1, 2. Jehova Thuhretute’n chawimawina eng nge an dawn a, chu chu engtin nge i ngaih?

MI TAM tak chuan hlawhtlinna lian tham tak atâna lâwmman pêk an nih hian, chu chu chawimawina ropui takah an ngai a ni. Entîr nân, mi ṭhenkhat chuan pâwl pahnih inhmêlmâkte inkâra remna siam tûra ṭhahnemngai taka an thawh avângin Nobel Prize an dawng a. Mahse, anmahni Siamtu nêna inremna an neih nâna mite ṭanpui tûra Pathian tirh palai nih chu chawimawina ropui zâwk a va ni êm!

² Jehova Thuhretute kan nih angin, chu chawimawina chu kan dawng a. Pathian leh Isua thupêk angin mite chu “Pathian nên lo inrem” tûrin kan ngên a ni. (2 Kor. 5:20) Jehova chuan a lama mite hîp nân min hmang a. Hei hi Pathian nêna inlaichînna nei tûra ram 235 chuanga mi maktaduai têlte ṭanpui an nih dân a ni a, anni chuan chatuana nun beiseina an nei a ni. (Tit. 2:11) Tih tak zeta ṭhahnemngaiin, ‘a duh apiang nunna tui a thlâwna la tûrin’ kan sâwm a. (Thup. 22:17) He hna hlu tak hi kan ngainat avâng leh taima taka kan hlen avângin, “thil ṭha tiha ṭhahnemngai” mite tia dik taka koh theih kan ni. (Tit. 2:14) Tûnah chuan thil ṭha tiha kan ṭhahnemngaihnain mite chu Jehova lama hîp tûra min ṭanpui theih dân i lo ngaihtuah ang u. Kawng khat chu kan thu hrilhna hmangin a ni.

3. “LALPA ṭhahnemngaihna” chuan eng nge a târ lan?

³ Pathian Fapa rorêlnain a hlen chhuah tûr chungchângah Isaia 9:7 chuan: “Sipai hote LALPA ṭhahnemngaihna chuan chûng chu a ti ang,” a ti a. Chûng thute chuan kan Pa vâna miin mihringte chhandamna a ngaihsakzia a târ lang. Ṭhahnemngaihna kawnga Jehova entawn tûr siam chuan Lalram thuchhuahtu anga Pathian min pêk rawngbâwlnain thinlung pumhlûma kan thlâwp a, phûrna leh ṭhahnem ngaihna a phuzia a târ lang chiang hle. Pathian hre tûra mite ṭanpui kan duh ngawih ngawihna chu Pathian ṭhahnemngaihna lan  chhuahna a ni. Chuti chu, Pathian hna thawhpuitute kan nih angin, kan dinhmunin a zir phawt chuan chanchin ṭha hrilhnaa a tam thei ang bera tel chu kan tum tlat em?—1 Kor. 3:9.

4. Engtin nge Isua chuan rawngbâwlnaa ṭhahnemngai taka beihna kawngah entawn tûr a siam?

⁴ Isua ṭhahnemngaihna pawh hi ngaihtuah teh. Ani chuan rawngbâwlnaa ṭhahnemngai taka beihna kawngah entawn tûr ṭha famkim a siam a ni. Dodâlna nasa tak a tawk chung pawhin, a lei lam nun hrehawm taka a tâwp thlengin, thu hrilhnaah ṭhahnem a ngai reng a. (Joh. 18:36, 37) A inthawi nâna a thih hun a hnaih chuan Jehova hre tûra mi dangte ṭanpui a tumna chu a zual sauh a ni.

5. Engtin nge Isua chuan theipui kûng tehkhin thu nêna inmila thil a tih?

⁵ Entîr nân, C.E. 32 kum tâwp dâwn khân Isua chuan a grêp huana theipui kûng kum thum lai rah lo neitupa chungchâng tehkhin thu chu a sawi a. Kit tûra hrilh a nih chuan grêp hrui enkawltu chuan lei ṭhaa châwm hrih a dîl a ni. (Luka 13:6-9 chhiar rawh.) Chutih lai chuan zirtîr tlêmte chauh chu Isua thu hrilhna rah chhuah tia sawi theih an la ni a. Mahse, Isua sawi grêp hrui enkawltu tehkhin thuin a târ lan angin, hun la awmchhun—thla ruk vêl—chu Judai ram leh Perea rama nasa lehzuala thu hrilh nân a hmang a. A thih hma ni rei lotêah chuan a bul vêla awm mi a tam zâwkte’n ‘an bengte an chhut chhêt’ avângin a ṭap a ni.—Mt. 13:15, C.L. Re-edited, Lk. 19:41.

6. Engvângin nge rawngbâwlnaah theih tâwp kan chhuah lehzual ang?

⁶ Hun hmâwra kan awm tawhzia ngaihtuahin, kan thu hrilhnaah theih tâwp kan chhuah lehzual a pawimawh hle a ni lâwm ni? (Daniela 2:41-45 chhiar rawh.) Jehova Thuhretute nih chu chanvo hlu a va ni êm! Keini hi he leia mihringte harsatna chinfel a ni dâwn tih beiseina dik tak pe chhuaktu awmchhun kan ni. Chanchin bua thuziaktu pakhat chuan tûn hnai mai khân, “Engvângin nge mi ṭhate chungah thil ṭha lo a thlen?” tih zawhna chu zawhna chhân theih loh niin a sawi a. A ngaithla duh apiangte hnêna chutiang zawhna Bible-in a chhân dân hrilh chu kan Kristian mawhphurhna leh chanvo a ni. Pathian thupêk anga a hna kan thawh hian, thil engkimah ‘thlarau kawnga ṭhahnemngaih’ nachhan tûr kan nei a. (Rom 12:11) Pathian malsâwmna nên chuan, chanchin ṭha ṭhahnemngai taka kan hrilhna chuan mite chu Jehovah hre tûr leh hmangaih tûrin a ṭanpui thei a ni.

7, 8. Engtin nge mahni inpêkna rilru put hmang chuan Jehova a chawimawi?

⁷ Tirhkoh Paula thiltawnin a târ lan angin, kan rawngbâwlna chuan ‘mut mawhna’ leh ‘chaw ngheina’ a thlen thei a. (2 Kor. 6:5) Hêng ṭawngkamte hian mahni inpêkna a târ lang chiang hle a, mahni inchâwm paha an nuna rawngbâwlna dah pawimawh bertu pioneer-te min hriat chhuahtîr a ni. Ram danga rawngbâwl tûra ‘leih buaka awm’ ang maia mahni inpe missionary-te chu ngaihtuah bawk ang che. (Phil. 2:17) A nih leh chaw pawh ei hman lo leh mut pawh mu ṭha hman lo khawpa Jehova berâmte vêngtu kan upate hi engtin nge? Kristian inkhâwmna leh thlawhhma rawngbâwlnaa tel tuma theih tâwp chhuah ṭhîn tarte leh hrisêl lote pawh kan zîngah an awm a. Hêng Pathian chhiahhlawh inpe takte kan ngaihtuah hian kan thinlung chu lâwmnain a khat a ni. Chûng thawhrimnate chuan mi dangte’n kan rawngbâwlna an thlîr dân a nghawng a ni.

⁸ United Kingdom, Lincolnshire-a Boston Target chanchinbu-ah Jehova Thuhretute zînga mi ni lo, chhiartu mi pakhat chuan heti hian lehkha a thawn a ni: “Mite chuan sakhuaah rinna an nei tawh lo . . . Hêng sakhaw rawngbâwltute hian ni lêngin eng nge an tih le? Krista tih angin kal chhuakin mite an be lo rêng rêng . . . Mite ngaihsak sakhaw awmchhun nia lang chu kal chhuak a, mite bia a, tih tak zeta thutak hrilhnaa inhmang Jehova Thuhretute an ni,” tiin. Mahni chauh inngaihtuahna he khawvêlah  hian mahni inpêkna rilru put hmang kan neih chuan Pathian Jehova a chawimawi tak zet a ni.—Rom 12:1.

9. Kan rawngbâwlnaa thil ṭha tiha ṭhahnemngai reng tûrin engin nge min chêttîr ang?

⁹ Mahse, rawngbâwlnaah ṭhahnemngaihna kan hloh anga a lan chuan eng nge kan tih theih? Thu hrilhna hmanga Pathian Jehova thil hlen chhuahte ngaihtuah chu a ṭangkai ang. (Rom 10:13-15 chhiar rawh.) Chhandamna chu rinna nêna Pathian Jehova hming lamnaah a innghat a; mahse, mite hnêna thu kan hrilh chauhvin an lam thei dâwn a ni. Chu mi hriatna chuan thil ṭha tiha ṭhahnemngai reng tûr leh Lalram chanchin ṭha puan chhuahnaa taima reng tûrin min chêttîr ang.

10. Engvângin nge kan nungchang ṭha chuan Jehova lamah mite a hîp kan tih theih?

¹⁰ Rawngbâwlnaa ṭhahnemngaihna chu pawimawh hle mah se, chu chu Pathian lama mite hîp nân a tâwk lo va. Pathian lama mite hîptu thil dang leh chu kan Kristian nungchang ṭha hi a ni. Paula chuan: “Kan rawngbâwl hna hi an dem lohna tûrin eng kawngah mah tlûk phahna tûr rêng rêng kan siam lo va;” tia a ziah hian kan nungchang a pawimawhzia a sawi uar a ni. (2 Kor. 6:3) Kan ṭawngkam leh nungchang ṭha chuan Kristian zirtîrna a chawimawi a, Jehova biakna lamah mite a hîp a ni. (Tit. 2:9, 10) A nihna takah chuan, mi rilru ṭha pute’n Krista neih ang kan nungchang an hmuh huna fakna thu an sawite chu kan hre ṭhîn a ni.

11. Engvângin nge kan nungchangin a nghawng chu ngun taka kan ngaihtuah ang?

¹¹ Kan thiltihte chuan mite chu a ṭha zawngin a thunun thei tih kan hria a; mahse, chutiang kalh chiah pawh a thleng thei a ni. Chuvângin, kan awmna chu hna thawhna hmun emaw, in emaw, a nih loh leh school emaw pawh ni se, kan rawngbâwlna leh kan nungchanga mite sawisêl kai loh chu kan tum tlat a ni. Duh rêng vângin thil sual kan tilui a nih  chuan, a sawh khâwk chu a râpawm hle ang. (Heb. 10:26, 27) Hei hian kan thiltih leh kan nunin mi dangte hnêna thu a sawi chu ngun takin min ngaihtuahtîr tûr a ni. He khawvêl nungchang tehnate a tlâk hniam avâng hian mi rilru ṭha pute chuan ‘mi fel leh mi suaksual, Pathian rawngbâwltu leh bâwl lotu chu an thliar hrang thei’ lehzual ang. (Mal. 3:18) Ni e, mite Pathian nêna inremtîrna kawngah kan Kristian nungchang ṭha chuan hmun pawimawh tak a luah a ni.

12-14. Rinna fiahnaa kan chhelna chuan mi dangte’n kan rawngbâwlna an thlîr dân engtin nge a nghawng? Entîrna pe rawh.

¹² Paula chuan Korinth khuaa mite hnêna a lehkha thawnah hrehawmna te, hnawhchêpna te, vuakna te, leh lung in tânnate a tâwk tih a sawi lang a. (2 Korinth 6:4, 5 chhiar rawh.) Rinna fiahna kan tawh hunah chuan, kan chhelna chuan thlîrtute chu thutak pawm tûrin a ṭanpui thei a ni. Entîr nân: Kum engemaw zât kal taah khân, Angola ram chhûngah chuan Jehova Thuhretute nuai bo tumna a awm a. Baptisma chang tawh nupa tuak khat leh tuina nei mi 30-te inkhâwm lai chu hual beh an ni a. Tichuan, dodâltute’n chûng pawisawi lote chu thisen chhuak khawpa an hlap lai en tûrin tualchhûng mite chu an kal khâwm a. Chu thiltih râwng takah chuan hmeichhiate leh naupangte pawh zuah an ni bîk lo. An thiltum ber chu tumahin Jehova Thuhretute thu sawi an ngaihthlâk loh nâna mite tihṭhaih a ni. Mahse, chutianga vântlâng hmuha vuak an nih hnuah chuan tualchhûnga mi tam takte chuan Thuhretute chu rawn panin, in lama Bible zirpui tûrin an ngên zâwk mah a nih chu! Chumi hnuah chuan Ram thu hrilh hna chuan hma lam a pan a, punna leh malsâwmna nasa tak a thlen a ni.

¹³ He thilthleng hian Bible thu bulte nunpui tûra kan dinnghehnain mi dangte chungah nghawng thui tak a neih theih dân a târ lang a. Petera leh tirhkoh dangte huaisenna khân mi eng zât tak Pathian nên inremtîr ang maw, tiin kan ngaihtuah mai thei a ni. (Tirh. 5:17-29) Keimahniah chuan kan school kalpuite, kan hnathawhpuite, a nih loh leh kan chhûngkaw zînga mite chuan thil dik atâna kan dinngheh avângin thutak an pawm phah thei a ni.

¹⁴ Eng hunah pawh kan unau ṭhenkhatte chuan tihduhdahna an tawng reng a. Entir nân, Armenia ramah chuan unau 40 chuangte chu an tualdawih avângin tân inah khung mêk an ni a, mi dang tam takte pawhin thla lo la awm tûrah chuan an tân belh a rinawm hle a ni. Eritrea ramah chuan Jehova chhiahhlawh mi 55-te chu tân inah khung mêk an ni a, ṭhenkhat phei chu kum 60 aia upa an ni. South Korea ramah chuan Thuhretu 700 vêlte chu an rinna avângin lung inah tântîr mêk an ni bawk. Hetiang thil hi kum 60 chhûng lai a thleng tawh a ni. Ram hrang hranga kan unau tihduhdahna tuarte rinawmna chuan Pathian ropuina a thlen theih nân leh dikna ngainatute chu biakna dika dingnghet tûra a ṭanpui theih nân i ṭawngṭai ang u.—Sâm 76:8-10.

15. Rinawm taka nunnain mi dangte thutaka a hîp theih dân hrilhfiah rawh.

¹⁵ Rinawm taka kan nunna pawhin mite chu thutakah a hîp thei bawk a ni. (2 Korinth 6:4, 7 chhiar rawh.) Entîr nân, he thiltawn hi ngaihtuah teh: Unaunu pakhat chuan bus chuan man pe tûra sum a han phawrh dâwn chuan a hmêlhriat pakhat chuan a chuan tawi dawi êm avângin chuan man pêk a ngaih loh thu a hrilh a. Unaunu chuan tawi tê pawh ni se, chuan man pêk chu thil dik a nih thu a hrilh a ni. A hnuah chuan a ṭhiannu chu bus aṭangin a chhuk a. Tah chuan bus khalhtupa chuan unaunu lam hawiin, “Jehova Thuhretute zînga mi i ni em?” tiin a zâwt a. Unaunu chuan, “Aw, ni e, engvângin nge min zawh?” a ti a. Chu pa chuan, “Bus chuan man pêk chungchânga in titi kha ka lo hria a, Jehova Thuhretute chu chutianga titu leh thil engkima rinawm awmchhun an ni tih ka hria,” tiin a chhâng a ni. Thla tlêm tê a liam hnuah chu pa chuan unaunu chu inkhâwmnaah rawn panin,  “Min hria em? Bus chuan man pêk chungchânga nangmah betu che kha ka nia. I nungchang ka han hmuh khân Jehova Thuhretute nêna Bible zir ka rêl thlu ta a ni,” tiin a sawi a ni. Rinawmna avânga hriat kan hlawhna chuan rawngbâwltu rin tlâk min nihtîr a ni.

16. Engvângin nge dawhtheihna te, hmangaihna te, leh ngilneihnate chuan mite thinlung a khawih? Entîrna pe rawh.

¹⁶ Dawhtheihna te, hmangaihna te, leh ngilneihna ang chi miziate kan lantîr hian Jehova lamah mite kan hîp bawk a ni. Min lo thlîrtu mi ṭhenkhat chuan Jehova, a thiltum, leh a mite chanchin hriat chu an duh mai thei a. Kristian dikte rilru put hmang leh nungchang chu a pâwn lâng maia Pathian ngaihsak anna nei a, vervêk taka Pathian betute nungchang nên chuan a inang lo hle a ni. Sakhaw hruaitu ṭhenkhat phei chu an berâmte an bumna aṭangin an hausa hle a, chûng an hauhsaknate chu in leh motor man to tak takte lei nân an hmang a—pakhat phei chuan an ui inah pawh air-condition a vuah hial a ni. Krista zuitu nia inchhâl tam takte chuan ‘athlâwnna pêk chhuah’ tumna an nei lo va. (Mt. 10:8) Chu ai mah chuan, hmân lai Israel hun laia puithiam khaw lo takte angin “hlawh beiseiin an zirtîr a”—an thil zirtîr tam tak lah chu Pathian thu nên a inmil lo lehnghâl. (Mik. 3:11) Chûng vervêkna chuan Pathian nêna inrem tûrin tumah a ṭanpui lo a ni.

17, 18. (a) Kan nuna Jehova miziate kan lan chhuahtîr hian engtin nge amah kan chawimawi? (b) Engin nge thil ṭha ti reng tûra chêttîr che?

¹⁷ Kawng leh lamah chuan, Kristian zirtîrna dik tak leh ṭhenawmte chunga thil ṭha tihna chuan mite thinlung a khawih a ni. Entîr nân, ṭum khat chu Pathian thu hrila in tin a kalnaah pioneer pakhat chu tar tawh lam hmeithai pakhat chuan a lo hnâr nghâl a. Chu nu chuan pioneer unaupain doorbell a rawn hmeh rîk lai chuan chokaah electric-bulb thlâk tûra leihlâwna a lo lâwn mêk thu a hrilh a ni. Unaupa chuan, “Nangmah chauhva tih hi a him lo asin,” tiin a hrilh a. Tichuan, chu pioneer chuan bulb chu thlâksakin a hawsan ta a. Chu nu fapa chuan thil awm dân a han hriat chuan a rilru a khawih hle a, unaupa chu a thiltih a ngaihhlutzia hrilh tûrin zawn chhuah a tum a. A tâwpah chuan chu nu fapa chuan Bible a zir ta ni.

¹⁸ Engvângin nge thil ṭha tiha theih tâwp chhuah chu i tum tlat? Kan rawngbâwlnaa taima taka kan thawh a, Pathian duhzâwng mila thil kan tih hian Jehova kan chawimawi a, mi dangte pawh chhandamna nei tûrin kan ṭanpui thei tih i hriat vâng pawh a ni thei a. (1 Korinth 10:31-33 chhiar rawh.) Chanchin ṭha hrilhnaa ṭhahnemngaihna leh Pathian duhzâwnga nunna chu Pathian leh mi dang kan hmangaihna lantîr duhna nasa tak aṭanga lo chhuak a ni. (Mt. 22:37-39) Thil ṭha tiha ṭhahnem kan ngaih chuan, tûnah ngei pawh hian hlimna leh lungawina nasa tak kan nei ang a. Chu bâkah, mi zawng zawngte’n min Siamtu Jehova chawimawi tûra biakna dik atâna ṭhahnemngaihna an lantîr hun chu nghâkhlel takin kan thlîr thei bawk ang. (w13-E 05/15)