1. Olsem wanem Jehova i stap olsem namba 1 Man husat i bin autim gutnius?

 GOD Jehova em namba 1 Man husat i bin autim gutnius. Bihain stret long taim Adam na Iv i mekim pasin bikhet, Jehova i tokaut olsem Satan bai bagarap. (Stt. 3:15) Insait long planti handret yia, Jehova i stori long olsem wanem em bai stretim bek gutnem bilong em, olsem wanem em bai pinisim ol hevi em Satan i kamapim, na olsem wanem ol man inap kisim laip oltaim. Olgeta dispela gutnius i stap long Baibel.

2. (a) Olsem wanem ol ensel i stap olsem lain bilong autim gutnius? (b) Olsem wanem Jisas i makim gutpela pasin em ol man bilong autim gutnius i ken bihainim?

² Ol ensel tu i stap olsem lain bilong autim gutnius. Ol i save autim gutnius, na tu, ol i helpim ol narapela long autim gutnius long olgeta hap bilong graun. (Luk 1:19; 2:10; Apo. 8:26, 27, 35; Rev. 14:6) Olsem wanem long nambawan ensel Maikel? Em tu em man bilong autim gutnius. Taim em i stap long graun na holim nem olsem Jisas, nambawan bikpela wok em i mekim em long autim gutnius. Pasin bilong em i soim olsem wok autim tok i mas stap olsem nambawan wok long laip bilong yumi tu.—Luk 4:16-21.

3. (a) Yumi save autim wanem gutnius? (b) Yumi mas bekim wanem ol askim?

³ Jisas i tokim ol disaipel bilong em long mekim wok bilong autim gutnius. (Mat. 28:19, 20; Apo. 1:8) Aposel Pol i tokim Timoti olsem: “Mekim wok olsem man bilong autim gutnius, na inapim tru wok bilong God yu mekim.” (2 Tim. 4:5) Yumi save autim wanem gutnius? Yumi save tokim ol man olsem Jehova, em Papa bilong yumi long heven, em i laikim tru yumi. (Jon 3:16; 1 Pita 5:7) Kingdom Bilong God i kamapim klia olsem God i laikim tru ol man bilong graun. Olsem na yumi tokim ol man olsem sapos ol i stap daun long Kingdom Bilong God, bihainim tok bilong em, na  bihainim stretpela pasin, orait ol inap kamap pren bilong em. (Sng. 15:1, 2) Jehova bai pinisim olgeta pen na hevi na bel hevi yumi gat long ol samting nogut i kamap bipo. Dispela em ol gutpela nius tru! (Ais. 65:17) Yumi stap olsem lain bilong autim gutnius, olsem na yumi mas bekim dispela 2-pela bikpela askim: Bilong wanem ol man i mas harim gutnius long nau? Na olsem wanem yumi inap mekim gut wok bilong yumi long autim gutnius?

4. Ol man i kamapim wanem ol tok giaman long God?

⁴ Tingim olsem wanpela man i giamanim yu, na em i tok papa bilong yu i lusim yu na famili bilong yu. Em i tok olsem papa bilong yu i no laik save long yu, em i no tokim yu long sampela tok hait, na em i gat hatpela pasin. Bihain dispela man i tokim yu olsem papa bilong yu i dai pinis, olsem na i no gat wok long yu painim em. Sampela i save mekim kain tok olsem long God. Ol i tok i hatwok long kisim save long God, na em i gat hatpela pasin. Sampela bikman bilong lotu i skulim ol man olsem God bai givim strafe long ol man nogut long hel inap oltaim oltaim. Sampela narapela i tok God i save kamapim bikpela win na ren we i save givim bikpela pen na hevi long ol man. Ol i tok maski ol dispela kain disasta i save kilim i dai ol gutpela man na man nogut wantaim, God i yusim ol disasta long givim strafe long ol man.

5, 6. Olsem wanem bilip bilong evolusen na ol bilip giaman bilong ol lotu i bagarapim ol man?

⁵ Sampela man i tok i no gat God. Ol lain husat i bilip long evolusen, ol i tok i no gat Man i bin wokim ol samting, olgeta samting i kamap nating. Sampela narapela i bilip olsem ol man i kamap long rot bilong ol animal. Olsem na ol man husat i gat dispela bilip, ol i no kirap nogut olsem sampela taim ol man i save pait na bagarapim narapela na tingim laik bilong ol yet tasol. Ol i bilip olsem em nomol long ol man i gat namba i mekim hatpela pasin long ol man nating. Olsem na sampela i tok oltaim bai i no gat stretpela pasin. Olsem na ol man husat i bilip long evolusen, ol i no ting ol gutpela samting bai kamap bihain.

⁶ Bilip bilong evolusen na ol bilip giaman bilong ol lotu, ol dispela samting tu i mekim na ol man i karim bikpela pen na hevi long taim bilong las de. (Rom 1:28-31; 2 Tim. 3:1-5) Ol dispela bilip i no gutpela nius. Olsem aposel Pol i tok, ol dispela bilip i mekim na ol manmeri “i stap long tudak, na ol i stap longwe long laip i kam long God.” (Efe. 4:17-19) Na tu, bilip bilong evolusen na ol bilip giaman bilong ol lotu i pasim ol man long kisim gutnius i kam long God.—Ritim Efesus 2:11-13.

7, 8. I gat wanpela rot tasol bilong kisim save long gutpela nius. Wanem dispela rot?

⁷ Sapos ol manmeri i laik pas gut wantaim God, pastaim ol i mas save olsem Jehova i stap tru na i gat gutpela as long ol i mas kisim save long em. Yumi ken kirapim ol long kisim save long ol samting em God i bin wokim, na long dispela rot yumi helpim ol long kisim save long God. Taim ol man i amamas long lukim na skelim gut ol samting em God i bin wokim, ol inap kisim skul long savetingting na bikpela strong bilong God. (Rom 1:19, 20) Olsem wanem yumi inap helpim ol manmeri long kliagut olsem ol samting God i wokim i gutpela na i narakain tru? Yumi ken yusim 2-pela buklet, Was Life Created? na The Origin of Life—Five Questions Worth Asking. Tasol, taim man i lukim na skelim gut ol samting God i wokim, dispela tasol i no inap bekim olgeta askim bilong em. Olsem: Bilong wanem God i larim pen na hevi i stap? Wanem laik bilong God long dispela graun? Tru tru God i save tingim yumi olgeta wan wan?

⁸ Wanpela rot tasol bilong kisim save long gutpela nius i stori long God na samting em i tingting pinis long mekim, em long rot bilong stadi long Baibel. Yumi inap helpim ol narapela long kisim save long gutnius, na dispela em i  wanpela gutpela wok tru! Tasol sapos yumi laik helpim wanpela long bilip long God na kamap pren bilong Em, orait yumi mas skulim em long tok i tru. Na tu, yumi mas helpim em long luksave long as na em i mas bilip long God. (2 Tim. 3:14) Olsem na yumi mas lain long kirapim ol man long bilip, olsem Jisas i bin mekim. Olsem wanem Jisas inap kirapim ol man long bilip? Wanpela as em olsem, em i bihainim gutpela pasin long tromoi ol askim. Olsem wanem yumi inap bihainim pasin bilong em?

9. Sapos yumi laik helpim ol man long bilip long gutnius, orait yumi mas mekim wanem?

⁹ Taim yumi autim tok, bilong wanem yumi mas tromoi ol askim olsem Jisas i bin mekim? Tingim olsem: Dokta bilong yu i tokim yu olsem yu bai kisim wanpela bikpela operesen. Ating yu bai bilipim tok bilong em. Tasol olsem wanem sapos em i no bin givim sampela askim long save long helt bilong yu? Ating nau yu no inap bilipim tok bilong em. Maski wanpela dokta i gat bikpela save, em bai givim ol askim na putim yau long ol bekim bilong man paslain long em i helpim em. Olsem na sapos yumi laik helpim ol man long bilipim gutnius bilong Kingdom, orait yumi mas lain long givim ol gutpela askim bambai yumi inap kliagut long olsem wanem yumi inap helpim ol.

10, 11. Sapos yumi bihainim pasin bilong Jisas long mekim wok tisa, dispela inap helpim yumi long mekim wanem?

¹⁰ Jisas i save olsem tisa inap givim ol askim bambai em inap save gut long sumatin, na tu, dispela bai helpim sumatin long skelim gut samting na kamapim tingting bilong em. Olsem: Taim Jisas i laik skulim ol disaipel long mekim pasin daun, pastaim em i givim askim we i kirapim ol long wokim tingting. (Mak 9:33) Wanpela taim Jisas i givim askim long Pita, na Jisas yet i kolim 2-pela bekim, na em i askim Pita long makim wanem bekim i stret. Dispela i helpim Pita long kisim skul long wanpela bikpela samting. (Mat. 17:24-26) Long narapela taim, Jisas i laik save long tingting i stap long bel bilong ol disaipel, olsem na em i givim sampela askim we i helpim ol long kamapim tingting tru bilong ol. (Ritim Matyu 16:13-17.) Jisas i no tokim ol manmeri long ol samting ol i mas mekim, nogat. Pasin em i bihainim long tromoi ol askim i kirapim ol manmeri long bilip long gutnius na senisim pasin bilong ol.

¹¹ Taim yumi bihainim pasin bilong Jisas long givim ol askim, yumi bai luksave long gutpela rot tru bilong helpim olgeta wan wan man yumi bungim taim yumi autim tok. Yumi bai kisim save tu long olsem wanem yumi inap toktok gut wantaim ol manmeri taim ol i no wanbel long tok yumi autim. Na tu, yumi bai skulim ol manmeri long ol samting ol i ken mekim bilong helpim ol yet. Orait nau yumi bai stori long 3-pela eksampel long olsem wanem yumi inap bihainim gutpela pasin bilong tromoi ol askim.

12-14. Olsem wanem yu inap helpim pikinini na bai em i no pret long autim tok? Stori long dispela.

¹² Eksampel 1: Yu bai mekim wanem sapos pikinini bilong yu em i tineja na em i pret long toktok long ol wanklas bilong em long ol samting em God i bin wokim? Yu ken mekim wanem bilong strongim em long toktok long ol? Yu no ken mekim tok i daunim em o stori long em long ol tok em i mas mekim, nogat. Mobeta yu givim ol askim we inap kirapim em long tokaut long tingting tru bilong em, olsem Jisas i bin skulim yumi long mekim. Orait, bai yu mekim olsem wanem?

¹³ Stap wantaim pikinini bilong yu na ritim sampela tok long buklet The Origin of Life—Five  Questions Worth Asking. Taim yu skelim pinis 5-pela askim long dispela buklet, orait askim pikinini long makim wanpela askim we em i ting planti sumatin bai i gat laik long save long bekim bilong en. Kirapim em long tingim ol narapela samting we i mekim na em i bilip olsem i gat Man i bin wokim yumi, na wanem samting i kirapim em long lotuim God. (Rom 12:2) Kamapim klia long pikinini bilong yu olsem i no gat rong sapos tingting bilong em i no wankain long tingting bilong yu.

¹⁴ Orait nau tokim pikinini olsem em i ken toktok long wanklas bilong em long wankain pasin olsem yu bin toktok long em. Em i ken stori long klasmeit long sampela bikpela tok long ol samting em God i bin wokim, na bihain em i ken askim klasmeit long kamapim tingting bilong em. Olsem: Em i ken askim klasmeit long ritim blok long pes 21 bilong dispela buklet Origin of Life. Orait nau pikinini bilong yu i ken askim olsem, “Yu ting DNA inap holim planti tok moa winim wanpela kompiuta long graun?” Ating klasmeit bai tok yes. Na ating pikinini bilong yu i ken tok, “Em tru, olsem na yu ting i stret long bilip olsem i gat man i bin wokim DNA?” Bilong helpim pikinini na bai em i no pret long stori long ol narapela long ol bilip bilong em, yu ken prektis wantaim em. Sapos yu skulim pikinini long bihainim gutpela pasin bilong tromoi ol askim, orait yu bai helpim em long mekim gut wok bilong autim gutnius.

15. Olsem wanem yumi inap yusim ol askim long helpim man husat i no bilip long God?

¹⁵ Eksampel 2: Taim yumi mekim wok autim tok, yumi inap bungim man husat i gat 2-pela tingting olsem God i stap o nogat, o ating em i no bilip liklik long God. Yumi ken traim yet long painim rot long helpim em. Long gutpela pasin, yumi ken askim olsem em i holim dispela tingting inap hamas yia pinis, na i gat wanem as na em i no laik bilip long God. Taim yumi harim pinis tok em i mekim, yumi ken tokim em olsem ating em i bin lusim sampela haptaim long skelim  ol bilip bilong em. Orait nau yumi ken askim em sapos em i amamas long ritim wanpela buklet we i stori gut long ol samting i kamapim klia olsem i gat Man i bin wokim olgeta samting. Sapos em i amamas, orait yumi ken tilim buklet Was Life Created? o The Origin of Life—Five Questions Worth Asking. Taim yumi bihainim gutpela tingting na tromoi ol askim, yumi inap putim gutnius i go daun long bel bilong man.

16. Bilong wanem yumi mas helpim sumatin bambai em i no ken ritim tasol ol bekim i stap long buk o buklet?

¹⁶ Eksampel 3: Taim yumi mekim Baibel stadi, wanem samting inap kamap sapos yumi larim sumatin i ritim tasol ol bekim i stap long buk o buklet? Ating em i no inap kamap strong long tok i tru. Bilong wanem? Long wanem, sapos sumatin i ritim tasol ol bekim i stap long buk o buklet na em i no tingim na kamapim long toktok bilong em yet, em i wankain olsem plaua em ol rop bilong en i no go daun tru long graun. Ating bai i hatwok long em i stap strong long tok i tru taim ol man i birua long em. (Mat. 13:20, 21) Bilong helpim sumatin, yumi mas askim em long kamapim tingting bilong em long samting em i wok long lainim. Traim long painimaut sapos em i wanbel long ol samting em i wok long kisim save long en, na bilong wanem em i pilim olsem. Helpim em long skelim gut ol tok bilong Baibel bambai em i ken luksave olsem Baibel i as bilong bilip bilong em. (Hib. 5:14) Sapos yumi bihainim gutpela pasin bilong givim ol askim, dispela bai helpim sumatin long kamap strong long tok i tru na em bai stap strong yet long bilip taim ol man i birua long em o traim long giamanim em. (Kol. 2:6-8) Yumi ken mekim wanem moa bambai yumi inap mekim gut wok bilong autim gutnius?

17, 18. Taim yu kamap long wanpela haus na narapela pablisa i autim tok long man, olsem wanem yu inap helpim dispela pablisa?

¹⁷ Taim Jisas i salim ol disaipel bilong em i go autim tok, em i salim ol i go tupela tupela. (Mak 6:7; Luk 10:1) Bihain, aposel Pol i stori long ol “wanwok” bilong em husat i bin “wok wantaim” em long autim gutnius. (Fili. 4:3) Long 1953, oganaisesen i kirapim wanpela program we ol pablisa inap trenim ol narapela long mekim wok autim tok.

¹⁸ Taim yu autim tok na kamap long wanpela haus, yu ken mekim wanem bilong helpim pablisa husat i wok wantaim yu taim em i autim tok long man bilong haus? (Ritim 1 Korin 3:6-9.) Yu tu mas opim Baibel bilong yu yet na bihainim taim em i stori long ol skripsa. Putim gut yau taim pablisa i stori, nogut i gat wok long yu helpim em long kamapim klia sampela tok long man bilong haus. (Sav. 4:12) Tasol yu mas was gut, na yu no ken katim tok taim pablisa i stori gut pinis long man o taim man bilong haus i wok long toktok i stap. Sapos yu katim tok, yu inap mekim na pablisa bai bel hevi o man bilong haus bai paul long tok yu mekim. I no gat rong long yu mekim sotpela tok, tasol taim yu toktok pinis, yu mas larim pablisa i pinisim tok bilong em.

19. Yumi mas tingim wanem samting? Bilong wanem?

¹⁹ Taim yu na narapela pablisa i autim tok na yupela i wokabaut yet bilong i go long narapela haus, olsem wanem yupela inap helpim narapela narapela long mekim gut wok bilong autim gutnius? Yusim dispela haptaim long stori long ol samting yupela i ken mekim bambai wok autim tok bilong yupela i kamap gutpela moa. Yupela i mas was gut na no ken mekim ol tok i daunim ol manmeri long teritori bilong yupela. Na tu, yupela i no ken komplein long ol bratasista. (Snd. 18:24) Yumi mas tingim olsem i no gat wanpela bilong yumi i gutpela olgeta. Jehova i mekim gutpela pasin tru taim em i givim yumi nambawan gutpela wok bilong autim gutnius na em i skulim yumi long pasin bilong mekim dispela wok. (Ritim 2 Korin 4:1, 7.) Olsem na yumi olgeta i mas soim olsem yumi pilim tru dispela gutnius, na bilong mekim olsem, yumi mas mekim gut wok bilong autim dispela gutnius.