LESWAKU xivutiso lexi xi hlamuleka, hi ku komisa a hi dzikeni eka swikombiso swimbirhi swa le Bibeleni swa vuavanyisi lebyi tisiweke hi Xikwembu—Ndhambi ya siku ra Nowa ni ku heriseriwa makumu ka Vakanana.

LESWI VANHU VAN’WANA VA SWI VULAKA: “A ku ri tihanyi ku va Xikwembu xi tise ndhambi leyi heriseke vanhu hinkwavo handle ka Nowa ni ndyangu wakwe.”

LESWI BIBELE YI SWI VULAKA: Xikwembu xi te: “Ku fa ka lowo homboloka a ndzi ku tsakeli, kambe ndzi tsakela leswaku lowo homboloka a tlhela endleleni yakwe, a ya emahlweni a hanya.” (Ezekiyele 33:11) Ku lovisiwa ka lavo biha enkarhini wa Nowa a ku xi tsakisanga Xikwembu. Kutani ha yini xi va lovisile?

Bibele yi hlamula yi vula leswaku loko Xikwembu xi tisa vuavanyisi byo tano eka vanhu lava nga xi gandzeliki eminkarhini leyi hundzeke, a xi “vekela vanhu lava nga xiximiki Xikwembu xikombiso xa swilo leswi taka.” (2 Petro 2:5, 6) Xana Xikwembu xi veke xikombiso xihi?

Xo sungula, Xikwembu xi vule leswaku hambileswi swi xi twisaka ku vava ku va xi lovisa vanhu, xa va vona vanhu va tihanyi lava vangaka ku xaniseka naswona va ta tihlamulela eka swiendlo swa vona. Hi ku famba ka nkarhi, xi ta herisa ku kala vululami ni ku xaniseka hinkwako.

Xa vumbirhi, xikombiso xa swiendlo swa Xikwembu swa nkarhi lowu hundzeke swi kombisa leswaku hi rirhandzu, Xikwembu xi lemukisa vanhu emahlweni ko va xi tisa vuavanyisi. Nowa a a ri muchumayeri wa leswo lulama kambe vanhu vo tala a va n’wi tekelanga enhlokweni. Bibele yi ri: ‘A va lemukangi nchumu ku fikela loko ndhambi yi fika yi va kukula hinkwavo.’—Matewu 24:39.

Xana Xikwembu xi ye emahlweni xi endla xikombiso xo tano? Ina. Hi xikombiso, xi lemukise vanhu va xona va Israyele leswaku loko va endla swo biha ku fana ni matiko lawa a ma va rhendzerile, a a xi ta pfumelela leswaku valala va hlasela tiko ra vona; va lovisa ntsindza wa vona ku nga Yerusalema; kutani va va yisa evuhlongeni. Tiko ra Israyele ri sungule ku endla swo biha—ri endla ni switlhavelo hi vana. Xana Xikwembu xi teke goza? Ina, kambe endzhaku ka loko xi rhume vaprofeta eka vanhu va xona, hi ku phindha-phindha, leswaku va cinca tindlela ta vona ka ha ri ni nkarhi. Xi tlhele xi ku: “Yehovha, Hosi leyi  Lawulaka a nge endli nchumu a nga si hlavutela mhaka ya yena leyi nga xihundla eka malandza ya yena ku nga vaprofeta.”—Amosi 3:7.

NDLELA LEYI U KATSEKAKA HA YONA: Xikombiso lexi hi xi vonaka eka vuavanyisi bya Yehovha bya nkarhi lowu hundzeke xi hi nyika ntshembo. Hi nga ku langutela hi mahlo-ngati ku avanyisiwa ka vanhu lava va vangaka ku xaniseka hikwalaho ka tihanyi hi ri ni ntshembo. Bibele yi ri: “Lava endlaka swo biha va ta herisiwa . . . Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” (Pisalema 37:9-11) Xana u anakanya yini hi vuavanyisi lebyi nga ta susela vanhu ku xaniseka? Xana i bya tihanyi kumbe i bya tintswalo?

LESWI VANHU VAN’WANA VA SWI VULAKA: “Ku herisiwa ka Vakanana a ku ri nyimpi ya tihanyi leyi nga fanisiwaka ni ku yayarheriwa ka vanhu ka manguva lawa.”

LESWI BIBELE YI SWI VULAKA: ‘Tindlela ta Xikwembu hinkwato i vululami. I Xikwembu xa vutshembeki, lexi nga riki na vuhomboloki.’ (Deteronoma 32:4) Xiendlo xa ku kondletela vululami lexi endliwaka hi Xikwembu a xi fani ni nyimpi ya vanhu. Ha yini? Hikuva ku hambana ni vanhu, Xikwembu xa swi kota ku vona leswi mbilu yi nga swona.

Hi xikombiso, loko Xikwembu xi avanyise muti wa Sodoma na Gomora kutani xi endla xiboho xa leswaku xi wu lovisa, wanuna wo tshembeka Abrahama a a lava ku tiyiseka loko xiboho xa Xikwembu xi ri ni vululami. A a nga tshembi leswaku Xikwembu xakwe xo lulama a xi ta “kukula wo lulama swin’we ni wo homboloka.” Xikwembu xi n’wi tiyisekisile handle ko n’wi helela mbilu leswaku hambiloko a ko va ni vanhu va khume vo lulama eSodoma, a xi ta tshika muti xi nga wu lovisi hikwalaho ka vona. (Genesa 18:20-33) Swi le rivaleni leswaku Xikwembu xi lavisise timbilu ta vanhu volavo kutani xi vona ndlela leyi a va homboloke ha yona.—1 Tikronika 28:9.

Hilaha ku fanaka, Xikwembu xi vone leswaku Vakanana a va hombolokile kutani xi vula leswaku va fanele va lovisiwa. Vakanana a va dumile hikwalaho ka tihanyi ta vona, leti a ti katsa ku hisa vana va ri karhi va hanya leswaku va endla switlhavelo endzilweni. * (2 Tihosi 16:3) Vakanana a va swi tiva leswaku Yehovha u lerise Vaisrayele leswaku va teka tiko hinkwaro. Lava hlawuleke ku nga fambi a va ngo lwisana ni Vaisrayele ntsena kambe a va lwisana na Yehovha loyi a swi kombise kahle leswaku a a ri ni vanhu vakwe.

Ku tlula kwalaho, Xikwembu xi kombise tintswalo eka Vakanana lava tshikeke vuhomboloki bya vona kutani va amukela milawu ya Yehovha ya mahanyelo. Hi xikombiso, nghwavava ya Mukanana ku nga Rahava yi ponisiwile swin’we ni ndyangu wa yona. Nakambe loko vaaki va muti wa Kanana lowu nga eGibiyoni va kombele ku kombiwa tintswalo, vona ni vana va vona va londzovotiwe va hanya.—Yoxuwa 6:25; 9:3, 24-26.

NDLELA LEYI U KATSEKAKA HA YONA: Hi nga kuma dyondzo ya nkoka eka vuavanyisi lebyi weleke Vakanana. Hi le kusuhi swinene ni “siku ra vuavanyisi ni ra ndzoviso wa vanhu lava va nga xi xiximiki Xikwembu.” (2 Petro 3:7) Loko hi rhandza Yehovha hi ta vuyeriwa loko a herisa ku xaniseka hi ku susa vanhu lava alaka mfumo wakwe.

Hi rirhandzu, Yehovha u hi tsundzuxa leswaku swiboho leswi vatswari va swi endlaka swi khumba vana va vona. Rito ra Xikwembu ri ri: “Mi fanele mi hlawula vutomi leswaku mi ta ya emahlweni mi hanya, n’wina ni vana va n’wina, hi ku rhandza Yehovha Xikwembu xa n’wina, hi ku yingisa rito rakwe ni ku n’wi namarhela.” (Deteronoma 30:19, 20) Xana marito wolawo i ya Xikwembu lexi nga ni tihanyi kumbe i marito ya Xikwembu lexi rhandzaka vanhu naswona xi lavaka leswaku va endla xiboho lexinene?