Bushe ‘Mwalipimpa Ukubomba Imilimo Isuma’?
Bushe ‘Mwalipimpa Ukubomba Imilimo Isuma’?
‘Kristu Yesu, ali-ipeele pali ifwe ukuti asangulule abantu pa kuti babe abantu bakwe abaibela, kabili abapimpa ukubomba imilimo isuma.’—TITO 2:13, 14.
KUTI MWAYASUKA SHANI?
Mulandu nshi mumwena ukuti lishuko nga nshi ukubombako umulimo wa kushimikila?
Bushe Daniele 2:41-45 ilanga shani ukuti calicindama ukuba abacincila mu kushimikila?
Londololeni ifyo imibele isuma ilenga abantu ukwisa mu kupepa kwa cine no kupalama kuli Yehova Lesa.
1, 2. Bushe Inte sha kwa Yehova bacindikwa shani, kabili mumfwa shani pali ifi mwacindikwa?
ABANTU abengi nga babapeela icilambu pa fintu bacitile ifyacindama bamona ukuti nababacindika sana. Ku ca kumwenako, bamo balabapeela icilambu pa kulenga utubungwe utushaleumfwana ukutendeka ukumfwana. Ala twalicindikwa nga nshi pa kuba inkombe sha kwa Lesa ishafwa abantu ukuba ifibusa na Kabumba wabo!
2 Fwe Nte sha kwa Yehova, ni fwe fye twacindikwa muli uyu musango. Lesa na Kristu e batweba ukupapaata abantu ‘ukubwelela kuli Lesa.’ (2 Kor. 5:20) Yehova aletubomfya ukukulila abantu kuli ena. Ici e calenga ukuti abantu abengi nga nshi mu fyalo ukucila pali 235 babe ifibusa fya kwa Lesa no kuba ne subilo lya mweo wa muyayaya. (Tito 2:11) Twalipimpa nga nshi ukwita umuntu ‘onse uulefwaya ukunwapo amenshi ya mweo aya bupe fye.’ (Ukus. 22:17) Apo twalitemwa uyu mulimo kabili tulaubomba bwino, twalilinga ukulaitwa ukuti abantu “abapimpa ukubomba imilimo isuma.” (Tito 2:14) Lekeni nomba tulande pa fyo ukupimpa ilyo tulebomba imilimo iisuma kwingatwafwa ukulenga abantu ukupalama kuli Yehova. Ukushimikila imbila nsuma e nshila imo iyo abantu bengapalaminamo kuli Lesa.
MULEPASHANYA UKUPIMPA KWA KWA YEHOVA NA YESU
3. Bushe “ukupimpa kwa kwa Yehova” kulenga twacetekela cinshi?
3 Pa kulanda pa fyo ukuteka kwa Mwana wa kwa Lesa kukacita, Esaya 9:7 itila: “Ukupimpa kwa kwa Yehova wa mabumba kukacita ici.” Aya mashiwi yalangilila ukuti Shifwe wa ku muulu alafwaya sana ukuti abantu bakapusuke. Ukumona ifyo Yehova acincila kufwile ukutulenga ukuba abapimpa ilyo tulebomba umulimo atupeela uwa kushimikila pa Bufumu no kulaubomba no mweo onse. Ifi tufwaisha ukwafwa abantu ukwishiba Lesa, cilangilila fye ukuti tulapashanya ukupimpa kwa kwa Yehova. Apo tubombela pamo na Lesa, bushe tulabombesha ukushimikila imbila nsuma apapela amaka yesu?—1 Kor. 3:9.
4. Bushe Yesu alangile shani ukuti ali uwapimpa mu kushimikila?
4 Tontonkanyeni na pa kupimpa kwa kwa Yesu. Ali uwacincila mu kushimikila. Nangu ca kutila abengi balemukaanya, alitwalilile ukuba uwacincila ukushimikila imbila nsuma mpaka fye ne mfwa. (Yoh. 18:36, 37) Ilyo inshita ya kuti apeele ubumi bwakwe ilambo yapaleme, Yesu aleshimikila sana pa kuti afwe abantu ukwishiba Yehova.
5. Bushe Yesu ali shani ngo walebomba mwi bala lya myangashi?
5 Ku ca kumwenako, mu 32 C.E., Yesu alandile icilangililo ca muntu uwali ne cimuti ca makunyu icalimbilwe mwi bala lyakwe ilya myangashi icishatwelepo ifisabo pa myaka itatu. Uyu mwaume aebele uwalebomba mwi bala ukuti aciteme, lelo uwalebombamo alombele ukuti bamupeeleko inshita iya kuti abikemo umufundo. (Belengeni Luka 13:6-9.) Pali ilya nshita, abantu fye abanono e bali abasambi ba kwa Yesu. Lelo nga fintu alandile mu cilangililo ca walebomba mwi bala lya myangashi, Yesu abomfeshe inshita iinono iyasheleko, nalimo imyeshi 6, ukushimikila sana mu Yudea na mu Perea. Ilyo kwashele inshiku ishinono ukuti afwe, Yesu aliliile ubulanda abaYuda banankwe abaleumfwa lelo abashalecitapo nangu cimo.—Mat. 13:15; Luka 19:41.
6. Mulandu nshi tulingile ukulabombesha mu mulimo wa kushimikila?
6 Apo impela naipalama sana, kanshi nacicindama nga nshi ukuti tulebombesha mu mulimo wa kushimikila! (Belengeni Daniele 2:41-45.) Ala lishuko nga nshi ukuba Inte sha kwa Yehova! Ni fwe fye tweba abantu ifyo amafya ya mu calo yakapwa. Uulemba inyunshipepala alandile ukuti takwaba uwingasuka icipusho ca kuti, “Mulandu nshi ifyabipa ficitikila abantu abasuma?” Mulimo wesu fwe Bena Kristu kabili lipaalo nga nshi ukwebako abantu abafwaya ukumfwa ifyo Baibolo yasuka amepusho ayapala aya. Tufwile ukuleka ‘umupashi ukutulenga ukucincila’ ilyo tulebomba uyu mulimo Lesa atupeela. (Rom. 12:11) Lesa akatupaala kabili tukaafwa abantu abengi ukumwishiba no kumutemwa.
UKUIPEELESHA KULALENGA ABANTU BACINDIKA YEHOVA
7, 8. Bushe ukuipeelesha kwesu kulenga shani Yehova ukucindikwa?
7 Nga filya cali ku mutumwa Paulo, umulimo wesu uwa kushimikila kuti walenga ‘twafufya utulo,’ no “kubulwa ifya kulya.” (2 Kor. 6:5) Aya mashiwi yatulanga bwino ifyo tufwile ukuipeelesha ilyo tulebomba umulimo wa kushimikila. Yatulanga ne fyo bapainiya ababika umulimo wa kushimikila intanshi baipeelesha nangu ca kutila balabomba incito pa kuti baleisakamana. Tontonkanyeni na pali bamishonari ababombesha ukwafwa abantu mu fyalo babatuma. (Fil. 2:17) Baeluda nabo balabombesha ukwafwa umukuni wa kwa Yehova ica kuti limo balafilwa no kulya e lyo limo balafufya no tulo. Kwaliba na bakoloci na balwalilila abesha na maka yonse ukulongana no kubombako umulimo wa kushimikila. Nga twatontonkanya pa babomfi ba kwa Lesa bonse aba abaipeelesha, ala tulatemwa icine cine. Na bantu bambi balamona ukuti twalicindika sana umulimo wa kushimikila.
8 Muli kalata iyo umo uushili Nte alembele ku balemba inyunshipepala mu United Kingdom, atile: “Abantu nabasuula imipepele . . . Finshi bashimapepo bacita akasuba konse? Tabatandalila abantu nga filya Kristu alecita . . . Imipepele fye iimoneka ukuti yalibika amano ku bantu ni Nte sha kwa Yehova, pantu bena balatandalila abantu kabili balashimikila ne cine.” Muli cino calo umo abantu abengi baitemwa, ukuipeelesha kwesu kulalenga Yehova Lesa ukucindikwa.—Rom. 12:1.
9. Cinshi cingalenga ukuti tube abapimpa mu mulimo wa kushimikila?
9 Finshi tufwile ukucita nga twamona ukuti tatuli abacincila mu kushimikila nge fyo twali kale? Tufwile ukutontonkanya pa fisuma ifyo Yehova alecita muli uyu mulimo wa kushimikila. (Belengeni Abena Roma 10:13-15.) Pa kuti abantu bakapusuke, bafwile ukutetekela Yehova no kulilila kwi shina lyakwe, lelo pa kuti bacite ifi, kano twabashimikila. Ukwishiba ifi kufwile ukutulenga ukuba abapimpa ukubomba imilimo iisuma no kulashimikila sana imbila nsuma iya Bufumu.
IMIBELE ISUMA ILALENGA ABANTU UKUFWAYA UKWISHIBA LESA
10. Mulandu nshi twingalandila ukuti imibele yesu iisuma ilalenga abantu ukupalama kuli Yehova?
10 Ukuba abacincila mu kushimikila te kwingalenga fye abantu ukupalama kuli Lesa. Icalenga bubili icingalenga abantu ukupalama kuli Lesa, mibele yesu iisuma. Paulo alondolwele umulandu imibele isuma yacindamina ilyo atile: “Tatucita nangu cimo icingapunwisha bambi, pa kuti abantu beba na pa kusangila ifilubo mu mulimo wesu.” (2 Kor. 6:3) Imilandile ne mibele yesu iisuma ilayemfya isambilisho lya kwa Lesa, no kulenga abantu ukufwaya ukulapepa Yehova. (Tito 2:10) Na kuba, tulomfwa uko abantu basambilila icine pa kumona ukuti tulapashanya imibele iisuma iya kwa Kristu.
11. Mulandu nshi tufwile ukutontonkanishisha no kupepela pa fyo imibele yesu ingakuma bambi?
11 Filya fine imibele iisuma ingalenga abantu ukufwaya ukwishiba Lesa, e fyo ne mibele yabipa ingalenga abantu ukukanafwaya ukumfwa ku mbila nsuma. E ico, nampo nga tuli ku ncito, pa ng’anda, nelyo ku sukulu, tatufwile ukulenga abantu ukusanga ifilubo mu mulimo wesu nelyo mu mibele yesu. Nga tulecita imembu ku mufulo fye, ifingafumamo kuti fyabipa. (Heb. 10:26, 27) Ukwishiba ifi kufwile ukutulenga ukutontonkanya sana pa mibele yesu no kupepelapo, tufwile no kulatontonkanya pa fyo imibele yesu ingakuma bambi. Ilyo imibele ya bantu mu calo ileya ilebipilako fye, abantu abafumacumi bafwile ‘ukumona apalekanina uubombela Lesa no ushimubombela.’ (Mal. 3:18) Ca cine, imibele yesu iisuma ilalenga abantu ukubwelela kuli Lesa.
12-14. Bushe ifyo tushipikisha ilyo baletucusha filenga abantu ukulamona shani umulimo wesu uwa kushimikila? Langilileni.
12 Muli kalata Paulo alembeele abena Korinti, alandile pa fintu aculileko pamo nga amacushi, amafya, impumo, e lyo no kupooswa mu fifungo. (Belengeni 2 Abena Korinti 6:4, 5.) Nga twashipikisha ilyo tuli na mafya, kuti twalenga abalemonako ukufwaya ukusambilila icine. Ku ca kumwenako: Imyaka imo iyapita, abantu bamo balefwaya ukulofya Inte sha kwa Yehova mu ncende imo iya mu Angola. Ba Nte babili abaupana e lyo na balesambilila Baibolo 30 balibekete ilyo balelongana. Lyena ababekete balongenye abantu pa kuti batambe uko balelopaula aba bantu ababula umulandu mpaka umulopa walasuuma. Baumiine kumo na bana e lyo na banakashi. Ico bacitiile ifi, kufwaya ukutiinya abantu pa kuti belakutika ku Nte sha kwa Yehova. Lelo pa numa, abengi abaleikala kuli iyi ncende baile kuli ba Nte no kubeba ukuti balebasambilisha Baibolo! Icafuminemo ca kuti umulimo wa kushimikila walitwalilile, abantu abengi balisambilile icine kabili bamunyinefwe balipaalilwe icine cine.
13 Ici cacitike cilelangilila ukuti abantu nga bamona ifyo twashipikisha ilyo baletucusha, kuti bafwaya ukusambilila icine. Ukushipa kwa kwa Petro na batumwa bambi kufwile kwalilengele abantu ukubwelela kuli Lesa. (Imil. 5:17-29) Abo tusambilila nabo, abo tubomba nabo, na balupwa wesu kuti bafwaya ukusambilila icine nga bamona ifyo tutwalilila abashipa ilyo baletucusha.
14 Pa nshita fye iili yonse, bamunyinefwe bamo balabacusha. Ku ca kumwenako, mu Armenia, mupepi na bamunyinefwe 40 balibapoosa mu cifungo pa mulandu wa kukanaitumpa mu fikansa fya calo, kabili abengi bali no kubakaka mu myeshi ileisa. Mu Eritrea, ababomfi ba kwa Yehova 55 balibakaka mu cifungo, bamo pali aba bali ne myaka ukucila pali 60. Mu South Korea, ba Nte mupepi na 700 balibakaka pa mulandu wa fyo basuminamo. Muli ici calo, bamunyinefwe balicula pa myaka 60. Natulepepa ukuti icitetekelo ca bamunyinefwe abo bacusha mu fyalo ifyalekanalekana cilelenga Lesa ukucindikwa no kulenga abantu ukwishiba icine.—Amalu. 76:8-10.
15. Langilileni ifyo ubufumacumi bwingalenga abantu ukufwaya ukusambilila icine.
15 Ukuba abafumacumi nako kuti kwalenga abantu ukusambilila icine. (Belengeni 2 Abena Korinti 6:4, 7.) Ku ca kumwenako, nkashi umo uwaninine muli basi alefwaya ukuti alipile indalama e lyo umunankwe amwebele ukuti elipila pantu aleya fye mupepi. Nkashi alondolwele ukuti afwile ukulipila nangu ca kuti aleya mupepi. Tapakokwele, umunankwe alikiile muli basi. Lyena namutekenya aipwishe nkashi yesu ukuti: “Bushe muli Nte ya kwa Yehova?” Nkashi ayaswike ati, “Ee, ndi Nte, cinshi mwaipushisha?” Namutekenya atile, “Nacumfwa uko mwacilalanshanya pa kulipila kuli basi kabili nalishiba ukuti Inte sha kwa Yehova baba pa bantu fye abanono ababa abafumacumi muli fyonse.” Ilyo papitile imyeshi iinono, umwaume umo alungeme uyu nkashi ilyo bali pa kulongana kabili amwipwishe ukuti, “Bushe namunjishiba? Nine namutekenya wa basi uwalanshenye na imwe pa fya kulipila kuli basi. Ilyo namwene imibele yenu iisuma, napingwilepo ukulasambilila Baibolo ne Nte sha kwa Yehova.” Abantu nga bamona ukuti tuli bafumacumi, balacetekela imbila nsuma tubila.
LYONSE MULEBA NE MIBELE IILENGA LESA UKUCINDIKWA
16. Cinshi cingacitika nga tuli ne mibele pamo nga ukushishimisha, ukutemwa ne cikuuku? Landeni ifyo bashimapepo bacita.
16 Na kabili, kuti twalenga abantu ukupalama kuli Yehova nga tuleshishimisha, tuli ne cikuuku, no kutemwa. Abantu bamo abatumona kuti bafwaya ukusambilila pali Yehova, pa bufwayo bwakwe na pa bantu bakwe. Imibele ya Bena Kristu ba cine ne fyo bacita filalenga Lesa ukucindikwa. Bashimapepo bamo bamoneka kwati baliba ne mibele iisuma, lelo balabepa abantu babo no kubebila indalama. Bamo balabomfya indalama bafumya ku bantu babo ku kushitamo amayanda aya mutengo ne myotoka. Shimapepo umo akuliile imbwa ing’anda no kubikamo mashini ya kutalalika umwela. Abantu abengi abatila basambi ba kwa Kristu tabafwaya ‘ukupeela fye.’ (Mat. 10:8) Lelo, nga filya bashimapepo ba mu Israele abapondweke balecita, “balafwaya ukubalipila ilyo balefunda” kabili ifingi ifyo basambilisha fya bufi. (Mika 3:11) Ubumbimunda bwa musango uyu tabulenga abantu ukubwelela kuli Lesa.
17, 18. (a) Bushe ukuba ne mibele iyo Yehova akwata kulenga shani Lesa ukucindikwa? (b) Cinshi cilenga ukuti mutwalilile ukubomba imilimo isuma?
17 Lelo abantu nga bamona ukuti tulasambilisha icine kabili twaliba ne cikuuku ku bantu, balafwaya ukuba ifibusa fya kwa Lesa. Ku ca kumwenako, ilyo painiya aleshimikila ku ng’anda ne ng’anda, mukamfwilwa umukoloci alikeene ukumushimikila. Atile ilyo munyinefwe akonkonseshe ninshi uyu mukoloci aali pa mutanto mu kicini alebika ikolobo lye laiti. Munyinefwe atile: “Imwe tamulingile ukubomba umulimo wa musango yu, pantu limbi kuti mwaicena.” Lyena munyinefwe alibikile ikolobo kabili e fyo aile. Ilyo umwana wa kwa uyu nakulubantu aumfwile icacitike, alitemenwe sana kabili atendeke ukufwaya uyu munyinefwe pa kuti amutashe. Mu kuya kwa nshita, uyu mwaume alisumine ukusambilila Baibolo.
18 Mulandu nshi mulefwaila ukutwalilila abacincila ukubomba imilimo iisuma? Nalimo mulandu wa kuti mwalishiba ukuti nga tuli abapimpa mu kushimikila no kuba ne mibele isuma, tulacindika Yehova kabili kuti twalenga na bambi ukwisapusuka. (Belengeni 1 Abena Korinti 10:31-33.) Cimbi icilenga ukuti tube abapimpa mu kushimikila no kuba ne mibele isuma ca kuti e nshila tulangilamo ukuti twalitemwa sana Lesa na bantu banensu. (Mat. 22:37-39) Nga tuli abacincila ukubomba imilimo isuma, tukaba ne nsansa pali ino nshita. E lyo kabili, tukalafwaisha ukwisamonako ilyo abantu bonse bakaba abapimpa mu kupepa kwa cine no kulacindika Kabumba wesu, Yehova.
[Ifipusho]
