1, 2. ¿Kasa nüneekaka apüla Jeʼwaa na aküjüliikana pütchi? ¿Jamüsü paaʼin sutuma tia?

KOJUTSÜ maʼin namüin na wayuukana saapünüle namüin wanee kasa saaʼu tü naainjakat. Nüinküle wanee wayuu anajiraain nutuma tü wayuukalüirua, talatsü maʼin naaʼin sutuma otta kojutsü maʼin nümüin tü naaʼinrakat. Akatsaʼa kojutuleʼeinya wamüin nuluwataain waya Maleiwa sünainmüin tü wayuukalüirua süpüla anajiraainjatüin shia nümaa.

² Aapünüsü wamüin wayakana aküjüliikana pütchi aʼyatawaakat tia. Nuluwataain waya Maleiwa nümaa Kürisüto sünain emeʼejaa naaʼin na wayuukana süpüla anajiraainjanain naya nümaa Maleiwa (2 Cor. 5:20). Nüneeküin waya Jeʼwaa süpüla keeʼireeinjatüin saaʼin tü wayuukalüirua shiʼraajüin nia. Makalaka eein wainma wayuu suluʼu 235 mma aleewaka nümaa Jeʼwaa otta aʼatapaka kataa oʼuu waneepia (Tito 2:11). Sükajee keeʼireein waaʼin waaʼinrüin kasa anasü, wamüshii na wayuukana: «Na eekana naseein, nasa masaloui tü wüin katakat atuma soʼu wayuu» (Alat. Map. 22:17, NM). Sükajee kojutüin wamüin tia aʼyatawaakat otta waainjüin shia süka süpüshuaʼa waaʼin, shiimainjaʼaya suluʼuin waya wanee «pueulo keeʼireeka aaʼin aaʼinraa kasa anasü» (Tito 2:14, NM). Wekirajaa sünain jamüin sürütkaaka wayuu nünainmüin Maleiwa sutuma keeʼireein waaʼin waaʼinrüin kasa anasü. Tü palajatkat kasa weeʼiyataka anain keeʼireein waaʼin waaʼinrüin kasa anasü shia sünain tü aküjaakat pütchi.

3. ¿Kasa shiiʼiyataka tü keeʼireekat naaʼin Jeʼwaa süpüleerua tü wayuukalüirua?

³ Naashin Isaías niainjachi kajapuluʼuka Jesuu Nuluwataaya Maleiwa otta nükaaliinjeena na wayuukana. Naainjüinjatü tia «süka keeʼireein shia naaʼin Jeʼwaa»  (Is. 9:7, NM). Keeʼireesü maʼin naaʼin Maleiwa suʼttaainjatüin tü wayuukalüirua. Süka shiain maʼin keeʼireein naaʼin Jeʼwaa tia süpüleerua tü wayuukalüirua, aküjüinjana maʼin waya pütchi süka süpüshuaʼa waaʼin. ¿Aküjüshi pia pütchi süka süpüshuaʼa paaʼin jaʼitairü kasain alatüin pümüin? (1 Cor. 3:⁠9.)

4. ¿Jamüsü naaʼin Jesuu sünainmüin tü aküjaakat pütchi?

⁴ Jülüja paaʼin nukuwaʼipa Jesuu, keeʼireesü maʼin naaʼin aküjaa pütchi jaʼitairü kasain alatüin nümüin. Mayaainjeʼe müliain nia atumawaa nnojoishi ooʼulaain suulia aküjaa pütchi (Juan 18:36, 37). Sülüʼülaapa nükalia süpüla nuʼutünüin aaʼin, nüchajaain maʼin sukuwaʼipa süpüla niʼraajünüinjachin Jeʼwaa sutuma tü wayuukalüirua.

5. ¿Kasa naainjaka Jesuu süka sülüʼülaain nükalia süpüla nuʼutünüinjachin aaʼin?

⁵ Soʼu juyaka 32 soʼu wakalia, aashajaashi Jesuu süchiki wanee higuera apünajünaka suluʼu niyüüjase wanee wayuu. Alatsü apünüin juya sümaa machoin shia. Nuluwataaka chi wayuukai süpüla süshottünüinjatüin. Nümakalaka chi nüchepchiakai nümüin: «Tapoteerü ekiiruʼupünaa süpüla tejitüin kaaʼulachaʼa kamaʼa aneerüle sütüma» (paashajeʼera Lucas 13:6-9). Soʼu juyakat tia, paliʼirü neʼe na wayuu ojuupatakana sümaa tü pütchi nüküjakat Jesuu. Tü nüküjeekalü achiki Jesuu sükajee tü higuerakat shia sülüʼülaain nükalia süpüla nuʼutünüinjachin aaʼin. Makalaka nüküjüin maʼin pütchi chaa Judea sümaa Perea. Süchikijee nüküjüin tia, aʼyalajüshi nia naaʼu na wayuu asülajaakana nacheʼe suulia tü pütchi nüküjakat (Mat. 13:15; Luc. 19:41).

6. ¿Jamüshii waküjüinjanaka maʼin pütchi?

⁶ Süka sülüʼülaain maʼin süpüla sajaʼttüin tü kasakalüirua, aʼyataainjana maʼin waya sünain aküjaa pütchi (paashajeʼera Daniel 2:41-45). ¡Nnojotsü eein wanee kasa makalü aka saaʼin aküjaa pütchi nüchiki Jeʼwaa! Wayaʼala neʼe aküjaka sümüin tü wayuukalüirua kasain shipin tü müliaa joutkat maaʼulu. Naashin wanee periodista, nnojotsü eein wanee wayuu atüjaaka saaʼu pütchikat tüü: «¿Jamüsü shiʼraka sümüliala wayuu?» Nuluwataain waya Maleiwa sünain asouktaa shiʼipajee pütchikat tia sümüin wayuu eekai sütüjaweein saaʼu tü sümakat tü Wiwüliakat. Müshiijeseʼe waküjüinjanain maʼin pütchi süka süpüshuaʼa waaʼin (Roma 12:11). Waküjüle maʼin pütchi, eʼraajüneechi Jeʼwaa sutuma tü wayuukalüirua otta aijeechi nia süpüla. ¡Eeshi wamaa Jeʼwaa sünain aʼyatawaakat tia!

7, 8. ¿Jamüshi kojutka atumawaa Jeʼwaa palajanale watuma aʼyatawaa nümüin?

⁷ Eeshii süpüla «matunküin» otta «meküin» waya sünainjee waʼyataain nümüin Maleiwa maʼaka sülatüin nümüin chi aluwataaushikai Pablo (2 Cor. 6:5). Pansaasü maʼin pütchikat tia sümaa nukuwaʼipa wanee wayuu palajanakai atuma aʼyatawaa nümüin Maleiwa. Eeshii sotule waaʼin na pürekutsoot palajanakana atuma naʼyataain nümüin Maleiwa sümaʼinruʼu nachajaain tü neküinjatkalü aaʼu. Müshiʼiya na misionero aʼyataakana maʼin sünain ekirajaa wayuu (Filip. 2:17). Eeshii na laülaashii matunküinkana otta meküinkana süpüleerua akaaliinjaa na anoujüshiikana. Eeshii na wawalayuu laülaayuukana otta na ayuuikana matüjüinkana makataa suulia tü outkajawaakat otta tü aküjaakat pütchi. Anasü maʼin jülüjüle waaʼin tü nakuwaʼipakat süka nooʼulaain waneeirua kasa süpüleerua aʼyatawaa nümüin Maleiwa. Nnojorülejeʼe naainjüin tia, ayatsüjeʼeya mojutüin sümüin wayuu tü waʼyataainkat nümüin Maleiwa.

⁸ Müsüinka nünüiki wanee wayuu suluʼu wanee karaloukta nuluwataaka sümüin wanee periódico chayaa Reino Unido: «Nnojoluitpa oonooin wayuu sümaa tü iküleesia suʼunakalü aluʼu [...]. ¿Kasa naainjaka na süpastootsekana tü iküleesiakat?  Eetaayaain nachajaain na wayuukana maʼaka naainjüin shia Kürisüto [...]. Nayataajaʼa neʼe namüiwaʼa na aküjüliikana pütchi nüchiki Jeʼwaa akaaliinjaka na wayuukana. Nachajaain tü wayuukalüirua süpüla naküjüin pütchi sümüin». Kojutshi atumawaa Jeʼwaa süka palajanain watuma tü aʼyatawaakat nümüin. Otta weeʼiyatüin mayaa nnojoluin jülüjüin waaʼin wakuwaʼipa wamüiwaʼa maʼaka naaʼin na manoujüinsaliikana (Roma 12:1).

9. ¿Kasa waaʼinrajatka süpüla keeʼireein waaʼin waainjüin kasa anasü sünain aküjaa pütchi?

⁹ ¿Kasa waaʼinrajatka weʼrüle wakulajaain aaʼin sünain aküjaa pütchi? Jülüjüinjatü waaʼin tü kasa eekat sünainjee waküjüin pütchi (paashajeʼera Roma 10:13-15, NM). Süpüla nuʼtteʼennüinjachin wanee wayuu, nuchuntüinjatü nünülia Jeʼwaa. Nnojoleerü jaralüin achuntüin nünülia Maleiwa, nnojorüle süküjünüin pütchi. Süka watüjaain saaʼu tia, keeʼireeinjatü waaʼin waainjüin kasa anasü otta aküjüinjana waya pütchi süka süpüshuaʼa waaʼin.

10. ¿Jamüsü watüjaaka saaʼu eein na anoujakana nünain Jeʼwaa sutuma neʼrüin waainjüin kasa anasü?

¹⁰ Aküjüinjana maʼin waya pütchi süpüla sürütkaain tü wayuukalüirua nünainmüin Maleiwa. Akatsaʼa eein wanee kasa arütkeʼeraka na wayuukana nünainmüin Maleiwa; shia tü wakuwaʼipakat. Müshi Pablo süchiki tia: «Suulia mojujain sünüiki wayuu tamüin sünain nnojoluin nanoujain tü taküjakat namüin, taaʼinreein tü anasükat waneepia noʼupala» (2 Cor. 6:3). Neʼrüle na wayuukana anain wanüikipala otta waainjüin kasa anasü, kamalainjeerü namüin tü wekirajakalü anain. Otta keeʼireejeerü naaʼin nanoujüin nünain Jeʼwaa (Tito 2:10). Waapawai achikirü eein wayuu anoujaka sutuma shiʼrüin anain maʼin nakuwaʼipa na wawalayuukana.

11. ¿Jamüsü jülüjüinjatka waaʼin tü kasa eejeetkat müleka lotule wakuwaʼipa?

¹¹ Eeshii wayuu anoujaka waainjüle kasa anasü, akatsaʼa eein na manoujüinkana müleka waainjüle kasa mojusü. Chale pia piʼyataaleruʼu, pipialuʼu otta pukoleejiaseruʼu, eeja paaʼin suulia mojuin sünüiki wayuu süchiki pukuwaʼipa otta piʼyataain nümüin Maleiwa. Macheʼere waya sünain kaainjalaa, mojeerü maʼin wakuwaʼipa (Heb. 10:26, 27). Makalaka jülüjüinjatüin waaʼin jamüin wakuwaʼipa maaʼulu. Nnojotsü kasajatüin sümüin wayuu maaʼulu aainjaa kasa anasü müsüjeseʼe eejeenain na eʼrakana naatajachin chi wayuu lotokoi akuwaʼipa nuulia chi nnojoikai lotuin akuwaʼipa otta naatajachin chi aʼyataakai nümüin Maleiwa nuulia chi nnojoikai aʼyataain nümüin (Mal. 3:18). Lotule wakuwaʼipa, anajiraajeena na wayuukana nümaa Maleiwa.

12-14. Süka ayatüin waya nümaa Jeʼwaa suʼunnaa tü müliaa weʼrakat, ¿kaseerü naainjaka na wayuu eʼrakana tia? Püküja süchiki tü alatakat namüin na wawalayuukana.

¹² Sünain tü karaloukta nüshajakat Pablo namüin na anoujüshii chajanakana Corinto, nüküja achikirü müliain nia atumawaa, niʼyaajünüin otta nüpüreesajünüin (paashajeʼera 2 Corinto 6:4, 5). Neʼrüle na wayuukana ayatüinya waya sünain anoujaa suʼunnaa tü müliaakat naapaajeerü amaa tü pütchi waküjakat. Eeshiinka waneeinnua wayuu oʼuteeka naaʼin na aküjüliikana pütchi chayaa Angola. Antüshii naya eejanale jutkatüin piamashii wawalayuu sümaa apünüinsü shikii wayuu ekirajaaka sünain tü Wiwüliakat. Nayamüjüin naya otta eʼikaajüshii natuma. Noutkajeʼerüin tü wayuukalüirua süpüla shiʼrajüin sukua tia. Nnojotsü akaʼalirajünüin tü jieyuukalüirua otta tü tepichikalüirua. Aainjünüsü tia naka shiiʼiree mamaneeinjatüin tü wayuukalüirua namüin na aküjüliikana pütchi. Eetaayaai shikeraajüin tia, akooʼomüinraashii na wayuu achuntakana ekirajawaa sünain tü Wiwüliakat. Sutuma sülatüin tia, wainma  na aküjakana pütchi otta kooʼomüinshii na anoujüshiikana jee eʼrüshii naya wainma kasa anasü.

¹³ Shiiʼiyatüin tia eein süpüla nanoujüin na wayuukana ichere waya süchiirua tü sümakat tü Wiwüliakat. Süka meimmoluin Pedro otta na wanee aluwataaushiikana, eeshii na wayuu anajiraakana nümaa Maleiwa (Aluw. 5:17-29). Eeshii süpüla nanoujüin na koleejiajiraakana wamaa, na aʼyataajiraakana wamaa otta na wapüshikana müleka neʼrüle wachecherüin waaʼin suʼunnaa müliain waya atumawaa.

¹⁴ Eeshii na wawalayuu müliakana atumawaa. Chayaa Armenia, püreesashii atumaa pienchi nekii wawalayuu sünainjee nnojoliin sünainpünaain naya poliitika. Otta eeshii süpüla kooʼomüin na wawalayuu püreesakana. Chayaa Eritrea, püreesashii atumaa jaʼrai shikii jaʼralimüin wawalayuu, eeshii eekai aipiruairüin shikii nouyase; laülaainna naya. Chayaa Corea del Sur püreesashii atumaa maʼaka setesiento wawalayuu saalii nnojoliin sünainpünaain naya poliitika. Eeirü maʼaka aipirua shikii juya sünain müliain maʼin atumaa na wawalayuukana. Süka ayatüinya na wawalayuukana nümaa Jeʼwaa, wachunta nümüin kojutüinjachin nia sutuma wayuu sümaa sunoujüin nünain (Sal. 76:8-10).

15. ¿Kasa alataka sutuma lotuin sukuwaʼipa wanee wawala?

¹⁵ Neʼrüle na waneeinnua lotuin wakuwaʼipa sünain tü waainjakat, keeʼireejeerü saaʼin tü wayuukalüirua shiʼraajüin Jeʼwaa (paashajeʼera 2 Corinto 6:6, 7). Anuu tü alatakat sümüin wanee wawala. Suwalaajüinjatü tü süsapiakat suluʼu wanee uusü, sümaka wanee wayuu eʼraajaka tü wawalakat: «Nnojo puwalaajüin, pejewalii neʼe waya». «Nnojotsü anain tia, wawalaajüinjatü tü wasapiakat jaʼitainna pejewaliin waya», sümaka tü wawalakat sümüin tü wayuukot. Ashakata müsüjaʼa tü wayuukot. Nümaka chi chupeetkai sümüin tü wawalakat: «¿Aküjüt pia pütchi nüchiki Jeʼwaa?». «Aa,  ¿kasa amüin?», sümaka tü wawalakat. «Taapüin tü püküjakat sümüin tü wayuukot, tatüjaa aaʼu sünain lotuin nakuwaʼipa otta nnojoluin nemeejüin wayuu na aküjüliikana pütchi», nümaka chi chupeetkai. Kojuya kashi süchikijee tia, nürütkaaka wanee wayuu sünainmüin tü wawalakat sünain wanee outkajawaa otta nümaka sümüin: «¿Sotushi taya paaʼin? Taya chi suchupeetsekai uusu yootokalinka pümaa. Tekirajaa anainrü tü Wiwüliakat namaa na aküjüliikana pütchi süka teʼrüin lotuin maʼin pukuwaʼipa». Sutuma tia, sunouja anainrü wayuu tü wamakat müleka lotule tü wakuwaʼipakat.

16. (1) ¿Kaseerü alataka müleka nnojoliire waashichijaamaatüin, aipüraliire waya otta kamaneere waya? (2) ¿Kasa naainjaka na shikiipüʼükana tü iküleesiakalüirua?

¹⁶ Eeshi süpüla niʼraajüneein Maleiwa sutuma tü wayuukalüirua müleka nnojoliire waashichijaamaatüin, aipüraliire waya otta kamaneere waya. Naʼaka na wayuu eʼraajakana waya eeshii na eʼraajeekana Jeʼwaa, na atüjaweekana saaʼu tü keeʼireekat naaʼin otta na eʼraajeekana tü nupueulosekat. Naata maʼin nakuwaʼipa na anoujüshii shiimainkana noulia na shikiipüʼükana wanee iküleesia. Eeshii na emeejakana sünneetse tü wayuukalüirua süpüla nayaʼlajüin wanee piichi kojutsü maʼin otta wanee kemion eekai kojutüin maʼin. Otta eeshii na akumajakana shipia namüʼlüin sümaa neʼiteʼerüin aire acondicionado sünain. Na oʼunakana nüchiirua Kürisüto naashin, shia jülüjaka naaʼin tü nneetkat (Mat. 10:8). Müshii aka naaʼin na sacerdoote chajanakana Israel, nnojoishii ekirajeein masaloui otta tü nekirajakalü anain alawaa neʼe (Miq. 3:11). Nnojotsü anajiraweein wayuu nümaa Maleiwa sutuma shiʼrüin piamain noʼupünaa na shikiipüʼükana tü iküleesiakalüirua.

17, 18. (1) ¿Jamüshi kojutka watuma Jeʼwaa washatüle tü nukuwaʼipakat? (2) ¿Jamüsü keeʼireeka waaʼin waainjüin kasa anasü?

¹⁷ Eesü wayuu kamalainka amüin tü wekirajakalü anain otta tü kasa anasü waainjakat. Eejachi wanee pürekutsoot aküjakai pütchi sainküin piichi, süjünajaaka nia wanee laülaa. Yalajatü shia saaʼu wanee kaleera sünain eʼitawaa wanee bombilla wanaa sümaa nüntüin chi wawalakai. «Atak, eewaasü taa pia» nümaka chi wawalakai sümüin. Niaka eʼitaain tü bombillakat, nuʼunaka süchikijee. Ponusü maʼin naaʼin tia chi süchonkai tü laülaakat makalaka nuushikajaain nüchiirua chi wawalakai süpüla naapüin tü analuʼutkat nümüin. Otta nücheka achikirü nikirajaain sünain tü Wiwüliakat.

¹⁸ ¿Jamüsü keeʼireeka paaʼin paainjüin kasa anasü? Süka pütüjaain saaʼu kojuteechin Jeʼwaa atumaa otta eein süpüla suʼttaain tü wayuukalüirua (paashajeʼera 1 Corinto 10:31-33). Waküjüle maʼin pütchi otta lotule wakuwaʼipa shia süka alin wapüla Jeʼwaa otta na wayuukana (Mat. 22:37-39). Keeʼireere waaʼin waainjüin kasa anasü, talateerü maʼin waaʼin. Otta waʼatapajeerü maʼin tü kaʼi nuʼwaajüneechikalü oʼu Maleiwa sutuma wayuu süka süpüshuaʼa saaʼin.