TA HŨRA mbica wĩna mũrata wendete mũno, no ageeka ũndũ ũtangĩciria no eke. Na hĩndĩ o ĩyo andũ angĩ magekĩrĩra ngaja ciĩko na itũmi ciake cia gwĩka ũndũ ũcio, makoiga mũrata ũcio waku ndarĩ tha. Hihi no ũhiũhe kũmetĩkia kana ũngĩeterera mũrata waku akũhe ũhoro ũcio wega? Angĩkorũo ndoima ho, hihi no ũkorũo na woni mwega kũmwerekera na ũmweterere nĩ getha agũtaarĩrie?

Ũtanatua itua, no wende kũmenya ũhoro makĩria. No wĩyũrie, ‘Hihi nĩ njũĩ mũrata ũcio wakwa wega, na nĩkĩ gĩtũmaga ndĩmwende?’ Na githĩ tiguo ũngĩka? Ta wĩcirie: Na githĩ tũtiagĩrĩire kwĩyũria ciũria ta icio tũtanacokia kĩũria, gĩa kana hihi Ngai nĩ arĩ tha?

Rĩmwe no wage gũtaũkĩrũo nĩ maũndũ mamwe Ngai eekire, o na kana ũrigwo nĩ gĩtũmi gĩa gwĩtĩkĩria maũndũ mamwe mekĩke. Nĩ kũrĩ andũ aingĩ mangĩkwĩra atĩ Ngai ndarĩ tha o na makuonie atĩ nĩ wagĩrĩire gũtuĩra Ngai o ta ũrĩa o mekaga. Ũtanatuĩra Ngai, nĩ wega ũkorũo na mawoni marĩa magĩrĩire kũmwerekera na ũmenye ũhoro wake makĩria. Ta wĩcirie ũhoro wa maũndũ maingĩ mega Ngai agwĩkĩire.

Angĩkorũo ũtũũro waku ũkoretwo ũrĩ mũritũ, wahota gwĩciria atĩ Ngai ndakwendete o na hanini. No ta wĩcirie, hihi Ngai nĩwe ũtũmĩte ũtũũro waku ũritũhe—kana nĩ gũkũrathima akũrathimaga? O ta ũrĩa tweruta, Shaitani nĩwe “mũnene wa gũkũ thĩ,” no ti Jehova. (Johana 12:31) Kwoguo mĩnyamaro mĩingĩ na wagi wa kĩhooto ũrĩa wonaga gũkũ thĩ ũrehagwo nĩ Shaitani. Na githĩ to wĩtĩkie atĩ kwaga gũkinyanĩra gwitũ o hamwe na maũndũ materĩgĩrĩirũo nĩ gũtũmaga tũnyamarĩke mũno?

O na kũrĩ ũguo-rĩ, nĩ maũndũ marĩkũ Ngai atwĩkĩire? Ta wĩcirie ũrĩa Bibilia yugaga: atĩ Ngai nĩwe “ũrĩa wombire igũrũ na thĩ”; ithũĩ tũrĩ ciũmbe ciake, ‘tũũmbĩtwo na njĩra ya magegania’; na ningĩ Jehova nĩwe “Ngai ũrĩa ũkũheaga mĩhũmũ ya muoyo na rũhĩ rũake we mwene.” (Thaburi 124:8; 139:14; Danieli 5:23) Maũndũ macio mothe maronania atĩa?

Maũndũ macio maronania atĩ mĩhũmũ iitũ, o na gũtũũra gwitũ, kwĩhocetie harĩ Mũũmbi witũ. (Atũmwo 17:28) Ũguo nĩ kuuga atĩ kĩheo kĩa muoyo, ũthaka ũrĩa tuonaga thĩinĩ wa thĩ, gũkenagĩra wendani na arata, ũhoti wa gũcama, kũhutia, kũigua, na kũnungĩra—icio ciothe nĩ iheo kuuma kũrĩ Ngai. (Jakubu 1:17) Na githĩ irathimo icio itironania atĩ Jehova nĩ mũrata twagĩrĩirũo nĩ gũtĩa na kwĩhoka?

Ũrĩa kũrĩ nĩ atĩ, no wone arĩ ũndũ mũritũ gwĩtĩkia Ngai. Kwahoteka wonaga ta ũtamũĩ wega ũndũ ũngĩmwĩhoka. Ũguo nĩguo andũ aingĩ monaga. Tũtingĩhota kwarĩrĩria maũndũ mothe Ngathĩti-inĩ ĩno marĩa matũmaga andũ mone ta Ngai atarĩ tha. Na githĩ ti ũndũ wa bata gwĩkĩra kĩyo gĩa kũmenya Ngai wega? * Twĩna ma atĩ weka ũguo, nĩ ũkũmenya ma ĩgiĩ Ngai. Kwoguo kuuga atĩ Ngai ndarĩ tha ti ũhoro wa ma, amu “Ngai nĩwe wendani.”—1 Johana 4:8.