1. Dicon Jehova ta e prome y e mihor Predicador di bon noticia?

 JEHOVA ta e prome y e mihor Predicador di bon noticia. Con asina? Wel, djis despues cu Adam cu Eva a rebela contra dje, el a anuncia un bon noticia, esta, cu lo e destrui e colebra cu ta Satanas e Diabel. (Gen. 3:15) A traves di siglonan, Jehova a inspira varios homber fiel pa skirbi detayenan encuanto con lo e santifica su nomber, drecha e daño cu Satanas a causa y con humanidad lo bolbe haya loke Adam cu Eva a tira afo. Esakinan sigur ta bon noticia, no ta berdad?

2. (a) Ki papel e angelnan ta hunga den predicacion di e bon noticia? (b) Ki ehempel Hesus a pone pa esnan cu ta predica e bon noticia?

² Jehova su angelnan tambe ta predica bon noticia; ademas, nan ta yuda nos proclama e bon noticia rond mundo. (Luc. 1:19; 2:10; Echo. 8:26, 27, 35; Rev. 14:6) Awor, kico di Miguel, e arcangel? E tambe ta un predicador di bon noticia. Tempo cu e tabata riba tera como Hesus, predicacion di e bon noticia tabata e cos di mas importante den su bida. Asina, el a pone un excelente ehempel pa tur predicador di e bon noticia awe!—Luc. 4:16-21.

3. (a) Ki bon noticia nos ta predica awe? (b) Ki preguntanan ta importante pa nos contesta?

³ Hesus a duna su discipelnan e mandamento pa predica e bon noticia. (Mat. 28:19, 20; Echo. 1:8) Apostel Pablo a urgi su compañero Timoteo: “Haci e trabou di un predicador di e bon noticia, cumpli cu bo sirbishi cabalmente.” (2 Tim. 4:5) Awor, ki bon noticia nos, como siguidornan di Cristo, ta proclama awe? Wel, entre otro cosnan, nos ta conta hende e berdad tocante nos Tata celestial, Jehova, esta, cu e ta stima nos. (Juan 3:16; 1 Ped. 5:7) Y e Reino di Dios ta un prueba cu Jehova ta stima nos. Pesey, cu goso nos ta laga tur hende sa cu nan por bira amigo di Dios si nan bira subdito di e Reino di Dios, obedece Dios y haci loke ta husto. (Sal. 15:1, 2) Y na su debido tempo, Jehova lo caba cu  tur sufrimento. Ademas, lo e elimina tur dolor cu mal recuerdo ta trece cu ne. Eseynan ta bon noticia, no ta berdad? (Isa. 65:17) Awor, como cu nos ta predicador di e bon noticia, ta bon pa nos haya contesta pa dos pregunta importante. Nan ta: Dicon ta urgente pa hende haya sa e bon noticia awe? Con nos por cumpli cabalmente cu nos papel como predicador di e bon noticia?

4. Ki mentira hende ta plama encuanto Dios?

⁴ Supone cu un hende gaña bo. E ta bisa bo cu bo tata a bandona abo y bo famia. E ta pretende cu e conoce bo tata y ta bisa bo cu bo tata no tabata interesa den boso, cu e tabata tene cos secreto pa boso y cu e tabata un homber cruel. Despues, e ta bisa bo pa no tuma e molester di busca contacto cu bo tata pasobra e ta morto. En realidad, eseynan ta cosnan cu hopi hende a ser siña tocante Dios. Lidernan religioso a siña nan cu Dios ta cruel, cu e ta un misterio y cu bo no por siña conoc’e. Por ehempel, algun lider religioso ta bisa cu Dios ta castiga mal hende pa semper den fierno. Otronan ta culpa Dios pa e sufrimento cu desasternan natural ta causa. Aunke e desasternan aki ta mata tanto bon hende como mal hende, nan ta bisa cu ta castigo di Dios.

5, 6. Con e teoria di evolucion y otro doctrinanan falso ta perhudica hende?

⁵ Otronan ta bisa cu Dios no ta existi. Tuma por ehempel e teoria di evolucion. Hopi hende cu ta kere den e teoria aki ta bisa cu no tin un mente inteligente tras di bida ma cu el a origina pa casualidad. Pa nan, no tin un Creador. Algun ta hasta bisa cu hende ta djis un otro especie di animal y cu nos no mester keda sorprendi ora hende ta comporta nan mes manera bestia. Pa nan ta masha normal cu hende fuerte ta trata hende debil na un manera cruel, pasobra esey ta simplemente un consecuencia di e asina yama ley di naturaleza. Pues, no ta nada straño cu hopi hende ta kere cu semper lo tin inhusticia. Pesey, personanan cu ta kere den evolucion no tin berdadero speransa pa futuro.

⁶ Pues no tin duda, e teoria di evolucion y otro doctrinanan falso ta contribui na e sufrimento cu humanidad ta pasa aden durante e ultimo dianan aki. (Rom. 1:28-31; 2 Tim. 3:1-5) E siñansanan aki no ta bon noticia. Al contrario, manera apostel Pablo a indica, nan ta laga hende “mentalmente den scuridad y aleha for di e bida cu ta bin di Dios.” (Efe. 4:17-19) Ademas, e teoria di evolucion y otro doctrinanan falso ta stroba hende di acepta Dios su bon noticia.—Lesa Efesionan 2:11-13.

7, 8. Cua ta e unico manera cu hende por haya un bon comprondemento di e bon noticia?

⁷ Pa hende por reconcilia cu Jehova Dios, na prome luga, nan mester ta convenci cu e ta existi y cu tin bon motibo pa nan hala cerca dje. Nos por yuda nan siña conoce Dios, animando nan pa observa e creacion y medita riba dje. Ora nan haci esey cu un mente habri, nan lo siña di Dios su sabiduria y poder. (Rom. 1:19, 20) Awor, con nos por yuda nan haya respet profundo pa Dios pa motibo di tur loke el a crea? Wel, nos por uza e foyeto Bida Ta Obra di un Kreador? Pero tin pregunta cu hende no por haya nan contesta observando e creacion so. Algun ehempel di esakinan ta: Dicon Dios ta permiti sufrimento? Kico ta Dios su proposito pa tera? Dios ta interesa den cada un di nos?

⁸ E unico manera cu hende por haya un bon comprondemento di e bon noticia encuanto Dios y su proposito ta studiando Bijbel. Anto nos tin e gran privilegio di por  yuda hende haya contesta pa nan preguntanan. Pero pa yega na curason di un persona, nos mester haci mas cu djis siñ’e e berdad; nos mester convenc’e cu loke e ta siñando ta e berdad. (2 Tim. 3:14) Y nos por mehora den esaki si nos ta imita e ehempel di Hesus. Con bin Hesus tabata asina bon den convence hende? Un motibo ta cu e tabata haci bon uzo di pregunta. Con nos por imit’e?

9. Kico nos mester haci pa nos por yuda hende spiritualmente?

⁹ Dicon nos mester haci uzo di pregunta den nos trabou di predica, manera Hesus a haci? Wel, pensa riba e siguiente situacion: Supone cu bo dokter bisa bo cu e tin bon noticia pa bo: Bo por cura di bo maleza solamente si bo haci un operacion grandi. Probablemente bo ta ker’e. Pero kico si e priminti bo esey sin cu nunca bo a papia cu ne tocante bo salud? E chens ta grandi cu lo bo no confi’e. No ta importa con bon e dokter ta; e mester papia cu bo, haci pregunta y scucha bo prome cu e por yuda bo. Di mes manera, si nos kier yuda hende acepta e bon noticia di e Reino, nos mester haci bon uzo di pregunta. Haciendo pregunta, nos por compronde den ki condicion spiritual nan ta pa nos por yuda nan.

10, 11. Kico nos lo por logra si nos ta imita Hesus su manera di siña hende?

¹⁰ Hesus tabata sa cu preguntanan bon pensa no solamente ta yuda un maestro siña conoce su studiante, pero nan ta yuda e studiante tambe pensa y expresa su mes. Por ehempel, ora Hesus kier a siña su discipelnan un les di humildad, el a haci nan un pregunta cu a pone nan pensa. (Mar. 9:33) Na un otro ocasion, Hesus a siña Pedro con pa rasona a base di principio; el a hacie un pregunta y a dun’e chens di scoge entre dos contesta. (Mat. 17:24-26) Na un otro ocasion, Hesus a haci su discipelnan un serie di pregunta di punto di bista pa haya sa kico tabata biba den nan curason. (Lesa Mateo 16:13-17.) Pues, Hesus no tabata djis bisa hende kico nan tabatin cu haci. El a haci pregunta cu a alcansa curason y asina motiva su oyentenan pa acepta e bon noticia y haci cambio den nan bida.

¹¹ Ora nos ta haci bon uzo di pregunta manera Hesus tabata haci, nos ta logra por lo menos tres cos. Nos ta haya sa con ta e mihor manera pa yuda hende, con pa rasona cu nan a pesar di e obhecionnan cu nan ta bin cu ne y con pa yuda hende humilde compronde con un estudio di Bijbel por beneficia nan. Awor, laga nos analisa tres scenario den cua nos por haci bon uzo di pregunta.

12-14. Con bo por yuda bo yiu haya mas confianza pa predica e bon noticia? Duna un ehempel.

¹² Scenario 1: Supone cu bo yiu teenager bin bisa bo cu e tin miedo di papia cu su compañeronan di klas tocante e creacion. Kico lo bo haci? Wel, sin duda lo bo kier yuda bo yiu haya mas confianza pa predica e bon noticia. Pues, en bes di critic’e of bis’e mesora kico e tin cu bisa, imita Hesus; hacie algun pregunta cu ta motiv’e pa expresa su punto di bista. Con asina?

¹³ Lesa hunto cu bo yiu algun porcion for di e foyeto Bida Ta Obra di un Kreador? Despues, puntr’e cua di e argumentonan cu e  foyeto ta presenta e ta haya mas interesante. Anim’e pa pensa riba e motibonan pakico e ta convenci cu tin un Creador y dicon e kier haci Dios su boluntad. (Rom. 12:2) Laga bo yiu compronde cu su motibonan por ta diferente for di esnan di bo.

¹⁴ Splica bo yiu cu e por rasona cu un compañero di klas di e mesun manera cu abo a haci cu ne. Lo e por analisa cu ne echo palpabel di creacion y puntr’e su punto di bista. Por ehempel, e por pidi su compañero di klas pa lesa e di dos subtema na pagina 12 di e foyeto Bida Ta Obra di un Kreador? Despues, e por puntra su compañero: “Bo ta kere cu e ingenieronan cu a diseña hala di avion tabata hende masha inteligente?” Probablemente, e compañero di klas lo bisa: “Si.” Despues, bo yiu por puntr’e: “Bo tabata sa cu ta hala di meuchi di lama ingenieronan a imita?” Despues e por puntr’e: “Si pa traha un imitacion mester tabatin un diseñador inteligente, kico di e producto original?” Ta bon pa bo practica regularmente di e manera aki cu bo yiu pa yud’e haya mas confianza pa papia cu otro hende tocante su creencianan. Si bo siña bo yiu haci bon uzo di pregunta, lo bo yud’e cumpli cu su papel como predicador di e bon noticia.

15. Con nos por haci uzo di pregunta pa rasona cu un ateista?

¹⁵ Scenario 2: Durante nos trabou di predica, nos por topa cu hende cu ta duda cu Dios ta existi of cu no ta kere mes cu e ta existi. Pero e combersacion no tin nodo di keda te ey; nos por purba di rasona cu un persona asina. Na un manera respetuoso, nos por puntr’e ta for di ki tempo y dicon e no ta kere den Dios. Despues di scucha su contesta, nos por bis’e cu nos ta mira cu el a pensa seriamente tocante e asunto. Anto nos por puntr’e si e tin algo contra pa lesa un foyeto cu ta duna evidencia cu bida ta  obra di un Creador. Si e ta sincero, casi sigur lo e bisa cu e no tin nada contra pa analisa tal evidencia. E ora ey, nos por ofrec’e e foyeto Bida Ta Obra di un Kreador? Pues, ora nos ta uza tacto y ta haci pregunta na un manera cariñoso, nos por alcansa curason di un persona cu e bon noticia.

16. Dicon nos no mester djis laga nos studiantenan lesa contesta for di paragraf?

¹⁶ Scenario 3: Tur ora cu nos ta dirigi un estudio di Bijbel, nos ta laga e studiante djis lesa su contestanan for di e paragrafnan. Kico lo por ta e resultado? Nos por stroba e studiante di progresa den e berdad. Dicon? Wel, un studiante cu ta djis contesta loke tin den e paragrafnan sin pensa riba e asunto ta manera un mata cu no tin raiz profundo. Ora e hay’e cu e cayente di oposicion, facilmente e por marchita, esta, bandona e berdad. (Mat. 13:20, 21) Pa evita esey, nos mester puntra nos studiante kico e ta pensa di loke e ta siñando; purba di haya sa si e ta di acuerdo cu loke e ta siña. Ta masha importante pa bo lag’e splica bo dicon e ta eens of dicon no. Despues, yud’e rasona for di e Scritura pa e mes por yega na conclusionnan corecto. (Heb. 5:14) Si nos ta haci bon uzo di pregunta, tin mas chens cu nos studiantenan lo para firme den e berdad y resisti hende cu kier opone of engaña nan. (Col. 2:6-8) Kico mas nos por haci pa cumpli cabalmente cu nos papel como predicador di e bon noticia?

17, 18. Con bo por yuda bo compañero den sirbishi ora e ta papiando cu un doño di cas?

¹⁷ Hesus a manda su discipelnan dos dos pa bay predica. (Mar. 6:7; Luc. 10:1) Mas despues, apostel Pablo a papia di su “compañeronan di trabou” cu a ‘lucha lado a lado cu ne na fabor di e bon noticia.’ (Flp. 4:3) Siguiendo e ehempelnan biblico aki, e organisacion di Testigonan di Jehova a cuminsa cu un campaña special na aña 1953 pa predicadornan di Reino train nan compañeronan den e trabou di predica.

¹⁸ Awor, con abo por yuda un otro publicador cu bo ta trahando cu ne den sirbishi ora e ta papiando cu un doño di cas? (Lesa 1 Corintionan 3:6-9.) Wel, bo por habri bo Bijbel y busca e textonan cu e ta lesa hunto cu e doño di cas. Presta atencion ora e ta papia of ora e doño di cas ta expresa su mes. Di e manera ey, si bo compañero tin mester di yudansa, bo por yud’e rasona cu e doño di cas. (Ecl. 4:12) Pero esaki si: Tene cuidou pa bo no interumpi e publicador siendo cu e ta dunando un bon testimonio ni e doño di cas ora e ta papia. Si bo ta interumpi e combersacion innecesariamente, bo por descurasha bo compañero y confundi e doño di cas. No ta malo pa bo contribui na e combersacion, pero limita bo mes na un of dos comentario breve y laga bo compañero sigui cu su combersacion.

19. Kico nos mester corda, y dicon?

¹⁹ Awor, con abo y bo compañero por yuda otro segun cu boso ta bay di un cas pa otro? Uza e tempo ey pa analisa con boso por mehora boso presentacionnan. Papia cosnan edificante. Pues, tene cuidou pa boso no papia malo di e hendenan den e teritorio ni critica boso compañeronan di trabou. (Prov. 18:24) Nos tin cu corda cu nos tur ta manera pochi di klei; niun hende no ta perfecto. Ta Jehova a mustra misericordia na nos, dunando nos e tesoro aki, esta, e privilegio di por predica e bon noticia. (Lesa 2 Corintionan 4:1, 7.) Pesey, laga nos balora e tesoro aki y cumpli cu nos papel como predicador di e bon noticia lo mihor cu nos por.