1, 2. Ka chansi ábanrügüti wibihibei wagía gefentiña luagu Heowá, ani ida liña hasandiragun hungua luagu?

GÍBETIÑA gürigia arihiti keisi aban lubuidun chansi hibihin aban afayeiruahaü luagu somu katei le hadügübei. Kei hénpulu, añahein ibihitiña afayeiruahaü ladüga hídehan lun ñein lan darangilaü hadan bián néchanigu gáganiguatiña. Gama lumoun, wéiritimati chansi le líchugubei Bungiu woun lau lóunahaniwa ayanuha lidan liri lun wíderagun amu gürigia lun habuiduragüdüni hamadagua luma.

² Sun gefentiña luagu Heowá resibi wamuti chansi ábanrügüti le. Resibi wamuti gumadi lúmagiñe Bungiu luma lúmagiñe Kristu lun wariñagun houn gürigia lun harandarun luma Bungiu (2 Ko. 5:20). Yusu lumutiwa Heowá lun hayarafadun gürigia lun, ani ítara liña hasubudiruni saragu míñunu gürigia ha lídangiñetiña lóugiñe 235 ageiraü luma burí aüdü, ani adügaaña aban lubuidun umadaguaü luma ani resibi haméi emenigini luagu aban ibagari magumuchaditi (Titu 2:11). Lau ubebeni le áfuridubei tídangiñe aban anigi harumatu, amisuraha wamutiña sun ha busentiña lun hatun “lídangiñe duna le íchugubei ibagari, mafayeihanga luagu” (Aruf. 22:17). Kei le hínsiñe lubéi wadagimanu espechaliti le woun ani adüga wamuti lau benefaü, gayarati lariñawagún lau ichouruni luagu aranseñu waña lan “lun wadügüni le buídubei” (Titu 2:14). Guentó ariha waméi ida liña lan lídehan ubebeni le lun hayarafadun gürigia lun Heowá. Lidan apurichihani warufudei ubebeni le wasandirubei luagu katei le buídubei.

3. Ka ichouruni líchugubei “lanarime línsiñehabu Suntigabafu” woun?

³ Luagu le lunbei ladügüni lagumadihan Liráü Bungiu, ariñagati Isaíasi 9:7: “Lanarime línsiñehabu Suntigabafu, ligíaba adügei katei le”. Arufuda lumuti dimurei burí le luagu  busenti lan Wáguchi le siélubei lun hesefurun gürigia. Hénpulu lánina ubebeni le líchugubei arufuda lumuti lau ichouruni luagu lunti lan wídehan lau sun wagundan lidan wadagimanu le líchugubei woun lun wapurichihani uganu luáguti Larúeihan. Lanarime ubebeni le wasandirubei lun wíderaguniña gürigia asubudirei Bungiu arufuda lumuti ubebeni le luágubei Heowá. Ligíati, desidírühadün san hadügüni sun hiyaraati lun hapurichihani uganu buiti? (1 Ko. 3:9.)

4. Ka hénpulu líchugubei Hesusu lánina ubebeni luma awanduni lidan lani ministeriu?

⁴ Samina humá giñe luagun Hesusu luma luagun lubuidun hénpulu lánina ubebeni luma awanduni le larufudubei lidan lani ministeriu. Íbini awanda lan aban lanarime éibaahouni, meferidirun lumuti ubebeni le lasandirubei luagu apurichihani darí lumoun lounwen ya ubouagu (Huan 18:36, 37). Le linarün katei, eibu layarafadun lóurate lounwen lidan sákürifisiu, wéiritimati láfaagun lun líderaguniña gürigia asubudirei Heowá.

5. Ka ladügübei Hesusu según hénpulu tánina tídibu igu?

⁵ Múberugu (otoño) lidan irumu 32, yúsuti Hesusu aban hénpulu luagu aban wügüri le ganadüribei aban tídibu igu to barüharu ǘrüwa irumu maginduntu. Dan le lariñagunbei tabureme lun tachugún, aba lariñagun óunigiruti lun lun líchugun dan lun lun líchugun múa luagun tugudina (aliihoualá Lúkasi 13: 6-9). Lidan dan ligía fiúrügügiña meha disipulugu áfuridutiña lídangiñe lapurichihan Hesusu. Gama lumoun, kei larufuduni lidan hénpulu ligía, lidan fiú dan le meha aniheinguabei lubá —kéiburi sisi hati— aba laganwoundagüdüni lapurichihan Hudéa luma Peréa. Fiú weyu lubaragiñe lounwen ayahuahati hawagu huríu ha ‘daruhalibei lau haganbun’ (Mat. 13:15; Luk. 19:41).

6. Ka uagu lunti lubéi waganwoundagüdüni wáfaagun lidan wani ministeriu?

⁶ Kei le yarafaali lubéi lagumuchagüle ubóu, súdiniti lun waganwoundagüdüni áfaaguni le wadügübei lidan apurichihani (aliihoualá Danieli 2:41-45). Wéiriti chansi le wibihibei lun gefentiña wamá luagu Heowá! Lidan sun ubóu wagíarügüñadiwa íchiga emenigini luagu lagumuchaguba lan turóbuli sunsuinagubei. Málügili lariñagun aban íchuguti ñunsu tídangiñe burí bigibigitu o radiu luagu úati lan óunabagülei lun álügüdahani le: “Ka uagu lasusereda katei wuribati houn gürigia buítiña?”. Ru laali Bungiu chansi woun, wagía kristiánugu, lun wanügüni óunabagülei le tídanbei Bíbülia lun álügüdahani le luma burí amu houn sun gürigia ha busenbaña haganbuni. Anihein buiti resun wama lun wagunfuliruni wadagimanu le ‘tau sun wanigi’ (Rom. 12:11). Lau lídehan Bungiu, lídehaba apurichihani le wadügübei lun hasubudiruni saragu gürigia Heowá ani hínsiñe ligíame houn.

7, 8. Ida liña wíchugun uéiriguni lun Heowá lau aranseñu wamá lun wadügün sákürifisiu?

⁷ Kei larufuduni lásügürün apostolu Pábulu, gayarati werederun “marumugunga, áfaga wagía ilamaü” luagu wagunfuliruni wani ministeriu (2 Ko. 6:5). Dimurei burí le arufuda lumuti furangu ka lan mini lubéi sákürifisiu, ani gayarati ladügün lun wasaminarun hawagun prekursorugu ha íchugubalin hani ministeriu lidan furumiñeti lúgaaru ani añahan nadagimein lun hibihini hemegeirun. Samina humá giñe hawagun misioneru, ha ederegeragubaña houngua sunsuinagubei lun heseriwidun houn gürigia ha lídangiñetiña amu ageiraü (Fili. 2:17). Agia wéiyaaña lidan afiñeni ha aniheinbei dan hígiruni heigin o harumugun lun hetenirun houn lánigu Heowá mudún? Añahein giñe íbirigu ha wéiyougaaña o ha sánditiña ha adügübalin sun hayaraati lun houdin adamuridagua luma lun hapurichihani uganu buiti. Ñuluguatu wanigi dan le wasaminarun hawagun sun lubúeingu Bungiu ha arufudubalin sífiri lánina sákürifisiu le. Gániti ligaburi hóuserun efekütu lidan hasaminan amu gürigia luagun wani ministeriu.

⁸ Tidan aban gárada abürühóutu tidoun periodiku Boston Target, lani Lincolnshire (Reino Unido), ariñagati aban aliihati: “Eferidireina hañalin  gürigia hafiñen luagu hani relihión [...]. Ka hadügübei tábutigu Ligilisi sun weyu? Furanguti midin hamá áluahaña gürigia kei meha ladügüni Kristu [...]. Genegeti gefentiñarügüñanu lan luagu Heowá arufuda berese hamá hau gürigia, lugundun furitiña áluahaña ani le linarün katei, ñǘdüntiña apurichihei inarüni”. Lidan ubóu le buínbei hau gürigia ha áluahabalin hagundan guánarügü, rútiwa uéiriguni lun Heowá lau aranseñu wamá lun wadügün sákürifisiu (Rom. 12:1).

9. Kaba ínchahawa lun wasigirun ‘adügei le buídubei’ lidan wani ministeriu?

⁹ Ka gayarabei wadügüni anhein genege lubéi woun weferidiruñein lan ubebeni luagu ministeriu? Buídubei wasaminarun luagun le libihibei Heowá lídangiñe wapurichihan (aliihoualá Rómana 10: 13-15). Mosu hagúaruni gürigia liri Heowá lau afiñeni lun hasalbarun, gama lumoun, úabaña adügüti katei le ánhawa mapurichihan. Gunfuranda wamani katei le lunti línchahaniwa lun wasigirun ‘adügei le buídubei’ luma lun wapurichihani uganu buiti luagu Larúeihan Bungiu lau ubebeni.

10. Ka uagu gayara lubéi wariñagun ídeha lan lubuidun wagaburi lun busén hamá ha aríagubadiwa lun hayarafadun lun Heowá?

¹⁰ Íbini súdini lan wapurichihan lau ubebeni, úati buídurügü lan lun hayarafadun gürigia lun Bungiu. Le libiaman katei le ídehabei lun hayarafadun gürigia lun Bungiu, wagaburi keisi kristiánugu. Afuranguagüda lumuti Pábulu lisudinin katei le dan le labürühanbei: “Míchutiwa lébuna lachugeragun ni aban, merede láamuga wawadigimari wuriba” (2 Ko. 6:3). Ídehati ligaburi wayanuhan luma laruman wagaburi lun wewendedagüdüni larufudahan Bungiu, adügati lun busén hamá ha arihibadiwa lun heseriwidun lun Heowá (Titu 2:10). Ligía sun lubéi oura wíchuguña fe luagu lubuidun resultóu le wibihibei dan le harihini gürigia ha harumabaña anigi lubuidun wagaburi keisi kristiánugu.

11. Ka uagu lunti lubéi wasaminarun lau lídehan furíei luagun efekütu le lánibei ligaburi wóuserun hawagu gürigia ha aríagubadiwa?

¹¹ Íbini gayara lan gani lan lubuidun wagaburi  aban buiti efekütu hawagu amu gürigia, subudi wamuti gayarati lan giñe gani lan luriban wousan aban efekütu wuribati hawagu. Ligíati, lídanñadiwa lan yebe wadagimanu, wábiñe o leskuelarugu, áfaaguatiwa lun madari hamá gürigia charati lidan wani ministeriu o lidan wóuserun. Ánhawa afigouha chulu wau, wuribabei resultóu le lunbei wibihini (Ebü. 10: 26, 27). Lunti líderaguniwa saminaü le lun wasaminarun lau lídehan furíei luagu le wadügübei luma le lariñagubei wabagari wawagu. Eibu arariragüdeina lani ubóu le lilurudun luagu laruman ibagari, furangutimabei harihini gürigia ha harumabaña anigi gürigia le “buídubei lumoun le wuribabei, le áhuduragubei lun Bungiu lumoun le máhuduragunbei lun” (Mal. 3:18). Le linarün katei, súdiniti ligaburi wóuserun lun harandarun gürigia luma Bungiu.

12-14. Ka efekütu lánibei awanduni le warufudubei dan le lóuchawagun wafiñen lidan le hasaminarubei amu gürigia luagu wani ministeriu? Ru humá aban hénpulu.

¹² Tidan aban tídangiñe ligaradan houn kristiánugu korintuna, ariñagati Pábulu súfurihali lan meha lénrengunga, abeichúni, adaürǘni luma éibaahouni (aliihoualá 2 Korintuna 6: 4, 5). Awanduni le warufudubei dan le lóuchawagun wafiñen gayarati línchahaniña ha arihibadiwa lun hánharun lun inarüni. Ru wamá aban hénpulu. Fiú irumu lubaragiñe le, desidírütiña ha kóntürabaña wawagu lun hagumuchun hau gefentiña luagu Heowá lídangiñe aban fulasu Angola. Lun lira, aba hegeyedaguniña bián gefentiña luagu Heowá badiseihaña hama darandi gürigia ha abasiihabaña adamuridagua, ani lárigiñe aba hóundaraguniña sun lílana ageiraü lun harihini habeichuniña gürigia maduruntiña hagía darí lun haseñengüdüniña. Ni würiña hama irahüñü mesefutiña luéi lanarime wuribani ligía, ani adüga hamuti lun hanufudedun gürigia ani lun ua lan ni aban aganbutiña gefentiña luagu Heowá. Gama lumoun, lárigiñebei harihini gürigia katei ligía, gíbetiña lílana ageiraü amuriahatiña aban külase tídangiñeti Bíbülia! Lúmagiñe oura ligía, héretimahali meha lapurichihóun uganu buiti, ani ligía adügübei lun ñein lan saragu awanseruni luma amu burí abinirúni.

¹³ Arufuda lumuti hénpulu le óunwenbu efekütu le gayarabei gani lani ligaburi wóuserun hawagu amu gürigia dan le wasigiruni adundehani le tídanbei Bíbülia. Átiriñanu funa gürigia arandarutiña luma Bungiu luagu ganigi le larufudubei Féduru hama ha híbiri apostolugu! (Adü. 5: 17-29.) Lidan wakesin, dandu wánigu paaná lidan wadagimanu o leskuelarugu o waduheñu gayarati giñe hánharun lun inarüni dan le harihini wóuserun lau irichaü.

¹⁴ Lidan furumiñeguarügü oura añahein wíbirigu éibaahoua. Kéiburi lidan ageiraü le gíribei Armenia, añahein kéiburi 40 íbirigu adaürǘtiña ladüga úaragua hamá lun Bungiu, ani gayarati ñéinbaña lan amu adaürǘtiña lidan burí hati le asigirubei. Eritrea, añahein giñe 55 lubúeingu Heowá adaürǘwa, fiú hádangiñe derebuguhaña kéiburi lóugiñe 60 irumu hau. Corea del Sur añahein giñe kéiburi 700 gefentiña luagu Heowá furisunrugu ladüga hafiñen. Lidan ageiraü le duraali katei le 60 irumu. Amuriaha wamá luma Heowá lun líchugun úaraguni le harufudubei íbirigu ha asufurirubaña lidan saragu ageiraü uéiriguni lun luma lun leseriwidun houn ha hínsiñehabubaña lun irichaü lun houdin luéigiñe lóubadina áhuduraguni le harumabei (Sal. 76:8-10).

15. Ru humá aban hénpulu lun harufuduni adüga lan úaraguni le warufudubei lun hánharun gürigia lun inarüni.

¹⁵ Adügati giñe laruman wagaburi lun hánharun amu gürigia lun inarüni (aliihoualá 2 Korintuna 6: 4, 7). Ariha wamá aban hénpulu. Tíchuguña aban íbiri seinsu tidoun aban máhina lun tagañeihani tupasein lun tádinun tidoun busu dan le tariñagun aban tasubudiragun tun lun tádinun mafayeihanga, lugundun murusunrügübei lan taweiyasuhan. Aba tariñagun íbiri tun gürigia tuguya mosu lan tafayeihan íbini murusunrügübei lan táfayahan. Lárigiñebei tararirun gürigia tuguya tídangiñe ugunei, aba lálügüdünu abugahati íbiri tuguya: “Gefentu san luagu Heowá huguya?”. Aba tariñagun lun: “Anha. Ka uagu hálügüdana?”. Aba lariñagun: “Aganba numuti le hariñagubei tun gürigia tugura, ani subudi numuti haruma lan hagaburi gefentiña luagu Heowá, hádangiñetiña  fiú gürigia ha meyeehanbaña”. Fiú hati lárigiñe, aba layarafadun aban wügüri tun íbiri tuguya lidan adamuridaguni aba lariñagun tun: “Haritagua humagidina san? Au abugahati busu le ayanuhabei huma luagu lafayeihóun paséi. Dan le narihini hóuserun aba desidírü nan naturiahanu Bíbülia hama Gefentiña”. Kei warihini lidan sügǘ le, dan le wasubudirúniwa kei gürigia úaraguatiña adügati lun warihíniwa kei gürigia ha gayarati lafiñerúniwa hawagu.

16. a) Ka uagu chülǘ lubéi igaburi buiti tidoun hanigi gürigia kéiburi gurasu, ínsiñehabuni luma areini? b) Ru humá aban hénpulu luagu le hadügübei tábutigu ligilisi houn hánigu.

¹⁶ Ídehatiwa giñe lun hayarafadun gürigia lun Heowá dan le warufudun igaburi kéiburi gurasu, ínsiñehabuni luma areini. Háfuga haganagua gürigia ha aríagubadiwa añahein lan ha busentiña haganwoundagüdüni hasubudin luagu Heowá, luagu lisuuni luma hawagu lumutuniña. Igaburi le harufudubei kristiánugu inarünitiña mama lúnrügüti harihín kei lílana somu relihión, ani libe-agei dan yusu hamuti lun hayeehan. Añahein fiú tábutigu ligilisi rísihaña lárigi hayeehaniña tílana ligilisi ani gasta hamuti seinsu ligía agañeiha katei tuma burí karü sérutu, ani anihein aban hádangiñe, agañeihati aban tiráüraü muna lau garabali diliti lun lilügün ounli. Le linarün katei, besafu hádangiñe ha ariñagubaña lánigu hamá Kristu mabusenrungubeitiña híchugun ni kata sin haguburahan (Mat. 10:8). Ítara kei fádirigu ha meha lídanbaña binadü Ísüraeli “arufudahatiña [...] luagu seinsu”, ani ligibuagun lira, libe-agei katei le harufudahabei mama tídangiñeti Bíbülia (Mik. 3:11). Lau biángua lan hagibu mídehanti hóuserun lun harandarun gürigia luma Bungiu.

17, 18. a) Ida liña wíchugun uéiriguni lun Heowá dan le wáyeihani ligaburi? b) Ka ínchahabadiwa lun wasigirun adügei le buídubei?

¹⁷ Chülüti giñe arufudahani kristiánu le inarüniti luma lubuidun usa tidoun hanigi gürigia. Dan le lidin aban prekursoru apurichiha muna tuagu muna, aba tabuguni aban weiriou mutu hilaali tani weiriei. Aba tariñagun lun wariñu tiña lan yebe luagu aban kalera lun tasansirun aban bonbiyu gusinarugu dan le ladaünrünbei luagu bena. Aba lariñagun tun: “Peliguruti wadagimanu le hun”. Aba lebelurun aba lasansiruni bonbiyu, aba lidin. Dan le líchugun tisaani gürigia tuguya fe luagu le asuseredubei, aba láfuridun áluahei íbiri ligía lun leteingiruni, ani lau lásügürün dan aba leresibirun aban aturiahani tídangiñe Bíbülia.

¹⁸ Ka uagu desidírühadün lubéi hasigirun adügei le buídubei? Háfuga ladüga subudi humani dan le lan warufudun ubebeni lidan wani ministeriu ani adüga waméi katei kei labusenrun Heowá, rútiwa uéiriguni lun ani íderaguatiwa amu gürigia lun hasalbarun (aliihoualá 1 Korintuna 10:31-33). Ubebeni le warufudubei luagu katei le buídubei lidan wapurichihani uganu buiti ani óusera wagía kei lunti lan lóuserun aban kristiánu, adüga wamuti ladüga busén wamá warufudun ínsiñeni luagu Bungiu luma hawagu gürigia wáledi (Mat. 22:37-39). Anhein warufuda ubebeni ligía, íbini guentó wibihiba ugundani. Ani gayarabei wagurabahan aban dan le ídanbei sun lanme gürigia adügei le buídubei lun híchugun uéiriguni lun Bungiu le Adügübadiwa, Heowá.