“Te bwai n tutuki ae te kabanea ni kangaanga ni kaineti ma kani kaanian te Atua ae I kataia ngkai n tokanikai i aona, bon namakinan ae ai akea uaau.” Aio ana taeka te aine temanna are e kunea bwa e kangaanga kakoauaan ae e kona Iehova n nora te bwai ae riai n tabeakina iai neiei. Ko namakina naba aei? Ngkana ngaia anne, ko bae n iango ni kangai: ‘E tabeakinia raoi Iehova naake a taromauria n tatabemania nako?’ Te kaeka iai bon eng! Ti nora koauan ae e tabeakinira Iehova n ana taeka Iesu.​—Wareka Ioane 6:44.

Tera ana taeka Iesu are e atai riki nakoia aomata nako aroaron ao nanon Iehova? (Ruka 10:22) E kabwarabwaraa Iesu ni kangai: “Akea te aomata ae kona n nakoiu ngkana e aki katikia te Tama are e kanakomaiai.” Ngaia are ti aki kona n riki bwa te tia rimwini Kristo ao te tia taromauria Tamara are i karawa ae Iehova, ma tii ngkana E katikira nakoina. (2 I-Tetaronike 2:13) Ngkana ti oota n te bwai ae nanonna Iesu, ngkanne ti na bon nora iai te bwai ni kakoaua ae teretere raoi ni kaineti ma tabeakinara iroun te Atua.

Tera ae nanonaki ni katikara iroun Iehova? E kabonganaaki naba te weabe ni Kuriiti ae rairaki bwa “katikaki” ni kaineti ma katikaia iika n te karaun. (Ioane 21:​6, 11) E katikira Iehova n te aro are e kairoroira bwa ti na beku ibukina? E bon aki. E anganira Iehova te inaomata n rinea ae ti na karaoia, ngaia are e bon aki kairoroira bwa ti na tangiria. (Te Tua-Kaua 30:​19, 20) E taekina anne ni kangai temanna te tia rabakau: “Bon akea bwaini kaukani mataroan nanon te aomata mai tinaniku bwa e riai ni kaukaki mai nanona.” E ukeri naano aika birion ma birion Iehova ni kakaaeia te koraki ake a tangiria. (1 Rongorongo 28:9) Ngkana e kunea te aeka n aomata anne, E na karaoa te bwai teuana are e na ringaki iai nanona. N te aro raa?

E kairiri ma te akoi Iehova ke ni katika nanon temanna are e ‘tauraoi ni butimwaea te koaua.’ (Mwakuri 13:48) E karaoa anne n aanga aika uoua bwa rinanon te rongorongo ae raoiroi man te Baibara are e roko iroura n tatabemanira nako ao te taamnei ae raoiroi. Ngkana e nora nanon temanna Iehova bwa e butimwaea te koaua man te Baibara, e a kabongana taamneina ni buokia bwa e na ataia ao ni maiuakina te koaua anne. (1 I-Korinto 2:​11, 12) Ngkana e aki buokira te Atua, ti na bon aki kona n riki bwa taan rimwin Iesu ni koaua ao taan taromauria Iehova aika kakaonimaki.

Tera ngkanne reireiara man ana taeka Iesu ibukin te Atua ae Iehova aika n Ioane 6:44? E katikia aomata Iehova ibukina bwa e nora te bwai ae raoiroi i nanoia ao e tabeakinia n tatabemania nako. N ataakin te koaua ae karaunano aei, e a kabebeteaki iai te aine are taekinaki mai i moa. E taku: “Bon te mwioko ae rangi ni kakawaki ae kona n reke iroun temanna, te beku ibukin Iehova. Ao ngkana e rineai Iehova bwa N na beku ibukina, I a boni kakawaki ngkanne irouna.” Ma tera arom iai? Ko kaungaaki bwa ko na kauka nanom ngkai ko a ataia bwa e tabeakinia taan taromauria Iehova n tatabemania nako?