KA MOLATK er kau el ngar er ngii a kmal ungil el sechelim, engdi ngrullii a tekoi el diak modengelii a uchul e ngrirellii. A rebebil a mo melekoi el kmo ngmekngit a blekerdelel e dirrek el kmo ngdimlak a ungil el uchul e ngmiruul er sel tekoi. Kau ke di mereched el mo kongei a tekingir me a lechub e ke mo mengiil er a sechelim el mo mesaod er ngii el leko er kau? A lsekum e ngmle dibus, e ngsebechem el mo klou a rengum el mengiil er ngii e diak bo molatk a mekngit el kirel?

A uchei er a monger, e nglocha soam el mo medengei a lmuut el betok el tekoi. Ngungil a di lekau el oker el kmo, ‘Ngak ak mera el ungil medengelii ngika el sechelik, e ngera uchul me ngkmal ungil el sechelik?’ Me a omomdasu: Kid ngsebeched el oba osisiu el uldasu el kirel a Dios?

Nglocha meringel er kau el mo medengelii a uchul me a Dios a mla remuul a bebil el tekoi, me a lechub e ngmechas a rengum er aike el bla lekengei me ngduubech. Te betok el chad a mo dmu er kau el kmo a Dios a mekngit a blekerdelel e mo orrimel er kau el mo oukerrekeriil er a uchul me ngmeruul a tekoi. Kau ke mo melemolem el oba ungil el uldasu el kirel a Dios el dimerekmo bo modengei a lmuut el betok el kirel? A nger er tia el ker a di mo ultuil er a klungel a klemedengei er kau el kirel a Dios. Di lekau el oker el kmo, ‘Ngera ngmla remuul a Dios el kirek?’

A lsekum e ngkmal meringel a klengar er kau, e ke locha mo melekoi el kmo a Dios a dirkak a ngera el ketmeklii el kirem. Engdi ka di molatk er tiang: A Dios nguchul aike el ringel er a klengar er kau me a lechub e ng ike el ungil el tekoi? Kede milsaod er ngii er a uchei el kmo a Satan a “merreder er tial beluulchad” el diak el Jehovah. (Johanes 12:31) Me ng Satan a uchul a betok el ringel me a chelebirukel er tia el beluulechad. Ke locha mo kongei el kmo kid el diak demecherrungel me a bkaischemrungel el tekoi a dirrek el uchul a betok el mondai er kid.

Me a leuaisei, e a Dios nguchul a ngera el tekoi? Ka molatk a lolekoi er ngii a Biblia el kmo: a Dios a “milebii a eanged ma chutem,” me a urerel a uldimukl er a bedenged el “ileakl ngodech e mengasireng,” me a Jehovah a “Dios el merreder er a klengar er kau.” (Psalm 124:8; 139:14; Daniel 5:23) Ngera belkul aikang?

Ngbelkul a kmo ngii a uchul a klengar er kid. (Rellir 17:28) Ngdirrek el belkul a kmo tia el sengk er a klengar, me a klebekelel tia el beluulechad el meliuekl er kid, me a deurreng el dolechesuar e le ngbltikerreng me a klausechelei a uchul, me kid el sebeched el mengarm, merutech, orrenges e melungel a rokui el sengk el mla er a Dios. (Jakobus 1:17) Aika el rokui el klengeltengat a uchul me ngsebeched el omekedong er a Dios el Sechelid el ngii a rredemelel a klou el omengull me a klaumerang er kid.

Nguaisei, engdi nglocha dirk meringel er kau el oumerang er a Dios. Alta ke melatk el kmo ngdiak msal ungil medengelii me ngmeringel er kau el mo oumerang er ngii. E tiang a di subed el tekoi. Ngar aika el mekedeb el suobel e ngdiak el sebeched el smaod a rokui el uchul me a rebebil a melekoi el kmo a Dios a mekngit a blekerdelel. Omomdasu e ngmo uchul a klungiolem a moruul aike el sebechem el mo medengelii a Dios? * Ngulterekokl a rengmam el kmo a moruul el uaisei e ke mo medengelii a klemerang el kirel a Dios. Ngmekngit a blekerdelel? Ngkmal diak e le “Dios a bltikerreng.”​—1 Johanes 4:8.