Mulebomba Umulimo Mwapeelwa Uwa Kubila

“Bomba umulimo wa kwa kabila wa mbila nsuma, bombesha umulimo obe onse.”—2 TIM. 4:5.

KUTI MWAYASUKA SHANI?

Bushe kabila wa mbila nsuma nani?

Mulandu nshi abantu bafwile ukumfwila imbila nsuma?

Finshi ifyo ababomba bwino umulimo wa kubila imbila nsuma bacita?

1. Mulandu nshi twingalandila ukuti Yehova e wabalilepo ukuba Kabila wa mbila nsuma?

KABILA wa mbila nsuma ni ulya uwebako bambi ilyashi ilisuma. Yehova Lesa e wabalilepo ukuba Kabila wa mbila nsuma. Ilyo fye abafyashi besu aba kubalilapo bapondweke, Yehova abilile imbila nsuma iya kuti insoka, e kutila Satana Kaseebanya, ikonaulwa. (Ukute. 3:15) Kale, Yehova apeele umupashi wakwe uwa mushilo ku baume ba cishinka ukuti balembe ifyo ishina lyakwe lyali no kulengwa ilya mushilo, ifyo ali no kufumyapo ifyabipa ifyo Satana aleta ne fyo abantunse bengakwata na kabili amapaalo ayo Adamu na Efa bapanishe.

2. (a) Mulimo nshi uo bamalaika babomba uwakuma ukubila imbila nsuma? (b) Bushe Yesu alemona shani umulimo wa kushimikila?

² Bamalaika nabo ni bakabila ba mbila nsuma kabili balafwa abantu ukubila imbila nsuma. (Luka 1:19; 2:10; Imil. 8:26, 27, 35; Ukus. 14:6) Bushe Mikaele, malaika mukalamba, na o ni kabila wa mbila nsuma? IlyoYesu ali pano calo, abikile amano ku kubila imbila nsuma. Ifyo acitile filanga ukuti na ifwe tufwile ukulamona umulimo wa kushimikila ukuti walicindama sana!—Luka 4:16-21.

3. (a) Ni mbila nsuma nshi tubila? (b) Mepusho nshi twalalanshanyapo?

³ Yesu aebele abasambi bakwe ukulabila imbila nsuma. (Mat. 28:19, 20; Imil. 1:8) Umutumwa Paulo akoseleshe kabomba munankwe Timote ukuti: “Bomba umulimo wa kwa kabila wa mbila nsuma, bombesha umulimo obe onse.” (2 Tim. 4:5) Ni mbila nsuma nshi iyo fwe basambi ba kwa Yesu tubila? Muli iyi mbila nsuma mwaba icine ca kuti Shifwe wa ku muulu, Yehova, alitutemwa. (Yoh. 3:16; 1 Pet. 5:7) Ubufumu ubo Yehova Lesa abikako, e nshila yacindama iyo atulangilamo ukuti alitutemwa. E ico tulatemwa ukwebako bambi ukuti bonse  abanakila Ubufumu bwa kwa Lesa, abamumfwila kabili abacita icalungama kuti baba ifibusa fyakwe. (Amalu. 15:1, 2) Na kuba, Yehova akafumyapo ukucula konse. Na kabili akalenga abantu ukukanaumfwa ububi nga baibukisha ifyabipa ifyo bapitamo. Ala kwena iyi ni mbila nsuma! (Esa. 65:17) Apo ni fwe bakabila ba mbila nsuma, twalalanshanya amepusho yabili ayacindama aya kuti: Mulandu nshi cicindamine ukuti abantu bomfwe imbila nsuma? Kabili kuti twabomba shani bwino umulimo twapeelwa uwa kubila imbila nsuma?

MULANDU NSHI ABANTU BALINGILE UKUMFWILA IMBILA NSUMA?

4. Malyashi nshi aya bufi ayo abantu balanda pali Lesa?

⁴ Elenganyeni ukuti bamweba ukuti bashinwe nabamubutuka. Tutile na bantu abatila balibeshiba bamweba ukuti, bashinwe bali-ifinya, tabafwaya bambi baishiba ifyo balecita, kabili bankalwe. Bambi kuti balemweba no kuti, muleipoosela fye inshita ukuya mu kufwaya bashinwe pantu balifwa. Ifi e fyo abantu abengi babeba pali Lesa. Babasambilisha ukuti Lesa te kuti tumwishibe no kutila munkalwe. Ku ca kumwenako, bashimapepo bamo batila Lesa akakanda abantu mu mulilo wa pe. Bambi batila Lesa e ulenga utuyofi utucitika utulenga abantu ukucula. Nangu ca kutila utuyofi tulepaya abasuma kumo na babi, batila Lesa e ulenga utuyofi pa kuti akande abantu.

5, 6. Bushe icisambilisho ca kusanguka ne fisambilisho fimbi ifya bufi fyakuma shani abantu?

⁵ Bambi nabo batila takwaba Lesa. Ku ca kumwenako, balanda ukuti ifintu fyasangwike fye. Abengi abasumina muli ici cisambilisho batila, takwaba Kabumba. Bamo balanda fye no kuti umuntu ni nama, kanshi te kuti tupape nga ca kutila alecita ifya bunama. E mulandu wine abantu abengi balandila ukuti ulufyengo talwakapwe pantu basumina ukuti abantu abakwata amaka bafwile ukuba no bunkalwe ku bantu abashakwata amaka. Kanshi, abantu abasumina mu kusanguka tabakwata isubilo lya cine cine.

⁶ Ukwabula no kutwishika, icisambilisho ca kuti ifintu fyasangwike fye ne fisambilisho fya mipepele ya bufi fyalileta sana amafya pa bantunse muli shino nshiku sha kulekelesha. (Rom. 1:28-31; 2 Tim. 3:1-5) Ifi fisambilisho ifyo abantu basambilisha, te mbila nsuma. Lelo, nga filya umutumwa Paulo alandile, filenga fye ‘amatontonkanyo ya bantu ukuba mu mfifi, no kutaluka ku mweo uufuma kuli Lesa.’ (Efes. 4:17-19) Na kabili, icisambilisho ca kuti ifintu fyasangwike fye ne fisambilisho fya mipepele ya bufi fyalenga abantu ukukaana imbila nsuma iyafuma kuli Lesa.—Belengeni Abena Efese 2:11-13.

7, 8. Ni nshila nshi iyo abantu bengeshibilamo bwino imbila nsuma?

⁷ Pa kuti abantu babwelele kuli Lesa, intanshi balingile ukushininkisha ukuti Yehova e ko aba no kuti kwaliba ifyacindama ifilingile ukubalenga ukupalama kuli ena. Kuti twabafwa ukwishiba bwino Lesa ukupitila mu kumona ifyo abumba. Abantu nga balesambilila pa bubumbo kabili tabaletwishika ifyo balesambilila, baleshiba amano ya kwa Lesa na maka akwata. (Rom. 1:19, 20) Pa kuti twafwe abantu ukuba na katiina ilyo batontonkanya pa fyo Kabumba Mukalamba aacita, kuti twabomfya impapulo ishilanda pali ili lyashi. Ku ca kumwenako, kuti twabomfya icitabo citila Palameni Kuli Yehova mu cipandwa 17. Na lyo line, ukumona fye ifyo Lesa abumba te kuti kubafwe ukwishiba amasuko ku mepusho ayo abantu abengi bepusha pamo nga: Mulandu nshi Lesa asuminishisha ukucula? Mulandu nshi Lesa apangile isonde? Bushe Lesa alansakamana?

⁸ Inshila imo iyo abantu bengeshibilamo bwino imbila nsuma ya kwa Lesa no bufwayo bwakwe kusambilila Baibolo. Ala lishuko nga nshi ukwafwa abantu ukwishiba amasuko ku mepusho bakwata! Lelo  pa kuti tufike pa mitima ya bantu, tufwile ukubanashanasha pa kuti bashininwe ukuti ifyo balesambilila fya cine, te kulabeba fye ifishinka. (2 Tim. 3:14) Nga ca kutila tulepashanya Yesu, tukalanashanasha bwino abantu. Cinshi calengele ukuti alenashanasha bwino abantu? Umulandu umo wa kuti alebomfya bwino amepusho. Kuti twamupashanya shani?

BAKABILA BA MBILA NSUMA ABABOMBA BWINO BALABOMFYA BWINO AMEPUSHO

9. Finshi tufwile ukucita pa kuti twafwe abantu ukusumina imbila nsuma?

⁹ Nga filya Yesu alecita, mulandu nshi na ifwe tulingile ukubomfesha ifipusho ilyo tuleshimikila? Katulangilile: Elenganyeni ukuti dokota wenu amweba ati nakwata ilyashi ilisuma ilya kumweba. Atila kuti amuposha nga mwaya ku opareshoni. Nalimo kuti mwamucetekela. Lelo nga amweba ukuti muye ku opareshoni ilyo ashilamwipusha icili conse pa bulwele mulwele, bushe kuti mwamucetekela? Nalimo te kuti mumucetekele. Nangu ca kuti dokota alicenjela sana, afwile ukumwipusha ifyo muleumfwa no kukutika ilyo mulelondolola ilyo ashilamundapa. Pa kuti na ifwe twafwe abantu ukusumina imbila nsuma ya Bufumu, tulingile ukusambilila ifya kwipusha bwino amepusho. Nga twabepusha e lyo twingeshiba umo balekabila ukubafwa mu fya kwa Lesa.

10, 11. Finshi nalimo fingafumamo nga tulepashanya ifyo Yesu alesambilisha?

¹⁰ Yesu alishibe ukutila amepusho ayasuma tayafwa fye uulesambilisha ukwishiba umusambi lelo yalalenga no musambi ukulanda ifyo aletontonkanya. Ku ca kumwenako, ilyo Yesu alefwaya ukusambilisha abasambi bakwe ukuicefya, abalile abepusha icipusho. (Marko 9:33) Ilyo Yesu alesambilisha Petro ifya kubomfya ifishinte mu mikalile, amwipwishe icipusho no kumweba ukuti asalepo icasuko. (Mat. 17:24-26) Pa nshita imbi, ilyo Yesu alefwaya ukwishiba ifyo abasambi bakwe baletontonkanya, alibepwishe amepusho ayalekanalekana. (Belengeni Mateo 16:13-17.) Ukubomfya ifipusho no kulondolola bwino ifyebo kwalengele abantu ukusumina imbila nsuma no kwaluka.

¹¹ Nga tulebomfya bwino ifipusho nga filya Yesu alecita, tukeshiba bwino ifyo twingafwa abantu, tukeshiba ifya kunashanasha balya abashifwaya ukulanshanya, kabili tukalasambilisha abantu ifyo benganonkelamo mu Cebo ca kwa Lesa. Twalalanda pa fintu fitatu ifingacitika ifyalatwafwa ukwishiba ifyo twingabomfya bwino ifipusho.

12-14. Kuti mwa-afwa shani umwana wenu ukukanaba no mwenso ilyo aleshimikila? Langilileni.

¹² Ica kubalilapo: Tutile muli bafyashi, bushe kuti mwacita shani nga ca kutila umwana wenu umupungwe amweba ukuti teshibe ifyo engalondolwela umunankwe ku sukulu umulandu asuminina ukuti ifintu fyabumbilwe fye? Ukwabula no kutwishika kuti mwafwaya ukumwafwa ukukanaba no mwenso ilyo ale-ebako bambi imbila nsuma. Kanshi mu nshita ya kumulengulula nelyo ukumweba ifya kucita apo pene, kuti cawama mwamwipusha ifyo aletontonkanya nga filya Yesu alecita. Kuti mwacita shani ifi?

¹³ Pa numa ya kubelenga no mwana wenu mu citabo citila Palameni Kuli Yehova, kuti mwamwipusha ukulondolola ifishinka ifyo alemona ukutila kuti fyafika uo alelandako pa mutima. Mukoselesheni ukutontonkanya na pali fimbi ifyalenga ukuti asumine ukuti kwaliba Kabumba no mulandu afwaila ukulacita ukufwaya kwakwe. (Rom.  12:2) Lekeni umwana wenu eshibe ukuti umulandu walenga ukuti asumine ukuti kwaliba Kabumba walipusana no mulandu imwe mwasuminina.

¹⁴ Londolweleni umwana wenu ukuti ilyo alelanda no munankwe wa ku sukulu kuti akonka ifi fine mwacita. E kutila, kuti alanda pa fishinka fimo lyena kuti aipusha ifipusho ifingalenga uo alelandako ukulondolola ifyo aletontonkanya pali ilyo lyashi. Ku ca kumwenako, kuti aeba umunankwe ukubelenga paragrafu 12 pe bula 173 mu citabo citila Palameni Kuli Yehova. Lyena kuti aipusha umunankwe ukuti, ‘Bushe ca cine bongobongo ya muntu kuti yasunga ifyebo fyonse ifyaba mu malaibrari yonse aya pe sonde kabili ifyebo ifyo bongobongo ingasunga fingi sana ica kuti te kuti fipimwe?’ Umunankwe kuti ayasuka kuti ee, ca cine. Lyena umwana wenu kuti amwipusha ukuti, ‘Bushe uletontonkanya ukuti bongobongo iisunga ifyebo ifyafula ifi yaishileko fye ukwabula uwa kuipanga?’ Pa kuti mwafwe umwana wenu ukukanaba no mwenso ilyo alelanda na banankwe pa fyo asuminamo, mufwile mulelanshanya nankwe lyonse ifyo afwile ukulanda. Nga mwasambilisha umwana wenu ifya kwipusha bwino amepusho, mukalenga akalebomba bwino umulimo wa kubila imbila nsuma.

15. Kuti twabomfya shani amepusho pa kuti twafwe abasumina ukuti Lesa takwaba?

¹⁵ Ica bubili: Ilyo tushimikila, tulasanga abantu abatwishika nga ca kuti Lesa e ko aba. Ku ca kumwenako, umuntu kuti atweba ati asumina ukutila Lesa takwaba. Mu nshita ya kuleka ukulanshanya nankwe pa mulandu wa fyo atweba, kuti twamwipusha ilyo atendeke ukukaana ukuti Lesa takwaba ne calengele ukuti alekaana. Pa numa ya kukutika ku fyo ayasuka no kumutasha pa kuti alitontonkenyepo sana pali ili lyashi, nalimo kuti twamwipusha nga kuti atemwa ukubelenga ifyebo fimo ifilangilila ukuti ubumi bwabumbilwe fye. Nga ca kuti umwine wa ng’anda alafwaya  ukukutika ku fyo bambi balanda, nalimo akasumina ukubelenga ifyo fyebo. Lyena kuti twamupeela icitabo citila Palameni Kuli Yehova. Nga twamwipusha bwino amepusho no kuba ne cikuuku ilyo tulelanshanya nankwe, nalimo kuti afwaya ukumfwa imbila nsuma.

16. Mulandu nshi tushifwile ukulekela umusambi ukubelenga fye ifyasuko mu citabo tulesambililamo?

¹⁶ Ica butatu: Ilyo tuletungulula isambililo lya Baibolo, nalimo tuleka umusambi alebelenga fye ifyasuko mu citabo. Ukucita ifi, kuti kwalenga umusambi ukukanalunduluka. Mulandu nshi? Pantu nga alebelenga fye ifyasuko ukwabula ukutontonkanya pa fyo alesambilila, icitetekelo cakwe te kuti cikose. Nga aba na mafya kuti anenuka kwati ni filya icimuti cuma nga ca kutila imishila ya ciko tayaingila sana mu mushili. (Mat. 13:20, 21) Pa kuti ica musango uyu tacicitike, tufwile ukwipusha umusambi ifyo aletontonkanya pa fyo alesambilila. Esheni ukumona nga ca kutila alesumina ukuti ifyo alesambilila fya cine. Ne cacindama ca kuti, mufwile ukuleka alanda umulandu asuminina nelyo akaanina fimo. Lyena mwafweni ukulatontonkanya pa Malembo pa kuti umwine akashininkishe ukuti ifyo alesambilila fya cine. (Heb. 5:14) Nga tulebomfya bwino amepusho, abo tusambilisha Baibolo bakaba ne citetekelo icakosa kabili bakakaana ukukonkelela abakalabasusha nelyo ukufwaya ukubalufya. (Kol. 2:6-8) Finshi fimbi ifyo twingacita pa kubomba bwino umulimo twapeelwa uwa kubila imbila nsuma?

BAKABILA BA MBILA NSUMA ABABOMBA BWINO BALAFWANA

17, 18. Kuti twabombela shani pamo no Mwina Kristu munensu ilyo tuleshimikila?

¹⁷ Yesu atumine abasambi bakwe babili babili ukuya mu kushimikila imbila nsuma. (Marko 6:7; Luka 10:1) Pa numa, umutumwa Paulo alandile pa balebombela pamo nankwe mu kubila mbila nsuma ukuti ‘babomfi banankwe.’ (Fil. 4:3) Ukulingana ne fi ifya kumwenako ifya mu Malembo, mu 1953, bakabila ba mbila ya Bufumu batendeke ukukansha bambi mu mulimo wa kushimikila.

¹⁸ Kuti twabombela shani pamo no Mwina Kristu munensu ilyo tuleshimikila? (Belengeni 1 Abena Korinti 3:6-9.) Ilyo uo mulebomba nankwe alebelenga ilembo, mulekonkamo muli Baibolo yenu. Mulekutikisha ilyo uo mulebomba nankwe nelyo ilyo mwine ng’anda alelanda. Mulekutikisha ilyo balelanshanya pa kuti nga kwaba icipusho kuti mwa-afwako munyinenwe ukulondolola. (Luk. Mil. 4:12) Lelo muleibukisha ukuti: Tamufwile ukucilinganya uo mulebomba nankwe ilyo alepelulushanya no mwine wa ng’anda. Nga mulecilinganya munyinenwe ilyo aleshimikila, kuti mwalenga afuupulwa kabili no mwine wa ng’anda teti omfwe ifyo mulelandapo. Inshita shimo kuti mwalandapo ilyo balelanshanya. Lelo nga mwafwaya ukulandapo, mulelandapo fye panono. Lyena lekeni uulelanshanya no muntu muleshimikilako atwalilile.

19. Cinshi tufwile ukulaibukisha, kabili mulandu nshi?

¹⁹ Ilyo muleshimikila ku ng’anda ne ng’anda, kuti mwa-afwana shani? Ilyo mwafuma pa ng’anda imo muleya pa ikonkelepo, kuti cawama ukulanshanyako fimo ifyo mwingacita pa kuti muwamyeko ifyo mwalashimikila pa ng’anda ikonkelepo. Tamufwile ukulalanda ifibi pa bantu baba mu cifulo mushimikilamo ifingalenga uo muli nankwe ukufuupulwa. Na kabili ilyo tuleshimikila tatufwile ukulanda ifyabipa pali bamunyinefwe. (Amapi. 18:24) Tufwile ukulaibukisha ukuti tuli fipe fye bumba. Yehova alitulanga icikuuku icikalamba pa kutupeela umulimo wa kushimikila imbila nsuma uwaba cuma. (Belengeni 2 Abena Korinti 4:1, 7.) E ico natulelanga ukuti tulatasha pali ici cuma ilyo tulebomba umulimo wa kubila imbila nsuma uo Lesa atupeela.

[Ifipusho]