1, 2. ¿Sribi meden ütiäte mikani nitre testiko Jehovakwe kisete, aune yebätä ja ruin ño mäi?

NITRE kwati tä jondron nuainne ye ütiäre jondron bianta ietre ye tä nemen tuin ütiäte ietre. Ñodre, nitre tä ja rüere ye nire tä dimike ne kwe rabadreta ja mäke kwin jabe, ni yei Premio Nobel bianta. Akwa, Ngöböta ni juen nitre mada dimike ja mäketa kwin ni ni Sribekä yebe, ye abokän bäri ütiäte.

² Sribi bäri ütiäte ye tä nitre testiko Jehovakwe kisete. Ngöbö aune Kristo ni juani sribi kwe nuainne, ye medenbätä nita kukwe niere nitre madai ne kwe rabadreta ja mäke Ngöböbe (2 Cor. 5:20). Jehová tä ni mike kukwe niere nitre madai ne kwe rabadre näin niara kokwäre, aune ye köböire nitre kwati juta 235 biti bäri kä jene jene känti, tätre ja mäke kwin niarabe aune töita nünanbätä kärekäre (Tito 2:11). Ja brukwä kwinbiti nita nitre nübaire “ñö ni mikakrä nüne kärekäre ye ña[in] ngwarbe” (Apoc. 22:17). Sribi mikani ni kisete ye tuin ütiäte nie aune nita ja di ngwen nuainne, ye köböire ni raba niere juta “jändrän kuin nuene” ye ngätäite nita siba (Tito 2:14). Sribi nuainta kä jutobiti ye raba nitre kwati mike nökrö ño Jehová ken ye ani mike gare jai. Nita nuainne kukwe drie yebiti.

3. ¿“Jehová [kukwe] nuaindi” ye köböire dre rabai nikwe?

³ Ngöbö Monsoi rabai gobrane yebätä Isaías 9:7 tä mike gare: “Jehová nitre rükä jie ngwanka käkwe ye nuaindi”. Kukwe ne tä mike gare ni Rün kä kwinbiti töita ni kä nebätä diantaribätä. Niarakwe ni mikani Gobran kwe kukwei driere ye nikwe nuaindre kä jutobiti niarata kukwe kwe mike gare kä jutobiti ye erere. Ni töita kwatibe nitre dimikabätä Jehová mike gare jai yebiti nita bämike niara tä sribire kä jutobiti. Ye medenbätä, ¿mä töita kwatibe kukwe kwin mikabätä gare? (1 Cor. 3:9.)

4. ¿Jesukwe kukwe driebare kä jutobiti aune kä ngwani nüke kwe jai yebiti dre bämikani kwe?

 ⁴ Jesukwe kä ngwani nüke jai aune kukwe driebare kwe kä jutobiti yebätä töbikadre. Nitre namani ja mike niara rüere, akwa kukwe driebare käre kwe kä jutobiti nememe niara murie ketani ye ngwane (Juan 18:36, 37). Köbö ye jatani nökrö ja ken angwane ja di ngwani bäri kwe Jehová mike gare nitre madai.

5. ¿Kukwe bämikani higuera yebätä ye erere Jesukwe dre nuainbare?

⁵ Ñodre, kä 32 ye ngwane Jesukwe kukwe bämikani känti blitabare kwe higuera dati abokän kä komä te ngwä ñaka nämene nemen yebätä. Ni higuera bökänkä käkwe higuera ye tikakamana ye ngwane ni viña ngübaka käkwe kä mada käräbare jai abono kitakärebätä (mäkwe ñäkä Lucas 13:6-9 yebätä). Kä ye näire kukwe drie nämene Jesukwe ye nitre braibe aibe käkwe kani ngäbiti. Akwa, kä jatanina nemen sö krä ti aibe niara käne, angwane ja di ngwani kwe kukwe driere bäri Judea aune Perea. Köbö namani braibe niara murie ketakäre ye ngwane nitre Judea “ja olo gu dikani [niara] kukwei ngäniene” ye muaibare kwe (Mat. 13:15; Luc. 19:41).

6. ¿Ñobätä nikwe ja di ngwandre bäri kukwe driere?

⁶ Kä kitera krüte yebätä nikwe ja di ngwandre bäri kukwe driere (mäkwe ñäkä Daniel 2:41-45 yebätä). ¡Ni abokän testiko Jehovakwe ye tuin ütiäte nie! Kukwe ükaite ño ni Kä nebätä kräke ye ni aibe tä mike gare. “¿Ñobätä kukwe käme tä nemen bare nitre kwin yebätä?”, kukwe ye ñaka mika raba gare jire chi ye ni kukwe mikaka gare käkwe niebare bitinkä. Akwa, Ngöbökwe sribi mikani ni kisete ne kwe nire törba kukwe ngwantarita ye erere mikai gare jai ye nikwe dimikadre Bibliabiti. Ye medenbätä, sribi mikani ni kisete ye “ jökrä jiebti [ni] rankwadre kisere” (Rom. 12:11). Ngöbö diebiti nita kukwe driere kä jutobiti ye köböire nikwe nitre dimikai Jehová mike gare jai aune tarere.

7, 8. ¿Ja di ngwanta kukwe kwin driere yebiti nita Jehová mike ño ütiäte?

⁷ Apóstol Pablo yebätä kukwe namani bare ye tä mike gare ni raba “kibien ñakare sribibtä amne [...] mrö nike kri arato” (2 Cor. 6:5). Texto ye tä ngwen törö nie ja di ngwandre sribi mikani ni kisete ye nuainne. Arato ye raba ni töi mike nitre prekursor tä sribi Ngöbökwe mike nuainne käne jai aune tätre ngwian ganainne braibe jai nünankäre yebätä. Ne madakäre, töbike nitre misionero tä ja töi mike kwatibe nitre juta madate dimike yebätä (Filip. 2:17). ¿Nitre umbre tä ñaka mröre o ñaka kübien obeja dimikakäre yebätä ni raba dre niere? Ja mräkätre niena umbre o tä bren, akwa tätre ja di ngwen näin gätäbätä aune kukwe driere yebätä nikwe tobikadre arato. Nitre jökrä Ngöbö mikaka täte tätre ja di ngwen sribire ja dibiti, ye tä kä mike juto nibätä. Niaratre tä kukwe bämike ye köböire nitre tä blite kwin kukwe drieta nikwe yebätä.

⁸ Ni ñäkäkä täräkwata Boston Target, de Lincolnshire (Reino Unido) yebätä käkwe kukwe ne tikani: “Nitre ñaka kitera tö ngwen kukwe mikata täte kwetre yei [...]. ¿Nitre ji ngwanka iglesiate tätre dre nuainne köbö kwatire kwatire yete? Kristo nämene nitre känene ye erere niaratre ñaka nuainne [...]. Nitre testiko Jehovakwe aibe tä töbike nitre mada yebätä, ñobätä ñan aune tätre niken nitre känene aune tätre kukwe metre driere”. Nitre kwati töita jabebätä, akwa nita ja di ngwen sribi nuainne yebiti nita Jehová mike ütiäte (Rom. 12:1).

9. ¿Dre ni töi mikai “jändrän kuin nuene” kukwe driekäre kä jutobiti?

 ⁹ ¿Ni ñaka niena kukwe driere kä jutobiti rabadre ruin nie angwane dre nuaindre? Nita kukwe driere ye köböire Jehovata dre mike nemen bare yebätä nikwe töbikadre (mäkwe ñäkä Romanos 10:13-15 yebätä). Nitre rabadre Ngöbö kädeke kä kwe yebiti ne kwe rabadrete nire, akwa ni ñaka kukwe driere ietre angwane nitre ñaka raba ye nuainne. Kukwe ye rükadre gare nie angwane ye ni töi mikai kukwe kwin nuainne aune kukwe kwin Gobran Ngöbökwe ye driere ja di tätebiti.

10. ¿Ñobätä nie raba ja ngwanta kwin ye nitre tä mike ñärärä angwane ye tä niaratre töi mike näin Jehová kokwäre?

¹⁰ Kukwe driedre kä jutobiti ye ütiäte krubäte, akwa ye ñan aibe köböire nitre törbai näin Ngöbö kokwäre. Ja ngwanta kwin ye raba nitre dimike arato. Pablokwe kukwe tikani ye tä mike gare ye ütiäte krubäte: “Ni mda mdakwe ñan ñäkädre blo, abkokäre nunta nüne ñakare blo ni mda mda okwäbti” (2 Cor. 6:3). Nita blite kwin aune ja ngwen kwin ye tä kukwe Ngöbökwe ye mike tuin kwin nitre madai, aune nitre tä ni mrusaire ye töita nemen Jehová mikabätä täte (Tito 2:10). Nita ja ngwen kwin ye nitre tö kukwe mikai gare tä mike ñärärä angwane niaratre tä ja töi kwite ye ni tärä kukwe nuin.

11. ¿Ñobätä ni rabadre orare töbikakäre nita ja ngwen ño yebätä?

¹¹ Akwa ni ñaka ja ngwen kwin angwane ye raba nitre töi mike töbike blo kukwe Ngöbökwe yebätä. Ye medenbätä, ni tädre sribikänti, gwi, kwelate ye ngwane nikwe ja ngwandre kwin, ne kwe nitre ñaka blitadre blo kukwe drieta nikwe yebätä. Nikwe ja mikai ngite nierare angwane kukwe tare rabai bare bäri nibätä (Heb. 10:26, 27). Ye medenbätä,  ni rabadre orare aune töbike nita dre nuainne aune ja ngwen ño yebätä. Kä nengwane nitre tä ja ngwen bäri käme, akwa “ni kukwe kwin nuainkä aune ni kukwe käme nuainkä, ni Ngöbö mikaka täte aune ni ñaka Ngöbö mike täte ye rabaita gare” nitre töi kwin yei (Mal. 3:18). Nikwe ja ngwandre kwin ye ütiäte krubäte ne kwe nitre rabadreta ja mäke Ngöböbe.

12-14. ¿Nita kä ngwen nüke jai ye tä nitre töi mike ño? Niedre keteiti.

¹² Pablo kukwe tikani nitre Corinto ie ye ngwane mikani gare kwe kukwe tare namani barebätä, ja tuani kwe kukwe tare ben, metani aune kitani ngite (mäkwe ñäkä 2 Corintios 6:4, 5 yebätä). Nita ja tuin kukwe ye erere ben aune nita kä ngwen nüke jai ye raba nitre mada töi mike kukwe metre kain ngäbiti. Ñodre, kä Angola yekänti nitre ja töi mikani nitre testiko Jehovakwe ye gainte. Nitre nibu testiko Jehovakwe aune nitre grebiti ni jätä nämene ja ükökrö gätäbätä ye ketaninkä kwetre, ye bitikäre ja mräkätre ye kwata metani kwetre nememe därie diantekäre aune nitre nünanka kä yekänti ükaninkrö kwetre kukwe ye tuakäre. Meritre aune monsotre kia jökrä ngwani ja tare nike; kukwe ye nuainbare kwetre kä jürä ngwankäre nitre madabätä ne kwe ñaka rabadre nitre testiko Jehovakwe kukwe nuin. Akwa, nitre nünanka yete kukwe ye tuani angwane ja tötika Bibliabätä ye ribebare kwetre jai. Kä ye ngwane ja käne kukwe drie jatani bäri, aune kukwe keta kabre kwin jatani nemen bare.

¹³ Kukwe ye tä mike gare nita ja mike kukwe Bibliabätä yekri ye raba nitre töi kwite. Ni raba niere Pedro aune apóstol mada mada ja ngwani dite ye köböire nitre kwati ja mäkäni Ngöböbe (Hech. 5:17-29). Nita ja mike kukwe erametre yekri ye ngwane sribi muko nikwe, nitre nänkä kwelate nibe bätä ni mräkätre töi rabai kukwe metre kain ngäbiti.

¹⁴ Käre ja mräkätre ruäre rüeta nakainkä. Ñodre, juta Armenia yekänti ja mräkätre gre ketebu tä ngite, ñaka ja mritani kwetre kukwe gobrankwe yete yebätä, aune sö rikai ta yete mada mada kitai ngite. Juta Eritrea yekänti nitre 55 Jehová mikaka täte tä ngite, ruärebiti kä niena gre ketamäbiti bäri. Corea del Sur yete nitre testiko 700 kitani ngite tödeka kwetre yebätä. Kä nikanina 60 ta kukwe ye tä nemen bare juta yete. Ja mräkätre kwati juta madate tätre ja tare nike, akwa rabadre ja ngwen metre Jehová käikitakakäre aune ye raba nitre kukwe metre tarekä töi mike ja mike kukwe metre yekri ye nikwe ribedre orasionte (Sal. 76:8-10).

15. Nita blite metre angwane ye raba nitre mada töi mike kukwe metre kain ngäbiti ye niedre.

¹⁵ Nita kukwe metre niere ye raba nitre mada töi mike kukwe metre kain ngäbiti (mäkwe ñäkä 2 Corintios 6:4, 7 yebätä). Kukwe namani bare yebätä ani blite. Máquina mikani bute ja ütiä biankäre yete ja ngwai nämene ngwian kite angwane ja ketamuko kwe niebare ie niara näin känime yebätä ñaka rabadre ja ütiä bien. Ja ngwai niebare rikadre känime akwa rabadre ja ütiä bien arato. Ye bitikäre, ja ketamuko kwe nikani timon. Ni bus ngwanka ngwantaribare ja ngwai ie: “¿Mä testiko Jehovakwe?”. Niarakwe niebare ie. “Jän, ¿ñobätä mätä ngwentari?”. Ni ye niebare ie: “Mäkwe kukwe nini ye juruani tie, aune gare tie nitre Testiko ye blite metre aune ñaka ni mada goire”. Sö nikani ruäre ta angwane gätä konkrekasionte yete ni iti niebare ja ngwai ie: “Ti bus ngwanka, tikwe blitaba mäbe. ¿Ye tä törö mäi? Mäkwe ja ngwama kwin ye käkwe ti töi mikaba ja tötike Bibliabätä nitre Testiko yebe”. Kukwe namani bare ye  tä mike gare nita blite metre angwane nitre raba tö ngwen nie.

16. a) ¿Nitre ngübata bätärekä, tareta aune ja töi mikata kwin kräke ye ñobätä tä mate brukwäbätä? b) Nitre ji ngwanka iglesiate tä dre nuainne nitre jie ngwanta kwetre yebätä ye niedre.

¹⁶ Nita nitre ngübare bätärekä, tarere, ja töi mike kwin kräke ye raba töi mike näin Jehová kokwäre arato. Jehová ye töi ño, töita dre nuainbätä, aune juta meden kwe ye nitre ruäre tä ni mike ñärärä aune tö mikai gare jai. Nitre kristiano metre tä ja töi mike aune ja ngwen ño ye ñaka tä nuainne ja bämikakäre jerekäbe ni mada ngökakäre. Nitre ruäre ji ngwanka iglesiate tä ngwian denkä nitre jie ngwanta kwetre yekän aune tätre ngwian yebiti ju bätä karo ütiäte kökö jai; ruäre ngwane tätre ju kökö nukro kwetre kräke aune aire acondicionado mike kräke. Nitre kwati ja bianka nänkä Kristo jiebiti ñaka töta nemen jondron nuain ngwarbe ni mada kräke (Mat. 10:8). Nitre sacerdote bikaka kri nämene Israel näire nämene “kukwe dirire jondron täri” ye erere tätre nuainne; arato ñaka tätre kukwe Bibliabätä ye driere (Miq. 3:11). Tätre ja bämike jerekäbe yebiti ñan raba nitre dimike ja mäke Ngöböbe.

17, 18. a) ¿Nita ja töi mike Jehová erere angwane nita niara käikitekä ño? b) ¿Dreta ni töi mike jondron kwin nuainne ni mada kräke?

¹⁷ Kukwe metre drieta aune kukwe kwin nuainta ye tä mate nitre mada brukwäte. Ni prekursor nämene kukwe driere ye ngwane jukwe metani kwe aune bicho kän brare krütani nämene gwi käkwe jatuaita niebare bengwairebe ie. Bicho ye niebare ie nämene kalerabätä foco kwite mrö ria käi yekänti. Prekursor niebare ie: “Mä ñan raba ye nuainne kaibe”. Prekursor foco kwitani kräke aune nikaninta. Bicho ye ngobo ie kukwe ye namani gare angwane, töi ñan namani krütare aune nikani ja mräkä ye jiebiti debe biankäre ie, kä nikani ta angwane ja tötika Bibliabätä ye kani ngäbiti kwe.

¹⁸ ¿Ñobätä mä töita kwatibe jondron kwin nuainne ni mada kräke? Mätä kukwe driere kä jutobiti aune dre tuin kwin Jehovai ye mätä nuainne, ye tä Jehová käikitekä aune nitre mada dimike ne kwe rabadrete nire ye gare mäi yebätä (mäkwe ñäkä 1 Corintios 10:31-33 yebätä). Ngöbö aune ni mada tare nikwe ye ni törba bämikai angwane nikwe kä jutobiti jondron kwin nuaindre, kukwe kwin driedre aune ja ngwandre ni kristiano erere (Mat. 22:37-39). Nikwe kukwe kwin ye nuaindi angwane jondron kwin rabai nikwe, aune kä nengwane kä rabai juto nibätä aune ja raba nemen ruin kwin nie. Arato, nitre jökräbätä kä rabai juto Jehová mikakäre täte gwairebe ye nita ngübare.