1. Kifer kapav appel Jéhovah premier ek pli grand Evangelisateur?

 ENN evangelisateur c’est enn kikenn ki annonce enn bon nouvelle. Premier ek pli grand Evangelisateur c’est Jéhovah. Desuite apré rebellion nou premier parent, Jéhovah ti annonce enn bon nouvelle ki sa serpent dan jardin Éden-la​—en realité, Satan le Diable​—pou konn enn destruction. (Gen. 3:15) A travers bann siecle, Jéhovah ti inspire bann zom fidele pou ecrire bann detail concernant fason ki Li pou tire deshonneur lor so nom. Zot ti aussi ecrire couma tou bann degat ki Satan inn faire, pou disparette, ek couma bann dimoune kapav ré-gagne bann privilege ki Adam ek Ève inn perdi.

2. (a) Ki role bann ange ena en rapport avek la bonne nouvelle? (b) Ki modele Jésus inn laissé pou bann evangelisateur?

² Bann ange aussi zot bann evangelisateur. Zot aussi zot annonce bann bon nouvelle, ek zot aide bann dimoune pou annonce la bonne nouvelle. (Luc 1:19; 2:10; Actes 8:26, 27, 35; Rév. 14:6) Ki nou kapav dire lor l’archange Mikaël? Mikaël, ki ti appel Jésus kan li ti lor la terre, ti laisse enn modele pou bann evangelisateur humain. Oui, seki ti pli important dan la vie Jésus c’est annonce la bonne nouvelle!​—Luc 4:16-21.

3. (a) Ki bon nouvelle nou annoncé? (b) Ki bann question, li important nou examiné en tant ki bann evangelisateur?

³ Jésus ti donne l’ordre so bann disciple pou zot vinn bann evangelisateur. (Mat. 28:19, 20; Actes 1:8) L’apotre Paul ti donne sa conseil-la Timothée, so compagnon travail: “Faire travail enn evangelisateur, accompli to ministere a fond.” (2 Tim. 4:5) Ki bon nouvelle eski nou, bann disciple Jésus, nou annoncé? Sa bon nouvelle-la implik enn verité bien encourageant: ki Jéhovah, nou Papa ki dan le ciel, content nou. (Jean 3:16; 1 Pierre 5:7) Enn fason important ki Jéhovah montré so l’amour c’est a  travers so Royaume. Alors, nou bien content pou dire bann dimoune ki tou seki soumette ar sa Royaume-la, ki obeir Bondié, ek ki faire seki droite, kapav ena bann bon relation avek Li couma so bann camarade. (Ps. 15:1, 2) En realité, Bondié ena projet pou tire tou bann souffrance ki finn arrivé a cause l’injustice. Li pou aussi tire la peine ki bann mauvais souvenir faire nou gagné. C’est vrai-mem enn bon nouvelle, pa vrai? (Is. 65:17) En tant ki bann evangelisateur, anou examine reponse deux question important: Kifer li bien important ki bann dimoune tann la bonne nouvelle zordi? Ek couma nou kapav rempli bien nou responsabilité en tant ki bann evangelisateur?

4. Ki bann fausse zistoire parfois bann dimoune tendé lor Bondié?

⁴ Faire coumadir enn dimoune dire ou ki ou papa inn abandonne ou ek tou ou famille. Supposé ki bann dimoune ki pretann konn ou papa, dire ki li ti indifferent, li pa ti content raconte so zaffaire ek li ti cruel. Kitfois, certain kapav mem faire ou croire ki li pa vaut la peine pou essaye rente en contact avek li parski li’nn mort. En realité, beaucoup dimoune finn tann bann zistoire coumsa lor Bondié. Finn dire zot ki Bondié Li enn mystere, ki impossible pou konn Li, ou-soit ki Li cruel. Par exemple, certain chef religieux pretann ki Bondié pou puni bann mauvais dimoune pou touletan dan enn place kot zot al tourmenté. Ena lezot ki rann Bondié responsable bann souffrance ki bann dimoune gagné a cause bann catastrophe naturel. Mem si bann bon ek bann mauvais dimoune toulé-deux mort dan sa bann catastrophe-la, certain dire ki c’est Bondié ki pé puni zot.

5, 6. Ki l’effet theorie l’evolution ek bann fausse doctrine finn ena lor bann dimoune?

⁵ Certain dire ki Bondié pa existé. En rapport avek sa, anou prend l’exemple theorie l’evolution. Beaucoup dimoune ki defann sa theorie-la dire ki la vie inn apparette sans ki’nn ena okenn l’intelligence derriere sa. Zot pretann ki pena enn Createur. Certain mem dire ki enn humain c’est zis enn lot zanimo, alors, nou pa bizin etonné kan enn dimoune agir couma enn zanimo. Zot dire ki bann fort ki domine bann faible pé zis suive seki zot appel la loi la nature. Fodé pa nou etonné ki beaucoup dimoune croire ki l’injustice pou touletan existé. Alors, bann ki ena la foi dan l’evolution, zot pena enn vrai l’espoir.

⁶ Pena okenn doute ki theorie l’evolution ek bann fausse doctrine finn joué zot role dan malheur ki bann dimoune inn gagné dan bann dernier jour. (Rom. 1:28-31; 2 Tim. 3:1-5) Sa bann l’enseignement humain-la zot pa vrai-mem enn bon nouvelle pou bann dimoune. Au contraire, couma l’apotre Paul dire, zot finn mette bann dimoune “dan noirté spirituel, ek . . . zot bien loin ar la vie ki Bondié offert.” (Éph. 4:17-19) En plus, theorie l’evolution ek bann fausse doctrine inn empeche bann dimoune pou accepté la bonne nouvelle ki sorti kot Bondié.​—Lire Éphésiens 2:11-13.

7, 8. Ki sel fason bann dimoune kapav bien comprend la bonne nouvelle?

⁷ Pou bann dimoune kapav reconcilié avek Bondié, avant zot bizin sur ki Jéhovah existé ek ki ena bann bon raison pou vinn proche ar Li. Nou kapav aide zot pou konn sa, kan nou encourage zot pou examine la creation. Kan bann dimoune etudié la creation avek enn l’esprit ouvert, zot aprann lor sagesse ek puissance Bondié. (Rom. 1:19, 20) Pou aide bann dimoune ena enn grand respé kan zot reflechi lor seki nou Grand Createur finn faire, nou kapav servi deux brochure: La vie a-t-elle été créée ? ek Cinq questions à se poser sur l’origine de la vie. Mais kan-mem, bann dimoune ki compte zis lor creation, pa pou gagne bann reponse pou certain question pli difficile ki existé dan la vie, couma par exemple: Kifer Bondié permette la souffrance? Ki projet Bondié  ena pou la terre? Eski Bondié interessé ar moi personnellement?

⁸ Sel fason ki bann dimoune kapav bien comprend la bonne nouvelle lor Bondié ek lor so projet, c’est kan zot etudié la Bible. Nou vrai-mem ena enn grand privilege pou aide bann dimoune trouve reponse zot bann question! Selman, pou touche leker bann dimoune ki ecoute nou, nou bizin faire plus ki faire zot konn bann fait; nou bizin convaink zot. (2 Tim. 3:14) Nou kapav convaink zot pli bien kan nou suive l’exemple Jésus. Kifer li ti ena succès? Enn raison c’est parski li ti servi bann question dan enn fason efficace. Couma nou kapav imite li?

9. Pou nou aide bann dimoune lor plan spirituel, ki nou bizin faire?

⁹ Pareil couma Jésus, kifer nou bizin servi bann question kan nou preche la bonne nouvelle? Anou guette sa l’exemple-la: Ou docteur dire ou ki li ena enn bon nouvelle. Li kapav gueri ou maladie si ou faire enn grand l’operation. Kitfois ou pou croire li. Mais si li faire ou sa promesse-la avant-mem ki li pose ou bann question lor ou la santé? Surement lerla ou pa pou ena confiance en li. N’importe ki capacité sa docteur-la kapav ena, li bizin pose ou bann question ek ecoute ou dire bann symptome ki ou ena, avant ki li kapav vrai-mem aide ou. Li pareil aussi pou nou, pou nou kapav aide bann dimoune pou accepté la bonne nouvelle lor Royaume Bondié, nou bizin developpe nou capacité pou pose bann question efficace. C’est zis apré ki nou finn konn bien zot condition spirituel, ki nou pou kapav aide zot.

10, 11. Ki nou pou kapav faire si nou imite fason ki Jésus ti enseigné?

¹⁰ Jésus ti koné ki bann bon question pa zis aide enn professeur pou konn so zeleve, mais aussi sa faire zeleve-la participé dan enn discussion. Par exemple, kan Jésus ti envie enseigne so bann disciple lor l’humilité, avant, li ti pose enn question ki ti faire zot reflechi. (Marc 9:33) Pou enseigne Pierre couma li kapav raisonne lor bann principe, Jésus ti pose li bann question kot ti ena plusieurs choix. (Mat. 17:24-26) Enn lot fois, kan Jésus ti envie ki so bann disciple dire seki ena dan zot leker, li ti pose zot enn serie question pou konn zot l’opinion. (Lire Matthieu 16:13-17.) Kan li ti servi bann question ek li ti dire bann kitsoz, li ti faire plus ki zis donne bann renseignement. Li ti touche leker bann dimoune, li ti pousse zot pou agir en accord avek la bonne nouvelle.

¹¹ Si nou imite Jésus ek nou servi bann question dan enn fason efficace, nou pou faire au moins trois kitsoz. Nou pou trouvé couma nou kapav aide bann dimoune pli bien, couma surmonte bann objection, ek aussi couma enseigne bann dimoune humble pou zot kapav gagne bann bienfait zot-mem. Anou examine trois l’exemple ki montré couma nou kapav servi bann question dan enn fason efficace.

12-14. Couma ou kapav aide ou zenfant pou ena plus l’assurance kan li koz lor la bonne nouvelle? Donne enn l’exemple.

¹² Premier situation: En tant ki parent, ki ou pou faire si ou zenfant demann ou couma li kapav defann so croyance lor creation avek so camarade lekol? Pena doute ki ou pou envie aide li pou koz lor la bonne nouvelle avek plus l’assurance. Alors, au lieu ki ou critik li ou-soit ou donne li bann conseil desuite, kifer ou pa imite l’exemple Jésus ek pose li bann question pou konn so l’opinion? Couma ou kapav faire sa?

 ¹³ Ensam avek ou zenfant, ou kapav lire bann partie dan brochure Cinq questions à se poser sur l’origine de la vie. Apré sa, ou kapav demann li ki bann point dapré li, kapav plus aide bann dimoune pou reflechi. Encourage li pou trouve so bann prop raison pou croire dan enn Createur ek kifer li envie faire volonté Bondié. (Rom. 12:2) Faire ou zenfant koné ki so bann raison pa bizin exactement pareil couma seki pou ou.

¹⁴ Explik ou zenfant ki, kan li koz avek so camarade, li kapav faire pareil couma ou finn faire avek li. Setadir, li kapav ré-guette bann point ki ena dan brochure-la ensam avek so camarade ek apré, demann li bann question ki pou dirige li vers reponse-la, ou-soit pou konn so l’opinion. Par exemple, kitfois ou zenfant kapav demann so camarade pou lire l’encadré ki trouve lor page 21, dan brochure l’Origine de la vie. Apré, li kapav demandé: “Eski li vrai ki pena okenn ordinateur dan nou lepok ki kapav depasse capacité ki ADN ena pou garde bann renseignement?” Kitfois camarade-la pou dire li oui. Apré sa, ou zenfant kapav demann li: “Si bann dimoune ki’nn invente bann ordinateur pa kapav gagne sa qualité resultat-la, couma enn matiere ki pena l’intelligence kapav faire sa par li-mem?” Pou ki ou zenfant kapav senti-li pli a l’aise pou koz lor so croyance ar lezot, ou kapav regulierement faire bann seance d’exercice avek li. Si ou forme ou zenfant pou servi bann question dan enn fason efficace, ou pou aide li pou rempli so responsabilité en tant ki enn evangelisateur.

15. Couma nou kapav servi bann question pou aide enn athée?

¹⁵ Deuxieme situation: Dan predication, nou zwenn bann dimoune ki ena doute ki Bondié existé. Par exemple, kitfois enn dimoune pou dire nou ki li enn athée. Au lieu ki nou laisse sa arrete nou conversation, avek respé nou kapav demann li depuis kan li enn athée ek seki finn pousse li pou prend sa position-la. Apré ki nou finn ecoute so bann reponse ek nou finn felicite  li ki li’nn bien reflechi lor sa sujet-la, nou kapav demann li si li trouve sa mauvais pou lire enn livre ki donne bann preuve ki la vie inn crée. Si li ena enn l’esprit ouvert, surement li pou dire nou ki li pa raisonnable pou refuse examine bann preuve coumsa. Lerla nou kapav offert li brochure La vie a-t-elle été créée ? ou-soit brochure Cinq questions à se poser sur l’origine de la vie. Kan nou pose bann question avek tact ek gentillesse, sa kapav touche leker enn dimoune pou ecoute la bonne nouvelle.

16. Kifer fodé pa nou contente-nou ki nou etudiant lire reponse ki ena dan so livre?

¹⁶ Troisieme situation: Kan nou conduire enn l’etude la Bible, fodé pa nou contente-nou ki etudiant-la lire reponse ki ena dan so livre. Mais, si nou faire zis sa, nou pou retarde so progré spirituel. Kifer? Parski enn etudiant ki lire bann reponse sans ki li medite lor la, pa pou ena bann racine spirituel ki profond. Li pou kapav bien vite tombé lor plan spirituel kan li gagne l’opposition, pareil couma enn plante fletri dan chaleur. (Mat. 13:20, 21) Pou evite sa resultat-la, nou bizin demann nou etudiant ki li pensé lor seki li pé aprann. Essaye koné si li daccord avek seki li pé etudié. Seki pli important, demann li kifer li daccord ou-soit li pa daccord. Lerla, aide li pou raisonne lor bann verset la Bible pou ki finalement, li kapav tire bann bon conclusion par li-mem. (Héb. 5:14) Si nou servi bann question dan enn fason efficace, bann dimoune ki nou enseigné pou plus kapav developpe enn la foi solide ek resisté ar bann ki opposé ar zot ou-soit ki rod detourne zot. (Col. 2:6-8) Ki nou kapav faire encore pou rempli nou responsabilité en tant ki bann evangelisateur?

17, 18. Kan nou accompagne enn proclamateur dan predication, couma nou kapav travail couma enn l’equipe?

¹⁷ Jésus ti envoye so bann disciple pou al preché deux par deux. (Marc 6:7; Luc 10:1) Plitar, l’apotre Paul ti mentionne ‘bann ki ti travail ensam avek li,’ ki finn “combatte avek [li] pou la bonne nouvelle.” (Phil. 4:3) En accord avek sa bann l’exemple biblik-la, en 1953, bann proclamateur Royaume Bondié ti commence enn programme pou forme lezot dan ministere.

¹⁸ Kan ou accompagne enn lot proclamateur dan predication, couma zot kapav travail couma enn l’equipe? (Lire 1 Corinthiens 3:6-9.) Suive dan ou la Bible kan proclamateur-la pé lire bann verset. Guette li ek dimoune-la kan zot pé kozé. Suive conversation-la bien pou ou kapav aide proclamateur-la si jamais li bizin ou l’aide pou surmonte enn l’objection. (Eccl. 4:12) Mais, faire attention: Mem si ou bien envie dire kitsoz, pa coupe conversation proclamateur-la pendant ki li pé raisonne avek sa dimoune-la. Sinon, sa kapav decourage li ek mette dimoune-la dan confusion. Parfois, li kapav arrivé ki ou bizin rente dan enn conversation. Mais, si ou decide pou dire kitsoz, faire zis enn ou-soit deux ti commentaire. Apré, laisse proclamateur-la contigne so conversation.

19. Ki li bon nou rappel, ek kifer?

¹⁹ Couma ou ek sa proclamateur avek ki ou pé preché-la kapav aide sakenn so camarade entre bann la porte? Kifer zot pa servi sa le temps-la pou guetté couma zot kapav ameliore zot bann presentation? Faire attention ki bann commentaire ki zot faire lor bann dimoune dan territoire pa decourageant. Zot bizin aussi evité koz lor defaut lezot evangelisateur. (Prov. 18:24) Li bon nou rappel ki nou pareil couma bann recipient la terre. Jéhovah finn manifesté enn bonté extraordinaire envers nou kan Li finn confié nou enn tresor, setadir privilege pou annonce la bonne nouvelle. (Lire 2 Corinthiens 4:1, 7.) Alors, anou montré ki nou apprecié sa tresor-la kan nou faire tou seki nou kapav pou rempli nou responsabilité en tant ki bann evangelisateur.