Lelo Upyasakenine “mu Mingilo Milumbuluke”?
Lelo Upyasakenine “mu Mingilo Milumbuluke”?
“Yesu Kidishitu; wakwitwipanina aye mwine, amba ētukūle ku bubi bonso, ne kwitutōkeja aye mwine bātwe bantu, ke tudi lupeto lwandi, lwa kupyasakena mu mīngilo milumbuluke.”—TET. 2:13, 14.
LE USA KULONDOLOLA NAMANI?
Mwanda waka umwene kupyasakena mu mingilo milumbuluke bu ntumbo?
Le Danyele 2:41-45 ulombola namani mvubu ya kupyasakena mu mwingilo?
Shintulula muswelo ukokeja mwiendelejo wa bwine Leza kukokela bantu ku mutōtelo wa bine ne kudi Yehova Leza.
1, 2. Le Batumoni ba Yehova badi na bulēme’ka bwa pa bula, ne wiivwananga namani pangala pa buno bulēme?
BAVULE bamonanga kupebwa mpalo ya kufwijibwa’ko na bulēme bukatampe. Kimfwa, bantu bamo batambwile Mpalo ya Kufwijibwa’ko (Prix Nobel) pa kulonga bintu na bupyasakane mwanda wa kuleta ndoe mu bukata mwa basusujañani nansha bantu babomboke. Bine, tudi na bulēme bukatampe pa kutumwa na Leza bu mikendi nansha bu batumwa ba kukwasha bantu basambe kipwano kya ndoe na Umpangi wabo!
2 Batwe Batumoni ba Yehova tudi na buno bulēme bwa pa bula. Kupityila ku buludiki bwa Leza ne Kidishitu, tuzenzanga bantu ‘bapwane na Leza.’ (2 Kod. 5:20) Twingidijibwanga na Yehova mwanda wakukokela bantu kwadi. O mwanda midiyo ne midiyo ya bantu ba mu matanda 235 i bakwashibwe bapwane kipwano kilumbuluke na Leza ne kwikala na lukulupilo lwa kumona būmi bwa nyeke. (Tet. 2:11) Twitanga na bupyasakane bwa na mutyima umo yewa “uswele, nandi ayate’o, buntu bitupu, mema a bumi.” (Kus. 22:17) Tubwanya kwitwa bu bantu bapyasakenine “mu mīngilo milumbuluke,” mwanda tusenswe uno mwingilo mulēme ne kwiuvuija na kininga. (Tet. 2:14) Shi ke pano, tubandaulei’ko muswelo witukwasha bupyasakane botupyasakenine mu mingilo milumbuluke tukokele bantu kudi Yehova. Muswelo umo bidi i kupityila ku mwingilo wetu wa busapudi.
TWIULEI BUPYASAKANE BWA YEHOVA NE YESU
3. Le “mukao wa Yehova” witukulupija bika?
3 Isaya 9:7 wisambila pa bisa kulonga buludiki bwa Mwanā Leza amba: “Mukao wa Yehova wa bibumbo ukafikija kine kino’ki.” Bino binenwa bilombola amba, Tata wetu wa mūlu utele mutyima bininge ku kupandija muzo wa muntu. Kimfwa kya Yehova kya bupyasakane kilombola patōka amba, mwingilo witupele Leza wa bu basapudi ba Bulopwe ufwaninwe kukwatakanibwa na mutyima wetu onso, na buzanzamuke bwetu ne bupyasakane bwetu. Mutyima wetu wa kusaka kukwasha bantu bayuke Leza i kilomboji kya bupyasakane bwa Yehova. Byotudi ba kwingila mingilo pamo na Leza, le twi basumininwe kusapula ne pa mfulo myanda miyampe kukwatañana na ngikadilo yotudi’mo?—1 Kod. 3:9.
4. Le Yesu wāshile kimfwa kya kūminina na bupyasakane mu mwingilo muswelo’ka?
4 Tulangulukilei ne pa bupyasakane bwa Yesu. Wāshile kimfwa kibwaninine kya kūminina na bupyasakane mu mwingilo. Nansha byaālondelwelondelwe byamalwa, wālamine bupyasakane bwandi mu mwingilo wa kusapula kufika ne ku mfulo kwa būmi bwandi bwa pano pa ntanda. (Yoa. 18:36, 37) Byaāyukile’mba lufu lwandi lwa bu kitapwa lubafwena, Yesu wāsumininwe bininge kukwasha bantu bafwene kudi Yehova.
5. Lelo Yesu wālongele namani kukwatañana na kyelekejo kyandi kya mutyi wa mukuyu?
5 Kimfwa mu dikumbi dya mwaka wa 32 K.K., Yesu wāletele kyelekejo kya muntu wādi na mutyi wa mukuyu mu budimi bwandi bwa mañanza kewāpelepo bipa mu myaka isatu. Pa kusoñanya batete’o, wa kulama budimi wamulomba’ko kitatyi kya kwela’ko mboleo. (Tanga Luka 13:6-9.) I enka kibalwa kityetye kete kya bana babwanga kyādi kibwanya kumonwa mu kine kitatyi’kya bu kipa kya mwingilo wa Yesu wa busapudi. Inoko, monka mwaālombwedile’kyo mu kino kyelekejo kya wa kulama budimi, Yesu wāingidije kitatyi kityetye kyāshele’ko—kintu kya myeji isamba—na kusapula bininge mu Yudea ne mu Pelea. Mafuku matyetye kumeso kwa lufu lwandi, Yesu wādidile pangala pa bantu ba yabo ntanda bādi na matwi a “bulemitetele pa kwivwana.”—Mat. 13:15; Luka 19:41.
6. Mwanda waka tufwaninwe kubweja’ko bukomo bwa kusapula?
6 Byotwafwena bininge ku mfulo, mwene i biyampe tubweje’ko bukomo bwa kusapula? (Tanga Danyele 2:41-45.) Bine, tudi na dyese’po kashā dya kwikala Batumoni ba Yehova! Twi bantu bamo kete pano pa ntanda, bapāna lukulupilo lwa bine lwa kupwija makambakano a muzo wa muntu. Mulembi umo wa majulunale waipangwile panopano kipangujo kikomo kulondolola amba, “mwanda waka bintu bibi bifikilanga bantu bayampe?” Batwe bene Kidishitu tudi na kiselwa ne dyese dya kulondolola kupityila ku Bible, bipangujo bya uno muswelo bipangula bonso badi na mutyima wa kwivwana. Tudi na bubinga bwendele’mo bwa kwikala na “mutyima wa kutunta,” potuvuija mwingilo witupele Leza. (Loma 12:11) Na bukwashi bwa Leza, kusapula kotusapula na bupyasakane kubwanya kukwasha bakwetu bayuke Yehova ne kumuswa.
MUSHIPIDITU WA KWIPĀNA UTUMBIJANGA YEHOVA
7, 8. Le mushipiditu wa kwipāna utumbijanga Yehova namani?
7 Enka mulombwela’kyo bintu byātene Polo, mwingilo wetu ubwanya kutwala ku “kukesha bufuku bonso” ne ku “kushikilwa na nzala.” (2 Kod. 6:5, Dibuku Dijila) Bino bishima bilombola patōka kwipāna, kadi bibwanya kwituvuluja bapania batūdile mwingilo wabo pa kifuko kibajinji mu būmi bwabo koku bekwatakanya abo bene na lupeto. Tulangulukilei ne pa bamishonele bepāne, ‘bepungwilwile abo bene bu kya mulambu’ mwanda wa kukwasha bantu mu matanda a bweni. (Fid. 2:17) Le tunena bika pa bakulumpe bengila bininge, babulwa bidibwa nansha kulala mwanda wa kulelela mikōko ya Yehova? Kadi tudi na banunu ne babelabela, balonga bukomo bwa kutanwa ku kupwila ne kutambila mu mwingilo wa busapudi. Mutyima wetu uyulanga kufwija’ko potulangulukila pa bano bengidi bonso ba Leza bepāne. Buno bukomo budi na lupusa pa muswelo umona bantu bakwabo mwingilo wetu.
8 Mu mukanda wātuminwe Boston Target wa mu kitango kya Lincolnshire, mu Royaume-Uni, mutangi umo ke Kamonipo wanene amba: “Bantu kebakikulupilepo mu bipwilo . . . Le bano bengidi ba bipwilo baloñanga bika mafuku onso? Kebendangapo kukakimba bantu na mwālongele Kidishitu . . . I enka kipwilo kimo kete kimweka bu kilonga namino, kya Batumoni ba Yehova, bene bendanga kukakimba bantu ne kadi batakamene bya binebine mu kusapula bubinebine.” Mu ino ntanda muyudile mushipiditu wa kwisangaja, mutyima wetu wa kwipāna udi na kamweno pa kutumbija Yehova Leza.—Loma 12:1.
9. Le i bika bibwanya kwitukankamika twikale nyeke bapyasakane mu mingilo milumbuluke?
9 Le tukalonga namani, shi bimweka bu tubabulwe bupyasakane mu mwingilo? I biyampe kulangulukila pa bintu biloñanga Yehova kupityila ku mwingilo wa busapudi. (Tanga Loma 10:13-15.) Lupandilo lwimanine pa kwita na lwitabijo pa dijina dya Yehova, inoko bantu kebakalongapo namino pampikwa kwibasapwila. Kuyuka kino kuketukankamika twikale nyeke bapyasakane mu mingilo milumbuluke, ne kusapula myanda miyampe ya Bulopwe na kininga.
MWIENDELEJO MULUMBULUKE UKOKELANGA BANTU KUDI LEZA
10. Mwanda waka tubwanya kunena amba mwiendelejo wetu mulumbuluke ukokelanga bantu kudi Yehova?
10 Mwingilo byoudi wa mvubu, bupyasakane bonkabonka kebubwanyapo kukokela bantu kudi Leza. Kintu kya bubidi kibadilwa mu mingilo ya bupyasakane ikokela bantu kudi Leza, i mwiendelejo mulumbuluke wa bwine Kidishitu. Polo wānene ukoma kamweno kadi na mwiendelejo wetu paāsonekele amba: “Ketusakilepo kuponeja muntu nansha umo mu lwitabijo, kutyina’mba mwingilo wetu wakafutululwa.” (2 Kod. 6:3) Muneneno wetu ūbaka ne mwiendelejo moloke, bineñenyanga bufundiji bwa Leza, bilengeja mutōtelo wa Yehova wikale ukoka bakwetu. (Tet. 2:10) Na bubine, twivwananga divule dine amba bantu bampikwa budimbidimbi betabanga ku bubinebine kitatyi kyobamona mwiendelejo wetu udi pamo na wa Kidishitu.
11. Mwanda waka tufwaninwe kubandaula ne milombelo ponka lupusa ludi na mwiendelejo wetu?
11 Nansha byotuyukile amba bilongwa byetu bibwanya kwikala na lupusa luyampe pa bantu, ino bilongwa bibi bibwanya kwikala na lupusa lubi. O mwanda twikale ku kaji, ku njibo nansha ku masomo, tukimbanga kwepuka kupa muntu bubinga bwa kutana kilubo mu mwingilo wetu ne mu mwiendelejo wetu. Shi tubalonga bubi ku kusaka, bipa bikalupuka’ko bikekala bilula. (Bah. 10:26, 27) Uno mulangwe ufwaninwe kwitutonona tubandaule ne milombelo ponka byobya byotulonga ne muswelo obibwanya kwikala na lupusa pa bakwetu. Misoñanya ya mu mwikadilo ya ino ntanda byoyenda ipona, bantu bampikwa budimbidimbi bakapēlelwa kusansanya “mubukata mwa yewa wingidila Leza ne yewa wampikwa kumwingidila.” (Mal. 3:18) Bine, mwiendelejo wetu mulumbuluke wa bwine Kidishitu udi na mvubu mpata pa kupwanya bantu na Leza.
12-14. Lelo muswelo otuminina matompo a lwitabijo udi na lupusa’ka pa mumwena bakwetu mwingilo wetu? Leta kimfwa.
12 Polo pa kusonekela bene Kodinda, wālombwele amba wāsusukile na kupangwapangwa, bikoleja, kukupilwa ne kukutwa. (Tanga 2 Kodinda 6:4, 5.) Shi lwitabijo lwetu lubatanwa na matompo, kūminina kwetu kubwanya kukwasha bantu betutala betabije bubinebine. Tulete kimfwa: Mu myaka ya kunyuma, batompele kukubija Batumoni ba Yehova mu Angola. Batumoni babidi babatyijibwe ne bantu 30 basangela musapu bākatenwe ku kupwila kwetu bākutyilwe. Penepa bantu ba mu kibundi bebunga mwanda wa kutala pakupilwa bano bantu bampikwa mambo nsonde na balwana kufika ne byebatambile mashi. Enka ne bana-bakaji ne bana bene bākupilwe. Kitungo kyabo kyādi kya kuzakaja bantu baleke kwivwana Batumoni ba Yehova. Ino pa kupwa kukupilwa nsonde mu kitango kya bantu, kadi bantu bavule mu kibundi bafwena Batumoni ba Yehova ne kwibalomba befunde nabo Bible! Kupwa, mwingilo wa kusapula Bulopwe waendelela kumeso, watandabuka bya binebine ne kweselwa madyese mavule.
13 Kino kimfwa kyelekeja lupusa lukatampe lubwanya kwikala na kulama kotulamine misoñanya ya mu Bible pa bakwetu. Tubwanya kwiipangula padi muswelo wāpwene bantu bavule na Leza pa mwanda wa bukankamane bwa Petelo ne batumibwa bakwabo. (Bil. 5:17-29) Bakwetu ba ku masomo, ba ku kaji ne bantu ba mu kisaka kyetu, babwanya kwitabija musapu shi betumona tulonga byoloke.
14 Banabetu bamo batanwanga na kupangwapangwa mu kitatyi kyo-kyonso. Kimfwa, mu Armeni, kubwipi kwa banabetu 40 badi mu kifungo mwanda wa kubulwa kwikuja mu myanda ya ntanda, kadi padi makumi na makumi akakutwa mu myeji iya’ko. Mu Eritré, i mukutwe bengidi ba Yehova 55, bamo ba myaka 60 ne kupita. Mu Korea wa Kunshi, kintu kya Batumoni 700 bakutyilwe pa mwanda wa lwitabijo lwabo. Ino ngikadilo ke milonge myaka 60. Tulombelei amba kikōkeji kya batutu bapangwapangwa mu matanda palapala, kitumbije Leza ne kukwasha boba basenswe boloke batwele mu mutōtelo wa bine.—Mit. 76:8-10.
15. Leta kimfwa kilombola muswelo ubwanya būmi bwetu bwampikwa budimbidimbi kukokela bantu ku bubinebine.
15 Kwikala kotwikele na būmi bwampikwa budimbidimbi kubwanya nako kukokela bantu ku bubinebine. (Tanga 2 Kodinda 6:4, 7.) Kimfwa, tala uno mwanda mumweke: “Kaka umo wafutyile lupeto lwa tyike ya motoka kitatyi kyamunene mulunda nandi amba kebasakilwapo kufuta tyike mwanda kebendelepo kulampe. Kaka wamushintulwila amba i biyampe kufuta, nansha’tu ke pa kishīko kimo. Kupwa mulunda nandi watūka mu motoka. Penepa, shofele wa motoka wavundamukila kudi kaka kamwipangula amba, “le wi Kamoni wa Yehova?” Kaka wamulondolola amba “i amo, le i kika kyakulengeja wipangule nankyo?” Shofele’mba, “nadi naivwana pomwadi mwisamba pangala pa kufuta tyike kadi ndyukile amba Batumoni ba Yehova babadilwanga mu bantu batyetye bafutanga, kadi bakubulwa budimbidimbi mu bintu byonso.” Myeji mityetye pa kupita’po, uno muntu wafwena kaka ku kupwila kamwipangula amba, “le ubandyuka? Ne shofele wa motoka wēsambile nobe pangala pa kufuta tyike. Ponāmwene mwiendelejo obe, nākwete butyibi bwa kushilula kwifunda Bible na Batumoni ba Yehova.” Kuyukana kotuyukene bu bakubulwa budimbidimbi kwituyukanyanga bu bengidi bakulupilwa.
TULOMBOLEI NYEKE NGIKADILO ITUMBIJA LEZA
16. Mwanda waka ngikadilo pamo bwa kitūkijetyima, buswe ne kanye biteñanga mityima ya bantu? Leta kimfwa.
16 Netu twingilanga mwingilo mukatampe mu kukokela bantu kudi Yehova kitatyi kyotulombola ngikadilo pamo bwa kitūkijetyima, buswe ne kanye. Bantu bamo betutala babwanya padi kusaka kwifunda myanda itala padi Yehova, pa mpango yandi, ne pa bantu bandi. Ngikadilo ne mwiendelejo wa bene Kidishitu ba bine i mwishile kulampe na kulombola’tu kwipāna kwa bwine Leza kwa boba batōtanga divule ne bya buzazangi. Bendeji bamo ba bipwilo bapetanga kupityila ku kwiba luombe lwabo ne kwingidija lupeto luvule na kupota mobo a lupoto lukomo ne myotoka—kadi kyaba kimo’nka ne kipombo kya bambwa kidi na bingidilwa bipepa luvula. Na bubine, bantu bavule betela bu balondi ba Kidishitu kebadipo na mutyima wa ‘kupāna bitupu.’ (Mat. 10:8) Ino, pamo bwa bapidishitu bañonaona ba Isalela wa kala, ‘bafundijanga mwanda wa mpalo’—kadi bintu bivule byobafundija kebikwatañenepo na bisonekwa. (Mika 3:11) Uno mwiendelejo wa buzazangi keupwanyangapo muntu na Leza.
17, 18. (a) Le i muswelo’a otutumbijanga Yehova kitatyi kyotumwekeja ngikadilo yandi mu būmi bwetu? (b) Le i bika byakutonona ūminine mu mingilo milumbuluke?
17 Ku mutamba mukwabo kadi, mityima iteñwanga na bufundiji bwa binebine bwa bwine Kidishitu ne bilongwa biyampe bilongelwa bakwetu. Kimfwa, kyaba kimo kyādi kisapula pania umo ku njibo ne njibo, wāpangilwe na mununu wa kishala mwana-mukaji. Wāmunene amba powadi ukōkola ku kibelo, nadi nkende pa mungaji mu mpishi, nonga bukomo bwa kupingakanya ampulu wa mudilo. Pania wamunena’mba “ke biyampepo kulonga’ye kasuku.” Penepa pania washinta ampulu kupwa waenda. Mwanā uno lolo pa kuyuka byalongekele, watengwa bininge ne kukakimba tutu mwanda wa kumufwija’ko. Mwenda mafuku, mwana waitabija kwifunda Bible.
18 Mwanda waka wi musumininwe kūminina mu mingilo milumbuluke? Padi, mwanda uyukile amba kitatyi kyotulombola bupyasakane mu mwingilo wetu ne kulonga bintu kukwatañana na kiswa-mutyima kya Leza, tutumbijanga Yehova ne kukwasha bakwetu bamone lupandilo. (Tanga 1 Kodinda 10:31-33.) Kupyasakena mu mingilo milumbuluke ya kusapula myanda miyampe ne kwiendeja mwendele mashinda a Leza, kutambanga ku mutyima wa kulombola buswe botuswele Leza ne bantu-netu. (Mat. 22:37-39) Shi tupyasakene mu mingilo milumbuluke, tukekala na nsangaji ne kuloelelwa tamba’nka pano. Kadi, tubwanya kutengela difuku dikalombola bantu bonso bupyasakane bwa kupyasakena mutōtelo wa bine, mwanda wa kutumbija Yehova Umpangi wetu.
[Bipangujo bya Kifundwa]
[Kifwatulo pa paje 8]
[Bifwatulo pa paje 10]
Kutambila kotambila mu mwingilo kupanga bantu bakutala bukamoni
[Kifwatulo pa paje 12]
Bantu bamonanga kubulwa budimbidimbi kobe ne kwingila koingila bininge
