Eski ou “zele pour fer dibyen”?

“Zezi-Kri, . . . i’n donn son prop lavi pour nou, pour . . . pirifye nou konman en pep ki apartenir a li, en pep zele pour fer dibyen.”​—TIT 2:13, 14.

KI OU POU DIR?

Akoz ou konsider li en loner pour zele pour fer dibyen?

Ki mannyer Danyel 2:41-45 i ed nou konpran lenportans pour devoue dan minister?

Eksplike ki mannyer kondwit Kretyen i atir lezot ver vre ladorasyon ek Zeova.

1, 2. Ki loner spesyal Temwen Zeova i annan e ki mannyer ou santi anver sa loner?

BOKOU dimoun i konsider li konman en loner pour ganny en pri akoz zot lareisit. Par egzanp, serten in ganny Pri Nobel akoz zot ti fer tou pour etablir lape ant bann nasyon ouswa parti politik ki pe lager antre zot. Me, ki pli gran loner i annan ankor ki ganny anvoye par Bondye konman bann anbasader ouswa reprezantan pour ed bann dimoun annan en relasyon anpe avek zot Kreater!

² Konman Temwen Zeova, nou annan sa loner spesyal. Anba konmann Bondye ek Kris, nou sipliy bann dimoun pour “les zot ganny rekonsilye avek Bondye.” (2 Kor. 5:20) Zeova pe servi nou pour atir dimoun ver li. Koumsa menm ki plizyer milyon dimoun dan plis ki 235 pei in arive ganny led pour annan en bon relasyon avek Bondye e annan sa lespwar pour ganny lavi eternel. (Tit 2:11) Avek devouman senser, nou envit “sa ki anvi, [pour] pran delo lavi gratwitman.” (Rev. 22:17) Lefet ki nou kontan nou responsabilite e fer li plennman, nou sirman kapab ganny dekrir konman en pep ki “zele pour fer dibyen.” (Tit 2:14) Aprezan annou vwar ki mannyer nou devouman pour fer sa ki byen i kapab atir lezot ver Zeova. En fason i atraver predikasyon.

IMIT DEVOUMAN ZEOVA EK ZEZI

3. Ki lasirans nou gannyen atraver ‘devouman Zeova’?

³ Pour dekrir sa ki dominasyon Garson Bondye pou akonplir, Izai 9:7 i dir: “Se avek devouman ki Zeova bann larme pou fer sa.” Sa parol i montre ki nou Papa ki dan lesyel i enterese avek delivrans bann imen. Legzanp devouman Zeova i montre klerman ki sa travay ki nou’n gannyen avek li konman bann proklanmater i devret ganny fer avek tou nou leker e avek  devouman. Sa gran dezir ki nou annan pour ed lezot konn Bondye i en fason pour reflekte devouman Zeova. Alor, konman bann ki travay ansanm avek Bondye, eski nou determinen personnelman dapre nou sirkonstans pour partisip plennman dan sa travay pour proklanm sa bon nouvel?​—1 Kor. 3:9.

4. Dan ki fason Zezi in kit en legzanp perseverans ek devouman dan predikasyon?

⁴ Egzamin osi devouman Zezi. I’n kit en legzanp parfe an rapor avek perseverans ek devouman dan minister. Malgre bann gran lopozisyon, i ti gard son devouman dan predikasyon ziska lafen son lavi lo later. (Zan 18:36, 37) Determinasyon Zezi pour ed lezot konn Zeova ti vin pli for anmezir letan ti pe aprose pour li ofer son lekor konman en sakrifis.

5. Ki mannyer Zezi ti azir an armoni avek son legzanp konsernan pye fig?

⁵ Par egzanp, pandan lotonn lannen 32 N.L., Zezi ti donn legzanp konsernan en zonm ki ti annan en pye fig dan son plantasyon rezen ki pa ti raport okenn fri pour trwa-z-an. Apre ki i ti’n ganny demande pour koup sa pye fig, son zardinyen ti demann li en pe letan pour met fimyen avek sa pye. (Lir Lik 13:6-9.) Sa letan, zis en ptigin disip ki ti kapab ganny konte konman bann fri predikasyon Zezi. Me parey i ganny endike dan sa legzanp lo sa zardinyen, Zezi ti servi sa apepre sis mwan ki ti reste li pour entansifye son minister Zide ek Pere. Detrwa zour avan son lanmor, Zezi ti pler pour son bann konpatriyot ki ti “bous zot zorey.”​—Mat. 13:15; Lik 19:41.

6. Akoz nou devret fer plis dan predikasyon?

⁶ Vi ki nou pe viv dan sa letan ki pli pros avek lafen, eski pa i enportan pour nou fer plis zefor dan predikasyon? (Lir Danyel 2:41-45. *) Pa i en gran privilez ki nou Temwen Zeova! Nou sa sel group dimoun dan lemonn ki pe donn lespwar limanite konsernan solisyon zot problenm. Dan en zournal, en zournalis ti dir ki napa larepons pour sa kestyon, “Akoz move keksoz i ariv avek bann bon dimoun?” I nou devwar ek privilez konman Kretyen pour donn dimoun ki pare pour ekoute larepons Labib pour bann kestyon parey. Nou annan tou rezon pour les nou ganny “pouse par lespri” anmezir nou akonplir nou travay ki Bondye in donn nou. (Rom. 12:11) Avek benediksyon Bondye, ler nou pres avek devouman, nou kapab ed lezot pour konn e kontan Zeova.

EN LETA LESPRI SAKRIFIS I ONOR ZEOVA

7, 8. Ki mannyer en leta lespri sakrifis i onor Zeova?

⁷ Parey legzanp zapot Pol i montre, dan nou minister nou kapab “mank sonmey, e mank manze.” (2 Kor. 6:5) Sa de lekspresyon i donn nou en lide ki savedir viv en lavi sakrifis e i fer nou mazin bann pionye ki predikasyon i premye plas dan zot lavi e ki an menm tan zot bezwen siport zot lekor finansyerman. Mazin osi bann misyonner devoue ki donn zot lekor konman en sakrifis  pour servi dan bann pei etranze. (Fili. 2:17, NW) Ki nou pou dir konsernan nou bann ansyen ki travay dir e ki pa manze ouswa mank sonmey pour pran swen avek troupo Zeova? I osi annan bann aze ek sa bann ki lasante pa tro bon ki fer zot mye pour asiste renyon e partisip dan predikasyon. Nou leker i ranpli avek lapresyasyon kan nou mazin tou bann serviter Zeova ki annan en leta lespri sakrifis. Bann zefor koumsa i annan lefe lo lafason ki lezot i vwar nou minister.

⁸ Dan en let pour Lincolnshire Boston Target, Langleter, en lekter ki pa Temwen ti dir: “Dimoun pe perdi konfyans dan larelizyon . . . Ki sa bann pret legliz i fer lazournen antye? I pa konmsi zot sorti kot zot parey Zezi e al zwenn dimoun . . . Sel larelizyon ki paret enterese se Temwen Zeova, zot sorti se zot e al zwenn dimoun e zot senserman pres laverite.” Dan sa lemonn kot dimoun i enterese zis avek zot prop lekor, nou leta lespri sakrifis i ede onor Zeova nou Bondye.​—Rom. 12:1.

9. Kwa ki kapab motiv nou pour reste zele pour fer dibyen dan predikasyon?

⁹ Me, ki nou kapab fer si nou paret pe perdi nou devouman pour nou minister? I pou byen si nou reflesir lo sa ki Zeova pe akonplir atraver predikasyon. (Lir Romen 10:13-15.) Pour en dimoun ganny delivre fodre i pe kriy o non Zeova avek lafwa, me dimoun pa pou kapab fer sa si nou pa pres avek zot. Ler nou konpran sa, sa pou motiv nou pour reste zele pour fer dibyen e pour proklanm sa bon nouvel lo Rwayonm plennman.

BON KONDWIT I ATIR DIMOUN VER BONDYE

10. Akoz i kapab ganny dir ki nou bon kondwit i atir dimoun ver Zeova?

¹⁰ Menm si devouman i enportan dan minister, zis devouman tousel pa ase pour atir lezot ver Bondye. Dezyenm laspe enportan pour pres avek devouman pour atir dimoun ver Bondye se nou kondwit konman Kretyen. Pol ti met lanfaz lo lenportans nou  kondwit kan i ti ekrir: “Nou pa oule plas okenn lobstak devan personn, pour ki nou servis pour Bondye pa ganny blanmen.” (2 Kor. 6:3) Nou parol ankourazan e bon kondwit i kapab fer lansennyman Labib pli atiran, i atir lezot ver ladorasyon Zeova. (Tit 2:10) Anfet, souvan nou antann bann bon rezilta kot bann dimoun senser in obzerv nou kondwit Kretyen.

11. Akoz atraver lapriyer nou devret egzamin lefe nou kondwit?

¹¹ Menm si nou rekonnet ki nou aksyon i kapab annan en bon lefe lo lezot, lekontrer osi i posib. Alor, ki swa nou kot travay, kot lakour ouswa kot lekol, nou pa oule ki personn i trouv okenn defo avek nou minister ek nou kondwit. Si nou fer pese volonterman, son konsekans i kapab fatal. (Ebr. 10:26, 27) Atraver lapriyer, egzamin sa ki nou pe fer e lefe ki nou fason viv i annan lo lezot. Anmezir standar moral sa lemonn i kontinyen deteryore, bann dimoun senser pou sirman “vwar ladiferans . . . ant enn ki pe servi Bondye ek enn ki pa’n servi li.” (Mal. 3:18) Wi, nou bon kondwit i zwe en rol enportan pour rekonsilye bann dimoun avek Bondye.

12-14. Ki mannyer lafason ki nou fer fas avek leprev i annan lefe lo lafason ki lezot i vwar nou minister? Donn legzanp.

¹² Ler i ti ekrir bann Korentyen, Pol ti montre zot ki i ti’n eksperyans soufrans, difikilte, ganny bate e met dan prizon. (Lir 2 Korentyen 6:4, 5.) Kan nou eksperyans bann leprev ki teste nou lafwa, nou landirans i kapab ed lezot aksepte laverite. Pour donn en legzanp: En pe letan pase, i ti annan en zefor ki ti pe ganny fer pour elimin Temwen Zeova dan en rezyon Angola. De Temwen ek 30 dimoun ki ti enterese e ki ti pe asiste renyon ti ganny rasanble ansanm. Bann zabitan sa landrwa ti ganny rasanble pour gete anmezir bann opozan ti bat sa bann inosan ziska zot ti sennyen. Menm bann madanm ek zanfan osi ti sibir sa kriyote. Sa bann dimoun ti fer sa pour ki personn pa ekout Temwen Zeova. Me zis mazin sa, apre sa bate an piblik, en kantite dimoun dan sa kominote ti apros bann Temwen e demann zot en letid Labib! Depi sa, sa bon nouvel in kontinyen propaze, i annan en kantite ogmantasyon ek bokou benediksyon.

¹³ Sa legzanp i montre lefe ki nou pozisyon ferm pour defann bann prensip Labib i kapab annan lo lezot. Petet nou kapab pe mazinen konbyen dimoun ki ti rekonsilye avek Bondye akoz kouraz zapot Pyer ek lezot zapot. (Akt 5:17-29) Dan nou ka, nou bann kanmarad lekol, koleg travay ouswa nou manm fanmir i kapab aksepte laverite kan zot vwar sa pozisyon ferm ki nou pran pour sa ki drwat.

¹⁴ La konmela, serten nou bann frer pe eksperyans persekisyon. Par egzanp, Larmeni, apepre 40 frer i dan prizon akoz zot pa pran okenn kote politik, e plizyer douzenn lezot i riske ganny anprizonnen dan bann mwan ki pe vini. Leritre, 55 serviter Zeova i dan prizon, serten i plis ki 60 an. Sid Kore, apepre 700 Temwen i dan prizon akoz zot lafwa. I fer pros 60 an depi ki sityasyon i koumsa laba. Annou priye ki fidelite sa bann frer ki pe ganny persekite dan plizyer pei i rann glwar Bondye e ed sa bann ki kontan ladrwatir pour pran pozisyon pour vre ladorasyon.​—Ps. 76:8-10.

15. Donn legzanp pour montre ki mannyer lonnekte i kapab atir dimoun ver laverite.

¹⁵ Lefet ki nou viv en lavi onnet osi i kapab atir dimoun ver laverite. (Lir 2 Korentyen 6:4, 7.) Par egzanp, get sa leksperyans: En ser ti pe met larzan dan en masin ki donn tiket bis kan en dimoun ki i ti konnen ti dir li ki i pa vo lapenn pey sa tiket akoz i pa ti pe al tro lwen. Sa ser ti eksplike ki i ti byen pour li pey tiket, menm si i ti pe zis al aret prosen bèstop. Apre sa, son  zanmi ti debarke. Ler i ti vwar sa, sa drayver ti vire e demann li, “Ou en Temwen Zeova ou?” Sa ser ti dir, “Wi, me akoz ou demann sa?” Drayver ti dir: “Mon’n tann ou konversasyon konsernan pey tiket e mon konnen ki Temwen Zeova i parmi sa ptigin dimoun ki fer sa e ki onnet dan tou keksoz.” Detrwa mwan pli tar, en zonm ti apros sa ser kot lasal e dir, “Ou rapel mwan? Mwan menm sa drayver bis ki ti koz avek ou konsernan pey tiket. Apre ki mon ti’n obzerv ou kondwit, mon ti deside konmans etidye Labib avek Temwen Zeova.” Nou repitasyon konman bann dimoun onnet i onor nou konman bann evanzelizater ki diny konfyans.

TOUZOUR DEMONTRE BANN KALITE KI ONOR BONDYE

16. Akoz bann kalite parey pasyans, lanmour ek labonte i tous leker lezot? Donn legzanp.

¹⁶ Nou osi zwe en rol pour atir dimoun ver Zeova kan nou demontre bann kalite parey pasyans, lanmour ek labonte. Serten ki’n obzerv nou i kapab annan sa dezir pour aprann konn Zeova, son plan ek son pep. Latitid ek kondwit bann vre Kretyen i diferan avek sa bann ki pretann zot servi Bondye an deor, me anndan, zot pe zis azir konman bann ipokrit. Serten sef relizye in vin ris akoz zot in anbet, servi larzan bann parwasyen pour aste bann lakaz ser ek loto e dan en ka, i ti menm annan enn ki ti aste en lakaz lisyen ki ti annan erkonn ladan. Sirman, bokou ki pretann ki zot disip Kris napa okenn lanvi pour ‘donn pour nanryen.’ (Mat. 10:8) Plito, parey bann pret egois dan letan lontan Izrael, zot “ansennyen zis pour en pri” e lamazorite sa ki zot ansennyen pa baze lo Labib. (Mik. 3:11) Sa bann aksyon ipokrit i pa rekonsilye personn avek Bondye.

17, 18. (a) Dan ki fason Zeova i ganny onore par nou bon aksyon? (b) Kwa ki motiv ou pour zele pour fer dibyen?

¹⁷ De lot kote, bann vre lansennyman Kretyen ek bann bon aksyon anver nou prosen i tous leker. Par egzanp, en fwa ler i ti pe pres portanport, en frer pionye ti ganny pouse par en vev aze. I ti dir ki ler sa frer ti’n pez son sonnet, i ti lo en lesel dan lakwizin pe esey ranplas en glob. Sa frer ti dir: “I danzere pour ou fer sa ou tousel.” Sa pionye ti apre sa sanz sa glob e kontiny son semen. Kan garson sa madanm ti tann sa ki ti’n arive, i ti sitan enpresyonnen ki i ti al rod sa frer pour demontre son lapresyasyon. Avek letan, sa garson ti aksepte en letid Labib.

¹⁸ Akoz ou determinen pour kontinyen fer dibyen? Petet akoz ou konnen ki ler nou devoue dan nou minister e viv an armoni avek lavolonte Bondye, nou onor Zeova e sa i kapab ed lezot pour ganny delivre. (Lir 1 Korentyen 10:31-33.) Lanmour pour Bondye e pour nou prosen ki pous nou pour annan devouman pour fer sa ki byen, pour pres sa bon nouvel e konport nou konman bann vre Kretyen. (Mat. 22:37-39) Si nou zele pour fer dibyen, nou pou ganny bokou lazwa ek satisfaksyon depi la konmela. Deplis, nou kapab esper avek enpasyans sa zour kan tou limanite pou demontre devouman pour vre ladorasyon par onor Zeova, nou Kreater.

[Not anba lo paz]

[Kestyon]

[Portre lo paz 8]

[Portre lo paz 10]

Ou prezans dan predikasyon i ase pour donn en bon temwannyaz

[Portre lo paz 12]

Lezot i remark ou lonnekte ek travay dir