1, 2. Ano ang pinasahi nga kadungganan sang mga Saksi ni Jehova, kag ano ang ginabatyag mo sa sini?

GINAKABIG sang madamo nga daku nga kadungganan ang pagtigayon sing padya para sa isa ka daku nga hinimuan. Halimbawa, ang iban nakabaton sing Nobel Prize bangod makugi nila nga gintinguhaan nga mapaluntad ang paghidait sa tunga sang nagailinaway nga pungsod. Pero mas daku pa gid nga kadungganan nga ipadala sang Dios subong mga embahador ukon tiglawas para buligan ang mga tawo nga matigayon ang mahidaiton nga kaangtanan sa ila Manunuga!

² Subong mga Saksi ni Jehova, ginadala naton ina nga kadungganan. Sa idalom sang pagdumala sang Dios kag sang Cristo, nagapakiluoy kita sa mga tawo nga “magpasag-uli . . . sa Dios.” (2 Cor. 5:20) Ginagamit kita ni Jehova para buligan ang mga tawo nga mangin suod sa iya. Gani, minilyon sa sobra 235 ka kadutaan ang nabuligan nga makatigayon sing maayo nga kaangtanan sa Dios kag sing paglaum nga mabuhi sing walay katapusan. (Tito 2:11) Tinagipusuon kag makugi naton nga ginaagda ang “bisan sin-o nga luyag magkuha sang tubig sang kabuhi nga wala sing bayad.” (Bug. 22:17) Bangod ginapabaloran naton ining hamili nga asaynment kag ginahimo ini sing mapisan, nagakaigo lang nga tawgon kita nga katawhan nga “makugi sa maayong mga buhat.” (Tito 2:14) Binagbinagon naton karon kon paano ang aton kakugi para sa maayong mga buhat nagabulig sa mga tawo nga mangin suod kay Jehova. Ang isa ka paagi amo ang aton pagbantala nga hilikuton.

3. Ano ang ginapasalig sa aton sang kakugi ni Jehova?

³ Tuhoy sa pagahimuon sang paggahom sang Anak sang Dios, ang Isaias 9:7 nagasiling: “Ang kakugi sang GINOO sang mga kasoldadosan magahimo sini.” Ginapadaku sini nga pinamulong nga nagapanghikot gid ang aton Amay sa langit para maluwas ang katawhan. Ang halimbawa ni Jehova sang kakugi nagapakita nga ang hilikuton nga ginhatag niya sa aton subong mga manugbantala sang Ginharian  dapat lang nga suportahan naton sing tinagipusuon kag himuon sing mapagsik kag makugi. Ang aton handum nga buligan ang mga tawo nga makilala ang Dios nagapabanaag sang kakugi ni Jehova. Gani subong masigkamanugpangabudlay sang Dios, determinado bala kita nga makigbahin sing bug-os sa pagbantala sang maayong balita tubtob ginatugot sang aton kahimtangan?—1 Cor. 3:9.

4. Paano nagpakita si Jesus sing halimbawa sang pagpabilin nga makugi sa ministeryo?

⁴ Binagbinaga man ang kakugi ni Jesus. Nagpahamtang sia sing himpit nga halimbawa sang pagpabilin nga makugi sa ministeryo. Bisan pa sa grabe nga pagpamatok, nahuptan niya ang iya kakugi sa pagbantala tubtob sa masakit nga katapusan sang iya kabuhi sa duta. (Juan 18:36, 37) Sang nagahilapit na ang iya kamatayon, nagdugang pa gid ang determinasyon ni Jesus nga buligan ang iban nga makilala si Jehova.

5. Ano ang ginhimo ni Jesus nahisuno sa iya ilustrasyon parte sa higuera?

⁵ Halimbawa sang tigragas sang 32 C.E., ginsugid ni Jesus ang ilustrasyon parte sa isa ka tawo nga sa iya ulubasan may kahoy nga higuera nga wala nagpamunga sa sulod sang tatlo ka tuig. Sang ginsugo niya nga pudlon ini, ang manugtatap sang ulubasan nangabay nga hulaton lang anay nga maabonohan ini. (Basaha ang Lucas 13:6-9.) Sadto, pila lamang ang mga disipulo nga makabig nga bunga sang pagbantala ni Jesus. Pero subong ginpakita sa ilustrasyon parte sa manugtatap sang ulubasan, gingamit ni Jesus ang nabilin nga malip-ot nga tion—mga anom ka bulan—para pauswagon pa gid ang iya pagbantala sa Judea kag Perea. Pila ka adlaw antes sang iya kamatayon, ginhibian ni Jesus ang iya mga kasimanwa nga ‘nakabati apang wala magpamati.’—Mat. 13:15; Luc. 19:41.

6. Ngaa dapat naton pauswagon ang aton pagministeryo?

⁶ Bangod nagahilapit na gid ang katapusan, indi bala nga importante nga pauswagon pa gid naton ang aton mga panikasog sa pagbantala? (Basaha ang Daniel 2:41-45.) Isa gid ka dalayawon nga pribilehiyo nga mangin Saksi ni Jehova! Kita lamang sa duta ang nagasugid sing matuod nga solusyon sa mga problema sang tawo. Sining karon lang, ang kolumnista sang isa ka pamantalaan nagsiling nga indi gid masabat ini nga pamangkot, “Ngaa may malain nga nagakatabo sa maayo nga mga tawo?” Subong mga Cristiano, obligasyon naton kag pribilehiyo nga isugid ang sabat sang Biblia sa sini nga mga pamangkot sa mga luyag magpamati. May rason gid kita nga “magmainit sa espiritu” samtang ginahimo naton ang hilikuton ni Jehova. (Roma 12:11) Upod sa pagpakamaayo sang Dios, ang aton makugi nga pagbantala makabulig sa iban nga makilala kag higugmaon si Jehova.

7, 8. Paano ang pagkamasinakripisyuhon nagapadungog kay Jehova?

⁷ Subong ginapakita sang eksperiensia ni apostol Pablo, ang aton ministeryo mahimo magresulta sa “mga gab-i nga wala sing tulog” kag “mga tion nga wala sing kalan-on.” (2 Cor. 6:5) Maathag nga ginapakita sini nga mga pinamulong ang pagsakripisyo sa kaugalingon kag mahimo ini magpahanumdom sa aton sa mga payunir nga nagauna sang ministeryo sa ila kabuhi samtang ginasuportahan ang ila kaugalingon sa pinansial. Binagbinaga man ang mapisan nga mga misyonero nga ‘nagabubo sang ila kaugalingon kaangay sang isa ka dulot nga ilimnon’ para mag-alagad sa iban nga lugar. (Fil. 2:17) Kamusta naman ang mapisan naton nga mga gulang nga indi na makakaon ukon makatulog bangod sa pag-atipan sang karnero ni Jehova? Ara man ang mga may edad kag maluya sing panglawas nga mga utod nga nagahimo sang ila masarangan para makatambong sa mga miting kag makagua sa latagon. Napalig-on gid kita samtang ginahunahuna naton ining masinakripisyuhon nga mga alagad sang Dios. Kag bisan ang mga indi Saksi makatalupangod kon daw ano ka importante para sa aton ang aton ministeryo.

⁸ Sa isa ka sulat sa Boston Target sa Lincolnshire, United Kingdom, ang isa ka bumalasa nga indi Saksi nagsiling: “Nagakadula na ang  pagtuo sang mga tawo sa mga relihion . . . Ano ang ginahimo sining mga ministro sang simbahan sa bilog nga adlaw? Wala sila nagagua kag nagakadto sa mga tawo kaangay sang ginhimo ni Cristo . . . Ang relihion lamang nga daw nagaulikid amo ang mga Saksi ni Jehova, nga nagagua kag nagakadto sa mga tawo kag nagapakigbahin gid sa pagbantala sang kamatuoran.” Sa sining kalibutan nga madamo gid sing nagapatuyang, ang aton pagkamasinakripisyuhon may daku nga mahimo para mapadunggan si Jehova.—Roma 12:1.

9. Ano ang makapahulag sa aton para makapabilin nga makugi sa maayong mga buhat sa aton ministeryo?

⁹ Pero, ano ang puede naton himuon kon daw nagaugdaw na ang aton kakugi sa ministeryo? Makabulig gid kon pamalandungan naton ang ginahimo ni Jehova paagi sa pagbantala nga hilikuton. (Basaha ang Roma 10:13-15.) Ang kaluwasan nagadepende sa pagtawag sa ngalan ni Jehova nga may pagtuo, pero indi ina paghimuon sang mga tawo kon indi kita magbantala sa ila. Ang paghunahuna sa sini dapat magpahulag sa aton nga magpabilin nga makugi sa maayong mga buhat kag mangin mapisan sa pagbantala sang maayong balita sang Ginharian.

10. Ngaa ang aton maayo nga paggawi nagaganyat sa mga tawo kay Jehova?

¹⁰ Indi lang kakugi sa ministeryo ang kinahanglan para maganyat ang mga tawo nga magpalapit sa Dios. Ang ikaduha nga butang nga nagaganyat sa ila amo ang maayo nga paggawi subong Cristiano. Ginpadaku ni Pablo ang importansia sang aton paggawi sang nagsulat sia: “Wala gid kami nagahatag sang bisan ano nga kasandaran, agod wala sing makita nga sayop sa amon ministeryo.” (2 Cor. 6:3) Ang aton maayo nga panghambal kag matarong nga paggawi nagapatahom sa panudlo sang Dios, amo nga nangin makagalanyat sa iban ang pagsimba kay Jehova. (Tito 2:10) Ang matuod, pirme kita makabati sing positibo nga mga resulta sang natalupangdan sang sinsero nga mga tawo ang aton tulad-Cristo nga paggawi.

11. Ngaa dapat naton binagbinagon sing maayo ang mga epekto sang aton paggawi?

 ¹¹ Kon ang aton maayo nga ginahimo may positibo nga impluwensia sa mga tawo, ang malain nga paggawi wala gid nagaganyat sa ila kay Jehova. Gani sa trabaho man kita, sa balay, ukon sa eskwelahan, ginalikawan gid naton ang mga butang nga mangin basihan sang iban para pangitaan sing sayop ang aton ministeryo ukon ang aton paggawi. “Kon hungod kita nga maghimo sing sala,” madula sing bug-os ang aton kaangtanan kay Jehova. (Heb. 10:26, 27) Amo nga dapat gid naton binagbinagon sing maayo kon ano ang aton ginahimo kag kon ano ang masiling sang iban parte sa aton pagkabuhi. Samtang nagaluya ang talaksan sa moral sini nga kalibutan, labi pa gid nga makita sang sinsero nga mga tawo ang kinatuhayan “sang [isa nga] nagaalagad sa Dios kag sang [isa nga] wala nagaalagad sa iya.” (Mal. 3:18) Huo, ang aton maayo nga paggawi bilang Cristiano may importante nga papel para makapasag-uli ang mga tawo sa Dios.

12-14. Paano ang aton pagbatas sa mga pagtilaw may epekto sa pagtamod sang iban sa aton ministeryo? Maghatag sing halimbawa.

¹² Sang nagsulat si Pablo sa mga taga-Corinto, ginsambit niya nga nakaeksperiensia sia sing mga kapipit-an, kabudlayan, pagbunal, kag pagbilanggo. (Basaha ang 2 Corinto 6:4, 5.) Kon makaeksperiensia kita sing mga pagtilaw sa aton pagtuo, ang aton pagbatas makabulig sa iban nga batunon ang kamatuoran. Sa pag-ilustrar: Sang nagligad nga mga tinuig, gintinguhaan nga dulaon ang mga Saksi ni Jehova sa isa ka lugar sa Angola. Gin-aresto ang duha ka Saksi kag ang 30 ka interesado nga nagatambong sa aton miting. Dayon ang mga tawo nagtilipon para tan-awon ang paglatigo sang mga manugpamatok sa inosente nga mga biktima asta nga nagdulugo ang ila kalawasan. Ginlatigo man nila pati ang mga babayi kag kabataan. Ang ila tuyo amo nga pahugon ang mga tawo para wala na sing mamati sa mga Saksi ni Jehova. Pero pagkatapos sini nga hitabo, madamo sa komunidad ang nagpalapit sa mga Saksi kag nangabay sing pagtuon sa Biblia sa ila puluy-an! Gani, ang pagbantala sang Ginharian nagpadayon, nga nagresulta sing talalupangdon nga mga pag-uswag kag madamo nga pagpakamaayo.

¹³ Ini nga halimbawa nagailustrar nga may daku nga epekto sa iban ang aton panindugan sa mga prinsipio sang Biblia. Mahimo madamo gid ang napasag-uli sa Dios bangod sa maisog nga panindugan nanday Pedro kag sang iban pa nga apostoles. (Binu. 5:17-29) Sa aton bahin, mahimo batunon sang aton mga kaeskwela, katrabaho, ukon miembro sang aton pamilya ang kamatuoran kon makita nila ang aton panindugan sa kon ano ang matarong.

¹⁴ Masami nga makaeksperiensia sing paghingabot ang pila naton ka kauturan. Halimbawa, sa Armenia, mga 40 ka utod ang napriso bangod sa ila neutralidad, kag madamo pa ang mahimo prisuhon sa masunod nga mga binulan. Sa Eritrea, 55 ka alagad ni Jehova, nga ang iban sobra 60 anyos, ang ginpriso. Sa South Korea, mga 700 ka Saksi ang ginpriso bangod sa ila pagtuo. Mga 60 na ka tuig nga amo sini ang nagakatabo. Ipangamuyo naton nga ang katutom sang ginahingabot nga mga utod sa lainlain nga lugar magahimaya sa Dios kag magabulig sa mga mahigugmaon sa pagkamatarong nga manindugan sa matuod nga pagsimba.—Sal. 76:8-10.

15. Iilustrar kon paano ang pagkabunayag mahimo magganyat sa iban sa kamatuoran.

¹⁵ Ang aton pagkabunayag mahimo man magganyat sa mga tawo sa kamatuoran. (Basaha ang 2 Corinto 6:4, 7) Halimbawa, binagbinaga ini nga eksperiensia: Ang isa ka sister nagahulog sing kuarta sa ticket machine sang bus sang ginsilingan sia sang iya amiga nga indi na kinahanglan magbayad sang tiket kay kalapit man lang sang iya panaugan. Nagsiling ang sister nga mas maayo gihapon nga magbayad sang tiket bisan pa malapit lang. Pagkatapos sini, nanaug na ang iya amiga. Dayon, ginpamangkot sang drayber ang sister, “Saksi ni Jehova ka?” “Huo,” sabat niya. “Ngaa haw?” “Nabatian ko ang inyo paghambalanay parte sa pagbayad sang tiket, kag kabalo ko nga kamo nga mga Saksi ni Jehova nalakip sa pila na lang ka tawo nga nagahimo sina kag bunayag sa tanan nga butang.” Pila ka bulan sang ulihi, may lalaki nga nagpalapit sa sister sa miting kag nagsiling, “Nadumduman  mo pa ako? Ako ang drayber sang bus nga nag-istorya sa imo parte sa pagbayad sang tiket. Bangod sa imo maayo nga paggawi, nagdesisyon ako nga magpa-Bible study sa mga Saksi ni Jehova.” Ang aton pagkabunayag nagarekomendar sa aton subong masaligan nga mga ministro.

16. Ngaa ang mga kinaiya subong sang pagkamapinasensiahon, gugma, kag kaayo nagatandog sa tagipusuon sang mga tawo? Maghatag sing halimbawa kon ano ang ginahimo sang mga lider sang butig nga relihion.

¹⁶ Ginabuligan man naton ang mga tawo nga mabuyok kay Jehova kon ginapakita naton ang mga kinaiya subong sang pagkamapinasensiahon, gugma, kag kaayo. Ang iban nga nakatalupangod sa aton mahimo magtuon parte kay Jehova, sa iya mga katuyuan, kag katawhan. Ang panimuot kag paggawi sang matuod nga mga Cristiano tuhay gid sa pakitakita nga diosnon nga debosyon sang mga tawo nga salimpapaw sa ila pagsimba. Ang pila ka lider sang relihion nangin manggaranon paagi sa pagdaya sa ila mga panong. Gingamit nila ang kalabanan nga kuarta nga ila nakuha para magbakal sang malahalon nga mga balay kag salakyan—kag bisan gani sang erkon nga balaybalay sang ido. Huo, madamo sang nagapangangkon nga sumulunod sang Cristo ang indi gusto ‘maghatag nga wala sing bayad.’ (Mat. 10:8) Sa baylo, kaangay sang malaut nga mga saserdote sa Israel sadto, “nagatudlo [sila] tungud sa hinakay” ukon bayad—kag ang kalabanan sang ila ginatudlo wala nabase sa Kasulatan. (Miq. 3:11) Ining salimpapaw nga paggawi wala nagapasag-uli sa mga tawo sa Dios.

17, 18. (a) Paano naton ginapadunggan si Jehova kon ginapakita naton ang iya mga kinaiya? (b) Ano ang nagapahulag sa imo nga magpadayon sa maayong mga buhat?

¹⁷ Sa pihak nga bahin, nagakatandog ang tagipusuon sang mga tawo bangod sa matuod nga Cristianong mga panudlo kag maayong mga buhat nga ginahimo sa iban. Halimbawa, samtang nagapamalaybalay ang isa ka payunir, wala sia ginbaton sang tigulang nga balo nga babayi. Nagsiling ang balo nga sang nag-doorbell ang payunir, ara sia sa kusina kag nagasaka sa hagdan para ilisan ang ila bombilya. “Delikado nga ikaw lang isa ang maghimo sina,” siling sang payunir. Gin-ilisan sang payunir ang bombilya kag dayon naglakat. Sang nahibaluan sang bata sang balo ang natabo, nagdayaw gid sia sa ginhimo sang utod amo nga ginpangita niya sia para pasalamatan. Sang ulihi, ginbaton niya ang pagtuon sa Biblia.

¹⁸ Ngaa determinado ka nga magpadayon sa maayong mga buhat? Ayhan bangod nahibaluan mo nga kon ipakita naton ang kakugi sa aton ministeryo kag himuon ang mga butang suno sa kabubut-on sang Dios, ginapadunggan naton si Jehova kag ginabuligan ang iban nga maluwas. (Basaha ang 1 Corinto 10:31-33.) Ang kakugi sa pagbantala sing maayong balita kag paggawi sing diosnon nagahalin sa tudok nga handum nga ipakita ang gugma sa Dios kag sa isigkatawo. (Mat. 22:37-39) Kon makugi kita sa maayong mga buhat, mangin malipayon gid kita karon. Isa pa, ginapaabot naton ang adlaw nga ang tanan nga katawhan magapakita sing kakugi sa matuod nga pagsimba bilang pagpadungog sa aton Manunuga, si Jehova.