Amuzuzikizye Mukuli Wanu Mbomuli Bakambausi
Amuzuzikizye Mukuli Wanu Mbomuli Bakambausi
“Kocita mulimo wamukambausi, uuzuzikizye cakumaninina mulimo wako.”—2 TI. 4:5.
INO INGA MWAINGULA BUTI?
Ino mukambausi muntu uuli buti?
Nkaambo nzi bantu ncobayandika kumvwa makani mabotu?
Nzyintu nzi nzyobacita bakambausi ibazwidilila?
1. Nkaambo nzi Jehova ncaambwa kuti ngo Mukambausi mutaanzi alimwi uubainda boonse?
MUKAMBAUSI muntu waambila bamwi makani mabotu. Mukambausi wakusaanguna alimwi uubainda boonse ngu Jehova Leza. Bazyali besu bakusaanguna nobakazanga buyo, Jehova wakaambilizya makani mabotu kujatikizya muzoka—Saatani Diabolosi—kuti uyakunyonyoonwa. (Matl. 3:15) Mumyaanda yamyaka, Jehova wakasololela baalumi basyomeka kutegwa balembe makani aatondezya zyina lyakwe mbolyakali kuyakusalazyigwa kukusampaulwa, mbwaakali kuyakubambulula kunyonyoona ikwacitwa a Saatani, alimwi akutondezya bantu mbobakali kuyakutambula zyoolwe nzyobakasweekelwa ba Adamu a Eva.
2. (a) Ndubazu nzi bangelo ndobajisi mumulimo wakukambauka? (b) Mbuti Jesu mbwaakatondezya mbobeelede kuucita mulimo bakambausi?
2 Bangelo abalo mbakambausi. Balo kubagama balaambilizya makani mabotu, alimwi balabagwasyilizya bantu mukumwaya makani mabotu. (Lk. 1:19; 2:10; Mil. 8:26, 27, 35; Ciy. 14:6) Mbuti kujatikizya Mikayeli angelo silutwe? Ciindi naakali anyika kaitwa kuti Jesu, wakatondezya bakambausi bantusi mbobakeelede kuucita mulimo ooyu. Mubuumi bwakwe, Jesu wakabikkila kapati maano kumulimo wakumwaya makani mabotu.—Lk. 4:16-21.
3. (a) Makani mabotu nzi ngotumwaya? (b) Mibuzyo nzi iiyandika kapati kulindiswe mbotuli bakambausi?
3 Jesu wakalailila basikwiiya bakwe kuti beelede kuba bakambausi. (Mt. 28:19, 20; Mil. 1:8) Mwaapostolo Paulo wakakulwaizya mubelesinyina Timoteo kuti: “Kocita mulimo wamukambausi, uuzuzikizye cakumaninina mulimo wako.” (2 Ti. 4:5) Makani mabotu nzi ngotumwaya tobasikutobela Jesu? Makani aaya alabikkilizya acisyomezyo cikkazyika moyo cakuti Taateesu wakujulu, Jehova, ulatuyanda. (Joh. 3:16; 1 Pe. 5:7) Nzila iiyandika kapati Jehova Leza njatondezya kuti ulatuyanda nkwiinda mu Bwami bwakwe. Aboobo, calukkomano twaambila bamwi kuti aabo boonse ibasala kweendelezyegwa a Bwami, ibamvwida Leza, alimwi akucita ziluleme, balakonzya kuba balongwe ba Leza. (Int. 15:1, 2) Bwini mbwakuti, makanze aa Jehova ngakugwisya kupenga koonse. Leza alimwi uyakupa kuti zyintu zibi izitupenzya tutakaziyeeyi limbi. Aayo makani mabotu ncobeni! (Is. 65:17) Mbwaanga tuli bakambausi, atulange-lange bwiinguzi bwamibuzyo yobilo iiyandika kapati: Nkaambo nzi ncociyandika kapati kuti bantu bamvwe makani mabotu mazuba aano? Alimwi mbuti mbotukonzya kuzwidilila ncobeni mumulimo wesu mbotuli bakambausi?
NKAAMBO NZI BANTU NCOBAYANDIKA KUMVWA MAKANI MABOTU?
4. Makani nzi aakubeja bantu ngobaambilwa kujatikizya Leza?
4 Amweezeezye kuti muntu umwi wamwaambila kuti bauso bakamukaka nywebo alimwi amukwasyi wanu. Ambweni aabo ibaamba kuti balibazyi bauso baamba kuti bakali kuliyanda, basikusalulula, alimwi basilunya. Mpoonya bamwi bamwaambila kuti musowa buyo ciindi canu kusola kubamba cilongwe abauso nkaambo bakafwa kale. Munzila imwi, oobo mbombubo bantu banji mbobaambilwa kujatikizya Leza. Bayiisyigwa kuti tacikonzyeki kumuzyiba Leza, akuti ngusilunya. Mucikozyanyo, basololi bamwi bazikombelo baamba kuti Leza uyakubasubula bantu babi kukabe kutamani mubusena bwakupenzyezya. Kupenga ikuboola akaambo kantenda zilicitikila, bamwi baamba kuti ngu Leza uukuleta. Nokuba kuti ntenda eezyi zilajaya bantu babi ababotu, bantu bamwi baamba kuti ncisubulo kuzwa kuli Leza.
5, 6. Mbuti muzeezo wakusanduka alimwi anjiisyo zyakubeja mbozyabajatikizya bantu?
5 Bamwi bantu basyoma kuti Leza tako. Amubone nzyobaamba aabo basyoma mukusanduka. Bunji bwabo baamba kuti buumi bwakalitalikila buyo bwini. Basyoma kuti kunyina Mulengi. Mane bamwi baamba kuti muntu uli buyo mbuli banyama boonse, aboobo taceelede kutugambya kuti muntu watalika kucita zyintu mbuli munyama. Baamba kuti, bantu basilunya nobadyaaminina bapengede oobo mboceelede kuba kweelana azilenge. Nkakaambo kaako tacigambyi kuti bantu banji basyoma kuti kutalulama takukamani pe. Aboobo, aabo ibasyoma mukusanduka balasweekelwa bulangizi bwini-bwini.
6 Cakutadooneka, muzeezo iwaamba zyakusanduka alimwi anjiisyo zyakubeja azyalo zyapa kuti kupenga kwabantu mumazuba aano aamamanino kwiindile. (Lom. 1:28-31; 2 Ti. 3:1-5) Njiisyo zyabantu kunyina nozileta makani mabotu eeni-eni aakkalilila. Muciindi caboobo, kweelana ambwaakaamba mwaapostolo Paulo, zyapa kuti bantu babe ‘mumudima mumizeezo yabo alimwi akuzanduka kubuumi buzwa kuli Leza.’ (Ef. 4:17-19) Kuyungizya waawo, njiisyo yakusanduka anjiisyo zimbi zyakubeja zyapa kuti bantu bataatambuli makani mabotu aazwa kuli Leza.—Amubale Baefeso 2:11-13.
7, 8. Ninzila nzi ilikke iikonzya kugwasya bantu kutegwa baamvwisye ncobeni makani mabotu?
7 Kutegwa bantu bayanzanisyigwe a Leza, beelede kusyoma kuti Jehova nkwali alimwi akuti kuli twaambo tubotu tumvwika ncobeelede kuswena kulinguwe. Tulakonzya kubagwasya kutegwa babe aluzyibo kwiinda mukubakulwaizya kulanga-langa zilenge. Ikuti bantu baiya kujatikizya zilenge kabajisi makanze aali kabotu, bayakubuzyiba busongo anguzu zya Leza. (Lom. 1:19, 20) Kutegwa tugwasye bantu kulemeka Mulengi wesu Mupati ciindi nobayeeya zyintu nzyaacita, tulakonzya kubelesya mabbuku eesu alimwi amamagazini aabandika makani aaya. Mucikozyanyo, tulakonzya kubelesya cibalo 17 mubbuku lya Amubaa Cilongwe a Jehova. Nokuba boobo, aabo ibaiya kuzwa kuzilenge buyo tabakonzyi kujana bwiinguzi kumibuzyo iiyandika kapati iikatazya bantu mubuumi, mibuzyo mbuli bwayeeyi: Nkaambo nzi Leza ncalekelede kupenga? Ino Leza ujisi makanze nzi kujatikizya nyika? Sena Leza ulandilanganya mebo kundigama?
8 Nzila ilikke iikonzya kugwasya ncobeni kutegwa bantu baamvwisye makani mabotu aajatikizya Leza alimwi amakanze aakwe nkwiinda mukwiiya Bbaibbele. Eelo kaka tulijisi coolwe citaliboteli cakugwasya bantu kujana bwiinguzi kumibuzyo yabo! Nokuba boobo, kutegwa tubasike amoyo baswiilizi tatweelede kubaambila buyo twaambo twamasimpe pe; tweelede kubagwasya kutegwa basyome. (2 Ti. 3:14) Ikuti twaiya cikozyanyo ca Jesu tulakonzya kuzwidilila ncobeni mukugwasya bamwi kuti basyome. Nkaambo nzi Jesu ncaakazwidilila? Kaambo kamwi nkakuti, wakali kubelesya kabotu mibuzyo. Mbuti mbotukonzya kumwiiya?
BAKAMBAUSI IBAZWIDILILA BALICIZYI KUBELESYA KABOTU MIBUZYO
9. Kutegwa tubagwasye bantu munzila yakumuuya, ncinzi ncotweelede kucita?
9 Nkaambo nzi ncotweelede kubelesya mibuzyo mubukambausi mbuli mbwaakacita Jesu? Amweezyeezye bukkale oobu: Dokota wamwaambila kuti ujisi makani mabotu ngayanda kumwaambila. Waamba kuti ulakonzya kumusilika ikuti mwaandulwa. Mulakonzya kumusyoma. Pele mbuti kuti wamusyomezya kuti mulapona nokuba kuti kunyina anaabuzya kutegwa azyibe bulwazi bwanu? Cakutadooneka, tamukonzyi kuzisyoma nzyaamba. Nokuba kuti ulijisi luzyibo lunji mumulimo wabudokota, weelede kubuzya mibuzyo alimwi akuswiilila nomumwaambila mbolyakatalika penzi kutegwa amugwasye ncobeni. Mbubwenya buyo, andiswe kutegwa tugwasye bantu kutambula makani mabotu aa Bwami, tweelede kucizyiba kubuzya mibuzyo. Lilikke buyo ikuti twazyiba mbwapengede muntu ooyo kumuuya, ndendilyo notukonzya kumugwasya.
10, 11. Mbubotu nzi mbotukonzya kujana kuti twaiya cikozyanyo ca Jesu cakuyiisya?
10 Jesu wakalizyi kabotu-kabotu kuti mibuzyo iibelesyegwa kabotu ilakonzya kumugwasya mwiiyi alimwi ilakonzya kugwasya sikwiiya kutegwa atole lubazu mumubandi. Mucikozyanyo, ciindi Jesu naakali kuyanda kuyiisya basikwiiya bakwe ciiyo cijatikizya kulicesya, wakasaanguna kubabuzya mubuzyo iwakabapa kuyeeya. (Mk. 9:33) Kutegwa agwasye Petro kubona mbwakonzya kuzibelesya kabotu njiisyo, Jesu wakamubuzya mibuzyo iindene-indene. (Mt. 17:24-26) Ciindi cimwi Jesu naakali kuyanda kuti basikwiiya bakwe baambe zili mumoyo, wakababuzya mibuzyo iijatikizya mbobakali kuyeeya. (Amubale Mateyo 16:13-17.) Kwiinda mukubelesya mibuzyo akwaamba twaambo, Jesu tanaakabagwasya buyo kumvwisya twaambo twamasimpe pe. Pele wakabasika amoyo, kukulwaizya bantu kubweza ntaamu kweelana amakani mabotu.
11 Ciindi notwiiya Jesu mukubelesya mibuzyo kabotu, tucita zyintu zyotatwe eezyi. Tulazyiba nzila mbotu yakugwasya bantu, tulazyiba mbotukonzya kwiingula majwi asinkila mubandi, alimwi tulayiisya babombe myoyo mbobakonzya kugwasyigwa. Amubone nzila zyotatwe zitondezya mbotukonzya kubelesya kabotu mibuzyo.
12-14. Mbuti mbomukonzya kumugwasya mwana kwaanguluka ciindi naambila bamwi makani mabotu? Amupe cikozyanyo.
12 Nzila yakusaanguna: Mbuli muzyali, ncinzi ncomukonzya kucita ikuti mwanaanu wamwaambila kuti ulalibilika kwaamba nzyasyoma kujatikizya zilenge ciindi nabandika abasicikolonyina? Cakutadooneka inga mwayanda kumugwasya kuba sicamba kujatikizya kwaambila bamwi makani mabotu. Aboobo, muciindi cakumunyemena naa kufwambaana kumwaambila ncayelede kucita, amwiiye cikozyanyo ca Jesu akumubuzya mibuzyo iijatikizya mbwayeeya. Mbuti mbomukonzya kucita oobo?
13 Mwamana kubala amwanaanu cibalo 17 mubbuku lya Amubaa Cilongwe a Jehova, mulakonzya kumubuzya twaambo tubotu ntwaajana itukonzya kumugwasya kapati. Amumukulwaizye kujana twaambo tumupa kusyoma mu Mulengi alimwi akaambo ncayanda kuti acite kuyanda kwa Leza. (Lom. 12:2) Amumwaambile mwanaanu kuti nzila nzyabelesya kusalazya twaambo tazyeelede buya kuti zyeelane anzyomubelesya.
14 Amumupandulwide mwanaanu kuti ciindi nabandika abasicikolonyina ulakonzya kubelesya nzila njomwamutondezya. Nkokuti ulakonzya kwaamba twaambo tumwi twamasimpe, mpoonya akubuzya basicikolonyina mibuzyo kutegwa azyibe nzyobayeeya. Mucikozyanyo, ulakonzya kulomba sicikolonyina kuti abale muncali 11 a 12 apeeji 172-173 mubbuku lya Amubaa Cilongwe a Jehova. Kumane mwanaanu ulakonzya kubuzya kuti, “Sena masimpe kuti mazuba aano makkompyuta naavwula kapati taakwe cikozyenye abongo caboola kumakani aakuyobola zyintu?” Kulangilwa kuti sicikolonyina ulaingula kuti inzya. Mpoonya mwanaanu ulakonzya kubuzya kuti, “Ikuti basyaazibwene mumakkompyuta kabakonzyi kupa kuti makkompyuta aabo kaayobola makani mbuli bongo, mbuti cintu citayeeyi mbocikonzya kucita oobo cilikke?” Kutegwa mumugwasye mwanaanu kwaanguluka ciindi nabandika abamwi kujatikizya nzyasyoma, cakwiinduluka-induluka mulakonzya kucita zitondezyo antoomwe. Ikuti mwamuyiisya mwanaanu kubelesya kabotu mibuzyo, muyakumugwasya kuzuzikizya mukuli wakwe mbwali mukambausi.
15. Mbuti mbotukonzya kubelesya mibuzyo kutegwa tugwasye muntu uutasyomi muli Leza?
15 Nzila yabili: Mumulimo wesu wakukambauka tulaswaanganya bantu ibadooneka naa Leza nkwali. Mucikozyanyo, muntu umwi ulakonzya kutwaambila kuti tasyomi muli Leza. Muciindi cakulekela majwi aali boobo kusinkila mubandi, tulakonzya kumubuzya kuti ndilili naakacileka kusyoma muli Leza alimwi ncinzi cakapa kuti atalike kusyoma boobo. Mwamana kuswiilila kubwiinguzi bwakwe akumulumbaizya akaambo kakwaabikkila maano makani aaya, mulakonzya kumulomba naa inga mwabala makani amwi aatondezya kuti buumi bwakalengwa buya. Ikuti mwini ŋanda kali muntu uubikkila maano, takonzyi kukaka kubandika makani aali boobo. Mpoonya tulakonzya kumwaabila bbuku lya Amubaa Cilongwe a Jehova. Mibuzyo iibuzyigwa cabupampu, munzila iili kabotu, ilakonzya kubeleka mbuli kkii iikonzya kujalula moyo wamuntu kuti aswiilile makani mabotu.
16. Nkaambo nzi ncotuteelede kukkutila buyo abwiinguzi ibuzwa mubbuku ndyotwiiya mbwapa sikwiiya Bbaibbele?
16 Nzila yatatu: Ciindi notusololela ciiyo ca Bbaibbele, tulakonzya kulekela sikwiiya kwaamba buyo bwiinguzi busimbidwe kuzwa mubbuku ndyotubelesya. Ikuti twacita oobo, tulakonzya kupa kuti sikwiiya atakomeni kumuuya. Nkaambo nzi? Nkaambo sikwiiya iwaamba buyo bwiinguzi busimbidwe kakunyina kuzinzibala kuyeeya azyintu nzyaiya takonzyi kuba amiyanda miyumu yakumuuya. Cilakonzya kumukatazya sikwiiya uuli boobo kuzumanana kuba mukasimpe ciindi bantu nobamukazya. (Mt. 13:20, 21) Kutegwa cintu cili boobu citacitiki, tweelede kumubuzya sikwiiya kutegwa aambe mbwalimvwa azyintu nzyali mukwiiya. Amusole kubona naa ulazizumina nzyaiya. Ciyandika kapati amumubuzye kuti aambe kaambo ncazuminina naa ncakakila. Mpoonya amumugwasye kumvwisya ncaamba Magwalo kutegwa akabone kaambo alikke. (Heb. 5:14) Ikuti twabelesya kabotu mibuzyo, bantu mbotuyiisya balalangilwa kuba amiyanda miyumu mulusyomo alimwi inga bacikonzya kukaka kuyunga kwabaabo ibasola kubakazya naa aabo ibasola kubanyonganya. (Kol. 2:6-8) Ncinzi cimbi ncotweelede kucita kutegwa tuzuzikizye mukuli wesu mbotuli bakambausi?
BAKAMBAUSI IBAZWIDILILA BALAGWASYANYA
17, 18. Ikuti twabeleka aumwi mumulimo wakukambauka, mbuti mbotukonzya kubelekela antoomwe?
17 Jesu wakatuma basikwiiya bakwe mumulimo wakukambauka kabali bobilo-bobilo. (Mk. 6:7; Lk. 10:1) Nokwakainda ciindi kuzwa leelyo, mwaapostolo Paulo wakaamba ‘basimilimonyina’ ibakali ‘kubeleka canguzu anguwe kujatikizya makani mabotu.’ (Flp. 4:3) Aboobo, kweelana anzila eeyi yamu Magwalo, mu 1953, basikumwaya ba Bwami bakatalisya bubambe bwakuyiisya bamwi mumulimo wakukambauka.
18 Ciindi nomubeleka a Munakristo umwi mumulimo wakukambauka, mbuti mbomukonzya kubelekela antoomwe? (Amubale 1 Bakolinto 3:6-9.) Ciindi ngomubeleka limwi nabala lugwalo lumwi kuzwa mu Bbaibbele, amuccililizye mu Bbaibbele lyanu. Amubikkile maano ciindi ngomubeleka limwi alimwi amwini ŋanda naambaula. Amuuccililizye mubandi kabotu-kabotu kutegwa naa ngomubeleka limwi wayandika kugwasyigwa, mwamugwasya. (Muk. 4:12) Nokuba boobo, tamweelede kumunjila mukanwa ngomubeleka limwi ikuti kabelesya nzila imwi iigwasya kusalazya kaambo. Ikuti mwaalilwa kubelesya kabotu busungu bwanu mulakonzya kupa kuti ngomubeleka limwi atyompwe alimwi mulakonzya kumunyonganya mwini ŋanda. Ziindi zimwi inga kwayandika kuti mutole lubazu mumubandi. Pele ikuti mwasala kwaamba makani amwi, amwaambe buyo kaambo komwe naa tobilo. Mpoonya amumulekele ngomubeleka limwi kuti azumanane amubandi.
19. Nkaambo kali nkotweelede kuyeeya, alimwi nkaambo nzi?
19 Mbuti nywebo ayooyo ngomubeleka limwi mbomukonzya kugwasyanya ciindi nomweenda kuya kuŋanda iimbi? Mulakonzya kubelesya ciindi eeci kubandika nzila zikonzya kugwasya nomubandika abantu mbomukambaukila. Amubone kuti mubandi wanu uujatikizya bantu bamucilawo eeco tautyompyi. Mbubwenya buyo, amutantamuke kakole kakwaamba zyintu zitali kabotu kujatikizya bakambausima. (Tus. 18:24) Tweelede kuyeeya kuti tuli zilongo buyo. Jehova watupa mulimo ooyu wakukambauka makani mabotu akaambo kaluzyalo lwakwe lupati. (Amubale 2 Bakolinto 4:1, 7.) Aboobo, toonse atutondezye kulumba kucoolwe eeci citaliboteli kwiinda mukuzuzikizya mukuli wesu mbotuli bakambausi.
[Mibuzyo yaciiyo]
[Cifwanikiso icili apeeji 3]
[Majwi aakwelelezya sikubala aali apeeji 5]
Kutegwa tubasike amoyo baswiilizi besu, tweelede kubakulwaizya kusyoma
[Cifwanikiso icili apeeji 6]
Mibuzyo iibuzyigwa kabotu . . .
1 ilabagwasya bantu kutegwa balijanine twaambo tubapa kusyoma
2 ilajalula mizeezo amoyo kutegwa bakatambule kasimpe
3 ilabagwasya kumvwisya ncaamba Magwalo kutegwa bakabone kaambo balikke
