XLAKATA tlan nakgalhtiyaw uma takgalhskinin, kaʼakxilhwi akgtiy liʼakxilhtit xla xtaʼakgastakyawan Dios nema lichuwinan Biblia: Munkaklat nema timilh kxkilhtamaku Noé chu akxni kamakgnilh cananeos.

TUKU WANKGO MAKGAPITSIN: «Nitlan likatsilh Dios xlakata masputulh latamanin kmunkaklat chu kajwatiya lakgmaxtulh Noé chu xfamilia».

TUKU WAN BIBLIA: Dios wan: «Ni klakaskin natsankga chatum tiku nitlan likatsi, wata tiku nitlan likatsi nialh katlawalh talakgalhin chu xlikana chuntiya nalatama» (Ezequiel 33:11). Wa xlakata Dios ni lipaxuwalh akxni kamalakgsputulh latamanin tiku lixkajni xlikatsikgo kxkilhtamaku Noé. ¿Pero tuku xlakata kamalakgsputulh?

Biblia kinkawaniyan pi akxni Dios kamalakgaxokgelh tiku lixkajni xlikatsikgo «na xaliʼukxilhtit litlawanikgolh wa nti nalatamakgoy ni na makpuwanikgoy Dios, chu na ni namaxkikgoy nkakni» (2 Pedro 2:5, 6). Nachuna, Biblia kinkawaniyan la akgastakyawanan Dios.

Xapulana, Dios limasiyalh pi maski katsani akxni liʼakgastakyawakgo linin tiku lixkajni likatsikgo, pero na akxilha akxni kamapatinikgo latamanin tiku nitu tlawakgonit, chu wa xlakata kamalakgaxokge tiku lixkajni likatsikgo. Nialh makgas kilhtamaku namasputu putum tapatin chu tuku ni xaʼakgstitum.

Xlipulaktiy, chuna la akgastakyawanalh Dios makgasa limasiyalh, pi paxkinan, chu pulana kawani latamanin akxni nina limin xliʼakgastakyawan. Akgtum liʼakxilhtit, maklakaskilh Noé xlakata xlichuwinalh tuku xʼama tlawa, pero latamanin ni kgaxmatkgolh. Biblia wan: «Wampi akxni ni pala tsinu xliakatsiwilakgo, tawilachi tlanka sen, lalh munkaklat, chu putum muxtukolh» (Mateo 24:39).

¿Talakgpalilh la malakgaxokgenan Dios la titaxtutilhalh kilhtamaku? Ni. Dios kawanilh israelitas, pi komo nachuna nitlan xlikatsikgolh la amakgapitsin kachikinin, xʼama masta talakaskin pi xtalatlawanakan xkamalakgsputulh, chu xkamalakgsputunika xkachikinkan Jerusalén chu xkachilinka. Israelitas ni kgaxmatkgolh tuku kawanika chu nachuna kgalhikgolh xalixkajni tayat la amakgapitsin kachikinin. ¡Asta xkamakgnikgo xkamankan xlakata xmakamastakgolh! ¿Kamalakgaxokgelh Jehová? Chuna tlawalh, pero pulana makglhuwa kamalakgachanilh palakachuwinanin xlakata xlakgpalikgolh xtayatkan  akxni nina xlimin lisputni. Asta kawanilh: «Jehová tiku lakgchan namapakgsinan xliputum kakilhtamaku nitu katitlawalh, wata pulana nakamakatsini xpalakachuwinanin» (Amós 3:7).

TUKU KINKAMASIYANIYAN UMA: Chuna la malakgaxokgenalh Dios makgasa nina talakgpali chu uma kinkamaxkiyan takgalhkgalhitin. Liwana katsiyaw pi Jehová nakamalakgaxokge tiku kamapatini amakgapitsin. Biblia wan: «Porque ti laklixkajnit lakchixkuwin, astan nakamasputukgokan [...]. Pero ti laktlan takatsij, ixlakan nawan ama lilakgatit pulataman xlakan ana snun lipaxaw natalatamaj» (Salmo 37:9-11). Xlakata akxni malakgaxokgenan Dios kalakgmaxtu latamanin kxtapatinkan. ¿Wamputun uma pi Dios nitlan likatsi?

TUKU WANKGO MAKGAPITSIN: «Xlakata kamalakgsputuka cananeos uma lu lanka talakgalhin xtachuna la guerra xala uku niku lhuwa lamakgnikan».

TUKU WAN BIBLIA: Putum xtiji xaʼakgstitum. «Dios tiku ni makgxtakgnan, wa tiku ni tlawa tuku ni xaʼakgstitum» (Deuteronomio 32:4). Tuku xaʼakgstitum tlawa Dios, nila tamalakxtumikan guerras xla lakchixkuwin, xlakata xlakan ni katsikgo tuku wi kxnakujkan latamanin pero Dios katsi.

Akgtum liʼakxilhtit, akxni Dios kaputsananilh kachikinin Sodoma chu Gomorra chu lakpuwa pi nakamalakgsputu, Abrahán tiku ni xmakgxtakga Dios nitlan limakgkatsilh tuku xʼama tlawa. Kgalhskilh Dios: «¿Xlikana nakatamasputuya tiku tlan likatsi chu tiku nitlan likatsi?» (Génesis 18:20-33). Nila xkanajla pi Dios tiku xaʼakgstitum chuna xʼama tlawa. Dios ni sitsinilh, wata wanilh pi komo xtekgsli kgalhkaw latamanin tiku xaʼakgstitum, xʼama katapati kachikinin (Génesis 18:20-33). Xlikana pi Dios kaʼakxilhnilh xnakujkan latamanin chu akxilhli pi lu nitlan xlikatsikgo (1 Crónicas 28:9).

Cananeos nachuna kaʼakxilhnika xnakujkan pi lu lixkajni xlikatsikgo chu wa xlakata Dios mapakgsinalh pi xkamalakgsputuka. Cananeos lu xkalilakgapaskan pi kstakna klhkuyukgo xkamankan xlakata xmakamaxkikgolh xdioseskan chu lhuwa atanu tuku lu nitlan xtlawakgo (2 Reyes 16:3). * Cananeos xkatsikgo pi Jehová xkawaninit israelitas pi xʼama kamaxki tiyat. Tiku ni mastaputunkgolh chu katalachipalh ni kaj watiya xkatalachipama israelitas na xkatalachipamakgolh Jehová, tiku xlimasiyama pi xkamakgtayama xkachikin.

Makgapitsi cananeos makgxtakgkgolh nitlan xtayatkan chu latamakgolh la lakaskin Jehová. Dios katapatilh. Akgtum liʼakxilhtit, Rahab tiku ksta xmakni, chu xfamilia katapatika chu ni kamakgnika. Nachuna akxni kachikin Gabaón skinkgolh xkatapatika, xlakan chu xkamankan ni kamakgnika (Josué 6:25; 9:3, 24-26).

TUKU KINKAMASIYANIYAN UMA: Wi tuku lu xlakaskinka kinkamasiyaniyan la kamalakgaxokgeka cananeos. Lu talakatsuwinita kilhtamaku nema wankanit pi «Dios natatlaway kuinta xlipaks wanti lixkajnit tilatamakgolh» (2 Pedro 3:7). Komo paxkiyaw Jehová chu kgalhakgaxmataw, akxni nakamasputu tiku ni makgamakglhtinankgo xaʼakgstitum xtamapakgsin, xatapaxuwan nalatamayaw kKatiyatni akxni nialh katiʼanalh tapatin.

Jehová kinkamalakapastakniyan pi tuku tlawakgo xanatlatni na wa tlawakgo xakamanan. Anta kxTachuwin kinkawaniyan: «Kalaksakti latamat xlakata tlan nalatapaya, wix chu minkamanan, napaxkiya Jehová mi Dios, nakgaxpata xtachuwin chu ni namakgxtakga» (Deuteronomio 30:19, 20). ¿Tlan xwanti pi uma xtachuwin Dios tiku nitlan likatsi, o wa xtachuwin Dios tiku kinkapaxkiyan chu lakaskin pi wa xatlan kalaksakwi?