1. Tanbasá Jeová mak ida neʼebé haklaken evanjellu uluk liu no importante liu?

 HAKLAKEN evanjellu, neʼe katak haklaken liafuan diʼak. Ida neʼebé haklaken evanjellu uluk liu no importante liu mak Maromak Jeová. Kuandu Adão ho Eva halo sala, Jeová fó sai kedas liafuan diʼak, katak iha aban-bainrua nia sei halakon samea, ka Diabu Satanás. (Gên 3:15) Durante tinan atus ba atus, Jeová mós fó sai informasaun kona-ba oinsá mak nia sei halo santu ninia naran, oinsá mak nia sei hadiʼa problema hotu neʼebé Satanás halo, no oinsá mak ema sei hetan fali oportunidade atu moris ba nafatin. Ita bele hetan liafuan diʼak neʼe hotu liuhusi Maromak nia Liafuan Bíblia.

2. (a) Oinsá mak anju sira mós hola parte iha serbisu haklaken? (b) Jesus fó ezemplu saida ba ninia dixípulu sira?

² Anju sira mós hola parte iha serbisu haklaken. Sira rasik haklaken evanjellu, no sira mós ajuda ema atu haklaken. (Lc 1:19; 2:10; Apos 8:26, 27, 35; Apok 14:6) Oinsá ho arkanju Miguel? Kuandu nia moris iha rai nuʼudar Jesus, nia fó ezemplu diʼak ba ninia dixípulu sira hodi tau uluk serbisu haklaken evanjellu iha ninia moris.—Lc 4:16-21.

3. (a) Ita haklaken liafuan diʼak kona-ba saida? (b) Iha lisaun neʼe, ita sei hanoin kona-ba pergunta saida deʼit?

³ Jesus haruka ninia dixípulu sira atu haklaken evanjellu. (Mt 28:19, 20; Apos 1:8) Apóstolu Paulo mós hatete ba Timóteo: “Halo knaar atu haklaken evanjellu, kaer didiʼak ó-nia knaar.” (2 Tim 4:5) Entaun, ita haklaken liafuan diʼak kona-ba saida? Ita haklaken kona-ba ita-nia Aman Jeová nia domin ba ita. (Joao 3:16; 1 Ped 5:7) Maromak Jeová hatudu ninia domin neʼe liuhusi ninia Ukun. Tan neʼe, ita fó-hatene ba ema seluk katak se sira simu Maromak nia Ukun, halo tuir ninia ukun-fuan sira no halo buat neʼebé loos, sira bele sai Maromak nia belun. (Sal 15:1, 2) Jeová sei halakon ema nia  susar hotu, no mós ema nia memória aat husi tempu uluk, neʼebé halo sira laran-susar nafatin. Neʼe mak liafuan diʼak duni! (Isa 65:17) Maibé, nuʼudar ita haklaken liafuan diʼak, ita presiza hatene resposta ba pergunta rua tuirmai neʼe: Tanbasá mak ema presiza rona liafuan diʼak? No oinsá mak ita bele kaer didiʼak ita-nia knaar atu haklaken liafuan diʼak?

4. Ema hatete lia-bosok saida kona-ba Maromak?

⁴ Hanoin toʼok: Ema ruma hatete ba Ita katak Ita-nia aman husik Ita no Ita-nia família hotu. Sira dehan katak Ita-nia aman mak ema neʼebé ladiʼak, lakohi hakbesik Ita, no nia nafatin subar ninia an. Sira balu mós hatete katak maski Ita koko atu koʼalia ho Ita-nia aman, neʼe saugati deʼit tanba nia mate ona. Tuir loloos, neʼe mak buat neʼebé ema balu hatete kona-ba Maromak. Sira dehan katak Maromak subar hela deʼit, nia la hanoin ema, no saugati deʼit ba sira atu buka-hatene kona-ba Maromak. Ulun-naʼin relijiaun balu mós hatete katak Maromak sei fó kastigu ba ema aat iha infernu. Balu tan hatete katak Maromak mak halo dezastre naturál oioin. Maski dezastre sira hanesan neʼe bele halo ema aat no ema diʼak hotu mate, maibé sira nafatin dehan katak neʼe mak kastigu husi Maromak.

5, 6. Hanorin kona-ba evolusaun no doutrina falsu sira kona ema oinsá?

⁵ Ema balu fiar ba evolusaun hodi hatete katak Maromak la iha no moris hotu mosu mesak deʼit. Sira barak hatete katak ema mak animál oin ida, no ema nia hahalok hanesan deʼit ho animál nia hahalok. Hanorin hanesan neʼe la ajuda ema atu hatudu hahalok diʼak. Liután neʼe, ema neʼebé fiar evolusaun hanoin katak ema neʼebé iha forsa liu mak sei domina ema neʼebé la iha forsa, hanesan ho animál sira. Tan neʼe, tuir sira-nia hanoin, buat neʼebé la iha justisa sei kontinua ba nafatin. Sin, hanorin evolusaun halo ema la iha esperansa ba futuru.

⁶ Klaru katak hanorin kona-ba evolusaun no doutrina falsu sira halo ema nia moris sai susar liután iha loron ikus sira-neʼe. (Rom 1:28-31; 2 Tim 3:1-5) Hanorin falsu sira-neʼe nunka lori liafuan diʼak, maibé hanesan apóstolu Paulo hatete, husik ema “iha nakukun laran” hodi hadook sira husi Maromak. Liután neʼe, hanorin kona-ba evolusaun no doutrina falsu sira hanetik ema atu labele simu liafuan diʼak husi Maromak.—Lee Efeso 4:17-19.

7, 8. Atu ema bele komprende liafuan diʼak, sira tenke halo saida?

⁷ Atu ema bele iha relasaun diʼak ho Maromak, ulukliu mak sira presiza fiar katak Maromak Jeová iha duni. Sira mós presiza hatene katak sira sei hetan buat diʼak hodi hakbesik ba Maromak. Ita bele ajuda sira atu hatene kona-ba Maromak hodi fó laran-manas ba sira atu haree didiʼak ba buat neʼebé Maromak kria. Nuʼudar sira estuda didiʼak Maromak nia kriasaun, sira bele aprende kona-ba Ninia matenek no forsa. (Rom 1:19, 20) Atu ajuda sira halo ida-neʼe, ita bele uza broxura Moris Hotu Mosu Mesak Deʼit ka lae?. Maski nuneʼe, hatene deʼit kona-ba kriasaun mós la toʼo tanba kriasaun la bele fó resposta ba pergunta sira neʼebé importante, hanesan: Tansá mak Maromak husik ema hetan terus? Saida mak Maromak nia hakarak ba mundu neʼe? Maromak hanoin haʼu ka lae?

⁸ Loos duni, atu ema bele komprende liafuan diʼak kona-ba Maromak no ninia hakarak, sira tenke estuda Bíblia. Ita iha knaar espesiál duni atu ajuda sira halo nuneʼe, loos ka lae? Maibé, hodi book ema nia laran, hatoʼo informasaun deʼit la toʼo. Ita mós presiza ajuda ema atu fiar katak informasaun neʼebé ita hatoʼo mak lia-loos duni. (2 Tim 3:14) Hodi halo nuneʼe, ita bele halo tuir Jesus nia  ezemplu. Entaun, tanbasá mak Jesus hetan susesu iha ninia serbisu haklaken? Buat ida neʼebé nia halo mak husu pergunta sira ho matenek. Mai ita haree oinsá mak ita bele halo tuir ninia ezemplu.

9. Atu ajuda ema atu simu liafuan diʼak, ita presiza halo saida?

⁹ Tanbasá mak ita presiza husu pergunta sira iha serbisu haklaken hanesan Jesus? Hanoin toʼok situasaun tuirmai neʼe: Ita-nia doutór hatete katak nia bele kura Ita-nia moras se Ita hetan operasaun boot ida. Karik Ita fiar ba buat neʼebé nia hatete. Maibé oinsá se doutór neʼe seidauk husu pergunta ida kona-ba Ita-nia moras no promete deʼit katak nia sei kura Ita-nia moras? Karik Ita la bele tau fiar ba nia. Maski doutór neʼe mak ema neʼebé matenek tebes, maibé nia presiza husu pergunta oioin kona-ba Ita-nia saúde no rona buat neʼebé Ita hatete. Nuneʼe mós ho serbisu haklaken, se ita hakarak ajuda ema atu simu liafuan diʼak, ita presiza aumenta ita-nia matenek atu husu pergunta sira ba ema hodi bele hatene ho loloos sira ida-idak nia situasaun no sira-nia presiza.

10, 11. Hodi halo tuir Jesus nia ezemplu kona-ba hanorin ema, ita bele halo saida deʼit?

¹⁰ Jesus hatene katak pergunta sira bele ajuda mestre sira atu hatene kona-ba estudante sira-nia situasaun no ajuda mós estudante sira atu fó sai sira-nia hanoin. Porezemplu, kuandu Jesus hakarak hanorin ninia dixípulu sira atu haraik an ba malu, nia husu uluk pergunta ida atu loke sira-nia hanoin. (Mc 9:33) Kuandu Jesus ajuda Pedro atu hadiʼa ninia hanoin neʼebé sala, Jesus mós husu pergunta ida hodi temi rasik ninia resposta neʼebé loos no resposta neʼebé sala, no nia husik Pedro atu hili ida husi resposta rua neʼe. (Mt 17:24-26) Iha tempu seluk, Jesus mós husu pergunta balu neʼebé tuituir malu ba ninia dixípulu sira hodi ajuda sira atu fó sai sira-nia hanoin. (Lee Mateus 16:13-17.) Jesus la fó-hatene kedas kona-ba buat neʼebé ema tenke halo. Maibé hodi uza pergunta sira, Jesus book ema nia laran no fó laran-manas ba sira atu halo tuir liafuan diʼak neʼebé sira rona.

¹¹ Hodi halo tuir Jesus nia ezemplu kona-ba husu pergunta, ita bele hatene oinsá atu ajuda ema ida-idak neʼebé ita hasoru iha serbisu haklaken. Ita mós bele hatene oinsá atu koʼalia ho ema neʼebé iha hanoin la hanesan ho ita, no ita bele hanorin ema oinsá atu hetan buat diʼak husi mensajen neʼebé ita lori. Entaun, mai ita haree ezemplu tolu kona-ba oinsá mak ita bele husu pergunta sira ho matenek.

12-14. Hodi halo saida deʼit mak ita bele ajuda ita-nia oan atu haklaken ho didiʼak? Fó toʼok ezemplu.

¹² Ezemplu 1: Inan-aman sira, se ita-nia oan sente taʼuk atu esplika ba kolega eskola kona-ba ninia fiar ba Kriadór, saida mak ita bele halo? Ita hakarak ajuda ita-nia oan atu haklaken liafuan diʼak ho laran-metin. Tan neʼe, duké hatún nia ka fó-hatene kedas oinsá atu hatán ba ninia kolega sira, diʼak liu halo tuir Jesus nia ezemplu hodi husu pergunta balu atu hatene ninia hanoin. Oinsá mak ita bele halo ida-neʼe?

¹³ Karik ita bele lee hamutuk ho ita-nia oan broxura Moris Hotu Mosu Mesak Deʼit ka lae? no depois husu informasaun saida mak nia gosta liu. Fó laran-manas mós ba nia atu fó sai ninia hanoin kona-ba tansá mak nia fiar ba Kriadór no tansá mak nia hakarak  halo tuir Maromak. (Rom 12:2) Fó-hatene nia katak maski dala ruma ninia hanoin la hanesan ho ita-nian, maibé neʼe la problema.

¹⁴ Tuirmai, esplika ba ita-nia oan katak bainhira nia koʼalia ho kolega sira, nia bele halo tuir buat neʼebé ita foin halo. Neʼe katak ita-nia oan ho nia kolega lee hamutuk informasaun ruma, no depois husu pergunta balu atu kolega neʼe bele fó sai ninia hanoin. Porezemplu, karik ita-nia oan bele husu nia kolega atu lee pájina 12 no 13 husi broxura Moris Hotu Mosu Mesak Deʼit ka lae?. Depois, ita-nia oan husu: “Ema neʼebé halo aviaun nia liras presiza iha matenek, loos ka lae?” Karik kolega sei hatán: “Loos.” Tuirmai, ita-nia oan husu: “Ó haree ka lae, aviaun sira-nia liras kopia tuir manu nia liras?” Depois husu tan: “Se halo aviaun nia liras hodi kopia tuir manu nia liras mós presiza iha matenek, oinsá tan ho ida neʼebé halo manu nia liras?” Atu ita-nia oan bele koʼalia kona-ba ninia fiar ba ema seluk ho aten-brani, ita bele halo beibeik drama kiʼik ho nia. Kuandu ita treinu ita-nia oan oinsá atu husu pergunta sira ho matenek, neʼe katak ita ajuda nia atu halaʼo didiʼak ninia knaar atu haklaken.

15. Ita bele husu pergunta saida deʼit ba ema neʼebé hanoin katak Maromak la iha?

¹⁵ Ezemplu 2: Iha serbisu haklaken, ita hasoru ema neʼebé duvida katak Maromak la iha. Karik ema balu hanoin katak Maromak la iha duni. Maibé ita bele nafatin koʼalia ho ema neʼebé iha hanoin hanesan neʼe. Ita bele husu ho respeitu pergunta hanesan: ‘Ita-nia hanoin hanesan neʼe ba tinan hira ona?’ ka ‘Tansá mak Ita komesa hanoin hanesan neʼe?’ Rona didiʼak ninia resposta, no gaba nia tanba nia hanoin kleʼan kona-ba neʼe. Depois, ita bele husu se nia hakarak lee livru ida neʼebé esplika kona-ba tanbasá mak ema balu fiar katak Maromak mak kria buat hotu. Se nia hakarak,  ita bele fahe broxura Moris Hotu Mosu Mesak Deʼit ka lae?. Hodi husu pergunta ho matenek no laran-diʼak, karik ita bele ajuda ema atu loke sira-nia hanoin hodi simu liafuan diʼak.

16. Tanbasá mak ita labele husik ita-nia estudante atu fó resposta husi livru deʼit?

¹⁶ Ezemplu 3: Kuandu ita halaʼo estudu Bíblia, karik ita husik estudante sira fó resposta husi livru deʼit. Maibé, se ita nuʼudar mestre husik deʼit sira fó resposta hanesan neʼe, ida-neʼe hanetik sira atu la laʼo ba oin iha lia-loos. Tanbasá? Tanba bainhira estudante sira repete deʼit resposta hodi la hanoin kleʼan, lia-loos la bele sai metin iha sira-nia laran. No kuandu ema koko hapara sira atu aprende lia-loos, karik sira sei rende an lalais hanesan fini neʼebé moris iha fatuk leten no namlaek kedas kuandu loro-matan kona. (Mt 13:20, 21) Atu sira labele sai hanesan neʼe, ita presiza buka-hatene estudante nia hanoin kona-ba buat neʼebé sira aprende. Husu ba sira se sira simu buat neʼebé sira foin aprende no husu mós tansá mak sira simu ka la simu buat neʼebé sira aprende. Depois, ajuda sira atu hanoin didiʼak kona-ba Eskritura sira, hodi nuneʼe ikusmai sira rasik bele iha hanoin neʼebé loos hodi tuir Bíblia nia hanorin. (Ebr 5:14) Se ita husu pergunta sira ho matenek, ita bele ajuda ita-nia estudante sira atu sai metin iha lia-loos no tahan hasoru susar oioin husi ema neʼebé kontra hasoru sira ka lohi sira. (Kol 2:6-8) Maibé, saida tan mak ita bele halo atu halaʼo didiʼak ita-nia knaar atu haklaken evanjellu?

17, 18. Kuandu ita haklaken hamutuk ho ita-nia maluk ida, oinsá mak ita bele serbisu hamutuk?

¹⁷ Kuandu Jesus haruka ninia dixípulu sira atu bá haklaken, nia haruka sira rua-rua duké husik sira laʼo ketaketak. (Mc 6:7; Lc 10:1) Liutiha tempu balu, apóstolu Paulo mós temi kona-ba ‘ninia maluk sira’ neʼebé haklaken evanjellu hamutuk. (Flp 4:3) Hodi tuir ezemplu sira-neʼe, iha tinan 1953, ita-nia organizasaun komesa halo arranju espesiál kona-ba haklaken-naʼin sira fó treinu ba malu.

¹⁸ Kuandu ita haklaken hamutuk ho ita-nia maluk ida, oinsá mak ita bele serbisu hamutuk? (Lee 1 Korinto 3:6-9.) Kuandu ita-nia maluk mak koʼalia ho uma-naʼin no hatudu eskritura ba nia, ita mós bele loke ita-nia Bíblia. Diʼak atu rona didiʼak ba buat neʼebé ita-nia maluk koʼalia, no prepara an atu ajuda nia kuandu uma-naʼin husu pergunta neʼebé susar ka hatete buat neʼebé ladiʼak. (Ecle 4:12) Maibé, ita mós presiza kuidadu hodi labele hadau ita-nia maluk nia koʼalia. Se ita halo hanesan neʼe, ida-neʼe bele halo nia laran-tun no bele mós halo konfuzaun ba uma-naʼin. Maski dala ruma ita mós bele koʼalia uitoan ho uma-naʼin, maibé importante liu mak ita kontrola an no husik ita-nia maluk atu koʼalia fali ho uma-naʼin.

19. Diʼak ba ita atu hanoin-hetan nafatin kona-ba saida?

¹⁹ Liután neʼe, bainhira ita laʼo hamutuk durante serbisu haklaken husi uma ba uma, oinsá mak ita bele ajuda malu? Diʼak atu uza tempu neʼe atu koʼalia kona-ba oinsá ita bele hadiʼa ita-nia matenek atu haklaken. Kuidadu atu la koʼalia buat neʼebé ladiʼak kona-ba ema neʼebé ita hasoru iha haklaken-fatin. Ita mós labele koʼalia kona-ba maluk kristaun ruma nia fraku. (Prov 18:24) Diʼak atu hanoin-hetan nafatin katak ita hotu ema sala-naʼin no iha fraku oioin, maibé tanba Jeová nia laran-luak, ita simu knaar espesiál atu haklaken liafuan diʼak. (Lee 2 Korinto 4:1, 7.) Tan neʼe, mai ita hotu hafolin rikusoin ida-neʼe hodi hakaʼas an atu halaʼo didiʼak ita-nia knaar atu haklaken evanjellu.