1. Eaa ra a Iehova i riro ei e ko tei akakitekite maata atu i te Evangeria?

KO TETAI tangata apii evangeria, e akakitekite ana aia i te au tuatua meitaki. Ko te Atua ko Iehova tei na mua i te akakitekite maata i te evangeria. Muri ua ake te meameaau anga a Adamu raua ko Eva, kua akakite a Iehova e ka takoreia a Satani te Tiaporo. (Gene. 3:15) No tetai au anere mataiti, kua akamarama mai a Iehova e akapeea aia me takore i te akakinoanga tei tukuia ki runga i tona ingoa, me akatikatika i te au manamanata ta Satani i akatupu, e akapeea e rauka akaou mai ei te au tangata i te oraanga mutu kore. Tei roto teia au tuatua meitaki i te Tuatua a te Atua, te Pipiria.

2. (a) Na teea mataara i akakitekite ei te au angera i te evangeria? (e) Akapeea a Iesu i riro ei ei akaraanga meitaki no te aronga akakitekite i te evangeria?

² E akakitekite katoa ana te au angera i te evangeria. Ka akakitekite ratou i te tuatua meitaki, e ka tauturu i tetai ke kia akakitekite aere i te reira i runga i te enua. (Luka 1:19; 2:10; Anga. 8:26, 27, 35; Apo. 14:6) Akapeea ra te angera maata ko Mikaela? Kua akakitekite katoa aia i te evangeria. Iaia i runga nei i te enua ei tangata tei kapikiia e ko Iesu, ko tana angaanga puapinga rava atu ko te tutu anga i te tuatua meitaki. Kua akaari mai tona akaraanga e kia riro te tutu anga ei angaanga puapinga roa atu kia tatou.​—Luka 4:16-21.

3. (a) Eaa te tuatua meitaki ta tatou e tutu aere ana? (e) Eaa te nga uianga ta tatou ka pau?

³ Kua akaue a Iesu i tana au pipi kia riro mai ei aronga apii evangeria. (Mata. 28:19, 20; Anga. 1:8) Kua akakite te apotetoro ko Paulo kia Timoteo e: ‘E rave i te angaanga apii evangelia, e rave akaope takiri i to angaanga orometua.’ (2 Timo. 4:5) Eaa te tuatua meitaki ta tatou e tutu aere ana? E akakite ana tatou ki te au tangata e te inangaro maira to tatou Metua i te rangi, ko Iehova, ia tatou. (Ioa. 3:16; 1 Pete. 5:7) Te riro ra te Patireia o te Atua ei  akapapuanga i tona inangaro no te au tangata. No reira ka akakitekite tatou ki tetai ke, e me riro mai ratou ei au tangata no tona Patireia, akarongo kiaia, rave i te au mea tika, ka riro ratou ei au oa nona. (Sala. 15:1, 2) Ka takore a Iehova i te au mamae katoatoa, e te mii no te au mea kino tei tupu kia tatou i mua ana. E nuti meitaki tikai teia! (Isa. 65:17) Ei aronga apii evangeria, ka anoanoia tatou kia pau e rua nga uianga puapinga: Eaa ra te au tangata ka anoanoia ai kia akarongo ki te tuatua meitaki i teia tuatau? E akapeea tatou me riro ei au tangata apii evangeria meitaki?

4. Eaa te au pikikaa tei akakiteia ki te au tangata no runga i te Atua?

⁴ Akamanako ana e kua akakite mai tetai tangata e kua akaruke toou metua tane ia koe e toou pamiri. Akakite mai aia e kare toou metua tane e inangaro ana i te kite ia koe, kare aia i te tangata oaoa e e tangata kino aia. E oti kua akakite mai aia e kua mate toou metua tane, e eaa koe ka kimi ei iaia. Te tuatua akapera ra tetai pae no runga i te Atua. Te karanga ra te tangata e kare e rauka i te kite i te Atua, me kore e Atua kino aia. Te apii ra tetai au arataki akonoanga e ka tamamae te Atua i te au tangata kino i roto i te ai e tuatau ua atu. Karanga tetai pae e na te Atua e akatupu ana i te au uriia me kore te au tumatetenga ei tamamae i te tangata. Te karanga ra ratou e noatu e tamate ana te au tumatetenga i te au tangata meitaki e te kino, te taangaanga ra te Atua i te au tumatetenga ei akautunga i te tangata.

5, 6. Akapeea te apiianga o te au mea tupu ua mai e te au apiianga pikikaa a te au akonoanga te takino anga i te au tangata?

⁵ Kua karanga tetai pae e kare e Atua. Te aronga tei irinaki i te au mea tupu ua mai, karanga ratou e kare te au mea ora i angaia mai. Irinaki tetai pae e no roto mai te tangata i te au manu. No reira te aronga tei irinaki i teia, kare i te mea poitirere e, e akaari ana te tangata i te tu taetaevao mei to te manu rai. Irinaki ratou e e mea natura ua no te au tangata maroiroi i te takino i te au tangata paruparu. Kare i te mea poitirere e te karanga ra tetai e ka vai ua rai te tu tika kore. No reira, te aronga tei irinaki i te au mea tupu ua mai, kare o ratou manakonakoanga mou.

⁶ Ko te apiianga o te au mea tupu ua mai e te au apiianga pikikaa a te au akonoanga, ko tetai tumu ia e mamae ra te au tangata i teia tuatau openga. (Roma 1:28-31; 2 Timo. 3:1-5) Kare teia au apiianga i te tuatua meitaki. Mari ra, mei ta te apotetoro ko Paulo i akakite mai, kua akatupu te reira i te tangata kia ‘akapoiriia, e kia taka keia mai mei te ora a te Atua.’ (Ephe. 4:17-19) Pera katoa, te apiianga no te au mea tupu ua mai e te au apiianga pikikaa a te au akonoanga, kua arai i te tangata kia kore e ariki i te tuatua meitaki a te Atua.​—E tatau ia Ephesia 2:11-13.

7, 8. Eaa te mataara anake ua e kite ei te au tangata i te tuatua meitaki?

⁷ E rauka ai tetai pirianga ki te Atua, ka akapapu te au tangata e e Atua tika tikai a Iehova e e tumuanga meitaki tetai kia kite ratou iaia. Ka rauka ia tatou i te tauturu ia ratou kia kite i te Atua na te akamaroiroi anga ia ratou kia apii no runga i tana i anga mai. Me akara te au tangata i te au mea angaia takapini ia ratou e me akamanako tikai ratou i ta ratou e akara ra, ka kite mai ratou i te tu pakari e te mana o te Atua. (Roma 1:19, 20) Ei tauturu i te au tangata kia marama e e mea umere tikai te au mea ta te Atua i anga mai, ka rauka ia tatou i te akaari i te atikara “Te Vaerua Tapu​—E Angaanga ra i Roto i te au Mea Angaia!” i roto i Te Punanga Tiaki o Peperuare 15, 2011. Inara e au uianga tetai kare e rauka i te tangata i te pau na te apii ua anga no runga i te au mea i angaia, koia oki: Eaa ra te Atua i akatika ai i te mamae? Eaa to te Atua akakoroanga no  te enua? Te manako maira ainei te Atua ia tatou tataki tai?

⁸ Te mataara anake ka kite ei tatou i te tuatua meitaki no runga i te Atua e tona akakoroanga, kia apii i te Pipiria. E tikaanga ngateitei to tatou kia tauturu i tetai ke kia kite mai i te tuatua meitaki! Inara, me inangaro tatou i te tauturu i tetai tangata kia irinaki i te Atua e kia riro mai ei oa Nona, ka maata atu ta tatou ka rave i te apii ua anga i te au mea tika no runga i te Atua. Ka anoanoia tatou kia akakeu i te reira tangata koia oki, kia tauturu iaia kia marama i te au tumu ka irinaki ei aia i te Atua. (2 Timo. 3:14) No reira ka apii tatou, akapeea me akakeu i te tangata mei ta Iesu rai i rave. Eaa ra i rauka ai iaia i te akakeu i te tangata? Tetai tumu koia oki, kua taangaanga meitaki aia i te au uianga. Akapeea tatou me aru iaia?

9. Me inangaro tatou i te tauturu i te au tangata kia irinaki i te tuatua meitaki, eaa ta tatou ka rave?

⁹ Eaa ra tatou ka taangaanga ai i te au uianga i roto i te angaanga orometua, mei ta Iesu rai i rave? Akamanako ana e kua karanga mai toou taote e ka anoanoia koe kia vaiia. Penei ka irinaki koe iaia. Inara akapeea me ka akakite mai aia i te reira e kare aia i uiui mai ana no runga i toou oraanga kopapa? Penei kare koe e irinaki iaia. Ka anoanoia tetai taote karape kia uiui i te au uianga e kia akarongo ki te au pauanga i mua ake ka tauturu ei aia i tetai tangata. No reira me inangaro tatou i te tauturu i te au tangata kia irinaki i te tuatua meitaki o te Patireia, ka anoanoia tatou kia kite e akapeea me uiui i te au uianga meitaki kia marama tatou eaa te tauturu ta ratou e anoano ra.

10, 11. Me aru tatou i te tu e apii ana a Iesu, eaa ta tatou ka rauka i te rave?

¹⁰ Kua kite a Iesu e ka taangaanga tetai puapii i te au uianga kia kite no runga i tana tangata apii e kia tauturu iaia kia akamanako e kia akakite mai i tona manako. Ei akaraanga, te inangaro anga a Iesu i te apii i tana au pipi no runga i te tu akaaka, kua ui aia i tetai uianga na mua tei akakeu ia ratou kia akamanako. (Mare. 9:33) Kua ui ana a Iesu kia Petero i tetai uianga, kua akakite aia e rua pauanga, e kua pati aia ia Petero kia iki e ko teea te mea tika. Kua tauturu teia ia Petero kia kite mai i tetai apiianga puapinga. (Mata. 17:24-26) I tetai atianga ke, kua inangaro a Iesu i te kite eaa tei roto i te ngakau o tana au pipi, no reira kua ui aia i tetai au uianga tei akakeu ia ratou kia akakite mai i to ratou manako. (E tatau ia Mataio 16:13-17.) Kare a Iesu i akakite ua ki te au tangata eaa ta ratou ka rave. Na roto i te tu i uiui ei aia i te au uianga, kua akakeu aia i te au tangata kia ariki i te tuatua meitaki e kia rave i te au tauianga i roto i to ratou oraanga.

¹¹ Me aru tatou i te tu i taangaanga ai a Iesu i te au uianga, ka kite tatou i te mataara meitaki rava atu kia tauturu i te tangata tataki tai ta tatou ka aravei i roto i te angaanga orometua. Ka kite katoa tatou e akapeea me uriuri manako ki te au tangata me kare ratou e ariki mai i ta tatou karere. E ka rauka katoa ia tatou i te apii i te au tangata kia puapingaia. I teianei, ka uriuri tatou e toru akaraanga e akapeea tatou me taangaanga meitaki i te au uianga.

12-14. Akapeea koe me tauturu i taau tamaiti kia manako papu no runga i te angaanga tutuanga? Oronga mai i tetai akaraanga.

¹² Akaraanga 1: Eaa taau ka rave me e mataku ana taau tamaiti mapu i te tuatua ki tona au oa apii no runga i te au mea i angaia mai? Akapeea koe me tauturu iaia kia  manako papu me tuatua kia ratou? Auraka e akaapa iaia me kore e akakite kiaia eaa tana ka tuatua, e ui ra kiaia i te au uianga te ka tauturu iaia kia akakite i tona manako, mei ta Iesu rai i apii ia tatou kia rave. Akapeea koe me rave i te reira?

¹³ I muri ake te tatau anga ki taau tamaiti i tetai au manako i roto i te atikara “Te Vaerua Tapu​—E Angaanga ra i Roto i te au Mea Angaia!” o Te Punanga Tiaki o Peperuare 15, 2011, e ui kiaia e ko teea te manako tana e reka ra. Akamaroiroi iaia kia akamanako i tetai au tumu ke i irinaki ei aia i Tei Anga mai e te tumu i inangaro ei aia i te tavini i te Atua. (Roma 12:2) Akamarama ki taau tamaiti e eiaa e manamanata me kare to korua manako e aiteite ana.

¹⁴ E akakite ki taau tamaiti e kia tuatua aia ki tona oa apii na roto i te tu e tuatua ana koe kiaia. Koia oki ka rauka iaia i te akara akaou i tetai au manako, e oti ui i tetai uianga kia kite aia e eaa te manako o tona oa. Ei akaraanga, ka rauka iaia i te ui i teia uianga: “Eaa te angaanga a te DNA?” Me oronga mai te oa apii i te pauanga tika, ka rauka i taau tamaiti i te ui e: “Eaa te ka mou mai ia tatou no runga i te tu e rave meitaki ua ana te DNA i tana angaanga?” Ei tauturu i taau tamaiti kia manako papu me tuatua aia ki tetai ke no runga i tona irinakianga, e akaari kiaia e ka akapeea aia me rave i te reira. Me tereni koe iaia kia taangaanga meitaki i te au uianga, ka tauturu koe iaia kia riro mai ei tangata apii evangeria meitaki.

15. Akapeea tatou me taangaanga i te au uianga kia uriuri manako ki tetai tangata kare e irinaki ana i te Atua?

¹⁵ Akaraanga 2: I roto i ta tatou angaanga tutuanga, penei ka aravei tatou i tetai tangata tei ekoko me e Atua rai tetai me kore kare aia e irinaki ana i te Atua. Ka rauka rai ia tatou i te uriuri manako kiaia. Penei ka ui atu tatou e eaa te roa tona irinakianga i te reira, me kore te tumu kare aia e irinaki ana i te Atua. I muri ake i to tatou akarongo anga  ki tana i tuatua mai, kia ariki tatou e kua akamanako meitaki aia no runga i tana e irinaki ra. E oti kia ui kiaia me ka inangaro aia i te tatau i tetai atikara te akapapu maira e kua angaia mai te au mea ora. Me ka inangaro aia, e akaari atu i te atikara “Te Vaerua Tapu​—E Angaanga ra i Roto i te au Mea Angaia!” o Te Punanga Tiaki o Peperuare 15, 2011. Me akangateitei tatou i tetai tangata e me uiui maru atu i te au uianga, penei ka itae te tuatua meitaki i tona ngakau.

16. Eaa ra tatou ka akapapu ei e kare ta tatou aronga apii e tatau ua mai i te au pauanga mei roto mai i te puka me kore i te poroutia?

¹⁶ Akaraanga 3: Me rave tatou i tetai apii Pipiria, eaa te ka tupu me akatika tatou i ta tatou tangata apii kia tatau tika mai i te au pauanga i roto i te puka me kore i te poroutia? Penei kare aia e tere ki mua i roto i te tuatua mou. No teaa ra? No te mea ko tetai tangata apii te tatau tika maira i te au pauanga ma te kore e akamanako i te reira, te riro ra aia mei tetai ua rakau rai kare tona aka e tupu oonu ana. Penei ka ngata iaia kia noo tamou ki roto i te tuatua mou me patoi mai te au tangata iaia. (Mata. 13:20, 21) E rauka ai i te tauturu i ta tatou aronga apii, ka anoanoia tatou kia ui e eaa tona manako no runga i tana e apii ra. E ui kiaia me te ariki ra aia i tana e apii ra e te tumu i manako akapera ei aia. E oti, e tauturu iaia kia akamanako i te au Tuatua Tapu me te rotai ra tana e irinaki ra ki runga i te Pipiria. (Ebe. 5:14) Me taangaanga meitaki tatou i te au uianga, papu e ka ketaketa ta tatou aronga apii i roto i te tuatua mou, e ka vai tiratiratu ratou me patoiia mai me kore me akavareia ratou. (Kolo. 2:6-8) Eaa atu tetai ka rauka ia tatou i te rave kia riro mai ei aronga apii evangeria meitaki?

17, 18. Me te tuatua ra tetai papuritia ki te tangata ngutuare, akapeea koe me tauturu iaia?

¹⁷ Kua tono taki rua a Iesu i tana au pipi kia rave i te angaanga tutu anga. (Mare. 6:7; Luka 10:1) Muri mai, kua tuatua te apotetoro ko Paulo e kua ‘rave kapiti’ aia e tona ‘au oa rave angaanga’ i te tutu anga i te tuatua meitaki. (Phili. 4:3) I te mataiti 1953, kua akamata te akaaerenga i tetai porokaramu puapinga kia tauturu i te au papuritia kia tereni i tetai ke i roto i te angaanga orometua.

¹⁸ Me aere kapiti koe e tetai papuritia ki tetai ngutupa, eaa taau ka rave kia tauturu iaia me tutu aia ki te tangata ngutuare? (E tatau ia 1 Korinetia 3:6-9.) Akara i te au irava i roto i taau Pipiria. Akarongo ki te papuritia iaia e tuatua ra kia rauka ia koe i te tauturu iaia kia uriuri manako ki te tangata ngutuare. (Kohe. 4:12) Inara, e matakite kia kore e tamanamanata atu i te papuritia iaia e oronga ra i tetai akakitekiteanga meitaki me kore me te tuatua maira te tangata ngutuare. Me tamanamanata koe i te reira, kare koe e akamaroiroi i te papuritia me kore kare te tangata ngutuare e marama mai. Kare i te mea tarevake kia oronga i tetai nga manako, inara e akatika i te papuritia kia tuatua i tana e tuatua ra.

19. Eaa ta tatou ka akamaara, e no teaa ra?

¹⁹ Ia korua e te papuritia e aere ra mei tera are ki tera are, akapeea koe me tauturu i tetai e tetai kia riro mai korua ei nga tangata apii evangeria meitaki? E uriuri manako akapeea me akameitaki atu i ta korua tuatua akamataanga. Kia matakite kia kore e tuatua i te au mea akamaroiroi kore no runga i te au tangata i taau ngai tutu anga, e auraka e kopekope no runga i te au taeake e te au tuaine. (Mase. 18:24) Kia akamaara tatou e e au tangata apa tatou katoatoa. Kua oronga aroa mai a Iehova i te angaanga no te tutu anga i te tuatua meitaki kia tatou e te apii anga ia tatou kia tutu aere. (E tatau ia 2 Korinetia 4:1, 7.) No reira kia akaari tatou i te tu ariki rekareka no te tuatua meitaki na te tauta maroiroi anga kia riro mai ei aronga apii evangeria meitaki.