1, 2. Kijingu kiahi kia tokala ngó ku Jimbangi ja Jihova, ni kiebhi ki u divua?

ATHU avulu, a sanguluka kioso kia a a bhana kijingu mukonda dia ku bhanga kikalakalu kiambote. Mu kifika, saí athu a a bhana kijingu kioso kia kuatekesa kifuxi ku kala ni ku tululuka ni kifuxi kia mukuá. Maji o kijingu kia beta-o-kota, o kijingu ki tu tambula kua Nzambi kioso ki tu kuatekesa athu ku kala ni ukamba ni muéne!

² O Jimbangi ja Jihova ene ngó ala ni kijingu kiki. Nzambi ni Kristu a tu tendelesa ku kuatekesa athu ‘ku kala dingi mu ukamba ni Nzambi mu veji dia ku kala nguma iê.’ (2 Kol. 5:20) Jihova muéne ua mu tu tumina o ku kuatekesa athu ku mu zukama. Mukonda dia kiki athu avulu mu 235 a jixi, a a kuatekesa ku kala ni ukamba uambote ni Nzambi, ni ku kala ni kidielelu kia ku tambula o muenhu ua kalelaku ku hádia. (Tito 2:11) Tua suína mu ku boka, phala ku kuatekesa “uoso uandala, a tambule o menha ma muenhu mu [kingó.]” (Dij. 22:17) Mukonda dia kuzola o kikalakalu kiki, ni ku suína, a tu ixana “mundu ua suína mu ku bhanga o ima ia mbote.” (Tito 2:14) Tu di longe kiebhi o ku suína kuetu mu ku bhanga o ima ia mbote, kuene mu kuatekesa athu ku zukama kua Jihova. Kia dianga, mu ku boka o njimbu iambote.

3. Kidielelu kiahi ki tu bhana “o [muanhu] ua Jihova?”

³ Mu ku tumbula o ima ia-nda bhanga o Mon’â Nzambi ku utuminu uê, mu divulu dia Izaia 9:7 tu tanga: “O [muanhu] ua Jihova dia Ilômbo Ieta uene ua-nda ku bhanga kienhiki.” O izuelu íii ilondekesa kuila o Tata ietu ia diulu ua mesena ku bhulula o athu mu ixi. O muanhu ua Jihova, ulondekesa kuila o kikalakalu kia ku boka o Njimbu kia tu bhana Jihova, tua tokala tu ki bhanga ni muxima uoso ni ku suína ni kisangusangu. O ku suína kuetu mu ku kuatekesa athu kuijiia Nzambi, kulondekesa kuila tua mu kaiela o phangu ia ku suína kua Jihova.  Eie ua mu kalakala kumoxi ni Nzambi, o kuila ua mu bhanga ioso phala ku boka o njimbu iambote, kála ki ua tena?—1 Kol. 3:9.

4. Kiebhi Jezú kia bhana phangu ia ku kolokota ni ku suína mu ukunji?

⁴ Xinganeka ué o muanhu ua Jezú. Muéne ua xisa phangu iambote ia ku kolokota ni muanhu mu ukunji. Sumbala ni kizukutisu kia bhitile nakiu, muéne ua kolokotele mu ku boka katé kiafu. (Nzuá 18:36, 37) Mukonda dia kuijiia kuila o kufuá kuê kua zukamene, Jezú ua kalakalele kiavulu phala ku kuatekesa athu kuijiia Jihova.

5. Kiebhi kia londekesa Jezú kuila ua difuanganene ni kidimakaji kia mufiku mu kifika?

⁵ Ku muvu ua 32 K.K, Jezú ua bhangele kifika kia diiala ua kexile ni muxi ua mufiku mu díbhia diê, ua kambele o kuima ibundu ku mivu itatu. Kioso kia tumina ku kidimakaji kiê phala ku batula o muxi, muéne ua bhingi kithangana phala ku u dimina mu jimbandu ni ku u ta dibote mba mbosa. (Tanga Luka 13:6-9.) Kioso kia zuela kiki Jezú ka kexile luua ni maxibulu avulu, exile ibundu ia bhongoluele mu ukunji uê. Maji o kifika kia kidimakaji kia londekesa kuila Jezú ua kalakalele mu kithangana kia tolo kia kexile nakiu—mu ku boka mbeji ji samanu—mu Judeia ni mu Peleia, ande dia kufuá kuê, ua didile o akua ixi iê, ‘a kexile mu kuívua maji a ditunine ku bhanga kima.’—Mat. 13:15; Luka 19:41.

6. Mukonda diahi tua tokala ku suína dingi mu ukunji uetu?

⁶ Mu kuijiia kuila tuala mu izuua isukidila, ki tu tokala ku kalakala dingi mu sidivisu ia ku boka? (Tanga Daniiele 2:41-45.) Ujitu ua dikota ku kala Mbangi ia Jihova! O jimbangi ja Jihova ene ngó ku mundu a bhana ku athu o kidielelu phala ku batula o maka. Saí musoneki ua jurnale uambe kuila o kibhuidisu, “Mukonda diahi o athu ambote a bhita ni maka?” ki kiala ni kitambuijilu. Kikalakalu kietu ku tambuijila o kibhuidisu kiki ku athu a mesena kuívua bhu kaxi ka Bibidia. Ima iavulu i tu bhangesa ku kala “ni muxima ua fulujuka.” (Loma 12:11) Ni dibesá dia Jihova mukonda dia kikalakalu kietu, etu tua-nda kuatekesa athu ku muijiia ni ku mu zola.

7, 8. Kiebhi o vondadi ietu ia ku di bhakula i bhana kijingu kua Jihova?

⁷ Kála kia bhitile ni poxolo Phaulu, o ukunji uetu u tena ku tu bhangesa ku“fula muene o kilu” mba “sè kuta dikoka [mu] dikanu.” (2 Kol. 6:5) O izuelu íii ilondekesa o ku di bhakula kuetu, i tu lembalesa ué o aboki a thembu ioso ene mu ta ku pholo o ukunji ku mienhu iâ, maji né kiki a kalakala phala ku dikila o ibhindamu iâ. Xinganeka ué o akunji ene mu kalakala kiavulu mu jixi jengi, phala ku kuatekesa o athu. (Fil. 2:17) Ihi i tuamba ia lungu ni tufunga tu’etu ene mu fula o kilu mba sé kudia, phala ku langa o jimbudi ja Jihova? Tuala ué ni a dietu a kuka kiá, ni ió a kambe o sauidi, a mu bhanga ioso phala kuia mu iônge ni ku boka. O mixima ietu i sanguluka kioso ki tu banza o nguzu iene mu bhanga o jiselevende ja Nzambi. O nguzu ia bhanga, ilondekesa ku athu kuila o ukunji uetu uala ni valolo ia dikota.

⁸ Saí muthu ki mbangi ia Jihova ua sonekena ku ditenda dia ikalakalu Lincolnshire Boston Target, Reino Unido, uambe: “O athu o kixikanu kiâ ku jingeleja, kia mu bhua . . . Ihi ia mu bhanga o atuameni a jingeleja jiji izuua ioso? Ene kene múia mu ikoka mu ku zuela ni athu, kála kia bhangele Kristu . . . Ene ngó mu bhanga kiki o Jimbangi ja Jihova, ene múia mu ikoka mu boka o kidi ku athu.” Ku mundu iú uezala ni athu a di banza ngó mudia, maji o ku di bhakula mu kikalakalu, ku boka o kidi ku athu ki bhana kijingu kua Jihova Nzambi.—Loma 12:1.

9. Ihi i tena ku tu kuatekesa ku suína mu ku bhanga ima ia mbote mu ukunji uetu?

 ⁹ Ihi i tua tokala ku bhanga phala ku suína dingi mu ukunji uetu kála ki tua kexile? Tua tokala ku xinganeka ia mu bhanga Jihova phala ku kuatekesa o athu bhu kaxi ka njimbu iambote. (Tanga Loma 10:13-15.) O athu a tokala ku kala ni kixikanu kua Jihova ni ku boka o dijina diê phala ku bhuluka, maji ene ka tena ku bhanga kiki, se ki tu a bokela o kidi. O kuijiia o kidi kiki, ki tu bhangesa ku suína mu ku bhanga o ima ia mbote, ni ku bhanga ioso phala ku boka o njimbu iambote ia Utuminu.

10. Mukonda diahi o ukexilu uetu uambote u sunga o athu phala kuijiia Jihova?

¹⁰ Ki ku bhingi ngó ku suína mu ukunji phala ku kuatekesa o athu kuijiia Nzambi. Ku bhinga ué o Kidistá, u kala ni ukexilu uambote phala ku kuatekesa o athu kuijiia Nzambi. Phaulu ua jimbulula o valolo ia ku kala ni ukexilu uambote kioso kia soneka: “Kana kubhanga kima kioso-kioso ki bhangesa mukuenu ku di bhala, phala o ungunza uetu ki u kale ni malebhu.” (2 Kol. 6:3) O uzuelelu uetu ua mbote ni ukexilu uetu, u fuamesa o ubhezelu ua Nzambi u tena ué ku sunga athu kua Jihova. (Tito 2:10) Mu kidi, tuene mu kuívua athu ene mu bhana umbangi ua ukexilu uetu ua mbote ua Kidistá.

11. Mukonda diahi tua tokala ku samba ia lungu ni phangu i tua tokala ku bhana ku athu?

¹¹ Kála o ukexilu uetu uambote u bhangesa o athu ku mesena kuijiia o kidi, o ukexilu uetu ua iibha u tena ué ku bhangesa o athu ku kamba o vondadi ia kuijiia Jihova. Ki kale ku salu mba bhu xikola, ki tu tokala ku bhanga ima i bhangesa muthu ku sondoloka kua Jihova. Se o ituxi tu i tona ku i ta mu luelu, tu tena ku texi o ukamba uetu ni Jihova. (Jihe. 10:26, 27)  Kienhiki tua tokala tu samba ia lungu ni ukexilu uetu, phala tu bhane phangu iambote ku akuetu. Tua mu mona kuila o ukexilu uambote ku mundu iú, ua mu bhua, mu kiki tu tena ku ‘mona o katungu . . . bhu kaxi ka ió u bheza Nzambi, ni ió ua ditunu ku mu bheza.’ (Mal. 3:18) O ukexilu uambote ua Jikidistá u tena ku kuatekesa o athu ku kala dingi ni ukamba ni Nzambi.

12-14. Kiebhi o ku suína kuetu mu ji polova ku kuatekesa o athu mu ukunji uetu? Bhana phangu.

¹² Mu mukanda uê ua kaiiadi ua sonekena akua Kolindo Phaulu ua tange kuila ua bhitile mu jiphaxi, kála kibetu, ni ku mu ta mu kaleia. (Tanga 2 Kolindu 6:4, 5.) Kioso ki tu bhita mu ji polova jiji, o ku suína kuetu ku tena ku kuatekesa o athu ku xikina o kidi. Mu kifika, ku mivu ia bhiti, saí kididi mua Ngola a mesenene ku buika o jimbangi ja Jihova. Jimbangi 2 ni 30 athu a kexile mu di longa o Bibidia, akexile mu kiônge, a a kondolokele ia a bhanene kibetu kia dikota katé kia tundu manhinga. Bhu kididi bhua kexile mua betela, o athu a zukamene phala ku tala kiebhi kia kexile mu a beta. O ahatu ni ana-ndenge a a betele ué. O jinguma akexile mu bhanga kiki phala o athu n’a kale ni uôma, n’a lembua kuívua o Jimbangi ja Jihova. Maji kioso kia zubha ku a beta, athu avulu mu kididi kieniókio a bhingile ku Jimbangi ja Jihova phala ku a longa o Bibidia! Mu kiki o jiphange a suluka ni ku boka, ene a tambula mabesá avulu.

¹³ O phangu íii ilondekesa kuila, kioso ki tu kolokota mu ku belesela o itumu ia Bibidia, ki bhangesa akuetu ku xikina o kidi. Nange tu diuana kioso ki tu tanga mu Bibidia o athu o ku kituka dingi makamba a Nzambi mukonda dia ku suína kua Phetele ni jipoxolo ja mukuá. (Ika. 5:17-29) O athu u tuene mu longa, ni jikoleka jetu, mba o jindandu jetu a tena ku xikina ku di longa o Bibidia kioso kia mona kuila tua mu bhanga o ima iambote.

¹⁴ Mu ithangana ioso kuene jiphange jetu ene mu a zukutisa. Mu kifika, mu ixi ia Armênia 40 a jiphange jetu ala mu kaleia mukonda dia ku dituna ku di ta mu maka a mundu, saí a mukuá ki tuijiia luua, maji nange a-ndaia ué mu kaleia mu jimbeji ku pholo. Ku ixi ia Eritreia 55 kia jiphange ala mu kaleia, saí iá ala mu kitala kia 60 a mivu. Ku ixi ia Corea do Sul, 700 a jimbangi ja Jihova ala mu kaleia, mukonda ka mesena kuia mu ita. O jiphange jetu a bhiti 60 a mivu mu kaleia. Tu sambie-nu kua Jihova phala o kixikanu kia jiphange jetu a mu a zukutisa ku mundu uoso, ki bhane kijingu kua Nzambi, ni ku kuatekesa o athu a mesena o kuiuka, ku xikina o ubhezelu ua kidi.—Jisá. 76:8-10.

15. Tanga musoso ulondekesa kuila o ku kala tu athu a kidi, ku bhangesa o athu ku di longa o Bibidia.

¹⁵ Se tu kala tu athu a kidi, o athu a-nda mesena ku di longa o kidi. (Tanga 2 Kolindu 6:4, 7.) Xinganeka o musoso iú: “Phang’etu ua kexile mu sumba bilhete mu maximbombo, kioso kia mu ambela ku kamba diê kuila muéne ka tokalele ku futa mukonda keji kuenda njila ia lebha. O phang’etu ua mu ambela kuila muéne ua tokalele ku futa né muéne se ueji tulukila bhua zukama. Kia mu ambela kiki, o kamba diê ua tulukila mu maximbombo. Mu kithangana kieniókio o xofelu ua uebhuidisa o phange: “Eie u Mbangi ia Jihova?” O phange ua tambuijila: “Kiene. Mukonda diahi ua mu ngi bhuidisa?” “Ngevu kioso ki mua kexile mu zuela ia lungu ni ku sumba o bilhete, ngejiia kuila o Jimbangi ja Jihova ene ngó a bhanga kiki, ene athu a kidi mu ima ioso.” Mu ku bhita jimbeji, o diiala didi ua zukama kua phang’etu mu kiônge iu uambe: “Eie ua ngejiia? Eme ngi xofelu ia maximbombo mu tua kexile mu ta o maka a lungu ni bilhete.  Kioso ki nga mono o ukexilu uê, eme nga mateka ku di longa o Bibidia ni Jimbangi ja Jihova.” Kioso ki tu londekesa kuila tu athu a kidi, o athu a dielela ku njimbu iambote i tu boka, mukonda tu zuela o kidi.

16. Mukonda diahi o ídifua kála o henda, o ku xixidika ni kulenduka ku bhangesa o athu ku xikina o kidi? Bhana phangu.

¹⁶ Tu tena ué ku kuatekesa athu ku zukama kua Jihova, kioso ki tu londekesa o ídifua kála o henda, ku xixidika, ni kulenduka. Saí athu a tu mona, a mesena ku di longa ia lungu ni Jihova, ni ikanenu iê ni mundu uê. O ukexilu ni uendelu uambote ua Jikidistá ja kidi, ki u difu ni athu a mukuá amba kuila Jikidistá, maji akua makutu. Saí atuameni a jingeleja a kituka jimvuama mukonda a nganala o jimbudi jâ, a tambula kitadi phala ku sumba jinzo ja te kalu ni makalu, katé muene a tunga jinzo ja katunda, muala ni mulenge ua talala phala o jímbua. Mu kidi athu avulu amba kuila akaiedi a Kristu, maji ka ‘bhana mu ngalasa.’ (Mat. 10:8) Mu veji dia kiki, a difu ni akunji mu Izalaiele iokulu, ‘mu ku longa, a longa ni ku kingila ku a futa’—o ima ia kexile mu longa, ka kexile mu i katula mu Bibidia. (Mik. 3:11) O uendelu iú ki u zukamesa muthu kua Nzambi.

17, 18. (a) Kiebhi ki tu ximana Jihova kioso ki tu londekesa ukexilu uambote ku muenhu uetu? (b) Mukonda diahi ua mesena ku suína mu ku bhanga ima iambote?

¹⁷ Maji o athu a mesena o ukamba ni Nzambi, kioso kia mona kuila tua mu longa o kidi, ni ima iambote i tu bhanga ku jivizinhu jetu. Mu kifika saí muboki ua kexile mu boka nzo ni nzo, ia mu kaie ku kavela uexile mutudi. Muéne uambe kuila kioso o muboki kia phuphu ku di bhitu, muéne ua bandele mu xikata mu ta lampada iéngi mu dixilu dia ku lambela. O muboki ua mu ambela. “Vavô, ku tokala ku bhanga o kikalakalu kiki sé ki kuatekesu.” O muboki ua te o lampada, iu uaié. O mona mutudi kiévu ia bhiti, kia mu uabhela kiavulu iu uai mu sota o muboki phala ku mu sakidila. Mu ku suka-ku, muéne ua mateka ku di longa o Bibidia.

¹⁸ Mukonda diahi eie ua mesena ku kolokota mu ku bhanga ima iambote? Nange uejiia kuila kioso ki tu suína mu ukunji uetu, ni ku belesela o itumu ia Nzambi, tu bhana kijingu kua Jihova, tu kuatekesa ué akuetu o ku bhuluka. (Tanga 1 Kolindu 10:31-33.) O ku bhanga ima iambote mu ku boka o njimbu iambote, ni kuenda mu njila ia Nzambi ku londekesa kuila tua zolo Nzambi ni akuetu. (Mat. 22:37-39) Se tu suína mu ima iambote tua-nda kala ni kisangusangu kia dikota lelu. Tu tena ku kingila o kizuua, kioso o athu mu ngongo a-nda bhana kijingu ku Mubhangi uetu Jihova.