1, 2. Deyo madit ango ma Lucaden pa Jehovah gitye kwede, dok man miyo iwinyo nining?

 DANO mapol ginongo ni obedo twon deyo madit adada ka kiminigi mot pi gin maber ma gutimo. Me lapore, jo mukene gunongo mot pien gutiyo ki mit kom me kelo kuc i kin lobbe aryo. Ento pud dong obedo twon deyo madit adada ka Lubanga ocwalo ngat moni me bedo lacungudwar nyo lawange wek okony dano me bedo ki kuc ki Lacwecgi!

² Macalo Lucaden pa Jehovah, wan keken aye watye ki deyo meno ma pud dong ber loyo-ni. I te tela pa Lubanga gin ki Yecu, wakwayo dano ducu ni “wuwek Lubanga odwokwu bote.” (2 Kor. 5:20) Jehovah tye ka tic kwedwa me nyiko dano cok bote. Man aye kit ma kikonyo kwede dano milion mapol i lobbe makato 235 kulu wek gubed ki wat maber ki Lubanga dok bene gubed ki gen me nongo kwo ma pe tum. (Tito 2:11) Ki miti madwong, walwongo ‘ngat mo keken ma mito mato pii me kwo labongo wel.’ (Yabo 22:17) Pien watye ki pwoc madit pi tic man dok watimo ki cwinywa ducu, man weko pore botwa me lwonge ni wan jo ma gitye ki “miti madwong me tiyo tic mabeco.” (Tito 2:14) Kong dong wanenu kit ma miti madwong ma watye kwede me tiyo tic mabeco romo konyowa kwede me nyiko dano cok bot Jehovah. Yo acel ma watimo kwede ki man aye me tito kwena.

3. “Arima pa Rwot [Jehovah]” miniwa gen ango?

³ Ma lubbe ki gin ma loc pa Wod pa Lubanga bicobone, Icaya 9:7 wacci: “Arima pa Rwot [Jehovah] me mony bimiyo man cobbe.” Lok magi nyuto ka maleng ni Wonwa me polo tye ki miti madit ni dano myero gularre. Lanen me bedo ki miti madwong ma Jehovah oweko-ni nyuto atir ni omyero wati tic ma en ominiwa me tito pi Ker-ri ki cwinywa ducu dok ki mit kom. Miti  madit ma watye kwede me konyo jo mukene me ngeyo Lubanga nyuto arima ma Jehovah tye kwede. Macalo lutic kacel ki Lubanga, tika wan ki acel acel wamoko tamwa me nywako i tic me tito kwena maber-ri ki cwinywa ducu kit ma kerowa twero kwede?​—1 Kor. 3:9.

4. Lanen maber ango ma Yecu oweko ma lubbe ki bedo ki miti madwong i ticce me pwony?

⁴ Nen bene kong lanen me miti madwong ma Yecu oweko. En oweko lanen maber pud dong loyo me bedo ki miti madwong i tiyo ticce me pwony. Kadi bed jo mapol gubedo ka dage, en pe orwenyo mitine madwong me tito kwena nio ka kineke ki nek alany. (Jon 18:36, 37) Ma dong kare me miyo kwone macalo gityer onyiko cok, Yecu oketo cwinye kun tiyo matek adada me konyo jo mukene wek gunge Jehovah.

5. I yo ma nining ma Yecu onongo tye calo latic ma i carolok me yat oduro-ni?

⁵ Me lapore, i mwaka 32 K.M., Yecu obolo carolok i kom laco mo ma onongo tye ki yat oduro i potone, ma onongo pe nyak pi mwaki 3. I kare ma owaco bot laticce ni otong yat-ti woko, latic-ci olege ni kong omiye kare wek eket cet dyang i tere. (Kwan Luka 13:6-9.) Jo manok keken aye onongo kiromo kwanogi ni gubedo lupwonnye pa Yecu. Ento kit ma en onyuto kwede i carolokke i kom latic-ci, Yecu otiyo ki kare manok ma odong​—dwe abicel keken-ni​—me tic matek adada i ticce me tito kwena i Judaya ki Perea. Ma dong odong nino manok wek kineke, Yecu okok pi lutugi pien ‘itgi oding woko ka winyo lok.’​—Mat. 13:15; Luka 19:41.

6. Pingo omyero wati matek i ticwa me pwony?

⁶ Kit ma dong wadonyo matut i kare me agikki-ni, pire mono pe tek tutwal ni myero wati matek i tic me tito kwena-ni? (Kwan Daniel 2:41-45.) Pud dong tye twon mot madit atika me bedo Lacaden pa Jehovah! I lobo kany, wan keken aye watito pi yo matir ma kitwero cobo kwede ki peko ma dano gitye iye. Cokcok-ki, lamego mo ma coyo lok i gajeti akwana owacci tek tutwal me gamo lapeny man ni, “Pingo jami maraco timme i kom jo ma kitgi beco?” Macalo Lukricitayo, obedo ticwa ki dong mot me nywako kacel ki jo ma gimito winyo lagam ma Baibul miyo pi lapeny macalo magi. Watye ki tyen lok me ‘bedo ma walyet i cwinywa’ ka nongo watiyo tic man ma Lubanga ominiwa-ni. (Rom. 12:11) Ki cwak pa Lubanga, miti madwong ma watye kwede i tito kwena-ni romo konyo jo mukene me ngeyo ki dong maro Jehovah.

7, 8. Cwiny me jalle ken keto deyo i kom Jehovah nining?

⁷ Ma lubbe ki gin mutimme i kom lakwena Paulo, ticwa me pwony-nyi romo weko “nino” ki “cam” bene remowa. (2 Kor. 6:5) Lok magi miyo waniang maber adada gin ma cwiny me jalle ken obedo ki dok romo poyo wiwa i kom painia ma giketo ticwa me pwony-nyi bedo mukwongo kun bene nongo myero guyeny kwo. Tam bene kong i kom lumiconari ma gimine macalo “gityer amata ma gionyo” wek gikony dano i lobbe mukene. (Pil. 2:17) Luelda ma i kacokkewa bene gitiyo matek adada, dok i cawa mukene pe gicamo nyo pe ginino wek gigwok romi pa Jehovah. Watye bene ki jo muteggi i kinwa kacel ki jo ma komgi lit ento pud gitute ki kerogi ducu me bedo tye i cokke ki wot i ticwa me pwony. Cwinywa bedo yom adada ka watamo i kom jo magi ma gijalle kengi kun gitiyo pi Lubanga-ni. Tute ma kit meno gudo kit ma dano gineno kwede ticwa me pwony-nyi.

⁸ I waraga ma ocoyo bot dul gajeti mo acel i lobo United Kingdom, laco mo ma pe obedo Lacaden owacci: “Niye pa dano  i kom dini tye ka dok piny . . . Gin ango ma lutela dini gitimo dye ceng lung? Gin pe gicito woko ka pwony kit ma Kricito ceng otimo kwede wek girwatte ki dano . . . Lucaden pa Jehovah keken aye nen calo giketo cwinygi i pwonygi, gicito ka rwatte ki dano ki dong gitito lok me ada ki cwinygi ducu.” I lobo man ma opong ki jo ma gimito cobo mitigi keken-ni, cwinywa me jalle ken-ni keto deyo i kom Lubanga Jehovah.​—Rom. 12:1.

9. Ngo ma romo konyowa wek wamedde ki bedo ki miti madwong me tiyo tic mabeco i ticwa me pwony?

⁹ Ento, ngo ma watwero timone ka miti madwong ma watye kwede pi ticwa me pwony-nyi nen calo tye ka dok piny? Bibedo me kony tutwal ka watamo i kom gin ma Jehovah tye ka cobone kun wok ki i ticwa me tito kwena-ni. (Kwan Jo Roma 10:13-15.) Larre pa dano cung i kom bedo ki niye i kom Jehovah kacel ki lwongo nyinge, ento gitwero timo man nining ka pe watito botgi lok me kwena? Bedo ki ngec man myero ocuk cwinywa me bedo ki miti madwong me tiyo tic mabeco kun waketo cwinywa ducu i tito pi kwena maber me Ker-ri.

10. Pingo kiromo wacci kitwa mabeco nyiko dano bot Jehovah?

¹⁰ Kadi bed ni pire tek me bedo ki miti madwong i ticwa me pwony, ento pe en keken aye romo nyiko dano bot Lubanga. Gin me aryo ma pire tek ma nyiko dano cok bot Lubanga aye bedo ki kit maber. Paulo ocoyo kit ma pire tek kwede me bedo ma kitwa ber ni: “Wan pe wamito waket ariya mo i yo pa ngat mo, wek dano pe guwac ni ticwa rac.” (2 Kor. 6:3) Ka lokwa dongo dano ki dok kitwa ber, man keto deyo i kom pwony pa Lubanga, ki bene ywayo tam pa jo mukene me cako woro Jehovah. (Tito 2:10) Ki lok ada, wawinyo kare ki  kare ni dano gujolo lok me ada pien nongo guneno kit mabeco ma watye kwede.

11. Pingo omyero watam matut dok waleg i kom gin ma watimo ki kit ma gudo kwede jo mukene?

¹¹ Kadi bed ni tic mabeco ma watimogi miyo dano gijolo lok me ada, ento jami maraco ma watimo bene gimiyo dano gikwero woko. Pi meno, kono watye i gang tic, paco, nyo i cukul, omyero pe wawek ngat mo onong bal i ticwa me pwony ki dok i kitwa. Ka watimo bal akaka, ci adwogine bibedo marac adada botwa. (Ibru 10:26, 27) Man myero owek watam matut dok waleg i kom gin ma watimo ki kit ma gudo kwede jo mukene. Kit ma kwo pa dano tye ka balle medde ameda i lobo-ni, jo ma gitye ki cwiny matir gibimedde ki ‘neno apokapoka . . . i kin ngat ma tiyo bot Lubanga ki ngat ma pe tiyo bote.’ (Mal. 3:18) Ada, kitwa maber pire tek adada me konyo dano wek gudok lurem Lubanga.

12-14. Kit ma waciro kwede ki aunauna gudo kit ma jo mukene gineno kwede lok me ada nining? Mi lapor mo acel.

¹² I waragane ma ocoyo bot jo Korint, Paulo otittigi ni ewok ki i can, ayelayela, gipwode, dok bene gitweye i buc. (Kwan 2 Jo Korint 6:4, 5.) Ka wawok ki i jami ma gitemo niyewa-ni, diyo cwinywa konyo jo mukene ma ginenowa me jolo lok me ada. Me lapore: Mwaki mapol mukato angec, kitemo jwayo Lucaden pa Jehovah woko ki i kabedo mo i lobo Angola. Lucaden aryo ma gunyomme kacel ki jo 30 ma gitye ki miti kimakogi i kare ma onongo gitye i cokke. I ngeye, kiguro lukin gang me neno kit ma lumone magi gipwodo kwede Lucaden aryo-ni ki jo 30 ma balgi pe-ni nio ka komgi ocwer remo. Lutino wa ki mon bene gumato lut ma rom aroma. Kitimo man wek dano gubed ki lworo pe me winyo lok pa Lucaden pa Jehovah. Ento i kare ma kipwodogi inyim lwak, lukin gang mapol gubino bot Lucaden magi kun gipenyo ni myero kikwan Baibul kwedgi ki paco! Lacen, tic me tito kwena me Ker-ri omedde anyim, ma oweko wel Lucaden omedde ki dok okelo mot mapol.

¹³ Lapor man nyuto kit ma lanenwa gudo kwede jo mukene i yo me aura ka wacung matek pi cik me Baibul. Waromo penye kekenwa ni dano adi ma gudoko lurem Lubanga pienni Petero ki lukwena mukene-ni gucung matek ki tekcwiny. (Tic 5:17-29) Ki botwa, lutino kwan luwotwa, lutic luwotwa, nyo jo me pacowa gitwero jolo lok me ada ka gineno wacung matek pi gin matir.

¹⁴ I kare mo keken, nongo olo to kitye ka uno utmegiwa mogo. Me lapore, i lobo Armenia, omege ma welgi romo 40 kitweyogi i buc pienni gukwero donyo i mony, dok mukene mapol ata pud nen calo kibitweyogi bene i anyim. I lobo Eritrea, kitweyo lutic pa Jehovah gin 55, mogo i kingi gitye mwaka 60 ki wiye. I lobo South Korea, Lucaden ma romo 700 kulu kitweyogi pi niyegi. Tim ma kit man omedde pi mwaki 60 kulu. Walegu wunu ni niye pa jo magi ma kitye ka unogi i lobbe mapat pat-ti oket deyo i kom Lubanga dok okony jo ma gimaro kit matir wek gucung matek i woro me ada.​—Jab. 76:8-10.

15. Mi lapor ma nyuto ni bedo ma wagene miyo dano gibedo ki miti me ngeyo lok me ada.

¹⁵ Pien wakwo kwo ma wagenne, man bene twero miyo jo mukene gijolo lok me ada. (Kwan 2 Jo Korint 6:4, 7.) Me lapore, tam kong i kom gin man mutimme-ni: Laminwa mo ma onongo tye ka wot ki bac onongo mito culo centene me wot ento lawote mo owacce ni konye pe me culone, kit ma gicito ka macok-ki. Laminwa-ni owacce ni omyero ecul kadi bed ecito ka macok. I ngeye, lawote-ni olor woko ki i bac. Ento, ladwo bac-ci olokke bot laminwa-ni ci openye ni, “In itye Lacaden pa Jehovah?” En ogamo ni, “Atye Lacaden, pingo i penya kumeno?” Ladwo bac-ci ogamo ni: “Awinyo kit ma wubedo ka  lok kwede ma lubbe ki culo cente me wot, dok bene angeyo ni Lucaden pa Jehovah gitye i kin jo manok ma giculo cente me wotgi dok gigene i jami ducu.” I nge dwe manok, laco mo obino atir bot laminwa-ni ki i cokke ci openye ni, “Tika i ngeya? An aye ladwo bac ma abedo ka lok kwedi ma lubbe ki culo cente me wot-ti. Pien aneno kiti maber-ri, man omiyo acako kwano Baibul ki Lucaden pa Jehovah.” Ka wabedo ma wagene, man miyo dano giketo gen i kom kwena ma watito-ni.

16. Pingo kit mogo calo diyo cwiny, mar ki kica gudo cwiny dano? Mi labol acel.

¹⁶ Wan bene wakonyo me nyiko dano bot Jehovah ka wanyuto kit mogo calo diyo cwiny, mar ki dong kica. Jo ma ginenowa giromo bedo ki miti me pwonyo lok i kom Jehovah, yubbe ki dong jone. Tam kacel ki kit pa Lukricitayo me ada pe obedo calo pa jo mukene ma gitimo jami wek kinengi ni kitgi atir kun nongo rac. Lutela dini mukene gulony pien gukwalo cente pa romigi dok gitiyo ki cente man me wilo odi ma welgi tek kacel ki mutoka mogo mangic​—kun ngat acel i kingi oketo fan i ot gwok wek obed mangic. Ki lok ada, jo mapol ma giwacci gilubo kor Kricito-ni pe gitye ki cwiny me ‘miyo nono labongo cul.’ (Mat. 10:8) Ma ka meno, calo lulamdog ma onongo gungak woko i kare pa jo Icrael-li, gin “gipwonyo pwony pi mucara”​—dok pol pa jami ma gipwonyo pe i ginacoya. (Mika 3:11) Kodi kwo man marac-ci pe weko ngat mo keken bedo larem Lubanga.

17, 18. (a) Waketo deyo i kom Jehovah nining ka wanyuto kite i kwowa? (b) Gin ango mumiyo idiyo cwinyi i tiyo tic mabeco?

¹⁷ Kitungcel bene, pwony matir pa Lukricitayo ki dong timo jami mabeco bot jo mukene gudo cwiny dano. Me lapore, i kare ma painia mo acel tye ka pwony i ot ki ot, daa to mo muteggi otugi ryeme cutcut. Daa to-ni owacci i kare ma painia-ni ogoyo olang, onongo ecung i lait ot i jokon, ka loko gulob me mac. Painia-ni owacce ni “Pe ber me timo tic man in keni.” Painia-ni oloko gulobi ci omedde ki wotte. I kare ma wod pa daa to-ni oniang gin mutimme-ni, man ogudo cwinye adada ma oweko en otemo yenyo omego man wek epwoye. Lacen, wod pa daa to-ni oye kwano Baibul.

¹⁸ Pingo imoko tammi me medde ki diyo cwinyi i tiyo tic mabeco? Twero bedo ni pien ingeyo ni ka wanyuto miti madwong i ticwa me pwony ki dok watimo jami ma rwatte ki yub pa Lubanga, ci waketo deyo i kom Jehovah ki bene waromo konyo jo mukene me nongo larre. (Kwan 1 Jo Korint 10:31-33.) Miti madwong me tiyo tic mabeco i tic me tito kwena ki dok kwo kwo maber bino pi mar ma watye kwede pi Lubanga ki luwotwa. (Mat. 22:37-39) Ka ce watye ki miti madwong me tiyo tic mabeco, ci wabibedo ki yomcwiny me ada kacel ki yengo i kare-ni. Ento bene, watye ka kuro nino ma dano ducu gibinyuto miti madwong pi woro me ada wek giket deyo i kom Lacwecwa, Jehovah.