Te ʼu Fakamau ʼa Te ʼAtua—ʼE Ha Ai Koa ʼe Agakovi Te ʼAtua?
Te ʼu Fakamau ʼa Te ʼAtua—ʼE Ha Ai Koa ʼe Agakovi Te ʼAtua?
MOʼO tali ki te fehuʼi ʼaia, tou vakaʼi ia faʼifaʼitaki ʼe lua ʼo te ʼu fakamau ʼa te ʼAtua ʼi te Tohi-Tapu: Te Tulivio ʼi te temi ʼo Noe pea mo te tautea ʼo te kau Kanaane.
TE TULIVIO ʼI TE TEMI ʼO NOE
KOTEA TE MANATU ʼA TE HAHAʼI: “Neʼe agakovi ia te ʼAtua ʼi te temi ʼae neʼe ina fakato ai te Tulivio moʼo fakaʼauha ia te malamanei, ʼo mole kau ai ia Noe mo tona famili.”
KOTEA TE MANATU ʼA TE TOHI-TAPU?: Neʼe ui fenei e te ʼAtua: “Ko te mea ae e au loto ki ai, e mole ko te mate a te tagata agahala, kae ke fetogi tona mauli pea ke mauli ia ia.” (Esekiele 33:11) Neʼe mole fiafia ia Sehova ʼi tana fakaʼauha ia te hahaʼi agakovi ʼi te temi ʼo Noe. Kaʼe he ko ʼe neʼe ina fai ia te faʼahi ʼaia?
ʼE ui fenei ʼi te Tohi-Tapu, moka fai e te ʼAtua ia te taʼi fakamau ʼaia ki te hahaʼi agakovi, neʼe ina “tuku . . . he fakamooni ki te u tagata agahala o te temi ka hau.” (2 Petelo 2:5, 6) Kotea ia te fakamoʼoni ʼaia?
ʼUluaki, neʼe fakaha e te ʼAtua tatau aipe pe ʼe lotomamahi moka ina fakaʼauha ia te hahaʼi agakovi, ʼe mole ina taʼofi ia te hahaʼi agakovi ʼae ʼe natou fakatupu he ʼu mamahi pea ʼe mole ina lau ʼanatou gaue kovi. ʼI tona temi totonu, ʼe ina fakagata anai ia te heʼe faitotonu pea mo te ʼu mamahi fuli.
Lua, ko te ʼu faʼifaʼitaki ʼo te ʼu gaue neʼe fai e te ʼAtua ʼi te temi muʼa, ʼe ina fakaha mai ko te ʼAtua ʼaki tona ʼofa ʼe ina fakatokaga te hahaʼi ʼi muʼa ʼo tana fakahoko ʼana fakamau. Ko Noe, neʼe ko he tagata faiakonaki ʼo te faitotonu, kaʼe neʼe mole fia fakalogo ia te hahaʼi ki ai. ʼE ui fenei ʼi te Tohi-Tapu: “Nee mole pe natou amanaki ki he mea, o kaku ki te to a te lomaki, o ave ia natou fuli.”—Mateo 24:39.
ʼE kei mulimuli koa te ʼAtua ki te faʼifaʼitaki ʼaia? ʼEi. Ohage la, neʼe ina fakatokaga ia tana hahaʼi, ia Iselaele, kapau ʼe natou fai ia te meʼa ʼae ʼe kovi ohage ko te ʼu puleʼaga ʼi ʼonatou tafaʼaki, ʼe ina tuku anai ʼonatou fili ke natou puleʼi ʼonatou kele; ke natou maumauʼi ia tonatou kolo muʼa ko Selusalemi; pea mo ʼave popula natou. Neʼe fai e Iselaele ia te meʼa ʼae ʼe kovi, ʼo natou sakilifisioʼi te ʼu tamaliki. Neʼe fakahoko koa e Sehova ia he koga? ʼEi, kaʼe neʼe ina ʼuluaki fekauʼi muʼa ia tana kau polofeta ke natou fakatokaga liuliuga natou pea ke fetogi tanatou faʼahiga manatu naʼa tauhala. Neʼe ina ui fenei: “Koteuhi e mole fai e te Aliki, [e Sehova], he mea e tahi, kae e heeki ina fakaha ia ia ki ana tagata faifekau ko te kau polofeta.”—Amosi 3:7.
Pesalemo 37:9-11) Kotea ia takotou manatu ʼo ʼuhiga mo he fakamau ʼe ina fakafimalieʼi ia te ʼu mamahi ʼo te malamanei? ʼE ha ai koa ia te agakovi peʼe ko te loto manavaʼofa?
HE KO ʼE ʼE MAʼUHIGA KIA TATOU IA TE TALI ʼAIA?: ʼE tou maʼu ia te ʼamanaki ʼi te ʼu fakamau neʼe fai e Sehova ʼi te temi muʼa. ʼE tou falala ʼe fakamauʼi anai e te ʼAtua ia te hahaʼi agakovi ʼae ʼe natou fakatupu te ʼu mamahi. ʼE ui fenei ʼi te Tohi-Tapu: “E motuhi anai te kau agakovi . . . E mau e te kau masiva te fenua, pea e natou fiafia lahi i te tokalelei.” (TE TAUTEA ʼO TE KAU KANAANE
KOTEA TE MANATU ʼA TE HAHAʼI: “Ko te tautea ʼo te kau Kanaane, neʼe ko he tau fakamataku, ohage ko te ʼu matea ʼe tou sisio ki ai ʼi te temi nei.”
KOTEA TE MANATU ʼA TE TOHI-TAPU: “E agatonu ona ala fuli, ko he Atua agatonu mo faitotonu, e fonu ia ia i te agatonu.” (Tetelonome 32:4) ʼE mole feala ke tou fakatatau ia he tau fakatagata pea mo he fakamau fakaʼatua. Kotea tona tupuʼaga? ʼO kehekehe ia mo te tagata, ʼe feala ke iloʼi e te ʼAtua ia te meʼa ʼae ʼe ʼi tona loto.
Ohage la, ʼi te temi ʼae neʼe fakamauʼi ai e te ʼAtua ia te ʼu kolo ʼo Sotoma mo Komola, neʼe fakatuʼutuʼu ke ina tautea, neʼe tuʼania ia te tagata agatonu ko Apalahamo ʼo ʼuhiga mo te faitotonu ʼa te ʼAtua. Neʼe mole manatu ʼe feala ki tona ʼAtua faitotonu ke ina “tamatei anai te tagata agatonu mo te tagata agahala.” Neʼe fakalotomalohiʼi ia ia e te ʼAtua, kapau ʼe maʼu he toko hogofulu ʼe agatonu ʼi Sotoma, ʼe Ina fakaʼateaina anai te kolo ʼaia. (Senesi 18:20-33) ʼE mahino ia, neʼe sio ia te ʼAtua ki te loto ʼo te hahaʼi ʼaia pea neʼe sio ki tanatou agakovi.—1 Koloniko 28:9.
ʼO toe feia aipe, neʼe fakamauʼi e te ʼAtua ia te kau Kanaane pea neʼe fakatuʼutuʼu ke ina tauteaʼi natou ʼuhi ko tanatou agakovi. Neʼe iloa ia te kau Kanaane ʼuhi ko tanatou agakovi, ohage la neʼe natou sakilifisioʼi ʼanatou fanau ʼi te afi. * (2 Hau 16:3) Neʼe iloʼi e te kau Kanaane, neʼe fakatotonu e Sehova ki te kau Iselaele ke natou maʼu ia te ʼu potu fuli ʼo te fenua. Ko natou ʼae neʼe natou nonofo ʼi tonatou fenua, neʼe natou filifili ke natou tauʼi ia te kau Iselaele pea mo Sehova, ʼae neʼe ina fakaha ia te ʼu fakamoʼoni ʼe nofo mo tana hahaʼi.
Koia, neʼe toe fakaha e te ʼAtua ia tona ʼofa ki te kau Kanaane ʼae neʼe natou fakafisi ki te ʼu meʼa ʼae ʼe kovi pea mo natou tali ia te ʼu lekula ʼa Sehova ʼo ʼuhiga mo te aga ʼae ʼe tonu ke natou fai. Ohage la ko Laape, te fafine paomutu Kanaane ʼae neʼe haofaki, ia ia pea mo tona famili. O toe feia mo te kau Kapaone, ʼi te temi ʼae neʼe natou kumi ai ia te loto manavaʼofa ʼo te ʼAtua, neʼe natou hao ai.—Sosue 6:25; 9:3, 24-26.
HE KO ʼE ʼE MAʼUHIGA KIA TATOU IA TE TALI ʼAIA?: ʼE ʼi ai te ako maʼuhiga ʼe feala ke tou taʼofi mai te fakamau ʼo te kau Kanaane. Kua tou fakaovi ki “te aho o te fakamaau mo te maumaui o te kau agakovi.” (2 Petelo 3:7) Kapau ʼe tou ʼoʼofa kia Sehova, ʼe tou fiafia anai ʼi te temi ʼae ka ina fakaʼauha ai anai ia te mamahi ʼo te malamanei ʼaki tana pulihi ia natou ʼae ʼe natou fakafisi ki tana takitaki faitotonu.
ʼAki tona ʼofa, ʼe fakamanatuʼi mai e Sehova ko te ʼu tonu ʼae ʼe fai e te ʼu matuʼa ʼe ʼi ai tona ikuʼaga ki te ʼu fanau. ʼE ui fenei ʼi te Folafola ʼa te ʼAtua: “Ke ke filifili te mauli, o tuku ke ke mauli, ia koe mo tou hakoga, o ofa [kia Sehova], tou Atua, pea mo fakalogo ki tona leo, pea mo pipiki kia ia.” (Tetelonome 30:19, 20) ʼE ko he ʼu palalau ʼa he ʼAtua ʼe agakovi peʼe ko he ʼAtua ʼe ʼofa ki tana hahaʼi pea mo ina loto ke natou filifili ia te meʼa ʼae ʼe lelei?
[Nota]
^ Neʼe maʼu e te kau ʼalekeolosia ia te ʼu fakamoʼoni ʼi te aga ʼi fenua ʼo te kau Kanaane, neʼe natou sakilifisioʼi te ʼu tamaliki.
[Paki ʼo te pasina 5]
ʼI muʼa ʼo te fakaʼauha e te ʼAtua ia te hahaʼi agakovi ʼi te Tulivio, neʼe ina fai ia te fakatokaga ʼaki ia Noe
[Fakamatala ʼo te pasina 6]
Neʼe iloa ia te kau Kanaane ʼuhi ko tanatou agakovi pea neʼe natou fakafeagai ki te ʼAtua pea mo tana hahaʼi