1. Apay a maawagan ni Jehova iti kaunaan ken kangrunaan nga Ebanghelisador?

TI EBANGHELISADOR wenno managebanghelio ket maysa a mangipakpakaammo iti naimbag a damag. Ni Jehova a Dios ti kaunaan ken kangrunaan nga Ebanghelisador. Idi nagsukir dagiti umuna a nagannaktayo, impakaammo ni Jehova ti naimbag a damag a madadaelto ti serpiente, ni Satanas a Diablo. (Gen. 3:15) Iti adu a siglo, pinaltiingan ni Jehova dagiti matalek a lallaki a mangisurat kadagiti detalye no kasano a maikkat ti pannakaumsi ti naganna, no kasano a mapukaw dagiti dakes a kasasaad a gapuanan ni Satanas, ken no kasano a maisubli dagiti oportunidad a napukaw da Adan ken Eva.

2. (a) Ania ti akem dagiti anghel iti trabaho a panagebanghelio? (b) Kasano a nagbalin ni Jesus nga ulidan kadagiti ebanghelisador?

² Ebanghelisador met uray dagiti anghel. Ipakpakaammoda ti naimbag a damag, ken tultulonganda ti sabsabali a mangiwaragawag iti naimbag a damag. (Luc. 1:19; 2:10; Ara. 8:26, 27, 35; Apoc. 14:6) Ebanghelisador kadi met ni Miguel nga arkanghel? Idi adda ditoy daga kas ni Jesus, impakitana ti ulidan kadagiti agbalin nga ebanghelisador. Impamaysana ti biagna iti panangiwaragawag iti naimbag a damag.—Luc. 4:16-21.

3. (a) Ania ti naimbag a damag nga iwarwaragawagtayo? (b) Ania dagiti saludsod a paginteresantayo kas ebanghelisador?

³ Dinutokan ni Jesus dagiti adalanna kas ebanghelisador. (Mat. 28:19, 20; Ara. 1:8) Imparegta ni apostol Pablo iti katrabahuanna a ni Timoteo: “Aramidem ti trabaho ti managebanghelio, naan-anay nga itungpalmo ti ministeriom.” (2 Tim. 4:5) Ania ti naimbag a damag nga iwarwaragawagtayo kas paspasurot ni Jesus? Ramanenna ti kinapudno nga ay-ayatennatayo ti nailangitan nga Amatayo a ni Jehova. (Juan 3:16; 1 Ped. 5:7) Ti kangrunaan a pamay-an nga ipakpakita ni Jehova a Dios ti ayatna ket babaen ti Pagarianna. Maragsakantay ngarud a  mangipakaammo iti sabsabali nga agbalinda a gayyem ti Dios no agpasakupda iti Pagarianna, agtulnogda kenkuana, ken agaramidda iti kinalinteg. (Sal. 15:1, 2) Kinapudnona, panggep ni Jehova nga ikkaten ti amin a panagsagaba. Pukawenna met dagiti nasaem a lagip iti napalabas. Talaga a naimbag a damag dayta! (Isa. 65:17) Kas ebanghelisador, napateg nga usigentayo ti sungbat ti dua a napapateg a saludsod: Apay a napateg a maammuan dagiti tattao ita ti naimbag a damag? Ken kasano a sibaballigi a maitungpaltayo ti akemtayo kas ebanghelisador?

4. Ania dagiti di umiso a sursuro a naibaga kadagiti tattao maipapan iti Dios?

⁴ Ipapanmo a naibaga kenka a pinanawan ni tatangmo ti pamiliayo. Imbaga dagidiay agkunkuna a makaam-ammo kenkuana a narigat kano nga as-asitgan, adda ilimlimedna, ken naulpit. Adda met nagkuna nga awan mamaay ti panangbirok kenkuana ta natayen. Umasping kadagita ti naibaga iti adu a tattao maipapan iti Dios. Naisuro kadakuada a ti Dios ket misterio, imposible a maam-ammo, wenno naulpit. Kas pagarigan, ibagbaga ti sumagmamano a lider ti relihion nga agnanayon kano a dusaen ti Dios dagiti dakes a tattao iti maysa a lugar a pagtutuokan. Adda met dagidiay mangibaga a nakem ti Dios ti panagsagaba a resulta dagiti natural a didigra. Nupay agpada a matay kadagita a didigra dagiti naimbag ken dakes, ibagbagada a pannusa dagita ti Dios kadagiti tattao.

5, 6. Ania ti epektona kadagiti tattao ti teoria ti ebolusion ken dagiti ulbod a doktrina?

⁵ Ipapilit ti dadduma nga awan ti Dios. Mainaig iti daytoy, usigentayo ti teoria ti ebolusion. Ibaga ti adu a mangitantandudo iti dayta a timmaud lattan ti biag ken awan ti nangdisenio. Kunada nga awan ti Namarsua. Adda met dagiti agkuna a ti tao ket sabali laeng a kita ti animal, isu a natural laeng nga adda dagiti inaanimal a kababalin ti tao. Kunada a natural laeng a ti napigpigsa dominaranna ti nakapkapuy. Isu a di pakasdaawan nga adu ti mamati a kanayonto latta nga adda di kinahustisia. Gapuna, awan ti pudno a namnama dagidiay mamati iti ebolusion.

⁶ Di pakasdaawan a ti teoria ti ebolusion ken dagiti ulbod a doktrina ket karaman kadagiti makagapu iti panagsagaba ti sangatauan kadagitoy maudi nga al-aldaw. (Roma 1:28-31; 2 Tim. 3:1-5) Dagitoy a natauan a sursuro ket saan a naimbag a damag. Gapu kadagitoy, ‘nasipngetan ti isip dagiti tattao, ken naisinada iti biag a kukua ti Dios,’ kas kinuna ni apostol Pablo. (Efe. 4:17-19) Malaksid iti dayta, linapdan ti teoria ti ebolusion ken dagiti ulbod a doktrina ti panangawat dagiti tattao iti naimbag a damag manipud iti Dios.—Basaen ti Efeso 2:11-13.

7, 8. Ania ti kakaisuna a pamay-an a naan-anay a maawatan dagiti tattao ti naimbag a damag?

⁷ Tapno maaddaan dagiti tattao iti nasayaat a relasion iti Dios, masapul nga umuna a kombinsidoda nga adda ni Jehova ken pagimbaganda ti umadani kenkuana. Matulongantay ida a maaddaan iti kasta a pannakaammo no paregtaentayo ida a mangusig kadagiti parsua ti Dios. No silulukat ti panunotda a mangusig ken mangadal kadagita, maammuanda ti sirib ken pannakabalin ti Dios. (Roma 1:19, 20) Tapno matulongan dagiti tattao a mangapresiar iti gapuanan ti Naindaklan a Namarsua, mabalintayo nga usaren dagiti broshur a Naparsua Kadi ti Biag? ken The Origin of Life—Five Questions Worth Asking. Nupay kasta, saan nga umdas ti panangadal laeng kadagiti parsua ti Dios tapno maammuan ti sungbat dagiti makaburibor a saludsod, kas iti: Apay nga impalubos ti Dios ti panagsagaba? Ania ti panggep ti Dios para iti daga? Maseknan kadi kaniak ti Dios?

 ⁸ Ti kakaisuna a pamay-an a naan-anay a maawatan dagiti tattao ti naimbag a damag maipapan iti Dios ken iti panggepna ket babaen ti panagadalda iti Biblia. Anian a nagsayaat a pribilehio ti panangtulong kadagiti tattao a mangbirok iti sungbat dagitoy a saludsod! Ngem tapno madanontayo ti puso dagiti dumngeg, saan nga umdas nga ibagatayo kadakuada dagiti pudno nga impormasion. Masapul a guyugoyentayo ida. (2 Tim. 3:14) Maaramidantay dayta no tuladentayo ti ulidan ni Jesus. Apay a nalaing a mangguyugoy? Ti maysa a makagapu ket ti epektibo a panagaramatna iti saludsod. Kasanotayo a matulad ni Jesus?

9. Ania ti masapul nga aramidentayo tapno matulongantayo dagiti tattao iti naespirituan?

⁹ Kas ken Jesus, apay a masapul nga agusartay kadagiti saludsod iti panagebangheliotayo? Usigem daytoy a kasasaad: Imbaga ti doktormo nga adda naimbag nga ipadamagna kenka. Mabalinna kano nga agasan ti sakitmo no agpaoperaka. Nalabit mamatika kenkuana. Ngem kasanon no ikarina dayta a dina pay dinamag no ania ti marikriknam? Mabalin a saanka nga agtalek kenkuana. Kasano man kalaing dayta a doktor, masapul nga agsaludsod ken dumngeg nga umuna no ania dagiti marikriknam sakbay a makaipaay iti aniaman a tulong. Umasping iti dayta, tapno matulongantayo dagiti tattao a mangawat iti naimbag a damag ti Pagarian, masapul a sursuruentayo ti epektibo a panangusar kadagiti saludsod. Matulongantay laeng ida no ammotayon ti naespirituan a kasasaadda.

10, 11. Ania ti mabalin a maaramidantayo no tuladentayo ti pamay-an ni Jesus a mangisuro?

¹⁰ Ammo ni Jesus a makatulong iti maysa a mannursuro ti panagusar kadagiti napili a saludsod tapno maammuanna ti kapanunotan ti estudiantena ken matulonganna a mangyebkas iti opinionna. Kas pagarigan, idi kayat nga isuro ni Jesus kadagiti adalanna ti maipapan iti kinapakumbaba, umuna a nagaramat iti mamagpanunot a saludsod. (Mar. 9:33) Naminsan, nagsaludsod ni Jesus ken Pedro sa nangted iti dua a posible a sungbat a pagpilianna. Daytoy ti nakatulong ken Pedro a mangtarus iti maysa a nagpateg a punto. (Mat. 17:24-26) Iti sabali pay a gundaway, idi kayat nga ammuen ni Jesus ti linaon ti puso dagiti adalanna, nangyimtuod kadagiti agsasaruno a saludsod. (Basaen ti Mateo 16:13-17.) Babaen iti panagsaludsod ken panangilawlawag ni Jesus, saan la a basta nangipaay iti impormasion. Nadanonna ti puso dagiti tattao ket natignayda a mangitunos iti biagda iti naimbag a damag.

¹¹ No tuladentayo ti epektibo a panagusar ni Jesus iti saludsod, maammuantayo ti kasayaatan a pamay-an a panangtulong kadagiti tattao, masursurotayo ti makisarita kadagiti di umanamong kadatayo, ken maisurotayo dagiti napakumbaba no kasano a naan-anay a magunggonaanda iti maad-adalda. Usigentayo ti tallo a situasion a mangipakita iti epektibo a panagusar iti saludsod.

12-14. Kasanom a matulongan ti anakmo a di agamak a mangiranud iti naimbag a damag? Mangted iti pagarigan.

¹² Situasion 1: Kas maysa a nagannak, ania ti aramidem no ibaga ti tin-edyer nga anakmo a marigatan a mangidepensa iti pammatina maipapan iti panamarsua no makisarita kadagiti kaklasena? Sigurado a kayatmo  a tulongan a maaddaan iti tured a mangiranud iti naimbag a damag. Isu nga imbes a kritikarem wenno dagdagus a balakadam, mabalinmo a saludsodan tapno mayebkasna ti kaririknana, kas iti inaramid ni Jesus. Kasano?

¹³ Kalpasan a binasayo ti sumagmamano a paset ti The Origin of Life—Five Questions Worth Asking, damagem iti anakmo no ania dagiti argumento a pagarupna a makapainteres iti dadduma. Paregtaem a mangpanunot iti dadduma pay a rason no apay a patienna nga adda Namarsua ken no apay a kayatna nga aramiden ti pagayatan ti Dios. (Roma 12:2) Ibagam iti anakmo a saan a kasapulan nga agpada ti rasonyo.

¹⁴ Ilawlawagmo iti anakmo a no makisarita iti maysa a kaklasena, mabalinna a tuladen ti indemostram a pannakisarita. Mabalinna nga ibaga iti kaklasena ti sumagmamano nga impormasion maipapan iti panamarsua sana saludsodan no ania ti makunana. Kas pagarigan, mabalin nga ipabasana ti kahon iti panid 21 ti broshur nga Origin of Life. Sananto isaludsod, “Pudno kadi a di maartapan dagiti moderno a kompiuter ti kapasidad ti DNA nga agipempen iti impormasion?” Nalabit umanamong ti kaklasena. Kalpasanna, mabalin nga isaludsod pay ti anakmo, “No dagiti agar-aramid ti kompiuter dida makapataud iti kompiuter a kas iti DNA ti kapasidadna, kasano koma a maaramid dayta ti awan panunotna a banag?” Tapno matulongam ti anakmo a di agamak a mangiranud iti pammatina, regular nga agpraktiskayo. No sanayem a mangusar a sieepektibo iti saludsod, matulongamto a mangitungpal iti akemna kas ebanghelisador.

15. Kasano a mausartayo dagiti saludsod tapno matulongantayo ti maysa nga ateista?

¹⁵ Situasion 2: Iti panangasabatayo, adda dagiti makasaritatayo nga agduadua iti kaadda ti Dios. Kas pagarigan, nalabit adda agkuna a saan a mamati iti Dios. Imbes nga  isardengmon ti makisarita, sitataktika a damagem no kasano kabayagen nga ateista ken no apay a kasta ti panangmatmatna. Kalpasan a maammuantayo ti sungbatna, komendarantayo ken saludsodantayo no kayatna a basaen ti literatura a mangilawlawag iti ebidensia a naparsua ti biag. No silulukat ti panunot ti bumalay, nalabit saanna a basta ipuera ti kasta nga ebidensia. Kalpasanna, mabalintayo nga itukon ti broshur a Naparsua Kadi ti Biag? wenno ti The Origin of Life—Five Questions Worth Asking. Ti nataktika ken nadayaw a panagsaludsod ket kasla tulbek a manglukat iti puso ti maysa a tao a dumngeg iti naimbag a damag.

16. Apay a saantay koma a kontento lattan a basaen laeng ti yad-adalantayo iti Biblia ti sungbatna manipud iti literatura a pagad-adalantayo?

¹⁶ Situasion 3: No mangyad-adaltayo iti Biblia, mabalin met a bay-antayo lattan a basaen ti estudiante dagiti sungbatna manipud iti literatura a pagad-adalantayo. Ngem no kasta ti aramidentayo, malapdantayo ti naespirituan nga irarang-ayna. Apay? Gapu ta no basbasaenna laeng dagiti sungbat a dina us-usigen ti kaipapananda, saan nga umuneg dagiti naespirituan a ramutna. Agbalin a kasla mula a nalaka a malaylay no maipasango kadagiti arig makasinit a pudot ti pannakaidadanes. (Mat. 13:20, 21) Tapno maliklikan dayta, nasken a saludsodantayo ti estudiante no ania ti makunana iti maad-adalna. Ammuem no umanamong met laeng kadagiti napagsaritaan a punto ken damagem no apay. Kalpasanna, tulongam a mangusig iti Kasuratan tapno makagteng kadagiti umiso a konklusion. (Heb. 5:14) No usarentay a naimbag dagiti saludsod, nalabit naan-anay a mairamut ti pammati dagiti yad-adalantayo ken masarangetda dagidiay bumusor wenno mangallilaw kadakuada. (Col. 2:6-8) Ania pay ti maaramidantayo tapno maitungpaltayo ti akemtayo kas ebanghelisador?

17, 18. Kasano a matulongam ti kaduam iti ministerio no batangna ti agsao?

¹⁷ Imbaon ni Jesus dagiti adalanna a sagdudua. (Mar. 6:7; Luc. 10:1) Idi agangay, adda ‘dagiti katrabahuan’ a dinakamat ni apostol Pablo nga “immagawa a nakidanggay [kenkuana] iti naimbag a damag.” (Fil. 4:3) Maitunos iti dayta, dagiti agibumbunannag iti Pagarian idi 1953 inrugida ti maysa a programa a panangsanay iti sabsabali iti ministerio.

¹⁸ Kasano a matulongam ti kaduam iti ministerio no batangna ti agsao? (Basaen ti 1 Corinto 3:6-9.) Ukradem iti Bibliam dagiti teksto a basbasaen ti kaduam. Dumngegka no agsasao ti kaduam wenno ti bumalay. Agimdengka a nalaing tapno masuportaram ti kaduam no kasapulanna ti tulong. (Ecl. 4:12) Ngem daytoy ti pagannadam: Saanka a bumallaet no madama nga agilawlawag ti kaduam. Mabalin a maupay ti kaduam ken matikaw ti bumalay gapu iti ibaballaetmo. No dadduma, maitutop a makiramanka iti saritaan. Ngem kalpasan a maibagam ti ababa a komentom, bay-am nga ituloy ti kaduam ti saritaan.

19. Ania koma ti laglagipentayo, ken apay?

¹⁹ Kasano a makapagtinnulongkayo iti kaduam bayat a magmagnakayo nga agturong iti sumaruno a balay? Usarenyo dayta a gundaway tapno pagsaritaanyo no kasano a maparang-ayyo ti presentasionyo. Ngem saanyo koma a pagsaritaan dagiti negatibo a banag maipapan kadagiti tattao iti teritoriayo. Saanyo koma met a pagsaritaan dagiti negatibo a kababalin dagiti padayo nga ebanghelisador. (Prov. 18:24) Nasayaat no laglagipentayo a mayarigtayo iti damili a basehas. Nupay kasta, naisangsangayan ti kinamanangngaasi ni Jehova ta intalekna kadatayo ti maysa a gameng, ti ministerio mainaig iti naimbag a damag. (Basaen ti 2 Corinto 4:1, 7.) Apresiarentayo koma amin dayta a gameng babaen ti panangaramidtayo iti amin a kabaelantayo a mangitungpal iti akemtayo kas ebanghelisador.