1, 2. Ania a naisangsangayan a dayaw ti ik-ikutan dagiti Saksi ni Jehova, ken ania ti panagriknam iti dayta?

ADU ti mangibilang a dakkel a dayaw ti mapadayawan gapu iti nasayaat a nagapuananda. Kas pagarigan, nakagun-od dagiti dadduma iti Nobel Prize gapu iti panangikagumaanda a mamagkappia kadagiti aggingginnura a nasion. Ngem anian a dakdakkel a dayaw ti maibaon kas embahador ti Dios a tumulong kadagiti tattao a makikappia iti Namarsua!

² Kas Saksi ni Jehova, datayo laeng ti addaan iti kasta a naisangsangayan a dayaw. Imbilin ti Dios ken ni Kristo nga ipakaasitayo kadagiti tattao a ‘makikappiada iti Dios.’ (2 Cor. 5:20) Us-usarennatayo ni Jehova tapno mayadani kenkuana dagiti tattao. Iti kastoy a pamay-an a natulongan dagiti minilion a tattao manipud iti nasurok a 235 a pagilian a maaddaan iti nasayaat a relasion iti Dios ken iti namnama a biag nga agnanayon. (Tito 2:11) Sireregta a yaw-awistayo iti “asinoman a mayat [nga] awatenna koma ti danum ti biag nga awan bayadna.” (Apoc. 22:17) Gapu ta ipatpategtayo daytoy nga annongen ken sipipinget nga itungtungpaltayo, maitutop laeng a maawagantayo kas ili a “naregta iti nasayaat nga ar-aramid.” (Tito 2:14) Usigentayo ita no kasano a ti kinaregtatayo iti nasayaat nga ar-aramid matulonganna dagiti tattao nga umadani ken Jehova. Ti maysa a pamay-an isu ti panangasabatayo.

3. Ania ti ipasigurado kadatayo ti “mismo a regta ni Jehova”?

³ Maipapan iti ibanagto ti panagturay ti Anak ti Dios, kuna ti Isaias 9:7: “Ti mismo a regta ni Jehova ti buybuyot aramidennanto daytoy.” Ipaganetget dagita a sasao a pudno a maseknan ti nailangitan nga Amatayo iti pannakaisalakan dagiti tattao. Naimpusuan, sigagagar, ken sireregta koma a suportarantayo ti trabaho a panagebanghelio gapu ta naregta ni Jehova a Dios. Mayanninawtayo ti regta ni Jehova no nasged ti tarigagaytayo a tumulong kadagiti tattao a mangammo iti Dios. Kas katrabahuan ti Dios,  ar-aramidentay kadi ti amin a kabaelantayo a makiraman iti pannakaipakaammo ti naimbag a damag?—1 Cor. 3:9.

4. Kasano nga impakita ni Jesus ti perpekto nga ulidan ti kinaregta iti ministerio?

⁴ Usigem met ti regta ni Jesus. Nangipakita iti perpekto nga ulidan ti kinaregta iti ministerio. Nupay mabusbusor, nagtalinaed a naregta iti trabaho a panangasaba agingga iti nasaem a panagpatingga ti naindagaan a biagna. (Juan 18:36, 37) Bayat nga umas-asideg idin ti ipapatay ni Jesus, ad-adda a determinado a tumulong iti sabsabali a mangammo ken Jehova.

5. Kasano a nagtignay ni Jesus maitunos iti ilustrasionna mainaig iti kayo a higos?

⁵ Idi otonio (Oktubre-Nobiembre) ti 32 C.E., kas pagarigan, insalaysay ni Jesus ti ilustrasion maipapan iti lalaki nga adda maysa a kayo a higos iti kaubasanna. Tallo a tawenen a di agbungbunga dayta a kayo. Idi imbaga ti lalaki iti agay-aywan iti kaubasan a pukanenna ti kayo, kiniddawna a maikkan iti gundaway a mangganagan iti dayta. (Basaen ti Lucas 13:6-9.) Sumagmamano pay laeng idi dagiti adalan a bunga ti panangasaba ni Jesus. Ngem kas ipakita ti ilustrasion maipapan iti agay-aywan iti kaubasan, inusar ni Jesus ti nabatbati nga ababa a tiempona—agarup innem a bulan—tapno agawaanna ti mangasaba idiay Judea ken Perea. Sumagmamano nga aldaw sakbay ti ipapatayna, sinangitan ni Jesus dagiti kailianna a ‘dimngeg ngem saan a nagtignay.’—Mat. 13:15; Luc. 19:41.

6. Apay a masapul nga agawaantayo ti makiraman iti ministerio?

⁶ Gapu ta nakaas-asidegtayon iti panungpalan, saan kadi a nasken laeng nga agawaantayo ti mangasaba? (Basaen ti Daniel 2:41-45.) Anian a nagsayaat a pribilehio ti agbalin a Saksi ni Jehova! Datayo laeng ti addaan iti mensahe a makaipaay iti solusion kadagiti problema ti sangatauan. Maysa a kolumnista iti pagiwarnak ti nangibaga nga imposible a masungbatan ti saludsod nga, “Apay a mapasamak dagiti dakes a bambanag kadagiti naimbag a tattao?” Pagrebbengan ken pribilehiotayo kas Kristiano nga iranud ti sungbat ti Biblia kadagiti kasta a saludsod kadagidiay sidadaan a dumngeg. Rumbeng laeng a ‘nasgedtayo iti espiritu’ bayat nga itungtungpaltayo ti annongentayo manipud iti Dios. (Roma 12:11) Babaen ti pamendision ti Dios iti naregta a panangasabatayo, matulongantayo dagiti dadduma a mangammo ken mangayat ken Jehova.

7, 8. Kasano a maidayaw ni Jehova gapu iti panagsakripisiotayo?

⁷ Ipasimudaag dagiti kapadasan ni apostol Pablo a mabalin nga adda ‘rabii a ditay makaturog’ ken gundaway a ‘ditay makapangan’ gapu iti ministeriotayo. (2 Cor. 6:5) Ipakita dagitoy a sasao ti kaipapanan ti panagsakripisio. Ipalagipda kadatayo dagiti payunir a mangyun-una iti ministerioda bayat a supsuportaranda ti pinansial a kasapulanda. Usigem met ti kasasaad dagiti napinget a misionerotayo a ‘mangiparparukpok iti bagbagida a kasla daton nga inumen’ tapno makapagserbida kadagiti tattao iti sabali a pagilian. (Fil. 2:17) Dagiti met ngay nasaet a panglakayen nga uray la saanen a mangan wenno maturog no dadduma gapu iti panangaywanda kadagiti karnero ni Jehova? Adda met dita dagiti natataenganen ken dagiti nakapuy ti salun-atda ngem ar-aramidenda ti amin a kabaelanda a tumabuno kadagiti gimong ken makiraman iti panangasaba. Maapresiartayo dagitoy nga adipen ti Dios no panunotentayo ti adu a panagsakripisioda. Mapalpaliiw met ti sabsabali no kasano kapateg kadatayo ti ministeriotayo.

⁸ Iti maysa a surat iti pagiwarnak a Boston Target iti Lincolnshire, United Kingdom, kinuna ti maysa a managbasa a saan a Saksi: “Mapukpukawen ti talek dagiti tattao iti relihion . . . Ania ti ar-aramiden dagiti ministro ti relihion iti intero nga agmalem? Saanda a rumrummuar a kas ken Jesus a  mapan makisarita kadagiti tattao . . . Ti laeng relihion nga agparang a maseknan ket dagiti Saksi ni Jehova, a rummuarda a makisarita kadagiti tattao ken naimpusuan nga ikaskasabada ti kinapudno.” Iti daytoy a lubong nga agraraira ti panangpennek laeng iti bagi, dakkel ti maaramidan ti panagsakripisiotayo tapno maidayaw ni Jehova a Dios.—Roma 12:1.

9. Ania ti mangtignay kadatayo nga agtalinaed a naregta iti nasayaat nga ar-aramid iti ministeriotayo?

⁹ Ngem ania ti mabalin nga aramidentayo no kasla mapukpukaw ti regtatayo iti ministerio? Makatulong ti panangmennamenna iti itungtungpal ni Jehova babaen ti trabaho a panangasaba. (Basaen ti Roma 10:13-15.) Maisalakan dagiti tattao no umawagda iti nagan ni Jehova buyogen ti pammati, ngem saanda a maaramid dayta no ditay kasabaan ida. No bigbigentayo daytoy, magutugottayo nga agtalinaed a naregta maipaay iti naimbag nga ar-aramid ken umagawa a mangiwaragawag iti naimbag a damag ti Pagarian.

10. Apay a makunatayo a ti nasayaat a kababalintayo maallukoyna dagiti tattao nga umadani ken Jehova?

¹⁰ Nupay napateg ti regtatayo iti ministerio, saan nga umanay dayta tapno maallukoy dagiti tattao nga agdayaw iti Dios. Kasapulan met ti nasayaat a Nakristianuan a kababalin. Impaganetget ni Pablo a napateg ti kababalintayo idi insuratna: “Saankami a pulos mangmangted ti aniaman a pakaigapuan ti pannakaitibkol, tapno ti ministeriomi saan koma a masarakan nga addaan biddut.” (2 Cor. 6:3) Gapu iti nasayaat a panagsasao ken kababalintayo, mabalin a maatrakar dagiti tattao nga agdayaw ken Jehova. (Tito 2:10) Kinapudnona, masansan a makadamagtayo iti nagsayaat a resulta no mapaliiw dagiti nasingpet a tattao ti Nakristianuan a kababalintayo.

11. Apay a masapul nga usigen ken ikararagtayo ti epekto ti kababalintayo iti sabsabali?

¹¹ Nupay bigbigentayo a maimpluensiaan nga agaramid iti naimbag dagiti tattao gapu iti  tigtignaytayo, adda met ngarud epekto kadakuada no di nasayaat ti kababalintayo. Isu nga addatay man iti pagtrabahuan, pagtaengan, wenno eskuelaan, ikagumaantayo ti saan nga agaramid iti aniaman a banag a panggapuanda a mangbabalaw iti ministerio ken kababalintayo. No sipapakinakem nga iyugalitayo ti agbasol, datayo met laeng ti agsagaba. (Heb. 10:26, 27) Daytoy koma ti mangtignay kadatayo a mangusig ken mangikararag iti tigtignaytayo ken iti epektona iti sabsabali. Bayat a bumabbaba ti moralidad daytoy a lubong, nabatad koma a ‘makita ti pagdumaan daydiay agserserbi iti Dios ken daydiay saan nga agserserbi kenkuana.’ (Mal. 3:18) Wen, ti nasayaat a Nakristianuan a kababalintayo ket napateg iti panangtulongtayo kadagiti tattao a maikappia iti Dios.

12-14. Kasano a ti panangibturtayo kadagiti pakasuotan pasayaatenna ti panangmatmat ti sabsabali iti ministeriotayo? Mangted iti pagarigan.

¹² Iti surat ni Pablo kadagiti taga-Corinto, dinakamatna a nagsagaba kadagiti rigat, pannakaidadanes, pannakababaut, ken pannakaibalud. (Basaen ti 2 Corinto 6:4, 5.) No ibturantayo dagiti pakasuotan, mabalin a matignay ti sabsabali nga umawat iti kinapudno. Kas pagarigan, sumagmamano a tawenen ti napalabas, implano dagiti bumusbusor a paksiaten dagiti Saksi ni Jehova iti maysa a lugar iti Angola. Bayat ti gimong, inarestoda ti dua a bautisado a Saksi ken 30 nga interesado a tattao. Kalpasanna, inummongda dagiti lumugar ket impabuyada ti pannakasapsaplit dagitoy nga inosente a tattao agingga a nagdardarada. Inramanda pati dagiti babbai ken ubbing. Inrantada dayta tapno mapabutngan dagiti umili ket saandan a dumngeg kadagiti Saksi ni Jehova. Ngem kalpasan dayta a pasamak, adu a lumugar ti immasideg kadagiti Saksi tapno agpayadalda iti Biblia. Nagbanaganna, nagtultuloy ti trabaho a panangasaba, adu ti immawat iti kinapudno, ken nabendisionan dagiti kakabsat.

¹³ Ipakita daytoy a pagarigan a mabalin nga awaten dagiti tattao ti kinapudno no makitada ti turedtayo a mangsalimetmet kadagiti prinsipio ti Biblia. Mabalin a masdaawtayo iti kaadu ti naikappia iti Dios gapu iti tured ni Pedro ken ti dadduma pay nga apostol. (Ara. 5:17-29) No dagiti kaeskuelaan, katrabahuan, wenno kapamiliatayo makitada ti reggettayo a mangaramid iti umiso, mabalin nga awatenda met ti kinapudno.

¹⁴ Kanayon nga adda dagiti kakabsattayo a maidaddadanes. Kas pagarigan, idiay Armenia, agarup 40 a kakabsat ti adda iti pagbaludan gapu iti neutral a takderda, ket adu pay ti posible a maibalud iti sumaganad a bulbulan. Idiay Eritrea, naibalud ti 55 nga adipen ni Jehova, a sumagmamano ti agedaden iti nasurok nga 60. Idiay South Korea, agarup 700 a Saksi ti naibalud gapu iti pammatida. Kasta ti mapaspasamak sadiay iti nasuroken nga 60 a tawen. Ikararagtayo a ti kinamatalek dagiti maidaddadanes a kakabsattayo iti nadumaduma a daga ket mangipaay iti dayaw iti Dios ken tumulong kadagiti managayat iti kinalinteg a mangawat iti pudno a panagdayaw.—Sal. 76:8-10.

15. Isalaysaymo ti maysa a kapadasan a mangipakita a mabalin nga aginteres iti kinapudno ti dadduma gapu iti kinamapagpiarantayo.

¹⁵ Mabalin met a matignay dagiti tattao nga aginteres iti kinapudno gapu iti kinamapagpiarantayo. (Basaen ti 2 Corinto 6:4, 7.) Kas pagarigan, usigentayo daytoy a kapadasan: Maysa a kabsat a babai ti agbaybayad iti ticket machine iti bus idi kinuna ti kaduana a saanen a kasapulan nga agbayad ta asideg met laeng ti papananna. Inlawlawag ti kabsat nga agbayad latta uray no agdissaag laeng iti sumaganad a pagsardengan ti bus. Idi kuan, dimsaagen ti kaduana. Gapu iti dayta, dinamag ti drayber iti daytoy a kabsat, “Maysaka kadi a Saksi ni Jehova?” “Wen,” insungbatna, “Apay kadi?” “Nangngegko ngamin ti saritaanyo maipapan iti panagbayad iti tiket, ket ammok a maysa dagiti Saksi ni Jehova kadagiti manmano a mangaramid iti kasta ken mapagpiaranda iti amin a banag.” Sumagmamano a bulan kalpasanna, iti maysa  a gimong, adda lalaki nga immasideg iti daytoy a kabsat ket kinunana, “Malasinnak pay kadi? Siak daydi drayber a nakisarita kenka maipapan iti panagbayad iti tiket. Idi nakitak ti nasayaat a kababalinmo, inkeddengko ti makipagadal iti Biblia kadagiti Saksi ni Jehova.” No makita dagiti tattao a mapagpiarantayo, agtalekda iti naimbag a damag nga ikaskasabatayo.

16. Ania ti epektona kadagiti tattao no ipakitatayo ti mabayag a panagitured, ayat, ken kinaimbag? Mangted iti pagarigan.

¹⁶ No iparangarangtayo dagiti galad kas iti mabayag a panagitured, ayat, ken kinaimbag, matulongantayo dagiti tattao a mangam-ammo iti Dios. Ti dadduma a makakitkita kadatayo mabalin a matignayda a mangammo ken Jehova, kadagiti panggepna, ken iti ilina. Ti kababalin ken tigtignay dagiti pudno a Kristiano ket naiduma unay kadagidiay addaan iti pammarang laeng a debosion. Bimmaknang ti dadduma a lider ti relihion gapu ta kukuartaanda dagiti miembroda, nga us-usarenda ti naur-orda a kuarta a paggatang iti nangingina a balay ken lugan—iti maysa a kaso, naigatang dayta iti de-aircon a balay ti aso. Kinapudnona, adu nga agkunkuna a pasurot ni Kristo ti saan a mangsursurot iti bilinna a ‘mangtedda nga awan bayadna.’ (Mat. 10:8) Imbes ketdi, kaslada kadagiti nasukir a papadi iti nagkauna nga Israel a ‘mangisursuro maipaay laeng iti maysa a gatad.’ (Mik. 3:11) Ti kasta a kinamanaginsisingpet dina matignay ti sabsabali a makikappia iti Dios.

17, 18. (a) Kasano a maidayawtayo ni Jehova no iparangarangtayo dagiti kualidadna? (b) Ania koma ti pakatignayam nga agtultuloy nga agaramid iti nasayaat?

¹⁷ Iti sabali a bangir, matignay ti puso dagiti tattao gapu iti pudpudno a Nakristianuan a sursuro ken iti makitkitada a nasayaat nga ar-aramidtayo. Kas pagarigan, bayat ti panagbalaybalayna, maysa a payunir a lalaki ti pappapanawen ti maysa a balo a baket. Imbaga ti babai nga idi nangngegna ti uni ti doorbell, adda iti kosina ken nakabatay iti agdan a marigrigatan a mangsukat iti bombilia. “Delikado nga agmaymaysakayo a mangaramid iti dayta,” kinuna ti payunir ket isun ti nangsukat iti bombilia sa pimmanaw. Idi naammuan dayta ti lalaki nga anak ti baket, nagbilib ket sinapulna ti kabsat tapno agyaman. Idi agangay, nagpayadal iti Biblia dayta a lalaki.

¹⁸ Apay a determinadoka nga agaramid iti nasayaat? Nalabit gapu ta ammom a no naregtatayo iti ministerio ken agreggettayo a mangaramid iti pagayatan ti Dios, maidaydayawtayo ni Jehova ken makatulongtayo iti pannakaisalakan ti sabsabali. (Basaen ti 1 Corinto 10:31-33.) Naregtatayo a mangikasaba iti naimbag a damag ken ipakpakitatayo dagiti nadiosan a kababalin gapu iti napasnek a tarigagaytayo a mangipakita iti ayattayo iti Dios ken iti padatayo a tao. (Mat. 22:37-39) No naregtatayo iti nasayaat nga ar-aramid, maaddaantayo ita iti pudpudno a ragsak ken pannakapnek. Kanayonanna, manamnamatayo a dumtengto ti aldaw a ti amin a tattao ket agbalin a naregta maipaay iti pudno a panagdayaw, a pakaitan-okan ti Namarsua kadatayo, ni Jehova.