“Men eo el̦aptata an kar bõbraik eõ bwe in jab ruwaakl̦o̦k ñan Anij ej kõn aõ kar l̦õmn̦ak bwe ejjel̦o̦k tokja.” Eñin ej naan ko an juon kõrã me ekar pen an tõmak bwe Jeova ej yokwe im kaorõk e. Kwõnañin ke kar l̦õmn̦ak rot in? El̦aññe aet, bõlen kwaar l̦õmn̦ak im ba, ‘Anij ej ke lukkuun yokwe im kaorõk kajjojo iaan armej ro me rej kabuñ ñan e?’ Uwaak eo ej aet! Ñan kam̦oole bwe Jeova ej yokwe im kaorõk ro rej kabuñ ñane, jen etale naan ko me Jijej ear ba.​—Riit Jon 6:65, UBS.

El̦apl̦o̦k an Jijej jel̦ã kõn Jeova im kõn ankilaan jãn jabdewõt armej. Ta eo Jijej ear ba? (Luk 10:22) Ear ba: “Ejjel̦o̦k en emaroñ itok ñan ippa el̦aññe Jema ejjab kamaroñe.” Jejjab maroñ kajju erom juon rũkal̦ooran Kũraij im juon eo ej kabuñ ñan Jemãdwõj ilañ, Jeova. Bwe jen maroñ kõm̦m̦ani men kein, Jeova ej aikuj m̦okta kamaroñ kõj ak karuwaakl̦o̦k kõj ñan e. (2 Tessalonika 2:13, UBS) El̦aññe jej mel̦el̦e kõn naan kein an Jijej, innem jenaaj lukkuun kile bwe Jeova ej yokwe im kaorõk kõj kajjojo.

Ewi wãween Jeova ej karuwaakl̦o̦k kõj ñan e? Ej ke iuun kõj bwe jen jerbal ñan e? Ejjab. Jeova ear letok ñan kõj maroñ eo ñan kããlõt ta eo jekõn̦aan kõm̦m̦ane. Mel̦el̦ein men in bwe ejjab iuun kõj ñan kõm̦m̦ani pepe ko. (Duteronomi 30:19, 20, UBS) Jeova ej lale bũruon aolep armej ro ipel̦aakin lal̦ in, im ej pukot ro me rekõn̦aan jel̦ã kõn e. (1 Kronikel 28:9) Ñe Jeova ej lo armej rein, ejjab iuun er ak ej m̦õn̦õn̦õ in jipañ er. Ewi wãween?

Ilo jouj, Jeova ej kajjioñ kõm̦akũt bũruon armej ro me “em̦ool im em̦m̦an bũrueer.” (Luk 8:15) Jeova ej kõm̦m̦ane men in ilo ruo wãween ko. Kein kajuon, ej kõjerbale ennaan ko rem̦m̦an ilo Baibõl̦ eo. Kein karuo, ej kõjerbale kajoor eo an. Ñe Jeova ej kile bũruon armej ro me rej m̦õn̦õn̦õ in roñjake katak ko rem̦ool ilo Baibõl̦, ej kõjerbale kajoor eo an ñan jipañ armej rein kajjojo bwe ren mel̦el̦e im l̦oori katak kein rem̦ool ilo mour ko aer. (1 Korint 2:12, UBS) El̦aññe en kar jab kajoor eo an Anij, jeban kar erom rũkal̦oor ro rem̦ool an Jijej. Bareinwõt, jeban kar erom ro me rej kabuñ im tiljek ñan Jeova.

Ta ko jej katak kõn Jeova Anij jãn naan ko an Jijej ilo Jon 6:65 (UBS)? Jej katak bwe Jeova ej karuwaakl̦o̦k armej ro ñan e kõnke ej kile bwe em̦ool im em̦m̦an bũrueer im ej yokwe im kaorõk er kajjojo. Ke kõrã eo ilo jinoin katak in ear mel̦el̦e naan kein an Jijej, men in ear lukkuun jipañe im kaenõm̦m̦ane. Kõrã in ej ba: “Ejjel̦o̦k juon jeraam̦m̦an el̦apl̦o̦k jãn ad karejar ñan Jeova. Im el̦aññe Jeova ear kããlõt eõ bwe in karejar ñane, mel̦el̦ein men in bwe el̦ap aõ aorõk ippãn.” Ak ta kõn kwe? Kiiõ ke kwõjel̦ã bwe Jeova ej yokwe im kaorõk kajjojo iaan ro rej kabuñ ñan e, kwõnaaj ke kate eok im ruwaakl̦o̦k ñan e?