Kana Mu “Tukufalezwi Misebezi Ye Minde”?
Kana Mu “Tukufalezwi Misebezi Ye Minde”?
“Kreste Jesu . . . naa tobohile bupilo bwa hae bakeñisa luna, kuli a . . . ikeniseze sicaba sa hae se si ipitezi, se si tukufalezwi misebezi ye minde.”—TITE 2:13, 14.
MU KONA KU ALABA CWAÑI LIPUZO ZE LATELELA?
Ki kabakalañi ha mu ikutwa kuli ki tohonolo ku mina ku tukufalelwa misebezi ye minde?
Liñolo la Daniele 2:41-45 li koñomeka cwañi butokwa bwa kuli lu tukufalelwe mwa bukombwa?
Mu taluse mo ku bonisa mikwa ye minde kwa luna ku kona ku tuseza batu ku kena mwa bulapeli bwa niti ni ku ba tusa ku tabela ku ziba Jehova Mulimu.
1, 2. Lipaki za Jehova ba na ni tohonolo mañi ye ipitezi, mi mu ikutwa cwañi ka za tohonolo yeo?
BATU ba banga ni tabo ye tuna ha ba fiwa mupuzo kabakala nto ye ñwi ye ipitezi ye ba ezize. Ka mutala, batu ba bañwi baa kutekiwanga bakeñisa ku tusa linaha ze peli ze ne sa utwani hande kuli li utwane. Ki tohonolo ye tuna ku lumiwa ki Mulimu kuli lu yo tusa batu ku kutela ku yena!
2 Ka ku ba lipaki za Jehova, ki luna feela ba ba na ni tohonolo yeo. Mulimu ni Kreste ki bona ba ba etelela musebezi wa luna wa ku tusa batu kuli ba “kutele ku Mulimu,” ili ku talusa ku ba tusa kuli ba be balikani ba hae. (2 Makor. 5:20) Jehova u itusisa luna kuli lu tuse batu ku sutelela ku yena. Kona libaka ha ku na ni balikani ba Mulimu ba bañata-ñata mwa linaha ze fitelela 235 ili ba ba na ni sepo ya ku pila ku ya ku ile. (Tite 2:11) Lu tukufalezwi ku kutaza ni ku mema batu ba ba “lata kaufela” kuli ba itute niti. (Sin. 22:17) Lu “tukufalezwi misebezi ye minde,” ili ku talusa kuli lwa lata musebezi wa lu file Jehova mi lu eza musebezi wo ka maata a luna kaufela. (Tite 2:14) Ha lu nyakisiseñi mo tukufalelo ya luna i kona ku tuseza ba bañwi kuli ba zibe Jehova. Nzila ye ñwi ye lu kona ku tusa batu kuli ba zibe Jehova ki ka ku kutaza taba ye nde ku bona.
MU BE NI TUKUFALELO SINA JEHOVA NI JESU
3. Tukufalelo ya Jehova i lu kolwisañi?
3 Liñolo la Isaya 9:7 li bonisa kuli Mwanaa Mulimu u ka ba Mulena ni kuli u ka ezeza batu lika ze nde. Lika zeo kaufela li ka ezahala bakeñisa ‘tukufalelo ya na ni yona Muñaa Bupilo wa limpi.’ Tukufalelo ki mafulofulo a bonisa mutu yo muñwi ha nze a eza nto ye ñwi. Manzwi a kwa timana yeo a lu tusa ku kolwa kuli Jehova u bata luli kuli batu ba puluswe. Lu swanela ku ba ni mafulofulo ni tukufalelo ha lu nze lu kutaza taba ye nde kakuli Jehova Mulimu u na ni tukufalelo. Ka ku ba batu ba ba “sebeza hamoho ni Mulimu,” kana lwa sebeza ka taata kuli lu kutaze taba ye nde?—1 Makor. 3:9.
4. Jesu u lu tomezi cwañi mutala o munde wa ku zwelepili ku tukufalelwa mwa bukombwa?
4 Jesu u lu tomezi mutala o munde wa ku zwelapili ku tukufalelwa mwa bukombwa. Nihaike kuli batu ba bañata ne ba mu hanyezanga mi ne ba batanga ku mu bulaya, Jesu naa tukufalezwi ku isa kwa mafelelezo a bupilo bwa hae bwa fa lifasi. (Joa. 18:36, 37) Bakeñisa kuli naa ziba kuli nako ya hae ya ku nyanda ni ku shwa ne i li fakaufi, Jesu naa sebelize ka taata kuli a tuse batu ku ziba Jehova.
5. Jesu u swana cwañi ni mubeleki ya bulezwi mwa swanisezo ya kota ya feiga?
5 Ka silimo sa 32 C.E., Jesu naa file swanisezo ya muuna ya naa na ni simu ya likota za veine mo ne ku na ni kota ya feiga ye ne sa beyi miselo. Hamulaho wa lilimo ze taalu, muuna yo a kupa mubeleki wa hae kuli a leme kota yeo, kono mubeleki yo a kupa kuli a fiwe nako ye ñata ya ku babalela kota yeo ilikuli mwendi kwapili i ka beya miselo. (Mu bale Luka 13:6-9.) Jesu ha naa fa swanisezo yeo, ne li batu ba sikai feela ba ne ba bile balutiwa. Swanisezo ya naa file Jesu i bonisa kuli naa bata ku sebeza ka taata mwa nakonyana ye ne siyezi pili a si ka shwa kale. Kabakaleo, Jesu a kutaza ka tukufalelo mwa Judea ka likweli ze bato eza ze silezi. Mazazinyana pili a si ka shwa kale, Jesu naa lilile bakeñisa kuli batu ba bañata ne ba si ka amuhela lushango lwa hae.—Mat. 13:15; Luka 19:41.
6. Ki kabakalañi ha lu tokwa ku sebeza ka taata mwa bukombwa?
6 Lu tokwa ku sebeza ka taata mwa bukombwa bakeñisa kuli se lu li fakaufi hahulu ni mafelelezo. (Mu bale Daniele 2:41-45.) Ki tohonolo ye tuna ku ba Lipaki za Jehova! Mwa lifasi kaufela, ki luna feela batu ba ba kona ku taluseza ba bañwi mo i ka felisezwa miinelo ye taata ye ba talimana ni yona batu. Ha ku si ka fita kale nako ye telele ku zwa fa naa bulelezi muñoli yo muñwi wa mutende kuli ha lu koni ku ziba libaka lika ze maswe ha li ezahalelanga batu ba bande. Kono Bibele i lu taluseza libaka, mi ka ku ba Bakreste, lu na ni buikalabelo ni tohonolo ya ku bulelela ba bañwi libaka leo. Lu swanela ku ‘tuka ka moya’ ha lu nze lu eza musebezi wa lu file Jehova. (Maro. 12:11) Jehova u ka fuyaula musebezi wa luna, mi lwa kona ku tusa batu kuli ba mu zibe ni ku mu lata.
BUITOMBOLI BWA LUNA BU LUMBEKISA JEHOVA
7, 8. Buitomboli bwa luna bu lumbekisa cwañi Jehova?
7 Paulusi naa tiyelanga miinelo ye taata ye miñata ha naa nze a kutaza, ye cwale ka “masihu a sikobyoti” ni “linako za kutokwa lico.” (2 Makor. 6:5) Mizwale ni likaizeli ba luna ba eza buitomboli bo bu swana kuli ba pete bukombwa bwa bona. Nihaike kuli mapaina ba tokwa ku sebeza kuli ba ipilise, buñata bwa bona ba nga bukombwa bwa bona sina musebezi wa butokwa hahulu. Balumiwa ni bona ba sebeza ka taata kuli ba tuse batu mwa linaha ze ba sebeleza ku zona. (Mafil. 2:17) Baana-bahulu fokuñwi ha ba fumanangi nako ya ku ca kamba ya ku lobala bakeñisa buikalabelo bwa bona bwa ku babalela mizwale ni likaizeli mwa puteho. Bakreste ba ba hulile ni ba ba kula ba likanga mo ba konela kaufela kuli ba yo fumaneha kwa mikopano ni ku ya mwa sebelezo ya mwa simu. Kwa lu susuezanga luli ku bona batanga ba Mulimu bao ha ba itombola bakeñisa bukombwa bwa bona. Mane nihaiba batu ba ba si Bakreste ba lemuhanga kuli lu nga bukombwa bwa luna ku ba bwa butokwa.
8 Mutu yo muñwi ya si Paki ili ya pila kwa naha ya United Kingdom naa ñozi cwana mwa liñolo la naa ñolezi kwa kampani ye hatisa mitende: ‘Batu ha ba sa sepa bulapeli. Baeteleli ba bulapeli ha ku na ze ba eza. Ha ba likanyisi mutala wa Kreste wa ku potela batu. Lipaki za Jehova ki bona feela ba ba potelanga batu ni ku kutaza niti ku bona.’ Batu ba bañata mwa lifasi ha ba lati ku itombola kuli ba tuse ba bañwi. Bakeñisa kuli lwa lata ku itombola kuli lu kutaze taba ye nde, lu lumbeka Jehova Mulimu.—Maro. 12:1.
9. Ki lika mañi ze ka lu tusa ku tukufalelwa misebezi ye minde mwa bukombwa bwa luna?
9 Lu swanela ku ezañi haiba kuli ha lu sa tukufalelwa hahulu mwa bukombwa sina mo ne lu ezezanga sapili? Lu lukela ku hupulanga lika ze nde kaufela ze lu ikola mwa musebezi wa lu file Jehova kuli lu eze. (Mu bale Maroma 10:13-15.) Kuli batu ba piliswe, ba swanela ku ba ni tumelo ku Jehova mi ba swanela ku biza fa libizo la hae. Kono batu bao ha ba koni ku eza cwalo haiba lu sa kutazi ku bona. Ku ziba taba yeo ku swanela ku lu tusa ku tukufalelwa misebezi ye minde ni ku kutaza hahulu taba ye nde ya Mubuso.
KU BONISA MIKWA YE MINDE KU SUSUEZA BATU KU ITUTA ZA MULIMU
10. Mikwa ye minde ye lu bonisa i tusa cwañi batu ku tabela ku ziba Mulimu?
10 Ku tukufalelwa mwa bukombwa haki kona feela ko ku kona ku tusa batu kuli ba tabele ku ziba Mulimu. Nzila ye ñwi ye lu kona ku tusa batu ka yona ki ka ku bonisa mikwa ye minde ya Sikreste. Paulusi naa talusize libaka mikwa ya luna ye minde ha i li ya butokwa ha naa ize: “Ha lu fi mutu libaka la ku sitatala ka se siñwi, kuli bukombwa bwa luna bu si ke bwa nyaziwa.” (2 Makor. 6:3) Haiba lu itusisa lipulelo ze nde ni ku bonisa mikwa ye minde, lu ka tusa batu ba bañwi ku tabela ku lapela Jehova. (Tite 2:10) Mane hañata lu amuhelanga lipiho za kuli batu ba itutanga niti ha ba bona kuli lwa likanyisa Kreste.
11. Ki kabakalañi ha lu tokwa ku nahanisisa ka tokomelo ni ku lapelanga kuli lu bonise mikwa ye minde ye ka tusa ba bañwi?
11 Haiba lu bonisa mikwa ye minde, lu ka tusa batu ku tabela ku ituta niti, kono haiba lu bonisa mikwa ye maswe, lu ka tahisa kuli batu ba si ke ba tabela ni hanyinyani ku ituta za Jehova. Lu swanela ku bona teñi kuli ha lu ezi nto ifi kamba ifi ye ka palelwisa mutu ku ituta za Jehova ibe kuli lu kwa musebezi, lu kwa ndu, kamba lu kwa sikolo. “Haiba lu eza sibi ka bomu,” silikani sa luna ni Jehova si ka sinyeha ku ya ku ile. (Maheb. 10:26, 27) Taba yeo i swanela ku lu tusa ku nahanisisa ka tokomelo ni ku lapela kuli lu bonisange mikwa ye minde ye ka tusa ba bañwi. Bakeñisa kuli mikwa ye ba bonisa batu mwa lifasi i zwelapili ku ba ye maswe, ku ka ba bunolo hahulu kuli batu ba bone shutano ye mwahalaa mutu “ya sebeleza Mulimu, ni ya sa mu sebelezi.” (Mala. 3:18) Kaniti luli, ku bonisa mikwa ye minde ya Sikreste ku kona ku tusa batu kuli ba be balikani ba Mulimu.
12-14. Ha lu tiyela twaniso ye lu talimana ni yona, batu ba bañwi ba ka ba ni mubonelo o cwañi ka za bukombwa bwa luna? Mu fe mutala.
12 Mwa liñolo la bubeli la naa ñolezi Makorinte, Paulusi naa talusize kuli naa nyandisizwe, naa natilwe, ni ku beiwa mwa tolongo kabakala kuli batu ne ba sa tabeli taba ye nde ya naa kutaza. (Mu bale 2 Makorinte 6:4, 5.) Haiba lu tiyela twaniso ye lu kona ku kopana ni yona, batu ba bañwi ba ka susuezwa kuli ba amuhele niti. Lilimonyana kwamulaho, batu ba bañwi mwa naha ya Angola ne ba bata ku felisa bulapeli bwa Lipaki za Jehova mwa sibaka sa bona. Batu bao ne ba shapakile batu ba babeli ili mutu ni musalaa hae ba ba kolobelizwe ni batu ba bañwi ba 30 ba ne ba ituta niti, mi ne ba zwezipili ku ba shapaka ku fitela ba holofala maswe. Mane batu bao ne ba shapile nihaiba basali ni banana. Ne ba bata kuli batu ba sabe ku teeleza kwa Lipaki za Jehova, kamukwaocwalo, ba hapeleza batu ba mwa silalanda seo kuli ba to buha ha ba nze ba shapa batu bao. Kono hamulaho wa nako, batu ba bañata kwa batu ba ne ba tilo buha ze ne ezahala, ba ikupela ku ituta Bibele ni Lipaki za Jehova! Hamulaho, Lipaki ba zwelapili ku kutaza mi batu ba bañata ba amuhela niti, mi mizwale ne ba fuyauzwi.
13 Mutala wo u lu tusa ku lemuha kuli haiba lu bonisa bundume ka nako ye lu nyandiswa, batu ba ba lu bona ba kona ku ikatulela ku amuhela niti. Bundume bwa naa bonisize Pitrosi ni baapositola ba bañwi mwendi ne bu susuelize ba bañwi kuli ba be balikani ba Mulimu. (Lik. 5:17-29) Batu be lu kena ni bona sikolo, be lu sebeza ni bona, kamba ba mwa lubasi lwa luna, ba kona ku amuhela niti bakeñisa kuli ba bona kuli lwa bonisanga bundume ka nako ye lu lwaniswa.
14 Ka nako kaufela, mizwale ni likaizeli ba luna ba bañwi ba nyandiswanga. Ka mutala, mwa naha ya Armenia, mizwale ba ba bato eza 40 ba lengilwe mwa tolongo bakeñisa kuli ba hana ku kena busole. Mi mane ba bañata mwa naha yeo mwendi ni bona ba ka lengiwa mwa tolongo kwapili. Mwa naha ya Eritrea, Lipaki ba 55 ba lengilwe mwa tolongo, mi ba bañwi ku bona ba na ni lilimo ze fitelela 60. Kwa naha ya South Korea kona, Lipaki ba ba bato eza 700 ba lengilwe mwa tolongo bakeñisa kuli ba hana ku kena busole. Ka lilimo ze 60, mizwale ba luna kwa naha yeo ba lengilwe mwa tolongo. Lu swanela ku zwelapili ku lapela kuli mutala wa busepahali bwa mizwale bao ba ba nyandiswa u lumbekise Mulimu ni ku tusa batu ba bañwi ku amuhela niti.—Samu 76:8-10.
15. Mu fe mutala o bonisa ka mo ku sepahala kwa luna ku kona ku tuseza batu ku tabela ku ituta niti.
15 Batu hape ba kona ku ituta niti kabakala busepahali bo lu bonisa. (Mu bale 2 Makorinte 6:4, 7.) Ka mutala, kaizeli yo muñwi naa itukiseza kuli a life masheleñi ha naa li mwa mbasi, kono mulikanaa hae a mu bulelela kuli a si ke a lifa kakuli kwa naa ya ne si kwahule. Kaizeli yo naa bulezi kuli mutu ni ha sa yi kwahule, wa swanela ku lifa masheleñi. Hasamulaho, mulikanaa kaizeli yo a fita kwa naa ya mi a tuluka. Mi hamulaho wa fo, muzamaisi wa mbasi a buza kaizeli yo kuli, “Musali-muhulu, mu Lipaki za Jehova?” Kaizeli yo a alaba kuli, “Eni ni Paki ya Jehova. Ki kabakalañi ha mu ni buza cwalo?” Muzamaisi yo a bulela kuli, “Ne ni utwa ze ne mu ambola ka za ku lifa masheleñi, mi na ziba kuli Lipaki za Jehova ki ba bañwi ba batu ba banyinyani ba ba lifanga masheleñi mwa mbasi, mi ba sepahala mwa lika kaufela.” Hamulaho wa likwelinyana, muuna yo a to atumela kaizeli yo kwa mikopano ni ku mu buza kuli, “Kuli mwa ni hupula? Ki na muzamaisi wa mbasi ya naa kile a ambola ni mina ka za ku lifa masheleñi mwa mbasi. Ha ne ni boni mo mu sepahalela, ne ni kalisize ku ituta Bibele ni Lipaki za Jehova.” Mutala wo u bonisa kuli batu ha ba lemuha kuli lwa sepahala, ba ka sepa taba ye nde ye lu kutaza.
MU ZWELEPILI KU BONISA TULEMENO TO TU LUMBEKISA MULIMU
16. Ku kona ku ezahalañi haiba lu bonisa pilu-telele, lilato, ni sishemo? Mu fe mutala o bonisa ze ba ezanga baeteleli ba bulapeli bwa buhata.
16 Haiba lu bonisa pilu-telele, lilato, ni sishemo, mwendi lu ka tusa batu ba bañwi kuli ba tabele ku ituta ka za Jehova, milelo ya hae, ni batu ba hae. Tulemeno to ba bonisa Bakreste ba niti tu lumbekisa Mulimu. Baeteleli ba bañwi ba bulapeli ba ipumisanga kuli ba na ni tulemeno kamba mikwa ye minde. Baeteleli bao ba pumanga batu ba ba mwa bulapeli bwa bona ni ku nga masheleñi ku bona. Ba bañwi kwa baeteleli bao ba bulapeli ba itusisanga masheleñi ao kwa ku leka mandu a tula ni ku itekela limota. Mane yo muñwi kwa baeteleli bao naa yahezi linja za hae ndu ye tula hahulu kuli mane ndu yeo i na ni mishini ye fukisa moya o munde! Baeteleli bao ha ba lateleli taelo ya Jesu ya kuli ba “fane feela.” (Mat. 10:8) Ba swana sina baprisita ba mwa Isilaele ba ne ba li ba ba maswe. Baeteleli bao ba luta ka mulelo wa “ku lifwa se siñwi.” (Mika 3:11, Bibele ye kenile, Hatiso ya 1984) Ha ba eza lika ka nzila ye cwalo, ha ba koni ku tusa mutu kuli a be mulikanaa Mulimu.
17, 18. (a) Lu kona ku lumbeka cwañi Jehova mwa bupilo bwa luna ka ku likanyisa tulemeno twa hae? (b) Ki kabakalañi ha mu bata ku zwelapili ku tukufalelwa misebezi ye minde?
17 Batu ba kona ku tabela ku ba balikani ba Mulimu ha ba lemuha kuli lu luta niti niha ba lu bona inze lu eza hande batu be lu pila ni bona. Ka mutala, paina yo muñwi naa kutaza ku mbelwa wa musupali, kono mbelwa yo a taluseza paina yo kuli ha tabeli ku teeleza ku yena. Mbelwa yo a taluseza paina kuli ka nako ya naa ngongota fa munyako, mbelwa yo naa pahami fa lele inze a patehile ku lukisa laiti ya mwa ndu ya hae. Muzwale wa paina yo a li: “Ha mu swaneli ku lukisanga za malaiti mu nosi.” Paina yo a lukiseza mbelwa yo laiti ya hae, mi hamulaho a ya fa ndu ye ñwi. Mwanaa mbelwa yo ha naa tilo utwa ze ne ezahezi, a taba hahulu kuli mane a bata muzwale yo kuli a itumele ku yena. Kwa mafelelezo, mwanaa mbelwa yo a amuhela tuto ya Bibele.
18 Ki kabakalañi ha mu bata ku zwelapili ku tukufalelwa misebezi ye minde? Mwendi ki ka libaka la kuli mwa ziba kuli haiba mu tukufalelwa mwa bukombwa ni ku ba ni mikwa ye minde, mu ka lumbekisa Jehova mi mu ka tusa ba bañwi kuli ba to piliswa. (Mu bale 1 Makorinte 10:31-33.) Ku zwa fo, lu kutaza ka ku tukufalelwa mi lu na ni mikwa ye minde bakeñisa kuli lu bata ku bonisa kuli lwa lata Mulimu luli ni batu ba bañwi. (Mat. 22:37-39) Haiba lu tukufalelwa misebezi ye minde, lu ka ba ni tabo luli ni ku ikola bupilo bo bunde. Mi lwa kona ku libelela ka tabo nako ya kwapili fo batu kaufela ba ka ba ni tabo ya ku lapela ni ku lumbeka Mubupi wa luna, Jehova.
[Lipuzo za Tuto]
[Maswaniso a fa likepe 10]
Haiba batu ba lu bona mwa bukombwa, lu ka fa bupaki ku bona
[Siswaniso se si fa likepe 12]
Batu ba bañwi baa lemuhanga haiba lu bonisa busepahali ni ku sebeza ka taata
