1, 2. Unsang talagsaong kadungganan ang nabatonan sa mga Saksi ni Jehova, ug unsay imong pagbati niana?

PARA sa daghan, dako kaayong kadungganan nga makadawat ug award sa ilang talagsaong nalampos. Pananglitan, ang pipila nakadawat ug Nobel Prize tungod sa ilang paningkamot nga mapasig-uli ang kalinaw tali sa magkaaway nga mga nasod. Apan mas labaw pang kadungganan kon ang usa ipadala sa Diyos ingong embahador aron tabangan ang mga tawo nga makabatog malinawong relasyon sa ilang Maglalalang!

² Ingong mga Saksi ni Jehova, kita lang ang nakabaton nianang talagsaong kadungganan. Ingon sa gisugo sa Diyos ug ni Kristo, kita nagtabang sa mga tawo nga ‘mapasig-uli sa Diyos.’ (2 Cor. 5:20) Gigamit kita ni Jehova sa pagkabig sa mga tawo ngadto kaniya. Mao nga diha sa kapin sa 235 ka kayutaan, minilyon ang natabangan nga makabatog maayong relasyon sa Diyos ug makalaom nga mabuhi sa walay kataposan. (Tito 2:11) Kita masibotong nagdapit ‘ni bisan kinsa nga may tinguha sa pag-inom sa tubig sa kinabuhi nga walay bayad.’ (Pin. 22:17) Kay mapabilhon ug makugihon sa maong importanteng buluhaton, kita matawag nga mga tawong “masiboton sa maayong mga buhat.” (Tito 2:14) Atong hisgotan kon sa unsang paagi ang atong pagkamasiboton sa maayong mga buhat makadani sa mga tawo ngadto kang Jehova. Ang usa ka paagi mao ang atong pagsangyaw.

3. Unsay gipasalig kanato sa ‘kasibot ni Jehova’?

³ Maylabot sa malampos sa pagmando sa Anak sa Diyos, ang Isaias 9:7 nag-ingon: “Ang kasibot mismo ni Jehova sa mga panon ang mobuhat niini.” Kining mga pulonga nagpasalig kanato nga ang atong langitnong Amahan nagtinguha gayod sa pagluwas sa katawhan.  Ang kasibot ni Jehova angayng magpalihok kanato nga bug-os mosuportar ug magmasiboton sa buluhatong pagsangyaw nga iyang gisugo. Agig pagsundog sa iyang kasibot, buot natong tabangan ang mga tawo nga makaila kaniya. Busa ingong isigkamagbubuhat sa Diyos, determinado ba kitang makigbahin sa pagmantala sa maayong balita kutob sa atong maarangan?—1 Cor. 3:9.

4. Sa unsang paagi si Jesus nagpakitag ehemplo sa pagpabiling masiboton sa ministeryo?

⁴ Tagda usab ang kasibot ni Jesus. Siya nagpakitag hingpit nga ehemplo sa paglahutay diha sa ministeryo. Bisag grabeng gisupak, siya nagpabiling masiboton hangtod sa kamatayon. (Juan 18:36, 37) Samtang nagkaduol ang iyang kamatayon, mas nagmakugihon si Jesus sa pagtabang sa uban nga makaila kang Jehova.

5. Sa unsang paagi susama si Jesus sa tig-atiman sa parasan sa ilustrasyon sa kahoyng igos?

⁵ Pananglitan sa tinghunlak sa 32 C.E., si Jesus naghatag ug ilustrasyon bahin sa tawong may kahoyng igos sa iyang parasan nga wala mamunga sulod sa tulo ka tuig. Ang maong tawo nagsugo sa tig-atiman sa parasan nga putlon ang kahoy, apan ang tig-atiman mihangyog dugang panahon aron abonohan ang kahoy. (Basaha ang Lucas 13:6-9.) Niadtong panahona, pipila pa lang ang nahimong tinun-an ni Jesus. Apan sama sa tig-atiman sa parasan, gigamit ni Jesus ang nahibiling mubong panahon—mga unom ka bulan—aron mas magmasiboton sa pagsangyaw sa Judea ug Perea. Pipila ka adlaw una namatay, si Jesus mihilak kay kadaghanan sa mga Hudiyo ‘wala mosanong’ sa iyang mensahe.—Mat. 13:15; Luc. 19:41.

6. Nganong angay kitang mas magmasiboton sa ministeryo?

⁶ Kay duol na kaayo ang kataposan, dili ba angay nga mas magmasiboton kita sa pagsangyaw? (Basaha ang Daniel 2:41-45.) Pagkatalagsaong pribilehiyo nga mahimong Saksi ni Jehova! Kita lang ang nagsangyaw sa tinuod nga solusyon sa mga problema sa katawhan. Dili pa dugay, usa ka kolumnista sa mantalaan ang miingon nga imposibleng matubag ang pangutanang, “Nganong mag-antos man bisan ang maayong mga tawo?” Ingong Kristohanon, obligasyon ug pribilehiyo natong ipaambit ang tubag sa Bibliya sa mga pangutana nga sama niana ngadto sa tanang maminaw. Busa angay gayod kitang “magmainiton sa espiritu” sa pagtuman sa gisugo sa Diyos. (Roma 12:11) Panalanginan ni Jehova ang atong buluhaton, ug kita makatabang sa uban nga makaila ug mahigugma kaniya.

7, 8. Sa unsang paagi ang atong pagsakripisyo magpasidungog kang Jehova?

⁷ Sama kang Pablo, makasinati kitag mga kalisdanan sa atong ministeryo, sama sa “mga gabiing walay tulog” ug “mga panahong walay pagkaon.” (2 Cor. 6:5) Kining mga pulonga nagpasabot ug pagsakripisyo. Kanay gipakita sa mga payunir nga nag-una sa ilang ministeryo samtang nanginabuhi aron matagan-an ang ilang panginahanglan. Tagda usab ang masibotong mga misyonaryo nga ‘nagbubo sa ilang kaugalingon nga samag halad-nga-ilimnon’ aron mag-alagad sa langyawng kayutaan. (Filip. 2:17) Ug dili ba ang atong makugihong mga ansiyano magutman o mapulaw usahay tungod sa pag-atiman sa kongregasyon? Ang atong edaran ug masakitong mga igsoon usab naningkamot sa pagtambong sa tigom ug sa pagpakigbahin sa kanataran. Makapadasig gayod dihang atong palandongon ang ilang pagsakripisyo. Ang maong mga paningkamot nakahatag ug maayong impresyon sa mga tawo bahin sa atong ministeryo.

⁸ Usa ka dili Saksi misulat ngadto sa  mantalaang Boston Target sa United Kingdom: “Ang mga tawo nawad-an nag interes sa mga relihiyon . . . Unsa may ginahimo tibuok adlaw niining mga ministro sa simbahan? Wala sila moadto sa mga tawo sama sa gihimo ni Kristo . . . Morag mga Saksi ni Jehova lang ang nagpakitag kahangawa, nga nangadto sa mga tawo ug nagsangyaw sa kamatuoran.” Niining kalibotana diin ang kadaghanan naghunahuna ra sa kaugalingon, ang atong mga pagsakripisyo nagpasidungog gayod kang Jehova nga Diyos.—Roma 12:1.

9. Unsay makadasig kanato sa pagpabiling masiboton sa maayong mga buhat diha sa ministeryo?

⁹ Apan unsay angay natong himoon kon morag nagkawala ang atong kasibot sa ministeryo? Makatabang ang pagpamalandong sa nalampos ni Jehova pinaagi sa buluhatong pagsangyaw. (Basaha ang Roma 10:13-15.) Aron maluwas ang mga tawo, kinahanglang motuo sila kang Jehova ug motawag sa iyang ngalan. Maposible lang kana kon ato silang sangyawan. Kini angayng magpalihok kanato sa pagpabiling masiboton sa maayong mga buhat ug magmakugihon sa pagmantala sa maayong balita sa Gingharian.

10. Sa unsang paagi ang atong maayong panggawi makadani sa mga tawo ngadto kang Jehova?

¹⁰ Ang atong kasibot sa ministeryo dili igo aron makabig ang mga tawo ngadto sa Diyos. Ang laing paagi mao ang Kristohanong panggawi. Gipasiugda ni Pablo ang kahinungdanon niini dihang siya misulat: “Wala gayod kami maghatag ug bisan unsa nga hinungdan sa pagkapandol, aron nga ang among ministeryo dili kakitaan ug sayop.” (2 Cor. 6:3) Ang atong hinlong sinultihan ug maayong panggawi makadani sa mga tawo sa pagsimba kang Jehova. (Tito 2:10) Gani, ang mga tawo sagad modawat sa kamatuoran dihang ilang mamatikdan nga kita nagsundog kang Kristo.

11. Nganong angay nga mainampoong palandongon ang mga epekto sa atong panggawi?

 ¹¹ Maingon nga ang atong maayong panggawi makadani sa mga tawo sa kamatuoran, ang atong dili maayong panggawi posible usab nga makawala sa ilang interes. Busa diha man sa trabahoan, balay, o sa eskuylahan, maningkamot kitang dili masawayan sa uban ang atong ministeryo ug panggawi. Kon kita tinuyong magpakasala, mawala kanato ang atong relasyon kang Jehova hangtod sa hangtod. (Heb. 10:26, 27) Kini magpalihok kanato nga mainampoong palandongon ang atong panggawi ug kon unsay epekto niini sa uban. Samtang nagkaubos ang moral nga sukdanan sa kalibotan, mas makita sa sinserong mga tawo ang “kalainan . . . tali sa usa nga nagaalagad sa Diyos ug sa usa nga wala mag-alagad kaniya.” (Mal. 3:18) Oo, importante kaayo ang atong maayong panggawi sa pagpasig-uli sa mga tawo ngadto sa Diyos.

12-14. Sa unsang paagi ang atong pagkamalahutayon sa mga pagsulay makapausab sa panglantaw sa mga tawo sa atong ministeryo? Paghatag ug pananglitan.

¹² Sa iyang sulat sa mga taga-Corinto, si Pablo miingon nga nakasinati siyag mga kasakitan, kalisdanan, pagbunal, ug pagbilanggo. (Basaha ang 2 Corinto 6:4, 5.) Kon makasinati kitag mga pagsulay, ang atong pagkamalahutayon magtukmod sa mga tawo sa pagdawat sa kamatuoran. Pananglitan sa miaging mga tuig, gisulayan sa mga maglulutos nga mawala ang mga Saksi ni Jehova sa usa ka dapit sa Angola. Ilang gilatigo ang duha ka Saksi ug ang 30 ka interesado nga nanambong sa tigom hangtod nga nagkadugo. Gani, gilatigo pod nila ang mga babaye ug bata. Gihimo nila kini sa publiko aron ang mga tawo mahadlok nang maminaw sa mga Saksi. Apan human sa nahitabo, daghan hinuon ang miduol sa mga Saksi ug mihangyog pagtuon sa Bibliya! Ingong resulta, nagpadayon ang pagsangyaw sa Gingharian, mas daghan ang midawat sa kamatuoran, ug gipanalanginan ang mga igsoon.

¹³ Gipakita niini nga kasinatian nga kon kita mobarog sa mga pagsulay, ang mga tawo lagmit modawat sa kamatuoran. Tingali mahanduraw nato nga daghan ang napasig-uli ngadto sa Diyos tungod sa maisogong pagbarog ni Pedro ug sa ubang apostoles. (Buh. 5:17-29) Kon mobarog usab kita, ang atong mga eskolmet, katrabaho, o mga membro sa pamilya posibleng modawat sa kamatuoran.

¹⁴ Sukad pa kaniadto, duna kitay mga igsoon nga gilutos. Pananglitan, mga 40 ka brader sa Armenia gipriso tungod sa isyu sa neyutralidad, ug lagmit daghan pa ang mapriso sa umaabot nga mga bulan. Sa Eritrea, 55 ka alagad ni Jehova ang gipriso, ug pipila kanila kapin na sa 60 anyos. Sa South Korea, mga 700 ka Saksi ang napriso tungod sa ilang pagtuo. Sulod sa 60 ka tuig, ang atong mga igsoon didto gipangpriso. Iampo nato nga ang pagkamatinumanon sa atong mga igsoon nga gilutos diha sa lainlaing nasod maghatag ug himaya sa Diyos ug magdasig sa uban nga mobarog dapig sa matuod nga pagsimba.—Sal. 76:8-10.

15. Paghatag ug pananglitan kon sa unsang paagi ang atong pagkamatinud-anon makadani sa mga tawo sa kamatuoran.

¹⁵ Ang atong pagkamatinud-anon makadani usab sa mga tawo sa kamatuoran. (Basaha ang 2 Corinto 6:4, 7.) Tagda kini nga kasinatian: Usa ka sister ang naghulog ug kuwarta sa ticket machine sa bus. Pero giingnan siya sa iyang amiga nga dili na kinahanglang moplete kay duol ra kaayo ang iyang naogan. Ang sister miingon nga husto rang moplete siya bisag unsa pa ka duol. Human manaog ang iyang amiga, ang drayber sa bus nangutana, “Saksi ni Jehova ka?” “Oo,” mitubag ang sister. “Ngano man?” “Nadunggan nako ang inyong panag-estorya bahin sa pagbayad ug tiket, ug nahibalo ko nga kamong mga Saksi ni Jehova lakip  sa pipila lang nga moplete gyod ug matinud-anon sa tanang butang.” Pipila ka bulan sa ulahi diha sa tigom, usa ka lalaki ang miduol sa sister ug miingon, “Nahinumdom ka nako? Ako tong drayber sa bus nga imong naestorya bahin sa pagbayad ug tiket. Tungod sa imong panggawi, nadasig kong magtuon sa Bibliya uban sa mga Saksi ni Jehova.” Oo, dihang makita sa mga tawo ang atong pagkamatinud-anon, sila madani sa kamatuoran.

16. Unsay resulta kon magpakita kitag hataas nga pailob, gugma, ug kalulot? Ug unsay gibuhat sa bakak nga relihiyosong mga lider?

¹⁶ Dihang kita magpakitag mga hiyas sama sa hataas nga pailob, gugma, ug kalulot, mahimong madani nato ang mga tawo sa pagkat-on bahin kang Jehova, sa iyang katuyoan, ug sa iyang katawhan. Kita lahi kaayo sa ubang relihiyosong mga lider nga nagpakaaron-ingnong diyosnon apan salingkapaw diay. Gani ang pipila kanila nangadato kay ilang gilimbongan ang ilang mga membro ug gigamit ang kuwarta sa pagpalit ug mahalong mga balay, sakyanan, ug de-aircon pa gani nga balay sa iro. Sa pagkatinuod, daghang nag-angkong sumusunod ni Kristo dili gustong moserbisyo nga walay bayad. (Mat. 10:8) Sila sama sa daotang mga saserdote sa karaang Israel nga “nagtudlo tungod lamang sa suhol,” ug kadaghanan sa ilang gitudlo dili Kasulatanhon. (Miq. 3:11) Ang maong pagkasalingkapaw dili makapasig-uli sa mga tawo ngadto sa Diyos.

17, 18. (a) Dihang atong sundogon ang mga hiyas ni Jehova, sa unsang paagi kini makapasidungog kaniya? (b) Nganong buot nimong magmasiboton kanunay sa maayong mga buhat?

¹⁷ Sa laing bahin, ang kasingkasing sa mga tawo matandog pinaagi sa kamatuoran nga atong gipaambit ug sa atong maayong mga buhat. Pananglitan, samtang namalaybalay ang brader nga payunir, gibalibaran dayon siya sa usa ka edarang biyuda. Miingon ang biyuda nga dihang nag-doorbell ang brader, tua siya sa kosina ug nagtungtong sa hagdan aron mag-ilis ug bombilya. Miingon ang brader, “Peligro baya kon ikaw ray mohimo ana.” Dayon giilisan sa brader ang bombilya ug mibiya. Dihang nasayran kini sa anak nga lalaki sa biyuda, nakadayeg siya ug gipangita ang brader aron pasalamatan. Sa ulahi, ang maong anak midawat ug pagtuon sa Bibliya.

¹⁸ Nganong determinado kang magmasiboton kanunay sa maayong mga buhat? Tingali kay nasayod ka nga ang pagpakitag kasibot sa ministeryo ug maayong panggawi makapasidungog kang Jehova ug makatabang sa uban nga maluwas. (Basaha ang 1 Corinto 10:31-33.) Dugang pa, buot usab natong ipakita ang atong dakong gugma sa Diyos ug sa mga tawo. (Mat. 22:37-39) Kon ato kanang himoon, kita magmalipayon ug magmatagbawon karon. Makalaom usab kita sa umaabot dihang ang tanang tawo magmasiboton sa matuod nga pagsimba ug magpasidungog sa atong Maglalalang, si Jehova.