1. Dahaka dainai ita gwau diba Iehova be Evanelia Tauna ginigunana?

 EVANELIA tauna be sivarai namona ia harorolaia tauna. Iehova Dirava be Evanelia Tauna ginigunana. Adamu bona Heva idia gwau-edeede murinai, ia be maoromaoro sivarai namona ia gwauraia. Ia gwau gaigai, Satani Diabolo unai, be do idia hamasea. (Gen. 3:15) Lagani momo lalodiai, Iehova ese iena ladana do ia hahelagaia, Satani ese ia havaraia hekwakwanai do ia kokia, bona taunimanima ese mauri hanaihanai do idia abia dalana ia gwauraia. Unai sivarai namodia be Baibel ai idia noho.

2. (a) Evanelia gaukarana lalonai aneru be dahaka idia karaia? (b) Evanelia taudia dekenai Iesu be dahaka haheitalai ia hahedinaraia?

² Aneru danu be evanelia taudia. Idia be sivarai namona idia gwauraia bona ma haida idia durua sivarai namona idia harorolaia totona. (Luka 1:19; 2:10; Kara 8:26, 27, 35; Apok. 14:6) Aneru badana Mikaela be edena bamona? Iesu be tanobada ai ia noho neganai, ena mauri lalonai sivarai namona harorolaia gaukarana ia atoa guna! Ita dekenai ia be haheitalai namona.​—⁠Luka 4:16-21.

3. (a) Ita harorolaia sivarai namona be dahaka? (b) Edena henanadai edia haere do ita tahua?

³ Iesu ese ena hahediba taudia ia hagania evanelia gaukara idia karaia totona. (Mat. 28:19, 20; Kara 1:8) Aposetolo Paulo ese ena turana Timoteo ia hagoadaia: “Evanelia tauna ena gaukara oi karaia, bona emu hesiai gaukara oi hagugurua momokani.” (2 Tim. 4:5) Ita harorolaia sivarai namona be dahaka? Taunimanima ita hamaoroa iseda guba Tamana, Iehova be ita ibounai ia lalokau henia. (Ioa. 3:16; 1 Pet. 5:7) Dirava ese ena Basileia amo iena lalokau taunimanima dekenai ia hahedinaraia. Unai dainai mai moale ida taunimanima ita  hadibaia, bema Basileia ena lohia dalana idia abia dae, Dirava idia kamonai henia bona kara maoromaoro idia badinaia, Dirava ena turana ai idia lao diba. (Sal. 15:1, 2) Momokani, Iehova ia ura hisihisi ibounai ia haorea vaitani. Danu, ita do laloatao noho lalohisihisi gunadia ibounai do ia kokia. Unai be sivarai namona! (Isa. 65:17) Ita be evanelia taudia dainai, inai henanadai badadia rua ita laloa be namo: (1) Hari, dahaka dainai taunimanima ese sivarai namona idia kamonai be gau badana? (2) Edena dala ai iseda evanelia gaukara ita karaia namonamo diba?

4. Haida edia lalohadai Dirava dekenai be dahaka?

⁴ Mani oi laloa, emu tamana idia diba taudia idia gwau, emu tamana be oi, emu sinana bona tadidia ia rakatania. Idia gwau ia be emui namo ia laloa lasi, umui amo gau haida ia hunia bona ia be dagedage tauna. Ma haida idia gwau, emu tamana ia mase dainai do oi davaria lou lasi. Taunimanima be Dirava dekenai unai bamona hereva idia gwauraia danu. Idia gwau Dirava ia noho lasi, ita tura henia diba lasi bona ia be dagedage tauna. Hegeregere, tomadiho gunalaia taudia haida idia gwau, Dirava ese kara dika taudia be gabu ta ai do ia hahisidia hanaihanai. Danu, haida idia gwau Dirava ese dika badadia ia havaraia. Bona ena be unai dika badadia lalodiai taunimanima dikadia bona namodia idia mase hebou, to idia gwau unai be Dirava ese ia panisidia.

5, 6. Edena dala ai evolusen lalohadaina bona hahediba hereva koikoidia ese taunimanima idia hakaua kerere?

⁵ Ma haida idia gwau Dirava ia noho lasi. Mani evolusen lalohadaina idia abia dae taudia ita laloa. Idia gwau mauri gaudia be idia vara kava, bona Havaraia Tauna ta be lasi. Haida idia gwau taunimanima be animal amo idia mai, unai dainai bema ta ena kara be animal bamona, unai be hoa gauna lasi. Idia gwau, dagedage taudia ese goada lasi taudia idia biagua auka be kerere lasi bona unai kara be do ia noho hanaihanai. Momokani, evolusen lalohadaina idia abia dae taudia dekenai helaro be lasi.

⁶ Inai dina gabediai, evolusen bona hahediba hereva koikoidia dainai, taunimanima be hisihisi bada idia davaria noho. (Roma 1:28-31; 2 Tim. 3:1-5) Unai lalohadai bona hahediba herevadia be sivarai namodia lasi. Bona aposetolo Paulo ia gwau, unai gaudia dainai taunimanima “edia lalona be ia dibura, bona Dirava ena amo ia mai mauri amo idia daudau.” (Efe. 4:17-19) Danu, evolusen lalohadaina bona hahediba hereva koikoidia ese taunimanima idia koua dainai, Dirava amo ia mai sivarai namona idia abia dae lasi.​—⁠Efeso 2:11-13 duahia.

7, 8. Taunimanima ese sivarai namona idia diba dalana tamona be dahaka?

⁷ Taunimanima be Dirava ‘danu do idia turana karaia’ totona, gau ginigunana be do idia abia dae Dirava be ia mauri noho bona badina namodia dainai, ia idia dibaia diba. Idia ita durua diba Dirava ese ia havaraia gaudia idia stadilaia totona. Bema idia be Ia ese ia havaraia gaudia idia stadilaia bona laloa dobu, Dirava ena aonega bona siahu do idia lalopararalaia. (Roma 1:19, 20) Taunimanima ita durua eda Havaraia Tauna Badana ese ia karaia gaudia idia moalelaia totona, namona be Iehova Kahirakahira Oi Lao bukana ita gaukaralaia. To, Dirava ese ia havaraia gaudia idia stadilaia karana sibona amo inai henanadai edia haere do idia davaria lasi: Dahaka dainai Dirava ese hisihisi ia koua lasi? Dirava ena ura tanobada totona be dahaka? Dirava ese lau ia laloa bada, eiava?

⁸ Taunimanima ese Dirava ena sivarai namona bona ena ura do idia diba dalana tamona be, Baibel do idia stadilaia. Taunimanima  ita durua edia henanadai edia haere idia davaria totona be hahenamo ta! To, kamonai tauna ita durua Dirava ia tura henia bona abidadama henia totona, ia dekenai hereva momokani ita hadibaia sibona be hegeregere lasi. Namona be ia ita durua ia dibaia gaudia ia abia dae momokani totona. (2 Tim. 3:14) Unai ita karaia totona, Iesu ita tohotohoa be namo. Dahaka dainai Iesu be taunimanima edia lalona ia veria? Dala ta be ia ese henanadai namodia ia gaukaralaia. Edena dala ai ia ita tohotohoa diba?

9. Edena dala ai taunimanima ita durua sivarai namona idia abia dae totona?

⁹ Evanelia gaukarana lalonai, dahaka dainai Iesu bamona, henanadai ita gaukaralaia be namo? Mani inai haheitalai oi laloa: Emu doketa be oi dekenai sivarai namona ta ia gwauraia. Ia gwau opereisen badana do oi abia bena emu gorere do ia hanamoa. Reana iena hereva do oi abia dae. To bema ia be emu gorere dainai oi ia nanadaia lasi, to maoromaoro ia gwau unai opereisen do oi abia, iena hereva do oi abia dae, a? Reana lasi. Herevana ia be diba bada doketa, to namona be oi ia nanadaia guna bona emu hereva ia kamonai namonamo, unai amo heduru maorona ia henia diba. Unai hegeregerena, bema ita ura taunimanima ita durua Basileia ena sivarai namona idia abia dae totona, namona be henanadai gaukaralaia namonamo dalana ita dibaia. Unai amo edia lalohadai do ita diba bona idia do ita durua namonamo.

10, 11. Iesu bamona, henanadai ita gaukaralaia namonamo neganai, edena dala ai unai ese ita do ia durua?

¹⁰ Iesu ia diba, tisa ese henanadai namodia ia gaukaralaia neganai, stiuden be ena lalohadai do ia gwauraia, bona tisa ese ena lalohadai do ia dibaia. Hegeregere, Iesu ia ura ena hahediba taudia dekenai manau karana ia hadibaia neganai, ia ese lalona veria henanadai ta ia henidia guna. (Mar. 9:33) Nega ta Iesu ese Petero dekenai henanadai ta ia henia, haere rua ia gwauraia, bena Petero ia hamaoroa haere maorona do ia abia hidi. Unai amo ia ese Petero ia durua mai anina bada gauna ta ia dibaia totona. (Mat. 17:24-26) Ma nega ta, Iesu ia ura iena hadibaia taudia ese edia lalohadai idia gwauraia dainai, ia henanadai henidia. (Mataio 16:13-17 duahia.) Iesu be henanadai ia henia bona mai anina bada herevadia amo hereva momokani ia hahedinaraia. To danu, ia ese taunimanima edia lalona ia veria sivarai namona idia abia dae bona edia mauri idia haidaua totona.

¹¹ Iesu bamona, bema haroro gaukara lalonai henanadai ita gaukaralaia namonamo, unai ese dala toi ai ita ia durua: (1) Ruma tauna durua dalana ita dibaia, (2) koua herevadia ita haerelaia diba, bona (3) manau taudia ita durua sivarai namona amo namo idia abia totona. Hari, henanadai ita gaukaralaia namonamo totona, haheitalai toi do ita herevalaia.

12-14. Edena dala ai emu natuna oi durua diba, mai gari lasi ida sivarai namona ia harorolaia totona? Haheitalai ta gwauraia.

¹² Haheitalai 1: Bema emu natuna ia gwau, ia gari ena klas turadia dekenai Dirava ese gau ibounai ia havaraia herevana ia harorolaia, edena dala ai ia oi durua diba? Momokani, oi ura emu natuna oi durua mai gari lasi ida sivarai namona ia harorolaia totona. Unai dainai, namo lasi oi gwau henia  o maoromaoro oi sisiba henia, to namona be Iesu oi tohotohoa bona emu natuna dekenai lalona veria henanadai haida oi gwauraia. Edena dala ai unai oi karaia diba?

¹³ Emu natuna ida Iehova Kahirakahira Oi Lao bukana ena rau 172 ai paragraf haida umui duahia murinai, oi nanadaia edena kahana ia moalelaia. Danu, oi nanadaia dahaka badina namodia ma haida dainai ia abia dae Havaraia Tauna ta ia noho, bona dahaka dainai ia ura Dirava ia hesiai henia. (Roma 12:2) Ia oi hamaoroa sibona ena lalohadai amo unai ia gwauraia diba.

¹⁴ Emu natuna oi hamaoroa ena klas turadia ia haroro henidia neganai, oi hahedinaraia dalana do ia badinaia. Ena turadia dekenai Dirava ese ia havaraia gaudia haida ia herevalaia, bena lalona veria henanadai haida ia henia diba. Hegeregere, ena klas turana ta ia noia diba Iehova Kahirakahira Oi Lao bukana ena rau 172, paragraf 12 ia duahia totona. Bena do ia nanadaia, “Momokani, taunimanima edia harana ia hegeregere tanobada ena laiberi dekenai idia noho buka ibounai edia hereva ia laloatao, bona gau ma haida ia dibaia totona, a?” Reana ena turana do ia haere, “Oibe.” Vadaeni emu natuna do ia henanadai, “Oi laloa iseda harana be ia vara kava, a?” Namona be emu natuna ida unai umui tohoa, unai amo ia oi durua diba mai gari lasi ida ena abidadama ia gwauraia hedinarai totona. Unai bamona oi hadibaia neganai, ia do oi durua evanelia tauna namona ai ia lao totona.

15. Edena dala ai henanadai karana amo Dirava ia noho lasi lalohadaina ia abia dae tauna ita durua diba?

¹⁵ Haheitalai 2: Nega haida haroro gaukara ai ita davaria taudia haida be idia daradara, Dirava ia noho eiava lasi. Hegeregere, reana ta ia gwau ia abia dae Dirava ia noho lasi. Namo lasi ena lalohadai dainai ita rakatania, to mai hemataurai ida do ita nanadaia edena negai bona dahaka dainai unai  lalohadai ia abia dae. Ena lalohadai ia gwauraia murinai, ita tanikiu henia bona ita nanadaia bema ia ura Dirava ese gau ibounai ia havaraia ia herevalaia bukana ta ia duahia. Bema ia ura, vadaeni Iehova Kahirakahira Oi Lao bukana ita hariharilaia diba. a Oibe, mai hemataurai ida henanadai ita henia karana ese ruma tauna ena lalona ia veria diba, sivarai namona ia abia dae totona.

16. Edena dala ai Baibel stiuden ita durua diba, unai amo sibona ena hereva amo do ia haere?

¹⁶ Haheitalai 3: Baibel stadi ita karaia neganai, nega haida stiuden be paragraf amo ena haere ia duahia sibona. Bema unai ia karaia, hereva momokani lalonai do ia goada lasi. Dahaka dainai? Badina bema ena haere be paragraf amo ia duahia sibona, ia be au ta bamona ena ramuna be tano lalonai idia diho momokani lasi. Dagedage ia davaria neganai, haraga herea do ia moru, au ia kakoro bamona. (Mat. 13:20, 21) Unai ia vara lasi totona, stiuden do ita nanadaia ia dibaia gaudia dekenai ena lalohadai do ia gwauraia. Namona be oi nanadaia edena gaudia ia abia dae bona dahaka dainai unai bamona ia laloa. Bena ia oi durua Baibel siridia edia anina ia lalopararalaia totona, unai amo lalohadai maorona ia abia diba. (Heb. 5:14) Bema ita ese henanadai ita gaukaralaidia namonamo, stiuden ena abidadama be do ia goada bona ia idia dagedage o hakaua kerere taudia do ia dadaraia. (Kol. 2:6-8) Dahaka gau ma haida ita karaia diba eda evanelia gaukarana ita hagugurua totona?

17, 18. Haroro gaukara ai pablisa ma ta ita bamoa neganai, edena dala ai ia ida ita gaukara hebou diba?

¹⁷ Iesu ese ena hahediba taudia be haroro gaukara totona rua rua ai ia siaidia. (Mar. 6:7; Luka 10:1) Gabeai, Paulo ese sivarai namona harorolaia totona ia “ida idia gaukara hebou taudia” ia herevalaia. (Fili. 4:3) Unai siri hegeregerena, lagani 1953 ai, Iehova ena orea ese program matamata ta ia hamatamaia: Haroro gaukara lalonai lo pablisa ese pablisa ma haida dekenai treinini idia henia.

¹⁸ Haroro gaukara ai pablisa ma ta oi bamoa neganai, edena dala ai umui gaukara hebou namonamo diba? (1 Korinto 3:6-9 duahia.) Namona be pablisa ese ia gaukaralaia siridia be emu Baibel ai oi itaia danu. Ia bona ruma tauna idia herevahereva neganai, oi kamonai namonamo. Unai amo ruma tauna be koua herevana ta ia gwauraia neganai, pablisa oi durua diba. (Had. 4:12) To inai oi laloatao be namo: Pablisa be ruma tauna ia haroro henia noho lalonai, iena hereva oi utua lasi. Badina bema iena hereva oi utua, pablisa do ia lalohisihisi bona ruma tauna be do ia daradara. Danu, bema oi hereva, namona be emu hereva oi hakwadogia bona pablisa ese ruma tauna do ia hereva henia lou.

19. Dahaka ita laloatao be gau badana, bona dahaka dainai?

¹⁹ Ruma ta umui haorea bena ruma ma ta umui lao noho lalonai, edena dala ai ta ta umui durua diba? Unai nega umui gaukaralaia diba emui hamatamaia herevadia umui hanamoa totona. Namona be emui teritori ai idia noho taudia umui gwauraia dika lasi. Ma danu, namo lasi tadikaka taihu ma haida ita maumauraia. (Aon. 18:24) Namona be ita laloatao ita ibounai be goevadae lasi taudia. To, Iehova ese ita dekenai sivarai namona harorolaia gaukarana ia henia, bona unai be hahenamo badana. (2 Korinto 4:1, 7 duahia.) Unai dainai, namona be ita ibounai ita gaukara goada, eda evanelia gaukarana ita karaia namonamo totona.