1. Omolwashike Jehova ta vulu okwiithanwa Omuuvithi gwevaangeli gwotango noku li a shiga ko?

OMUUVITHI gwevaangeli omuntu ngoka ha lombwele yalwe onkundana ombwanawa. Jehova Kalunga oye Omuuvithi gwevaangeli gwotango nokwa shiga ko. Nziya konima sho aavali yetu yotango ya tukula oshipotha, Jehova okwa li a tseyitha onkundana ombwanawa kutya eyoka ndyoka li li Satana Ondiapoli otali ka hanagulwa po. (Gen. 3:15) Momukokomoko gwoomvula omathele dha ka pita, Jehova okwa li a nwetha mo aalumentu aadhiginini ya nyole uuyelele kombinga yankene edhina lye ndyoka lya nyatekwa tali ka yelithwa, nkene eyonagulo ndyoka lye etithwa kuSatana tali ka kuthwa po, nosho wo nkene aantu taya vulu oku ka mona omauwanawa ngoka ga li ga kanithwa kuAdam naEva.

2. (a) Aayengeli otaya dhana onkandangala yini miilonga yokuuvitha evaangeli? (b) Oshiholelwa shini Jesus a li a tulile po aauvithi yevaangeli?

² Aayengeli nayo oye li aauvithi yevaangeli. Yo yene ohaya lombwele yalwe onkundana ombwanawa, nohaya kwathele aantu mboka taya taandeleke onkundana ombwanawa. (Luk. 1:19; 2:10; Iil. 8:26, 27, 35; Eh. 14:6) Ongiini kombinga yomuyengeli omukuluntu Mikael? Sho a li kombanda yevi e li Jesus, okwa li a tulile po aauvithi yevaangeli yopantu oshiholelwa. Omolwashike? Omolwaashoka Jesus okwa li a kankamekele onkalamwenyo ye kokutaandelitha onkundana ombwanawa. — Luk. 4:16-21.

3. (a) Ohatu taandeleke onkundana ombwanawa yini? (b) Omapulo geni tu na okwiipula tu li aauvithi yevaangeli?

³ Jesus okwa li a lombwele aalongwa ye ya kale aauvithi yevaangeli. (Mat. 28:19, 20; Iil. 1:8) Omuyapostoli Paulus okwa li a ladhipike Timoteus omulongi pamwe naye, a ti: ‘Longa oshilonga shomuuvithi gwevaangeli, gwanitha ayihe mokulongela Kalunga.’ (2 Tim. 4:5, yelekanitha NW) Tu li aalanduli yaJesus, onkundana ombwanawa yini hatu taandeleke? Onkundana ndjoka oya kwatela mo oshili ndjoka tayi tu shilipaleke kutya Tate yetu gwomegulu, Jehova, oku tu hole. (Joh. 3:16; 1 Pet. 5:7) Jehova Kalunga ohu ulike ohole ye momukalo gwa simanenena okupitila mUukwaniilwa we. Onkee ano, ohatu lombwele yalwe nenyanyu  kutya ayehe mboka haya vulika kelelo lyUukwaniilwa, haya vulika kuKalunga nohaya longo uuyuki, otaya vulu okukala ookuume ke kopothingo. (Eps. 15:1, 2) Nokuli, Jehova okwa lalakanena okuhulitha po okumona iihuna hoka kaaku li pauyuuki. Ota ka kutha po uuwehame mboka we etithwa kiiningwanima iiwinayi mbyoka ya ningwa moonkalamwenyo dhetu. Ndjoka kayi shi tuu onkundana ombwanawa! (Jes. 65:17) Molwaashoka otu li aauvithi yevaangeli, natu ka kundathaneni omayamukulo gomapulo gaali ga simana: Omolwashike sha simanenena aantu yu uve onkundana ombwanawa kunena? Ongiini tatu vulu okugwanitha po lela oshilonga shetu tu li aauvithi yevaangeli?

4. Omathimbo gamwe aantu ohaya lombwelwa omahokololo giifundja geni kombinga yaKalunga?

⁴ Dhiladhila ando to lombwelwa kutya tate gwoye okwe ku ekelahi nosho wo yaandjeni. Natu tye ando mboka taya ti oye mu shi otaya popi kutya okwa li kee na uukuume nomuntu, ihaa lombwele sha omuntu noku na onyanya. Yamwe otashi vulika ye ku itaalithe kutya itashi kwatha sha wu ninge oonkambadhala wu kwatathane naye molwaashoka okwa sa. Aantu oyendji oya lombwelwa sha faathana kombinga yaKalunga. Oya longwa kutya Kalunga ihu uviwa ko, ita vulu okutseyika, nenge kutya oku na onyanya. Pashiholelwa, aasita yamwe ohaya ti kutya Kalunga ota ka geela aakolokoshi moku ya tula momulilo gwaaluhe. Yamwe ohaya ti kutya Kalunga oye he etitha okumona iihuna hoka haku etwa kiiponga yopaunshitwe. Aantu ohaya ti kutya iiponga mbyoka oyi li egeelo lya za kuKalunga nonando iiningwanima mbika ohayi dhipaga aantu mboka haya longo uuwanawa nosho wo mboka haya longo uuwinayi.

5, 6. Elongo lyoevolusi nosho wo omalongo giifundja oga guma ngiini aantu?

⁵ Yalwe ohaya ti kutya kaku na Kalunga. Shi na ko nasha naashika, dhiladhila kombinga yelongo lyoevolusi. Oyendji mboka haya ambidhidha elongo ndyoka ohaya popi kutya onkalamwenyo oya holoka po kuyo yene. Ohaya popi kutya kaku na Omushiti. Yamwe oya popya nokuli kutya omuntu oku li owala oshinamwenyo sholudhi lulwe, onkee ano, shoka kashi na oku tu kumitha uuna omuntu ta ningi oshinima a fa oshinamwenyo. Ohaya ti kutya aapangeli aakwanyanya mboka haya pangele mboka kaaye na oonkondo dha sha, otaye shi ningi owala taya landula anuwa oompango dhopaunshitwe. Onkee ano, itashi kumitha sho aantu oyendji yi itaala kutya okwaanuuyuuki opo aluhe ku na okukala. Mboka ye na eitaalo moevolusi kaye na etegameno lyasha.

⁶ Kapu na omalimbililo kutya elongo lyoevolusi nosho wo omalongo giifundja oga gwedha ko kuudhigu mboka aantu ya kala muwo momasiku gahugunina. (Rom. 1:28-31; 2 Tim. 3:1-5) Omalongo ngoka gopantu inaga etela aantu onkundana ombwanawa noyoshili ndjoka tayi kalelele. Pehala lyaashono, ngaashi omuyapostoli Paulus e shi popi, oga thiga ‘omadhiladhilo gaantu momilema, naKalunga ite ya pe omwenyo.’ (Ef. 4:17-19) Kakele kaashono, elongo lyoevolusi nosho wo omalongo giifundja oga ningitha aantu kaaya taambe ko onkundana ombwanawa ndjoka ya za kuKalunga. — Lesha Aaefeso 2:11-13.

7, 8. Omomukalo owala guni aantu taya vulu okuuva ko thiluthilu onkundana ombwanawa?

⁷ Opo aantu ya hanganithwe naKalunga, oye na okwiitaala tango kutya Jehova oko e li nosho wo kutya opu na omatompelo omawanawa gokuhedha popepi naye. Otatu vulu oku ya kwathela ya mone ontseyo ndjoka moku ya ladhipika ya konakone eshito. Uuna aantu taya konakona eshito nomadhiladhilo inaaga mangwa kusha, ohaya tseya uunongo waKalunga nosho wo oonkondo dhe. (Rom. 1:19, 20) Otatu vulu okuninga oonkambadhala tu kwathele aantu ya kale ye wete kutya eshito ekumithi uuna taya dhiladhila kombinga yaashoka Omushiti gwetu Omwaanawa a longa, mokulongitha okabroshure Was Life Created? nosho wo The Origin of Life — Five Questions Worth Asking. Ihe nonando ongaaka, mboka hayi ilongo owala keshito ihaya mono omayamukulo komapulo gomonkalamwenyo ngoka ga limbilika aantu noonkondo, ngaashi: Omolwashike Kalunga e ethela okumona iihuna ku kale po? Elalakano lyaKalunga li na ko nasha nevi olini? Mbela Kalunga oku na ko ngaa nasha nangame pauhandimwe?

 ⁸ Omukalo gumwe moka aantu taya vulu okuuva ko nawa onkundana ombwanawa kombinga yaKalunga nosho wo yelalakano lye, omokukonakona Ombiimbeli. Kawu shi tuu uuthembahenda mboka tu na wokukwathela aantu ya mone omayamukulo komapulo gawo! Opo tu adhe omitima dhaapulakeni yetu, otu na okuninga oshindji shi vulithe owala oku ya lombwela uushili; otu na oku ya tompa. (2 Tim. 3:14) Otatu vulu okukala hatu tompo yalwe mokulandula oshiholelwa shaJesus. Omolwashike a li he shi pondola? Etompelo limwe olyo kutya okwa li ha longitha omapulo taga gumu omutima. Ongiini tatu vulu oku mu holela?

9. Opo tu kwathele aantu pambepo, otu na okuninga shike?

⁹ Ngaashi Jesus, omolwashike tu na okulongitha omapulo miilonga yokuuvitha evaangeli? Natu tale konkalo ndjika: Ndohotola gwoye okwe ku lombwele kutya oku ku nine onkundana ombwanawa. Ota vulu okupanga uuvu woye ngele e ku tanda etando enene. Otashi vulika wu mu itaale. Ihe ongiini ngele okwe ku uvanekele ngaaka nokuli nomanga inee ku pula sha kombinga yuukolele woye? Osha yela kutya ito ke mu inekela. Kutya nduno ndohotola ngoka oku kale a pyokoka shi thike peni, okwa pumbwa okupula omapulo nokuuva kungoye kutya omandhindhiliko gomukithi gwoye ogeni manga inee ku pa ekwatho lyo opalela. Sha faathana, ngele otwa hala tu kwathele aantu ya taambe ko onkundana ombwanawa yUukwaniilwa, otu na okwiilonga okupula omapulo taga gumu omutima. Otatu vulu owala oku ya kwathela ngele tu uvu ko nawa onkalo yawo yopambepo.

10, 11. Otatu vulu okumona iizemo yini ngele otwa holele omukalo gwaJesus gwokulonga?

¹⁰ Jesus okwa li e shi kutya omapulo ga longekidhwa nawa ihaga kwathele owala omulongi a tseye kombinga yomulongwa ihe ohaga kwathele wo omupulakeni a kuthe ombinga moonkundathana. Pashiholelwa, sho Jesus a li a hala a longe aalongwa ye oshiilongomwa kombinga yeifupipiko, tango okwa li e ya pula epulo tali ya ningitha ya dhiladhile. (Mark. 9:33) Opo a longe Petrus a kale e shi okudhiladhila komakotampango, Jesus okwa li e mu pula epulo ndyoka a li e na okuhogolola eyamukulo. (Mat. 17:24-26) Pompito yimwe, sho Jesus a li a hala a tseye shoka shi li momitima dhaalongwa ye, okwa li e ya pula omapulo ya popye shoka yu uvite. (Lesha Mateus 16:13-17.) Mokulongitha omapulo nosho wo omatyokosha, Jesus okwa li a ningi oshindji shi vulithe owala okulombwela aantu ooshili. Okwa li a gumu omitima dhaantu, noku ya ladhipika ya katuke metsokumwe nonkundana ombwanawa.

¹¹ Sho tatu holele Jesus mokulongitha omapulo taga gumu omutima, ohatu ningi po iinima itatu lwaampo. Ohatu mono omukalo gwa dhenga mbanda moka tatu vulu okukwathela aantu, ohatu tompo mboka inaaya hala okupulakena kutse, nohatu longo mboka aaifupipiki nkene taya vulu okwiimonena uuwanawa. Tala koonkalo ndatu ndhoka tadhi ulike nkene tatu vulu okulongitha omapulo tage e ta iizemo iiwanawa.

12-14. Ongiini to vulu okukwathela okamwoye ka kale ke na omukumo gwokuuvithila yalwe onkundana ombwanawa? Gandja oshiholelwa.

¹² Onkalo 1: Wu li omuvali, oto ka ninga po shike ngele okamwoye koomvula omulongo nasha oka popi kombinga yankene ke na okupopila eitaalo lyako kombinga yeshito uuna taka popi nomulongwa gwomongundu yako? Nopwaahe na omalimbililo, oto ka kala wa hala oku ka kwathela ka kale ke na omukumo ngele taka lombwele yalwe kombinga yonkundana ombwanawa. Onkee ano, pehala lyoku ka pa uusama nenge wu ka pe mbala omayele, omolwashike itoo holele Jesus nokupula omapulo ka popye etaloko lyako? Oto vulu oku shi ninga ngiini?

¹³ Konima sho wa lesha nokamwoye iitopolwa  mokabroshure The Origin of Life — Five Questions Worth Asking, oto vulu oku ka pula kutya omayele geni ka mona tage ka ningitha ka dhiladhile. Ka ladhipika ka mone omatompelo kuko kene kutya omolwashike ki itaala mOmushiti nomolwashike ka hala okulonga ehalo lyaKalunga. (Rom. 12:2) Shilipaleka okamwoye kutya omatompelo gako inaga pumbwa okukala ga fa goye thiluthilu.

¹⁴ Yelithila okamwoye kutya ngele taka popi nomulongwa gwomongundu yako, otaka vulu okuholela shoka wa ningi. Shoka otashi ti kutya okamwoye otaka vulu okweendulula uushili wumwe nokupula omapulo ngoka taga ningitha omulongwa gwomungundu yako a popye etaloko lye. Pashiholelwa, otaka vulu okupula omulongwa ngoka a leshe oshimpungu shoka shi li pepandja 21 mokabroshure Origin of Life. Okamwoye otaka vulu nduno okupula taka ti: “Odhoshili ngaa kutya omukalo moka o-DNA hayi pungula uuyelele itagu vulu okuyelekanithwa nookompiuta dhokunena?” Omulongwa gwomungundu yako oku na okukala a tya eeno. Okamwoye otaka vulu nduno okupula ta ka ti: “Ngele aapangeli yookompiuta itaya vulu okuninga ngaaka, ongiini nduno iinima mbyoka ihaayi dhiladhila tayi vulu oku shi ninga kuyo yene?” Opo wu ka kwathele ka kale haka kala ka manguluka sho taka kundathana nayalwe kombinga yeitaalo lyako, oto vulu okukala ho ka enditha po pandjigilile. Ngele owe ka dheula ka kale haka longitha omapulo taga gumu omutima, oto ke ka kwathela ka gwanithe po oshilonga shako ke li omuuvithi gwevaangeli.

15. Ongiini tatu vulu okulongitha omapulo opo tu kwathele omuntu ngoka inii itaala muKalunga?

¹⁵ Onkalo 2: Muukalele ohatu tsakaneke mo aantu mboka ya limbililwa ngele Kalunga oko ngaa e li shili. Pashiholelwa, omuntu ohashi vulika e tu lombwele kutya ini itaala muKalunga. Pehala lyokweetha shoka a popi shi hulithe po oonkundathana, otatu vulu oku mu pula nesimaneko kutya okwa kala ethimbo li thike peni inii itaala muKalunga noshike she mu ningitha a kale e na etaloko li li ngaaka. Konima yokupulakena komayamukulo ge noku mu pandula sho a dhiladhila muule kombinga yoshinima shoka, otatu vulu oku mu pula ngele oku wete kutya otashi ka kala sha puka okulesha  oshileshomwa shoka tashi gandja uunzapo kutya onkalamwenyo inayi ya po kuyo yene. Ngele omunegumbo okwa patulukila omadhiladhilo galwe, oku na okukala a yamukula kutya itashi ka kala pandunge okutinda okutala uuyelele mboka. Opo nduno otatu vulu oku mu pa okabroshure Was Life Created? nenge hoka ke na oshipalanyolo The Origin of Life — Five Questions Worth Asking. Okupula omapulo nuukeka nonombili, ohaku vulu okupatulula omutima gwomuntu opo a taambe ko onkundana ombwanawa.

16. Omolwashike kaatu na okukala twa gwanenwa ngele omukonakonimbiimbeli ta lesha owala omayakulo moshileshomwa shoka tatu konakona?

¹⁶ Onkalo 3: Uuna tatu ningi ekonakonombiimbeli, ohashi vulika tu ethe owala omukonakoni e endulule omayamukulo ngoka ge li moshileshomwa moka tatu konakona. Ihe ngele otwa kala hatu ningi ngaaka, otatu ke mu imba a hume komeho pambepo. Omolwashike? Omolwaashoka omukonakoni ngoka he endulula omayamukulo inaa tedhatedha kugo iha kala e na omidhi dhopambepo dha ya muule. Ota vulu oku ka kala nuupu a fa omuti ngoka hagu ganya kuupyu uuna a adhika komapataneko. (Mat. 13:20, 21) Opo tu yande oshizemo sha tya ngaaka, otwa pumbwa okupula omukonakoni gwetu nkene u uvite kombinga yaashoka ti ilongo. Niishewe, kambadhala wu tale ngele ota tsu kumwe niitsa mbyoka ya popiwa. Shimwe ishewe sha simanenena, mu pula a popye kutya omolwashike ta tsu kumwe nenge kutya omolwashike itaa tsu kumwe nasho. Mu kwathela wo a dhiladhile kOmanyolo opo a vule okuthika pehulithodhiladhilo li li mondjila kuye mwene. (Heb. 5:14) Ngele otwa kala nokulongitha omapulo taga gumu omutima, nena mboka hatu longo otaya ka kala ya dhamenena meitaalo notaya ka vula okukondjitha mboka taye ke ya pataneka nenge taye ke ya pukitha. (Kol. 2:6-8) Oshike ishewe tatu vulu okuninga opo tu gwanithe po oshilonga shetu tu li aauvithi yevaangeli?

17, 18. Uuna wu li nOmukriste omukweni muukalele, ongiini tamu vulu okulonga muukumwe?

¹⁷ Jesus okwa li a tumu aalongwa ye kooyaali miilonga yokuuvitha. (Mark. 6:7; Luk. 10:1) Konima, omuyapostoli Paulus okwa li a tumbula ‘aalongi pamwe naye’ mboka ‘ya longo nuudhiginini pamwe naye mokutaandelitha onkundana ombwanawa.’ (Fil. 4:3) Metsokumwe noshiholelwa shoka shi li mOmanyolo, mo 1953, aauvithi yUukwaniilwa oya li ya tameke opolohalama yokudheula yalwe muukalele.

¹⁸ Uuna wu li nOmukriste omukweni muukalele, ongiini tamu vulu okulonga muukumwe? (Lesha 1 Aakorinto 3:6-9.) Konga mOmbiimbeli yoye omanyolo ngoka mukweni ta longitha. Kala to gandja eitulomo kuye nokomunegumbo uuna gumwe gwomuyo ta popi. Landula nawa oonkundathana opo ngele omunegumbo ta patana moshinima shontumba, wu vule okukwathela mukweni. (Omuuv. 4:12) Opu na oshinima shimwe shoka tu na okutakamitha: Yanda egamo lyokukwata mukweni melaka uuna ta tompathana nomunegumbo momukalo tagu gumu omutima. Ngele owu na uulaadhi wokupopya sha pitilila, otashi vulika shi sithe mukweni uunye noshi ngwangwaneke omunegumbo. Omathimbo gamwe, ohashi kala shi li nawa opo nangoye wu kuthe ombinga moonkundathana. Ihe ngele owa hala wu popye sha, ingambeka wu gandje eetopo lyoye limwe nenge gaali paufupi. Opo nduno pitika mukweni a tsikile nokukwatela komeho oonkundathana.

19. Oshike tu na okudhimbulukwa, nomolwashike?

¹⁹ Ongiini tamu vulu okukwathelathana namukweni uuna tamu zi megumbo limwe mu uka mekwawo? Otamu vulu okulongitha ethimbo ndyoka mu popye kombinga yankene tamu vulu okuhwepopaleka omafalomo geni. Takamitheni kaamu popye iinima tayi teya omukumo kombinga yaamboka yomoshitopolwa sheni. Sha faathana, yandeni okuya momwigo gwokukala tamu popi kombinga yiikala iiwinayi yaauvithi yevaangeli ooyakweni. (Omayel. 18:24) Natu dhimbulukwe kutya tse iiyuma yeloya. Jehova okwe tu ulukila olukeno lwe momukalo gwa dhenga mbanda sho e tu inekelela uuyamba wuukalele wonkundana ombwanawa. (Lesha 2 Aakorinto 4:1, 7.) Onkee ano, natu ulike kutya otu na olupandu lwuuyamba mboka mokuninga ngaashi tatu vulu tu gwanithe po oshilonga shetu tu li aauvithi yevaangeli.