YU TRAEM tingbaot se yu gat wan fren we yu laekem tumas, be hem i mekem wan samting we yu no kasem save from wanem hem i mekem samting ya. Ol man oli tokbaot nogud fren blong yu, mo oli talem se tingting we i pusum hem blong mekem samting ya, i no stret. Oli talem se fren blong yu i stap spolem ol man. ?Olsem wanem? ?Bambae yu yu bilif long samting we ol man ya oli talem? ?No bambae yu wet fastaem blong harem tingting blong fren blong yu? Sipos fren blong yu i no stap blong talem samting we hem i mekem, ?bambae yu jajem hem wantaem, no yu gat longfala tingting mo yu wet long hem?

Ating yu yu no wantem jajem fren blong yu kwiktaem, be yu wantem save moa long saed blong hem. Maet yu askem se: ‘?Mi mi save gud fren blong mi, no i gat sam samting long saed blong hem we mi no save? ?Wanem sam fasin blong hem we i pulum mi blong laekem hem?’ Long sem fasin, bifo we yumi talem se God nao i stap spolem ol man, yumi mas askem sam kwestin olsem long saed blong hem, blong luk sipos yumi savegud hem no nogat.

Maet yu luk se i had blong kasem save sam samting we God i bin mekem. No maet tingting blong yu i paspas long sam samting we God i letem i hapen. Plante man bambae oli talem long yu se God nao i stap spolem ol man. Mo bambae oli talem long yu se tingting we i pusum God blong mekem sam samting, i no stret. ?Olsem wanem? ?Bambae yu yu kwik blong folem tingting blong olgeta, no bambae yu wet kasem we yu savegud God? Yes, bifo we yumi jajem God olsem, yumi mas savegud hem fastaem. I gud blong askem se: ?God i fren blong mi olsem wanem?

Sipos laef blong yu i had, maet yu save foldaon long trap ya blong talem se God i no wan gudfala fren blong yu. Be i gud yu tingbaot se: ‘?God nao i stap mekem ol samting oli strong tumas long laef blong yu? ?No hem i stap givim ol gudfala samting long yu?’ Olsem we yumi luk finis, Setan “i stap rulum wol ya,” be i no Jehova. (Jon 12:31) Taswe, i klia nomo se Setan nao i stamba blong ol rabis fasin we oli stap hapen long wol tede. Yumi kasem plante trabol tu from we yumi sinman, mo eni samting i save hapen long laef blong yumi we yumi no tingbaot. ?Yu yu agri long samting ya?

Be naoia yu traem tingbaot. ?God i stamba blong wanem samting? Baebol i talem se God i “mekem skae mo graon, mo hem nao i stap givhan long yumi.” Baebol i leftemap tingting blong yumi blong luk se God i ‘mekem yumi long fasin we i nambawan olgeta.’ Mo Baebol i tokbaot Jehova se hem i “God ya we i stap holem laef blong yumi long han blong hem.” (Ol Sam 124:8; 139:14; Daniel 5:23) ?Olgeta samting ya oli soemaot wanem?

Oli soemaot se God nomo i mekem yumi, i givim win blong yumi pulum, mo i mekem yumi laef. (Ol Wok 17:28) Mo tu, oli soemaot se laef blong yumi, ol naesfala samting we oli stap raonabaot long yumi, yumi harem gud from lav we narafala i soemaot long yumi, yumi fren gud wetem narafala, yumi harem gud blong testem mo tajem wan samting, yumi lesin long ol defdefren saon, mo yumi smelem samting, olgeta samting ya oli ol presen we God i givim long yumi. (Jemes 1:17) Ol blesing ya we hem i givim oli soemaot se hem i wan gudfala fren. ?Olsem wanem? ?Yu yu agri se yumi mas tinghae long hem mo yumi mas trastem hem?

Samtaem, maet yu harem se i had blong trastem God. Maet yu harem se yu no savegud hem, mekem se yu no trastem hem. Long ol haf ya, yumi no save tokbaot evri samting we oli pulum ol man blong oli talem se God i stap spolem ol man. Be ating yu yu agri se samting we i gud we yumi mekem, hemia blong traehad blong savegud God. * Mifala i save se sipos yu mekem olsem, bambae yu savegud trutok long saed blong hem. ?Olsem wanem? ?Yu ting se God nao i stap spolem ol man? Nogat. Defren olgeta, Baebol i talem se: “God i stamba blong fasin ya blong lavem man.”—1 Jon 4:8.