Kana mu ka Sepa Mulimu?

MU NAHANE kuli mu na ni mulikani ye mu lata hahulu, kono u eza nto ye ñwi ye mu sa utwisisi. Batu ba bañwi ba nyaza likezo za hae ni milelo ya hae, ni ku bulela kuli u situhu. Kana mu ka matukela ku lumela ze ba bulela batu bao, kamba mu ka libelela kuli mu utwe maikuto a hae? Haiba kuli ka nako yeo mulikanaa mina yo ha yo, kana mwa kona ku mu libelela ku fitela a taha kuli a to talusa maikuto a hae?

Mwendi pili mu si ka alaba kale lipuzo zeo, ne mu ka tokwa ku ziba ze ñata. Mu kana mwa ipuza kuli: ‘Kana mulikanaa ka yo naa mu ziba hande luli, mi ki lika mañi ze ni mu latela?’ Ku eza cwalo ki ko kunde. Kono mu lemuhe taba ye: Kana ha lu koni ku itusisa muezezo o swana wo kuli lu zibe haiba Mulimu u situhu kamba ku tokwa?

Ku kana kwa mi bela taata ku utwisisa lika ze ñwi za ezize Mulimu, kamba mu kana mwa komoka libaka Mulimu ha tuhelezi lika ze ñwi ku ezahala. Batu ba bañata ba kona ku mi bulelela kuli Mulimu u situhu, mi ba kana ba mi susueza ku nyaza milelo ya hae sina mo ba ezeza bona. Pili mu si ka nyaza kale Mulimu, mu tokwa ku ziba ze ñata ka za hae. Hape mu tokwa ku nahana ka za lika ze nde za mi ezelize.

Haiba mu pilile bupilo bo butata, mu kana mwa ikutwa kuli Mulimu a li kuba a be mulikanaa mina. Kono ha mu ka kutumana hanyinyani ni ku nahanisisa, mu ka lemuha kuli Mulimu haki yena ya mi tahiselize manyando mwa bupilo, kono u mi ezelize lika ze nde mwa bupilo. Sina mo lu bonezi, Satani ki yena “mubusi wa lifasi le,” isiñi Jehova. (Joani 12:31) Kamukwaocwalo, ki Satani ya tahisa buñata bwa manyando ni bumaswe bo bu li teñi mwa lifasi le. Hape ku sa petahala kwa luna ni miinelo ye si ka libelelwa, ni zona li lu tahisezanga manyando a mañata.

Kono cwale Mulimu yena u tahisize lika mañi? Mu nyakisise ze i bulela Bibele kuli: Mulimu ki yena “ya ezize lihalimu ni lifasi”; misebezi ya hae i kopanyeleza cwalo ni mibili ya luna ye ezizwe ka mukwa “o komokisa”; ni kuli Jehova ki “yena Mulimu ya sweli bupilo bwa hao mwa lizoho la Hae.” (Samu 124:8; 139:14; Daniele 5:23) Litaba zeo kaufela li talusañi?

Li talusa kuli lu na ni bupilo mi lu teñi bakeñisa Mubupi wa luna. (Likezo 17:28) Li talusa kuli mpo ya bupilo, ku buheha kwa lika ze mwa lifasi, tabo ye lu banga ni yona ha lu boniswa lilato ni ha lu na ni balikani, munati o lu utwanga ha lu ca lico, ni tabo ye lu banga ni yona ha lu kumbata batu be lu lata, ku teeleza kwa lipina, ni ku utwa munko o munde, ki limpo ze zwa ku Mulimu. (Jakobo 1:17) Kana haki niti kuli limbuyoti zeo li tahisa kuli Mulimu a be Mulikanaa luna ye lu swanela ku kuteka ni ku sepa?

Ki niti kuli ku kana kwa mi bela taata ku sepa Mulimu. Mwendi mu ikutwa kuli ha mu koni ku mu sepa bakeñisa kuli ha mu mu zibi hande. Mi yeo ki nto ye utwahala. Mwa litaba ze ku swani ze, ha lu koni ku talusa mabaka kaufela a tahisa kuli batu ba bañwi ba nahane kuli Mulimu u situhu. Kono kana ne mu si ke mwa eza hande ku ikataza ku ziba ze ñata ka za Mulimu? * Lu sepa kuli ha mu nze mu ikataza ku eza cwalo, mu ka fita fa ku ziba niti ka za Mulimu. Kana u situhu? Batili, mane taba ya niti kikuli: “Mulimu ki lilato.”—1 Joani 4:8.

[Litaluso za kwatasi]

[Siswaniso se si fa likepe 7]

Mulimu haki yena ya mi tahiselize manyando mwa bupilo, kono u mi ezelize lika ze nde mwa bupilo