho mboka Jehowa ngandji, kete tayoyohandɔ etena kayondolanya anto tshɛ wa kɔlɔ wasoyana ndo watona ɛlɔmbwɛlɔ kande.

La ngandji tshɛ, Jehowa tooholaka dia ɛsɔnwɛlɔ wasala ambutshi lo nsɛnɔ yawɔ wekɔ la shɛngiya ndo le anawɔ. Ɔtɛkɛta ande mbutaka ɔnɛ: “Nyosonole lumu, dia nyu la an’anyu ndjala la lulumbi, lu mbuka [Jehowa, Nzambi k]anyu, ngandji, lu nkitanyia diui diandi ndu lu mbumamema.” (Euhwelu k’Elembe 30:19, 20) Onde ɛtɛkɛta ɛsɔ wekɔ wa Nzambi k’esehe ko kana wa Nzambi koka anto ande ngandji ndo kalanga dia vɔ nsala ɛsɔnwɛlɔ w’amɛna?