1, 2. Anong onra an yaon sa mga Saksi ni Jehova sana, asin ano an pagmati mo dapit digdi?

PARA sa dakul, sarong dakulang onra an matawan nin premyo huli sa marahayon na nagibo. Halimbawa, may mga tinawan kan Nobel Prize huli sa ginibong pagmamaigot na magkaigwa nin katuninungan sa pag-ultanan nin duwang nasyon na nag-iiwal o dai nagkakaintindihan. Pero, mas dakulang onra nanggad an suguon nin Diyos bilang embahador o representante tanganing tabangan an mga tawo na magkaigwa nin matuninong na relasyon sa saindang Kaglalang!

² Bilang Mga Saksi ni Jehova, kita sana an may siring na onra. Sa irarom kan pagdirehir nin Diyos asin ni Cristo, nakikiulay kita sa mga tawo na ‘makipag-ulian sa Diyos.’ (2 Cor. 5:20) Ginagamit kita ni Jehova tanganing irani sa saiya an mga tawo. Sa paaging ini natabangan an minilyon sa labing 235 kadagaan na magkaigwa nin marahay na relasyon sa Diyos asin sa siring magkaigwa kan paglaom na mabuhay nin daing katapusan. (Tito 2:11) Udok sa puso an satong kaigutan sa pag-imbitar na ‘uminom kan tubig nin buhay na daing bayad’ an siisay man na ‘buot,’ o gusto. (Kap. 22:17) Huling pinapahalagahan nanggad niyato an mahalagang marhay na asignasyon na ini asin inuutob iyan nin may kahigusan, angay kitang apudon na sarong banwaan na “maigot sa paggibo nin marahay.” (Tito 2:14, BPV) * Pag-ulayan ta ngunyan kun paano an satong kaigutan sa marahay na mga gibo nakakatabang sa sato na irani an mga tawo ki Jehova. An sarong paagi iyo an satong paghuhulit.

3. Ano an inaasegurar sa sato kan ‘kaigutan ni Jehova’?

³ Manungod sa gigibuhon kan pamamahala kan Aki nin Diyos, an Isaias 9:7 nagsasabi: ‘An kaigutan ni Jehova nin mga hukbo magibo kaini.’ Idinuduon kaiyan na talagang mawot kan satong langitnon na Ama na makaligtas an katawuhan. An halimbawa ni Jehova sa pagigin maigot malinaw na nagpaparisa na an gibuhon na itinao niya sa sato bilang mga parabalangibog kan Kahadian maninigo sa satong bilog na pusong suporta, entusiyasmo, asin kaigutan. An satong makusog na pagmawot na tabangan  an mga tawo na mamidbid an Diyos nagpapabanaag kan kaigutan ni Jehova. Kun siring, bilang mga kapwa trabahador nin Diyos, determinado daw kita personalmente na gibuhon an satong pinakamakakaya sa pagbalangibog kan maugmang bareta sagkod sa itinutugot kan satong kamugtakan?—1 Cor. 3:9.

4. Paano itinao ni Jesus an halimbawa nin pagigin danay na maigot sa ministeryo?

⁴ Isip-isipon man an kaigutan ni Jesus. Itinao niya an perpektong halimbawa nin pagigin danay na maigot sa ministeryo. Sa ibong nin grabeng pagkontra, nagdanay siyang maigot sa paghuhulit sagkod sa saiyang makulugon na kagadanan bilang tawo. (Juan 18:36, 37) Mantang naghaharani an saiyang kagadanan bilang atang, lalo pang nagin determinado si Jesus na tabangan an iba na mamidbid si Jehova.

5. Paano huminiro si Jesus kauyon kan saiyang ilustrasyon dapit sa puon nin igos?

⁵ Halimbawa, kan tigrakdag nin 32 C.E., nagtao si Jesus nin ilustrasyon dapit sa sarong lalaki na may ubasan, kun sain igwa nin higera, o puon nin igos, na dai namunga sa laog nin tulong taon. Kan an nag-aataman kan ubasan sabihan kan kagsadiri na paludon na iyan, nakiulay siya na tawan siya nin panahon tanganing bugtakan iyan nin pataba. (Basahon an Lucas 13:6-9.) Kan panahon na idto, kakadikit pa sanang disipulo an puwedeng ibilang na bunga kan paghuhulit ni Jesus. Pero arog kan ipinaparisa sa ilustrasyon na iyan dapit sa nag-aataman, ginamit ni Jesus an natatadang halipot na panahon—mga anom na bulan—tanganing urog pang maghulit sa Judea asin Perea. Pirang aldaw bago an saiyang kagadanan, tuminangis si Jesus para sa saiyang mga kahimanwa na ‘an puso tuminagas’ asin dai naghimati.—Mat. 13:15; Luc. 19:41.

6. Taano ta maninigo na urog pa kitang magmaigot sa ministeryo?

⁶ Huling nasa puro na kita kan panahon kan katapusan, bako daw na mahalagang marhay na urog pa kitang magmaigot sa paghuhulit? (Basahon an Daniel 2:41-45.) Dakulang pribilehiyo nanggad an magin mga Saksi ni Jehova! Kita sana an mga tawo digdi sa daga na nagtatao nin paglaom dapit sa tunay na solusyon sa mga problema kan katawuhan. Dai pa sana nahahaloy, sinabi nin sarong kolumnista sa diyaryo na imposibleng masimbag an hapot na “Taano ta nangyayari an maraot na mga bagay sa marahay na mga tawo?” Responsabilidad asin pribilehiyo niyato bilang mga Kristiyano na ihiras sa gabos na gustong magdangog an simbag kan Bibliya sa mga hapot na arog kaiyan. Yaon sa sato an gabos na dahilan na magin “malaad sa espiritu” mantang inuutob ta an sugo sa sato nin Diyos. (Roma 12:11) Paagi sa bendisyon nin Diyos, an satong maigot na pag-eebanghelyo makakatabang sa iba na mamidbid asin mamutan si Jehova.

7, 8. Paano nagtatao nin onra ki Jehova an pagigin mapagsakripisyo?

⁷ Arog kan ipinaparisa kan mga inagihan ni apostol Pablo, puwede kitang makaeksperyensiya nin “mga bangging daing turog” asin “mga panahon na dai nagkakakan” huli sa satong ministeryo. (2 Cor. 6:5, NW) Malinaw na ilinaladawan kaini an pagsasakripisyo sa sadiri asin puwede nanggad kaining ipagirumdom sa sato an mga payunir na iniinot sa saindang buhay an ministeryo mantang sinusuportaran an sadiri sa pinansiyal. Girumdumon man an dedikadong mga misyonero na garo ‘inatang’ an sadiri tanganing maglingkod sa mga tawo sa ibang mga nasyon. (Fil. 2:17) Kumusta man an satong mahigos na mga elder na kun minsan dai nagkakakan o dai nakakaturog huli sa pag-ataman sa mga karnero ni Jehova? Yaon man an mga may edad na asin mga may hilang na ginigibo an pinakamakakaya tanganing makaatender sa Kristiyanong mga pagtiripon asin makapaglingkod sa langtad. An satong puso napapano nin pag-apresyar kun naiisip ta an gabos na mapagsakripisyong mga lingkod na ini nin Diyos. An mga paghihinguwang iyan may epekto sa kun ano an paghiling kan iba sa satong ministeryo.

⁸ Sa diyaryong Boston Target sa Lincolnshire, United Kingdom, sarong parabasa na bakong Saksi an nagsurat: “An mga tawo nawawaran na nin pagtubod sa mga relihiyon . . . Ano an piggigibo kan mga ministrong ini kan simbahan sa bilog na aldaw? Siguradong dai sinda nagluluwas arog kan  ginibo ni Cristo tanganing kaulayon an mga tawo . . . An solamenteng relihiyon na garo baga nagmamalasakit iyo an Mga Saksi ni Jehova, na nagluluwas tanganing kaulayon an mga tawo saka nagpapartisipar talaga sa paghuhulit kan katotoohan.” Sa kinaban na ini na an kadaklan sadiring kagustuhan an pinapaniguan, dakula an nagigibo kan satong pagigin mapagsakripisyo tanganing matawan nin onra si Jehova Diyos.—Roma 12:1.

9. Ano an puwedeng makamotibar sa sato na magdanay na maigot sa marahay na mga gibo sa satong ministeryo?

⁹ Pero, ano an puwede tang gibuhon kun kita garo baga nawawaran na nin kaigutan sa ministeryo? Makakatabang an paghurop-hurop sa kun ano an nahahaman ni Jehova paagi sa gibuhon na paghuhulit. (Basahon an Roma 10:13-15.) An kaligtasan nakadepende sa pag-apod sa pangaran ni Jehova nin may pagtubod, pero dai iyan magigibo kan mga tawo kun dai kita mahulit sa sainda. An pakaaram kaini maninigong magmotibar sa sato na magdanay na maigot sa marahay na mga gibo asin magin mahigos sa pagbalangibog kan maugmang bareta kan Kahadian.

10. Taano ta masasabi na an satong marahay na paggawi nakakaparani sa mga tawo ki Jehova?

¹⁰ Mahalaga sa ministeryo an kaigutan, pero bako sana iyan an kaipuhan tanganing mairani an mga tawo sa Diyos. An ikaduwang bagay na kaiba sa maigot na mga gibo na nakakaakit sa mga tawo na rumani sa Diyos iyo an marahay na Kristiyanong paggawi. Idinuon ni Pablo an kahalagahan kan satong paggawi kan siya magsurat: ‘Naglilikay kaming makagibo nin ano man na ikakaulang nin siisay man, tanganing mayong makapagtaram nin maraot dapit sa samong ministeryo.’ (2 Cor. 6:3, BPV) An satong marahay na pananaram asin matanos na paggawi nakakadagdag sa kagayunan kan katukduan nin Diyos, na huli kaiyan nagigin kaakit-akit sa iba an pagsamba ki Jehova. (Tito 2:10) Sa katunayan, parati kitang nakakadangog nin marahay na mga resulta kun naoobserbaran kan sinserong mga tawo an satong arog-Cristong paggawi.

11. Taano ta maninigo niyatong pag-isipan na marhay asin ipamibi an dapit sa mga epekto kan satong paggawi?

 ¹¹ Aram niyato na an mga ginigibo ta puwedeng magkaigwa nin marahay na impluwensiya sa mga tawo, pero posible man mangyari an kabaliktaran. Kaya, yaon man kita sa trabaho, sa harong, o sa eskuwelahan, nagmamaigot kita tanganing an siisay man dai nin mahiling na sala sa satong ministeryo asin paggawi. Kun kita tuyong magpaparagibo nin kasalan, kapahapahamak an magigin resulta kaiyan sa sato. (Heb. 10:26, 27) Maninigo na mapahiro kita kaini na pag-isipan na marhay sagkod ipamibi an dapit sa satong mga ginigibo asin kun ano an sinasabi sa iba kan satong paagi nin pamumuhay. Mantang nagrururo an pamantayan sa moral kan kinaban na ini, mas mahihiling kan sinserong mga tawo ‘an kalainan kan naglilingkod sa Diyos asin kan dai naglilingkod sa saiya.’ (Mal. 3:18) Iyo, an satong marahay na Kristiyanong paggawi may mahalagang papel sa pagtabang sa mga tawo na makipag-ulian sa Diyos.

12-14. Kun tinatagalan ta an mga pagbalo sa pagtubod, ano an epekto kaini sa paghiling kan iba sa satong ministeryo? Magtao nin halimbawa.

¹² Sa surat sa mga taga Corinto, sinabi ni Pablo na siya nag-agi nin mga kahurasaan, mga kasakitan, mga paghampak, asin pagkabilanggo. (Basahon an 2 Corinto 6:4, 5.) Kun nag-aagi kita nin mga pagbalo sa pagtubod, an satong pagtagal puwedeng makatabang sa mga nagmamasid na akuon an katotoohan. Bilang pag-ilustrar: Nagkapirang taon na an nakaagi, may mga nagpurbar na paraon an mga Saksi ni Jehova sa sarong lugar sa Angola. Dinakop an duwang bawtisadong Saksi asin 30 interesado na nag-aatender sa satong mga pagtiripon. Dangan, tiniripon an mga tawo duman tanganing maghiling mantang an mga inosenteng ini linalatigo kan mga nagkokontra sagkod na magdurugo. Linatigo ninda pati mga babayi asin mga aki. An intensiyon iyo na takuton an mga tawo tanganing mayo nang magdangog sa mga Saksi ni Jehova. Pero pagkatapos kan panglalatigong ini, dakul sa mga tawo duman an nagdulok sa mga Saksi asin nakiulay na tukduan sa Bibliya! Huli kaiyan, nagpadagos an gibuhon na paghuhulit kan Kahadian, na nagresulta sa risang-risang pagdakul kan mga nag-ako kan katotoohan asin dakul na bendisyon.

¹³ Ipinapahiling kan halimbawang ini na an satong marigon na paninindugan sa mga prinsipyo sa Bibliya puwedeng magkaigwa nin dakulang epekto sa iba. Tibaad iniisip-isip ta kun gurano kadakul an natabangan na makipag-ulian sa Diyos huli sa may kusog nin buot na paninindugan ni Pedro asin kan iba pang mga apostol. (Gui. 5:17-29) Sa kamugtakan ta, an satong mga kaeskuwela, katrabaho, o kapamilya posibleng magkaigwa nin positibong reaksiyon kun nahihiling ninda na naninindugan kita sa kun ano an tama.

¹⁴ Sa ano man na panahon, may mga tugang kita na nag-aagi nin persekusyon. Halimbawa, sa Armenia, mga 40 brother an nasa presohan huli sa saindang neutralidad, asin dakul pa an posibleng marhay na mapreso sa maabot na mga bulan. Sa Eritrea, 55 lingkod ni Jehova an nakapreso, na an nagkapira labi nang 60 an edad. Sa South Korea, mga 700 na Saksi an nasa presohan huli sa saindang pagtubod. Uminabot na nin 60 taon an arog kaining situwasyon duman. Ipamibi ta na lugod an kaimbudan kan pinepersegir na mga tugang ta sa manlain-lain na kadagaan magtao nin kamurawayan sa Diyos asin makatabang sa mga namumuot sa katanusan na manindugan para sa tunay na pagsamba.—Sal. 76:8-10.

15. Magtao nin halimbawa kun paano an pagigin onesto puwedeng makaakit sa iba pasiring sa katotoohan.

¹⁵ An satong pagigin onesto puwede man makaakit sa mga tawo pasiring sa katotoohan. (Basahon an 2 Corinto 6:4, 7.) Halimbawa, isip-isipa an eksperyensiyang ini: Kan an sarong sister naghuhulog nin kuwarta sa ticket machine sa sarong bus, sinabihan siya kan kabisto niya na dai na kaipuhan magbayad para sa tiket huling haranihon man sana an bababaan niya. Ipinaliwanag kan sister na tama sanang magbayad kan tiket, dawa sagkod sana siya sa sunod na punduhan nin bus. Pagkatapos kaiyan, nagbaba na an kabisto niya. Dangan nagkiling sa sister an drayber kan bus asin naghapot, “Saksi ni Jehova ka?” “Iyo po,” an simbag kan sister. “Ta’no po ta naihapot nindo?” “Nadangog kong pinag-ulayan nindo an pagbayad nin tiket sa bus, saka aram ko na an mga Saksi ni Jehova kabilang sa kadikiton na tawong naggigibo kaiyan asin sinda onesto sa gabos na bagay.” Pakalihis nin  pirang bulan, sarong lalaki an nagdulok sa sister sa pagtiripon asin nagsabi, “Nagigirumduman mo ako? Ako i’tong drayber kan bus na nakipag-ulay saimo manungod sa pagbayad nin tiket. Kan mahiling ko su ginibo mo, nagdesisyon akong mag-adal na kan Bibliya sa mga Saksi ni Jehova.” An satong reputasyon sa pagigin onesto nagrerekomendar sa sato bilang mapagtitiwalaan na mga ministro.

16. Taano ta nakakapahiro sa puso nin mga tawo an mga kuwalidad na arog kan pakatios, pagkamuot, asin kabuutan? Magtao nin halimbawa kan mga ginigibo kan mga lider nin palsong relihiyon.

¹⁶ Nakakatabang man kita na maparani an mga tawo ki Jehova kun nagpapahiling kita nin mga kuwalidad na arog kan pakatios, pagkamuot, asin kabuutan. An ibang nag-oobserbar sa sato tibaad magmawot na makanuod dapit ki Jehova, sa saiyang mga katuyuhan, asin sa saiyang banwaan. An kaisipan asin paggawi kan tunay na mga Kristiyano lain na marhay sa basta sana pagpahiling nin diyosnon na debosyon kan mga tawong an pagsamba sa parati pagsagin-sagin sana. An ibang lider nin relihiyon yuminaman paagi sa pandadaya sa mga miyembro ninda, na ginagamit an kadaklan sa nakuang kuwarta tanganing magbakal nin mamahalon na mga harong asin awto—asin an saro sa sainda nagkaigwa nin naka-aircon na harong-harong nin ayam. Iyo, an dakul na naghihingakong parasunod ni Cristo mayo nin pagmawot na ‘magtao nin daing bayad.’ (Mat. 10:8) Imbes, arog kan masumbikal na mga saserdote sa suanoy na Israel, sinda ‘nagtutukdo huli sa bayad’—asin an kadaklan sa mga itinutukdo ninda bakong suno sa Kasuratan. (Miq. 3:11) An siring na mapagsagin-sagin na mga gibo dai nakakatabang sa siisay man na makipag-ulian sa Diyos.

17, 18. (a) Paano kita nagtatao nin onra ki Jehova kun ipinapahiling ta sa satong buhay an saiyang mga kuwalidad? (b) Ano an nagmomotibar sa saimo na magmaigot sa marahay na mga gibo?

¹⁷ Sa ibong na lado, an tunay na Kristiyanong mga katukduan asin paggibo nin marahay sa kapwa nakakapahiro sa puso. Halimbawa, mantang naghaharong-harong, sarong payunir na brother an gusto nang pahalion tulos kan sarong may edad nang babaying balo. Sinabi kan balo na kan mag-doorbell an brother, yaon siya sa urualsang hagyan, na nagpupurbar na salidahan an sarong bumbilya sa kusina. “Delikado po saindo na gibuhon iyan nin solo,” an sabi kan brother. Sinalidahan kan brother an bumbilya dangan naghali. Kan maaraman kan aking lalaki kan balo an nangyari, napahanga siyang marhay kaya hininguwa niyang mahanap an brother tanganing magpasalamat. Pag-abot nin panahon, an aking lalaki nag-ako nin pag-adal sa Bibliya.

¹⁸ Taano ta determinado ka na magmaigot sa marahay na mga gibo? Tibaad huling aram mo na kun kita maigot sa satong ministeryo asin minagawi kauyon kan kabutan nin Diyos, natatawan ta nin onra si Jehova asin puwede tang matabangan an iba na magkamit nin kaligtasan. (Basahon an 1 Corinto 10:31-33.) An kaigutan sa marahay na mga gibo sa paghuhulit kan maugmang bareta asin an paggawi sa diyosnon na paagi minagikan sa hararom na pagmawot na ipahiling an pagkamuot sa Diyos asin sa kapwa. (Mat. 22:37-39) Kun maigot kita sa marahay na mga gibo, kita abundang bebendisyunan nin kagayagayahan asin satispaksiyon ngunyan. Dugang pa, makakalaom kita na maabot an panahon kun sain an bilog na katawuhan mapahiling nin kaigutan para sa tunay na pagsamba bilang pagtao nin onra sa satong Kaglalang, si Jehova.