1. Xiñee zanda guininu Jiobá nga primé binni ni bicheeche diidxaʼ ne zanírube lu dxiiñaʼ riʼ.

 TI BINNI ni rucheeche diidxaʼ nga tuuxa ni riníʼ diidxaʼ nacubi ne galán ni rusiecheʼ stobi. Jiobá nga primé binni ni bicheeche diidxaʼ ne laabe nga zanírube lu dxiiñaʼ riʼ. Despué de bidxiideche Adán ne Eva Dios, nagueendaca guníʼ Jiobá caadxi diidxaʼ nacubi ne galán: zadxiña dxi guinitilú beendaʼ que, o Binidxabaʼ (Gén. 3:15). Lu ca siglu ni gudiʼdiʼ despué de bichee Adán, biquiiñeʼ Jiobá caadxi hombre ni ruzuubaʼ diidxaʼ para gusiene xiñee cadi jneza guiráʼ cosa malu guníʼcabe de laa, ximodo guni chaahuiʼ ca guendanagana bisaana Binidxabaʼ ne ximodo zanda guicaa binni ca ndaayaʼ ni biniti Adán ne Eva.

2. 1) Xi dxiiñaʼ runi ca ángel para ganda guireeche diidxaʼ. 2) Xi rusiidiʼ ejemplu bisaana Jesús cani rucheeche diidxaʼ.

² Ca ángel ca laaca rucheechecaʼ diidxaʼ, purtiʼ laaca riniʼcaʼ diidxaʼ nacubi ne galán ne racanecaʼ ca xpinni Dios para gúnicaʼ zaqueca (Luc. 1:19; 2:10; Hech. 8:26, 27, 35; Apoc. 14:6). Yanna, xi zanda guininu de arcángel Miguel, ni binibiáʼcabe casi Jesús dxi bibani lu Guidxilayú yaʼ. Ejemplu stiʼ Jesús rusihuinni ximodo naquiiñeʼ guireeche diidxaʼ ne laaca rusihuínnini pabiáʼ risaca guni binni dxiiñaʼ riʼ yanna (Luc. 4:16-21).

3. 1) Xi diidxaʼ nacubi ne galán rusíʼdinu binni. 2) Gunáʼ nga ca guendarinabadiidxaʼ caquiiñeʼ guicábinu.

³ Jesús biʼniʼ mandar ca discípulo stiʼ gucheechecaʼ diidxaʼ (Mat. 28:19, 20; Hech. 1:8). Yanna guidúʼyanu xi gudxi apóstol Pablu Timoteu, tobi de ca hombre bíʼninebe dxiiñaʼ: «Bicaa ique güi lu stiidxa Cristu ne biʼni irá ni bisaana Dios ladxi nouʼ» (2 Tim. 4:5). Gunáʼ nga diidxaʼ nacubi ne galán ni rusiidiʼ ca xpinni Jesús yaʼ. Tobi de laani nga nadxii Jiobá laanu, Bixhózenu ni nuu guibáʼ (Juan 3:16; 1 Ped. 5:7). Ne Reinu stibe nga tobi de cani rusihuinni pabiáʼ nadxiibe laanu, nga runi rábinu binni zanda gaca xhamígucaʼ Dios, pa gúnicaʼ ni na Reinu riʼ, pa guzuubacaʼ  stiidxaʼ Dios ne gúnicaʼ ni jneza (Sal. 15:1, 2). Ne maʼ guníʼ Jiobá zabee guiráʼ yuubaʼ ni nuu pur ca cosa ni cadi jneza runi binni ne laaca zacanebe binni para gusiaandaʼ guiráʼ ni bininá laa dxiqué. ¡Nabé sicarú guiráʼ ca diidxaʼ nacubi riʼ! (Is. 65:17.) Cumu binni rucheeche diidxaʼ laanu la? naquiiñeʼ guicábinu guiropaʼ guendarinabadiidxaʼ riʼ: 1) Xiñee caquiiñeʼ gunadiaga binni diidxaʼ nacubi ne galán ca dxi stinu riʼ. 2) Ximodo zanda gucheechenu diidxaʼ jma jneza.

4. Xii nga caadxi cosa ni cadi jneza riníʼ binni de Dios.

⁴ Bixuiʼlú ñabi tuuxa lii bisaana bixhoʼzoʼ lii ne familia stiluʼ. Ne laaca niníʼ ca binni ni na runibiáʼ laabe qué ñábibe lii caadxi cosa ni naquiiñeʼ ñannuʼ, qué nusihuínnibe pabiáʼ rizaaláʼdxibe lii ne malu laabe, ne laaca ñabi xcaadxi binni lii maʼ pur gana si gacalaʼdxuʼ chiyubuʼ laabe purtiʼ maʼ gútibe. Zacá nga riníʼ stale binni de Dios. Riníʼcabe qué zanda gunibiaʼnu laabe ne malu laabe. Caadxi de ca xaíque yuʼduʼ rusiidicaʼ runi castigar Dios binni malu ti lugar ra cacaguí. Xcaadxi rugaaniʼ donda laabe pur guiráʼ ca desgracia ni cayaca tiempu riʼ. Neca rati binni nachaʼhuiʼ ne binni malu lu ca desgracia riʼ, stale tu riníʼ zacá nga rusabanáʼ Dios binni.

5, 6. Xi cazaaca tiempu riʼ pur qué runi cré binni Dios ne pur guiráʼ cosa ni cadi dxandíʼ rusiidiʼ caadxi religión.

⁵ Xcaadxi binni riníʼ gastiʼ Dios. Guzéʼtenu de cani runi cré evolución, o cani riníʼ málasi bihuinni guiráʼ ni nuu lu Guidxilayú. Stale de ca binni ni runi cré zacá, riniʼcaʼ cadi dxandíʼ bizáʼ Dios binni. Dede nuu tu riníʼ zeeda gaca binni casi maniʼ, nga runi cadi naquiiñeʼ guidxagayaanu ora guni binni xiixa casi runi ti maniʼ. Ne ora ruuyacabe modo ruxhatañee tuuxa ni jma nadipaʼ ti binni ni qué gapa tu gacané laa, riníʼcabe zacá nga naquiiñeʼ guibani binni ndaaniʼ Guidxilayú. Nga runi, ca binni ni qué runi cré pa nuu ti Dios, riníʼ íquecaʼ qué ziuu dxi gaca chaahuiʼ guiráʼ ca cosa malu cadúʼyanu yanna.

⁶ Yanna riʼ nuu stale binni ni qué runi cré Dios ne nuu religión ni rusiidiʼ stale cosa ni cadi dxandíʼ, ne laaca pur laacani nga cadale guiráʼ desgracia ni cadiʼdiʼ binni lu ca últimu dxi riʼ (Rom. 1:28-31; 2 Tim. 3:1-5). Cani maʼ bizéʼtenu riʼ, qué rusiecheʼ cani binni, purtiʼ casi guníʼ apóstol Pablu, maʼ bisicahui cani «xquenda biaani caʼ» ne maʼ «qué gapa ca enda nabani ni rudii Dios» (Efes. 4:17-19). Cumu nuu tu qué runi cré Dios ne nuu religión ni rusiidiʼ ni cadi dxandíʼ la? cayaca nagana para binni guni cré ca diidxaʼ nacubi ne galán ni zeeda de Dios (biindaʼ Efesios 2:11-13).

7, 8. Xi caquiiñeʼ guni binni para guiene ca diidxaʼ nacubi ne galán stiʼ Dios.

⁷ Para ganda chuʼ ca binni riʼ gaxha de Jiobá, primeru naquiiñeʼ guni crécabe nuu ti Dios ne nuu razón para guidxíñacabe laabe. Ne zanda gacanenu laacabe gunibiáʼcabe Dios ora gábinu laacabe gúʼyacabe guiráʼ ni bizaʼbe. Ora ruuyaʼ binni guiráʼ cani bizáʼ Dios sin guiníʼ ique sti cosa de laacani, riziidiʼ pabiáʼ nuu xpiaanibe ne pabiáʼ naroʼbaʼ poder stibe (Rom. 1:19, 20). Para ganda gucaʼnu laacabe chuuláʼdxicabe guiráʼ ni bizáʼ Jiobá, zanda iquiiñenu ca folletu ¿Es la vida obra de un Creador? ne El origen de la vida. Cinco cuestiones dignas de análisis. Neca guiziidiʼ binni stale cosa de cani bizáʼ Dios, qué zanda diʼ gacanécani laa ganna caadxi cosa nabé risaca, casi xiñee rudii Dios lugar gacaná binni, xiñee bizaʼbe Guidxilayú ne pa dxandíʼ nga rizaaláʼdxibe cada tobi de laanu.

⁸ Para ganda guiene binni ca diidxaʼ nacubi ne galán stiʼ Dios ne ganna xi naguixhe íquebe la? caquiiñeʼ gúʼndacaʼ Biblia. ¡Ti ndaayaʼ naroʼbaʼ nga gacanenu laacabe guiziidicabe  de laacani! Peru para ganda chindá ni cusíʼdinu ndaaniʼ ladxidóʼcabe la? napa xidé gacanenu laacabe guiénecabe xiñee naquiiñeʼ guni crécabe (2 Tim. 3:14). Ne zanda gúninu ni jma jneza pa chinándanu ejemplu stiʼ Jesús. Xiñee gunda gucanebe binni yaʼ. Purtiʼ biiyaʼ chaahuibe xi guinabadiidxabe binni. Guidúʼyanu ximodo zanda chinándanu ejemplu stibe.

9. Xi naquiiñeʼ gúninu para ganda gacanenu binni guiziidiʼ de Dios.

⁹ Xiñee naquiiñeʼ chinándanu ejemplu stiʼ Jesús ne gánnanu xi guinabadiidxanu binni ora maʼ cucheechenu diidxaʼ yaʼ. Quíxhenu ti ejemplu para guiénenu ni. Guníʼ ique ñabi ti doctor lii: zanda guiándaluʼ, peru caquiiñeʼ gaca operarluʼ, xi si la? nabé nagana operación riʼ. Zándaca zuni creluʼ laabe. Peru pa ñábibe nga lii ante guinabadiidxabe lii xi yuubaʼ napuʼ yaʼ. Zándaca maʼ qué ñuni creluʼ laabe óraque. Neca maʼ napa doctor riʼ stale iza de cayuni xhiiñaʼ, primeru naquiiñeʼ guinabadiidxabe xi cayaʼcuʼ ante guiniʼbe xi tratamientu guicaaluʼ. Zacaca nga laanu, para ganda gacanenu binni guni cré ca diidxaʼ nacubi ne galán stiʼ Reinu, naquiiñeʼ guʼyaʼ chaahuinu xi guinabadiidxanu laacabe ti gánnanu xiruʼ caquiiñeʼ guiziidicabe de Dios.

10, 11. Xi ribeendunu ora rusíʼdinu casi bisiidiʼ Jesús.

¹⁰ Jesús gunna ti cosa: ora ruuyaʼ chaahuiʼ ti maestru xi guinabadiidxaʼ, racaneni laa gunibiáʼ binni ni cayuundané, peru laaca riquiiñeni para guiníʼ binni riʼ xi nuu ndaaniʼ ladxidóʼ. Guzéʼtenu ti ejemplu. Dxi gucalaʼdxiʼ Jesús nusiidiʼ ca discípulo stiʼ pabiáʼ risaca cadi gudxiibacaʼ laca laacaʼ, primeru gunabadiidxabe xiixa ni bicaa laacaʼ guiníʼ íquecaʼ ante guicábicaʼ (Mar. 9:33). Para bisiidibe Pedru guiníʼ ique lu ca principiu stiʼ Dios, gunabadiidxabe laa xiixa ra zanda guicabi chupa cosa, de raqué maʼ gúdxibe laa guʼyaʼ gunáʼ tobi de laacani nga jma jneza (Mat. 17:24-26). Ne dxi rápabe gana gánnabe xi nuu ndaaniʼ ladxidóʼ ca discípulo stibe, gunabadiidxabe laacaʼ caadxi cosa para gucaabe laacaʼ guiniʼcaʼ xi runi sentircaʼ (biindaʼ Mateo 16:13-17). Qué ñabi diʼ Jesús laacabe xi naquiiñeʼ gúnicabe. Né cani gunabadiidxabe, bidiibe cuenta xi nuu ndaaniʼ ladxidóʼ cani cucaadiaga laabe ne bicaabe laacaʼ gúnicaʼ ni cusiidibe.

¹¹ Ora rinándanu ejemplu stiʼ Jesús ne ruuyaʼ chaahuinu xi guinabadiidxanu, racaneni laanu gúninu chonna cosa: zánnanu ximodo jma galán gacanenu binni, zadxélanu ximodo gábinu laabe cadi jneza xiixa ni runi crebe ne zusíʼdinu laabe ximodo zanda cueendube ni galán. Guzéʼtenu chonna ejemplu ra zadúʼyanu ximodo jma jneza iquiiñenu ca guendarinabadiidxaʼ ca.

12-14. Ximodo zanda gacaneluʼ xiiñiluʼ ti cadi guidxibi ora gucheeche diidxaʼ. Bizeeteʼ ti ejemplu.

¹² Primé ejemplu. Xi ñúniluʼ pa ñabi ti xiiñiluʼ ni canazá preparatoria lii qué ganna pa zanda gusiene cani riné scuela dxandíʼ nuu ti Dios ni bizáʼ guiráʼ ni nuu. Ximodo zanda gacaneluʼ laabe para gánnabe gusiénebe ni runi crebe yaʼ. Lugar de tindeneluʼ laabe o gábiluʼ laabe xi guiniʼbe, cadi jma galán guinabadiidxaluʼ laabe caadxi cosa para gannuʼ ximodo riníʼ íquebe, cásica biʼniʼ Jesús la? Ximodo zanda guʼnuʼ nga yaʼ.

¹³ Despué de gúʼndaneluʼ xiiñiluʼ chupa  chonna ndaa stiʼ folletu El origen de la vida. Cinco cuestiones dignas de análisis, zanda guinabadiidxuʼ laabe gunáʼ de cani bíʼndatu jma rucaa laabe guni crebe Dios. Laaca zanda guinabadiidxuʼ laabe xiñee runi crebe nuu ti Dios ni bizáʼ guiráʼ ni nuu ne xiñee racaláʼdxibe gúnibe ni na Dios (Rom. 12:2). Gudxi laabe zándaca gadxé nga ni bicaa laabe guni crebe Dios ne gadxé nga ni bicaa lii guni creluʼ Dios.

¹⁴ Bisiene laabe zanda guiníʼnebe xcompañérube cásica guníʼneluʼ laabe. Zanda gábibe laa caadxi cosa ni bizáʼ Dios ne guinabadiidxabe laa xi riníʼ ique de laani. Zanda guinábabe xcompañérube guʼndaʼ cuadru ni zeeda lu yaza 21 stiʼ folletu El origen de la vida, de racá guinabadiidxabe laa: «Cadi dxandíʼ qué zanda guchaaganu cani nuu lu ti computadora né guiráʼ ni nuu lu ADN la?». De racá maʼ guinabadiidxaʼ xiiñiluʼ sti biaje: «Yanna, pa guyuu tu biʼniʼ ti computadora, cadi laaca dxandíʼ guyuu ti binni nuu xpiaaniʼ ni biʼniʼ ADN la?». Para gacaneluʼ xiiñiluʼ ganda gusiene ni runi cré, gatigá zanda guni ensayartu modo gúnibe ni. Pa gusiidiluʼ laabe guʼyaʼ chaahuibe xi guinabadiidxabe, zacaneluʼ laabe para ganda gucheechebe diidxaʼ jma jneza.

15. Ximodo zanda iquiiñenu ca guendarinabadiidxaʼ ca para gacanenu ti binni ni qué runi cré Dios.

¹⁵ Guiropa ejemplu. Ora rucheechenu diidxaʼ ridxélanu binni ni huaxiéʼ runi cré pa dxandíʼ nuu ti Dios, peru laaca ridxélanu xcaadxi ni qué liica runi cré Dios. Bixuiʼlú nidxaaganu tuuxa ni ñabi laanu qué runi cré Dios. Para cadi gucueezabe laanu de guinínenu laabe, né stale respetu zanda guinabadiidxanu laabe dede padxí riníʼ íquebe zacá ne xi bicaa laabe guiníʼ íquebe zacá. Ora maʼ binadiáganu ni guicábibe, zanda gábinu laabe galán nga ribeebe tiempu para guiníʼ íquebe de laani. De racá maʼ guinabadiidxanu laabe pa ñuuláʼdxibe ñuundabe ti folletu ni cusiene dxandíʼ nuu ti Dios  ni bizáʼ ca cosa nuu lu Guidxilayú. Pa riuuláʼdxibe gánnabe jma la? zándaca zanabe gúʼndabe xiixa ni gusihuinni dxandíʼ nuu ti Dios. De racá maʼ gusaananenu laabe folletu ¿Es la vida obra de un Creador? o El origen de la vida. Cinco cuestiones dignas de análisis. Ora ruuyaʼ chaahuinu xi guinabadiidxanu ne gácanu nachaʼhuiʼ né binni, zanda gacaneni laanu para chindá ca diidxaʼ nacubi stiʼ Reinu ndaaniʼ ladxidóʼ binni.

16. Xiñee cadi naquiiñeʼ gudiʼnu lugar puru si guʼndaʼ ti binni lu libru o lu folletu stiʼ para guicabi.

¹⁶ Guionna ejemplu. Guníʼ ique cayúʼndanenu ti binni Biblia, xi zazaaca pa gudiʼnu lugar puru gúʼndasibe lu libru o lu folletu stibe para guicábibe yaʼ. Pa gúninu zacá, qué zanda diʼ gacanenu laabe guiniisibe lu stiidxaʼ Dios. Xiñee yaʼ. Purtiʼ pa guicábibe sin guiníʼ íquebe de laani, zeeda gácabe casi ti yaga huiiniʼ ni cadi gueteʼ nuu xcu. Ne ora chuʼ tu gucaalú laabe pur caziidibe ni cá lu Biblia, zándaca ziábabe nagueenda (Mat. 13:20, 21). Para cadi guizaaca nga naquiiñeʼ guinabadiidxanu laabe xi riníʼ íquebe de ni caziidibe. Guyúbinu ximodo gánnanu pa dxandíʼ runi crebe ni caziidibe o pa coʼ. Ne ni jma risaca nga guyúbinu modo gábibe laanu xiñee riníʼ íquebe zacá. De racá maʼ iquiiñenu Stiidxaʼ Dios para gusiénenu laabe, zacá stúbisibe zudiibe cuenta de lu Biblia nga zeeda guiráʼ ni caziidibe (Heb. 5:14). Pa guʼyaʼ chaahuinu xi guinabadiidxanu, jma nagueenda zacanenu binni ni cusíʼdinu gaca fe stiʼ naguidxi ti ganda guzuhuaa dxiichiʼ ora chuʼ tu gucaalú laa ne ora gacalaʼdxiʼ tuuxa gabi laa cadi dxandíʼ ni caziidiʼ (Col. 2:6-8). Xiruʼ zanda gúninu para gucheechenu diidxaʼ jma jneza yaʼ.

17, 18. Ximodo zanda gacaneluʼ xcompañéruluʼ ora maʼ caniʼné sti binni.

¹⁷ Dxi biseendaʼ Jesús ca discípulo stiʼ para gucheechecaʼ diidxaʼ, biseendabe laacaʼ chupa chupa (Mar. 6:7; Luc. 10:1). Despué bizeeteʼ Pablu de caadxi binni ni bicheechené laa diidxaʼ, cani «huayuni né [laa] xhiiñaʼ Cristu» (Filip. 4:3). Cumu zinanda xquidxi Dios ejemplu riʼ la? lu iza 1953 gudíxhecaʼ ximodo zanda guiziidiʼ ca xpinni Cristu gucheechecaʼ diidxaʼ ne gacanésaacaʼ ora maʼ cayúnicaʼ dxiiñaʼ riʼ. a

¹⁸ Ora gucheecheluʼ diidxaʼ né sti xpinni Cristu, ximodo zanda gacaneluʼ laabe ora maʼ caníʼnebe tuuxa yaʼ (biindaʼ 1 Corintios 3:6-9). Biyubi ca textu ni cuzeetebe lu Biblia stiluʼ. Bicaadiaga laabe ne bicaadiaga binni ni caníʼnebe. Yenanda laabe ra caniʼbe, purtiʼ pa guinabadiidxacabe laabe xiixa zanda gacaneluʼ laabe (Ecl. 4:12). Peru guyuu cuidadu ti cadi guchuuguluʼ stiidxabe ora maʼ cusiénebe xiixa. Pa gúniluʼ ni, zándaca zabeeluʼ gana laabe o zuchéndaluʼ binni ni caníʼnebe. Nuu biaje zanda guicábiluʼ. Peru pa guiniʼluʼ xiixa la? guníʼ chupa chonna diidxaʼ si ne bidii lugar guiniʼruʼ xcompañéruluʼ.

19. Xi naquiiñeʼ guietenaláʼdxinu, ne xiñee.

¹⁹ Ximodo zanda gacanésaatu laga zetu sti yoo yaʼ. Galán iquiiñetu tiempu ca para guiniʼtu ximodo jma jneza guiníʼnetu binni. Ne naquiiñeʼ chuʼtu cuidadu ti cadi guiniʼtu xiixa ni cadi jneza de ca binni nuu neza ra rucheechetu diidxaʼ. Ne cadi guiniʼtu mal de xcaadxi xpinni Cristu ni canagucheechenetu diidxaʼ (Prov. 18:24). Guietenaláʼdxinu binni ruchee guiranu ne pur guendanachaʼhuiʼ stiʼ Jiobá nga bidii laanu dxiiñaʼ de gucheechenu diidxaʼ nacubi ne galán stiʼ Reinu (biindaʼ 2 Corintios 4:1, 7). Gudiʼnu xquíxepeʼ Jiobá pur dxiiñaʼ «nabé risaca ni bisaana né» laanu ne gúninu xhiiñaʼ Dios biaʼ gándatiʼ ne gucheechenu diidxaʼ.