Mbeni wali so abâ ti lo so a yeke ngangu ti tene Jéhovah apensé tâ na lo atene: “A yeke tâ ngangu na mbi ti zi na li ti mbi so mbi yeke ye oko ape.” Mo kue mo pensé tongaso na tere ti mo wani? Tongana a yeke ni, peut-être mo hunda tere ti mo awe, mo tene: ‘Biani, Jéhovah ayeke pensé tâ na awakua ti lo oko oko la?’ Kiringo tënë ni ayeke en! Lo yeke pensé na e oko oko. E hinga ni na lege ti atënë so Jésus atene.​—Diko Jean 6:44.

Jésus ahinga sarango ye ti Jéhovah tâ nzoni nga na ye so bê ti lo aye. Tongaso, tënë ti nyen la lo tene? (Luc 10:22). Lo tene: “Zo oko alingbi ti ga na mbi pëpe, gi tongana Babâ so atokua mbi si agboto lo aga na lo na mbage ti mbi.” Biani, Jéhovah, Babâ ti e ti yayu, lo mveni la ayeke gboto e, ndani la si e ga adisciple ti Christ nga e yeke voro lo Jéhovah ni (2 aThessalonicien 2:13). Tongana e mä yâ ti atënë ti Jésus so nzoni, andâ e yeke hinga nga so Nzapa ayeke pensé tâ na e.

Jéhovah ayeke gboto e na mbage ti lo ni tongana nyen? Tënë ti yanga ti Grec so a kiri pekoni na “agboto” aye nga ti sara tënë ti gbotongo mbeni gbanda so asusu asi yâ ni (Jean 21:6, 11). A ye ti tene so Jéhovah ayeke gboto e na ngangu ti sara na lo? Oko ape. Jéhovah amû na e liberté ti mû desizion, tongaso e wani la e yeke zi bê ti e ti yamba tënë ti lo, lo gbu e gbungo na ngangu ape (Deutéronome 30:19, 20). Mbeni koli atene: “Bê ti zo ayeke pëpe tongana mbeni yanga-da so maboko ni ayeke na gigi. Me a yeke mbeni ye so a lingbi a zi ni gi na yâ ni.” Jéhovah ayeke bâ yâ ti bê ti azo kue na ndo ti sese so, na lo yeke gi ati so wa la aye ti sara na lo (1 Chronique 28:9). Tongana lo wara mara ti bê tongaso, lo yeke sara mbeni ye so apika bê ti e mingi. Lo yeke sara nyen?

Jéhovah ayeke gboto yeke yeke na mbage ti lo bê ti zo so “ayeke nduru ti yeda na tënë” ti lo (Kusala 13:48). Lo yeke gboto ni na alege use. Kozo ni ayeke na lege ti nzoni tënë ti yâ ti Bible so e mä, na use ni ayeke na lege ti yingo vulu ti lo. Tongana Jéhovah abâ bê ti mbeni zo so ayeda ti mä tâ tënë ti yâ ti Bible, lo yeke mû maboko na zo ni na lege ti yingo vulu ti lo ti mä yâ ni na ti sara ye ague oko na ni na yâ ti gigi ti lo (1 aCorinthien 2:11, 12). A yeke gi tongaso si e ga adisciple ti Jésus na e yeke voro Jéhovah na bê ti e kue.

Tongaso, atënë ti Jésus na Jean 6:44 afa nyen na e na ndo ti Jéhovah Nzapa? A fa so Jéhovah ayeke gboto azo na mbage ti lo ngbanga ti so lo bâ mbeni nzoni ye na yâ ti bê ti ala na lo yeke pensé na ala. Mango yâ ti pendere tënë so adë bê ti wali so e sara tënë ti lo fade. Lo tene: “Zo so ayeke wakua ti Jéhovah, kota pasa la lo yeke na ni so. Ni la, tongana Jéhovah airi mbi ti ga wakua ti lo, a fa so lo bâ mbi na nene ni mingi.” Ka mo? So mo hinga mo tene Jéhovah ayeke pensé na awakua ti lo oko oko kue apusu mo ti zi bê ti mo ti yamba tënë ti lo?