NGAD weliyed buchuuw murung’agen l’agruw e pufthin rok Got nrogon ni bay u Bible, ni aram fare Ran ni tharey e fayleng u nap’an Noah nge nap’an ni thang piyu Kanaan, ya ra ayuwegdad ni ngad nanged e fulweg ko re deer ney.

BOCH BAN’EN NI MA YOG E GIRDI’: “Got e der runguy e girdi’ u nap’an ni pi’ fare ran ni nge tharey e fayleng  ni ke thang urngin e girdi’ ma kemus ni Noah nge chon e tabinaw rok e kar mageygad nib fas.”

N’EN NI BE YOG E BIBLE: Ke yog Got ni gaar: “Da gu adag ni ngug guy reb e tadenen ni nge yim’. Ku gub adag ni ngug guy ni ke tal ndakir denen nge par nib fos. Israel, mu taleg e kireb ni ga be rin’.” (Ezekiel 33:11) Ere de felfelan’ Got u nap’an ni ke yim’ e girdi’ nib kireb u nap’an Noah. Ere, mang fan ni ke thangrad?

Be yog e Bible ni nap’an ni dugliy Got e n’en nra buch rok e girdi’ kakrom, ma aram e be “dag ngak e piin ni kireb e n’en nra rin’ ngorad ni faanra ur pired nib kireb e ngongol rorad.” (2 Peter 2:5, 6) Mang e ke rin’ Got kakrom ni ku ra rin’ e ngiyal’ ney?

Som’on, e ke micheg Got ni yugu aram rogon ndabun ni nge thang e girdi’, machane manang e piin nder runguyed e girdi’, ma yad ma gafgownagrad, ma ra gechignagrad nbochan e ngongol rorad nib kireb. Ma ra munmun ma ra chuweg urngin e kireb nge gafgow.

Bin l’agruw, e pi n’en ni rin’ Got kafram e be tamilangnag ni ma ginang e girdi’ u fithik’ e t’ufeg u m’on ni nge gechignagrad. Noah e reb e tamachib ko tin nib mat’aw, machane yooren e girdi’ e kar darifannaged. Be yog e Bible ni gaar: “Da ur nanged [“tiyan’rad,” NW] e n’en ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin.”​—Matthew 24:39.

Gur, bay ban’en ni ke rin’ Got ni bod ni ke rin’ u nap’an Noah? Arrogon. Bod ni ke yog ngak e girdi’ rok ni aram piyu Israel nfaanra ngar rin’ed e ngongol nib kireb ni bod rogon ni ma rin’ girdien e pi nam u toobrad, ma ra pag e pi toogor rorad ni ngar chamgad ngorad, ma ngar kirebnaged yu Jerusalem ni mach rorad, min kalbusnagrad. Ma ki ulul piyu Israel i ngongliy e kireb, mus ngak pi fakrad ni ur pied ni maligach. Bay ban’en ni i rin’ Jehovah ko re n’ey, fa? Arrogon, machane u tomuren ni l’og e pi profet rok ni ngar ginanged e girdi’ bayay nge bayay ni ngar thilyeged e ngongol rorad u m’on ni nge sagaal. Me yog ni gaar: “I Somol ni Got e dariy ban’en ni ma rin’ nder ma weliy ngak e pi profet, ni aram e pi tapigpig rok, nge mu’ mfini rin’.”​—Amos 3:7.

ROGON NI GAB L’AG KO RE N’EY: N’en ni rin’ Jehovah e rayog ni nge pi’ e athap ngodad. Rayog ni nge pagan’dad nra gechignag Got e piin ni yad be gafgownag e girdi’. Be yog e Bible ni gaar: “Piin ni yad ba kireb e bay ni tulufrad . . . machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.” (Psalm 37:9-11) Uw rogon u wan’um fare pufthin nra chuweg e girdi’ u fithik’ e gafgow, be m’ug riy ndariy e runguy rok Got, ara ir be’ ni ma runguy e girdi’?

BOCH BAN’EN NI MA YOG E GIRDI’: “Nap’an ni kan li’ piyu Kanaan ma bod ni yibe cham ndariy e runguy riy nfaanra yira taareb rogonnag ko pi cham ni yibe tay e ngiyal’ ney ni yibe thang e fan rok gubin e girdi’ u lan reb e binaw.”

N’EN NI BE YOG E BIBLE: “Ba yal’uw ma ba mmat’aw urngin e tin ma rin’. Got romed e ba yul’yul’ ma der ma ban.” (Deuteronomy 32:4) Rogon ni ma pufthinnag Got e girdi’ e de taareb rogon ko mahl ni ma tay e girdi’. Mang fan? Ya Got e ba thil ko girdi’, manang rarogon gum’irchaen e girdi’.

Ni bod nnap’an ni pufthinnag fare mach nu Sodom nge Gomorrah me dugliy ni nge thangrad, ma Abraham ni ir be’ nib yul’yul’ e baadag ni nge nang ni faanra n’en ni ke dugliy Got e ba mat’aw, fa danga’. Ba mo’maw’ rok ni nge lemnag ni fare Got rok nib mat’aw e ra “chagiy e piin ndawor ra ngongliyed e kireb ngak e piin ni kar ngongliyed e kireb nge thang e fan rorad.” Ke micheg Got ngak u fithik’ e gum’an’ nfaanra bay ragag e girdi’ ni yad ba mat’aw ko fare mach nu Sodom ma dabi kirebnag. (Genesis 18:20-33) Ba tamilang ni i fal’eg i yaliy Got rarogon gum’irchaen e pi girdi’ nem me guy feni rib gel e kireb rorad.​—1 Kronicles 28:9.

Miki guy Got nrib gel e kireb rok piyu Kanaan ma aram me yog ni ngan thangrad. Piyu Kanaan e yimanangrad ni yad e girdi’ ndariy e runguy rorad, ya yad ma pi’ e bitir rorad ni maligach u fithik’ e nifiy. * (2 Kings 16:3) Piyu Kanaan e yad manang ni ke yog Jehovah ngak piyu Israel ni yad ra tafanay urngin e binaw rorad. Piin ni kar mel’eged ni ngar pared ngar uned ko cham e yad be togopuluw ngak piyu Israel nge Jehovah, ya boor ban’en ni be m’ug riy ni i ayuweg e girdi’ rok.

Miki runguy Got piyu Kanaan ni kar paged e ngongol rorad nib kireb ma kar folgad ko motochiyel rok Jehovah. Ni bod ni ayuweg Rahab ni fare pin ni i pi’ ir nchuway’ nge chon e tabinaw rok. Maku nap’an ni wenig boch piyu Kanaan ni yad ma par ko fare mach nu Gibeon ngak Jehovah ma aram me daki thangrad nge pi bitir rorad.​—Joshua 6:25; 9:3, 24-26.

ROGON NI GAB L’AG KO RE N’EY: Rayog ni ngad filed ban’en nib ga’ fan ko pufthin ni kan tay ngak piyu Kanaan. Gad be chugur i yan ko “chirofen ni bay ni  pufthinnag e girdi’ nib kireb nge mu’ min kirebnagrad.” (2 Peter 3:7) Faanra ba t’uf Jehovah rodad ma ra fel’ rogodad u nap’an nra chuweg e piin ndubrad ni ngar folgad ko gagiyeg rok.

Be puguran Jehovah ngodad ni n’en ni ma dugliy e piin gallabthir e bay rogon ko pi bitir rorad. Ya be yog e Bible ni gaar: “Mu turguyed e yafos ni ir e nge yib ngomed. Nge t’uf romed Somol ni Got romed, um folgad rok ma gimed be par ni gimed ba yul’yul’ ngak ni fan e gimed nge piin ni owchemed e nge yog ni mpired nib n’uw nap’med.” (Deuteronomy 30:19, 20) Ere gur, pi thin nem e thin rok reb e Got ndariy e runguy rok fa thin rok reb e Got ni ma t’ufeg e girdi’, ma baadag ni ngar mel’eged e tin nib fel’?