1, 2. Ki grand l’honneur bann Témoins de Jéhovah ena, ek ki sentiment ou ena lor la?

 BEAUCOUP dimoune considere couma enn grand l’honneur pou gagne enn recompense pou enn kitsoz important ki zot finn faire. Par exemple, certain finn gagne Prix Nobel parski zot finn faire bann grand zeffort pou etablir la paix entre bann peuple. Mais, li enn pli grand l’honneur encore kan Bondié envoye enn kikenn couma enn ambassadeur ou-soit enn envoyé pou aide bann dimoune etabli bann bon relation avek zot Createur!

² En tant ki Témoins de Jéhovah, nou ena sa grand l’honneur-la. Pou suive commandement Bondié ek Christ, nou suppliye bann dimoune pou “reconcilié-zot avek Bondié.” (2 Cor. 5:20) Jéhovah servi nou pou attire bann dimoune vers Li. C’est coumsa ki plusieurs million dimoune, dan plus ki 235 pays finn gagne l’aide pou ena bann bon relation avek Bondié ek lerla, ena l’esperance pou gagne la vie eternel. (Tite 2:11) Avek zele, nou invite “tou seki envie, [pou] prend de l’eau la vie sans payé.” (Rév. 22:17) Nou accorde enn grand l’importance ar sa l’activité ki ena valeur-la ek nou faire li avek serieux, c’est a cause sa ki kapav appel nou enn peuple “ki zelé pou bann bon action.” (Tite 2:14) Asterla, anou guetté couma nou zele pou bann bon action aide nou pou attire bann dimoune vers Jéhovah. Enn fason ki nou faire sa, c’est par nou l’activité predication.

3. Ki l’assurance “zele Jéhovah” donne nou?

³ Isaïe 9:7 faire reference ar seki domination Garson Bondié pou accompli, sa verset-la dire: “C’est zele Jéhovah chef bann l’armée ki pou faire sa.” Sa bann parole-la montré ki quantité nou Papa ki dan le ciel interessé ar delivrance bann dimoune. Zele ki Jéhovah manifesté, montré bien ki, en tant ki bann proclamateur so Royaume, nou bizin soutenir avek tou nou leker sa travail ki Li’nn donne nou pou faire-la. Nou bizin aussi faire sa avek l’enthousiasme ek zele. Sa grand desir ki nou ena pou aide  bann dimoune konn Bondié, reflete zele ki Jéhovah ena. Alors, en tant ki bann dimoune ki travail ensam avek Bondié, eski personnellement nou bien decidé pou faire nou maximum pou annonce la bonne nouvelle, dapré nou situation?​—1 Cor. 3:9.

4. Couma Jésus inn laisse enn l’exemple par so zele ek so perseverance dan so ministere?

⁴ Anou examine aussi zele ki Jésus ti ena. Li ti laisse enn l’exemple parfait par so zele ek so perseverance dan so ministere. Malgré enn grand l’opposition, li ti garde so zele pou predication ziska la fin so la vie lor la terre. (Jean 18:36, 37) Kan ler ti pré pou arrivé pou Jésus donne so la vie en sacrifice, li ti encore plus decidé pou aide lezot dimoune pou konn Jéhovah.

5. Couma Jésus ti agir en accord avek l’exemple ki li ti donné lor enn pié figue?

⁵ Par exemple, en automne l’an 32 nou lepok, Jésus ti donne l’exemple enn missié ki ti ena enn pié figue dan so karo raisin. Sa pié figue-la pa ti rapporte okenn fruit pendant trois an. Kan missié-la ti dire travailleur ki occupe so plantation coupe sa pié-la, travailleur-la ti demann li encore inpé le temps. Li ti pou mette fumier ar pié-la pou li rapporté. (Lire Luc 13:6-9.) Kan Jésus ti pé dire sa, zis enn tigit dimoune ki ti accepté so message dan sa lepok-la. Mais pareil couma Jésus ti montré dan l’exemple pié figue, li ti servi sa tigit le temps ki ti resté-la​—apepré six mois​—pou augmente so l’activité predication dan Judée ek dan Pérée. Deux-trois jour avant so la mort, Jésus ti ploré pou bann Juif ki “finn tendé mais . . . pa finn prend compte.”​—Mat. 13:15; Luc 19:41.

6. Kifer nou bizin augmente nou l’activité dan predication?

⁶ Nou pé vive enn lepok kot la fin bien pré, alors, eski li pa important ki nou augmente nou bann zeffort dan predication? (Lire Daniel 2:41-45.) En tant ki Témoins de Jéhovah, nou ena enn grand privilege, pa vrai? Nou sel peuple lor la terre ki pé offert enn vrai solution pou bann probleme l’humanité. Pa trop longtemps, enn journaliste ti dire ki pena okenn reponse pou sa question-la: “Kifer bann bon dimoune konn malheur?” C’est nou devoir ek enn privilege en tant ki Chretien pou partage avek bann dimoune ki disposé pou ecoute nou, bann reponse ki la Bible donné lor bann question coumsa. Nou ena bann bon raison pou nou “zelé grace a l’esprit saint” kan nou pé accompli sa mission ki Bondié inn confié nou-la. (Rom. 12:11) Avek benediction Bondié, nou zele pou annonce la bonne nouvelle kapav aide lezot dimoune pou konn Jéhovah ek pou content Li.

7, 8. Couma enn l’esprit sacrifice donne l’honneur Jéhovah?

⁷ Bann l’experience ki l’apotre Paul ti faire, montré nou ki nou aussi dan nou ministere, nou kapav konn “bann la nuit sans sommeil” ek “bann moment kot pena mangé.” (2 Cor. 6:5) Sa bann l’expression-la decrire bien enn l’esprit sacrifice ek sa faire nou pense bann pionnier ki mette zot ministere en premier dan zot la vie ek en mem temps, travail pou gagne seki zot bizin. Guette aussi l’exemple bann missionnaire bien devoué ki faire bann sacrifice pou aide bann dimoune dan lezot pays. (Phil. 2:17) Ki nou kapav dire lor nou bann ancien ki travail dur, ki mank bann repas ou-soit pa gagne sommeil pou kapav prend soin bann brebis Jéhovah? Nou ena aussi bann frere ek soeur agé ek bann ki pena enn bon la santé, mais ki faire tou seki zot kapav pou assisté reunion ek preché. Nou leker bien touché kan nou pense tou sa bann serviteur Bondié ki ena enn l’esprit sacrifice-la. Sa bann zeffort ki zot faire-la ena enn l’effet lor fason ki lezot considere nou ministere.

⁸ Dan enn lettre ki enn lecteur ki pa Témoin de Jéhovah ti ecrire dan la gazette Boston Target, dan Lincolnshire (Royaume-Uni), li ti dire: “Bann dimoune pé perdi la foi dan la religion. Ki sa bann pretre-la faire toute la journée? Zot pa al kot bann  dimoune pareil couma Christ ti faire. . . . Sel religion ki parette prend compte bann dimoune c’est bann Témoins de Jéhovah, ki al kot bann dimoune ek ki vrai-mem passe le temps pou preche la verité.” Dan enn le monde kot avant tou bann dimoune rod satisfaire zot prop desir, l’esprit sacrifice ki nou manifesté contribué beaucoup pou donne Jéhovah l’honneur.​—Rom. 12:1.

9. Ki kapav pousse nou pou reste zelé dan nou ministere?

⁹ Mais, ki nou kapav faire si nou pensé ki nou pé perdi nou zele dan nou ministere? Seki kapav aide nou c’est reflechi lor seki Jéhovah pé faire grace a la predication. (Lire Romains 10:13-15.) Pou bann dimoune gagne la vie sauve, fodé ki zot invok nom Jéhovah avek la foi, mais zot pa pou kapav faire sa si nou pa preche ar zot. Si nou reflechi lor la, sa bizin pousse nou pou reste zelé pou bann bon action ek pou faire tou seki nou kapav pou preche la bonne nouvelle lor Royaume Bondié.

10. Kifer nou kapav dire ki nou bon conduite attire bann dimoune vers Jéhovah?

¹⁰ Li vrai ki li important ki nou zelé dan nou ministere, selman, zele tousel pa assez pou attire bann dimoune vers Bondié. Enn deuxieme kitsoz parmi bann bon action ki attire bann dimoune vers Bondié c’est nou bon conduite. Paul ti montré l’importance ki nou conduite ena kan li ti ecrire: “Dan n’importe ki kitsoz, nou pa donne okenn l’occasion ki kapav faire lezot tombé, pou ki personne pa critik nou ministere.” (2 Cor. 6:3) Nou bann bon parole ek nou bon conduite faire l’enseignement Bondié vinn pli joli, sa attire bann dimoune vers l’adoration Jéhovah. (Tite 2:10) En realité, souvent nou tann bann bon resultat kan bann dimoune sincere remarké ki nou ena enn conduite pareil couma Christ.

11. Kifer nou bizin examine dan la priere l’effet ki nou conduite ena lor lezot?

¹¹ Nou reconette ki nou bann bon action kapav ena enn bon l’effet lor bann dimoune,  selman, le contraire aussi kapav vrai. Alors, ki nou dan travail, dan lakaz, ou-soit dan lekol, nou faire tou pou pa donne personne l’occasion pou faire reproche lor nou ministere ek lor nou conduite. Si nou finn prend l’habitude pou faire peché volontairement, bann consequence ki nou pou gagné pou bien grave. (Héb. 10:26, 27) Sa pensée-la bizin pousse nou pou reflechi dan la priere lor seki nou pé faire ek l’effet ki nou conduite ena lor lezot. A mesure ki bann dimoune dan sa le monde-la pé perdi zot bann valeur moral, bann dimoune sincere pou plus “trouve difference . . . entre enn dimoune ki servi Bondié ek enn dimoune ki pa finn servi Li.” (Mal. 3:18) Oui, nou bon conduite kapav faire beaucoup pou reconcilié bann dimoune avek Bondié.

12-14. Couma certain arrivé considere nou ministere, kan zot trouve nou endure bann l’epreuve ki testé nou la foi? Donne enn l’exemple.

¹² Kan Paul ti ecrire bann Corinthiens, li ti dire ki li ti passe par bann l’epreuve, bann difficulté, li ti gagne batté ek li ti al dan prison. (Lire 2 Corinthiens 6:4, 5.) Kan nou konn bann l’epreuve ki testé nou la foi, nou l’endurance kapav aide bann dimoune ki observe nou pou accepté la verité. Anou prend enn l’exemple: Ena deux-trois l’année, bann opposant ti rod elimine bann Témoins de Jéhovah dan enn l’endroit en Angola. Zot ti encerclé deux Témoin baptisé ek 30 dimoune interessé ki ti pé assisté reunion. Apré sa, bann opposant-la ti rassemblé bann dimoune ki ti reste dan l’endroit pou guette zot fouette sa bann victime innocent-la ziska ki di-sang coulé. Mem bann madame ek bann zenfant ti gagne batté. Sa bann opposant-la ti faire sa pou ki bann dimoune gagne peur ek pou ki personne pa ecoute bann Témoins de Jéhovah. Mais apré ki ti fouette sa bann Témoins-la en publik, beaucoup dimoune dan sa l’endroit-la ti vinn vers zot pou demann enn l’etude la Bible! Apré sa, predication ti progressé ek ti ena enn grand l’accroissement ek beaucoup benediction.

¹³ Sa l’exemple-la montré ki nou position bien ferme pou bann principe la Bible kapav ena enn grand l’influence lor lezot. Kitfois nou demann-nou-mem ki quantité dimoune ti reconcilié avek Bondié parski Pierre ek lezot zapotre ti montré-zot ferme. (Actes 5:17-29) Dan nou cas, kitfois nou bann camarade lekol, nou bann collegue travail, ou-soit bann membre nou famille pou accepté la verité kan zot trouve nou prend enn position ferme pou seki droite.

¹⁴ Pena enn jour ki passé sans ki certain parmi nou bann frere gagne persecution. Par exemple, en Arménie, apepré 40 frere inn al dan prison parski zot pa prend part pou okenn parti politik, ek ena encore plusieurs douzaine ki kitfois pou al faire prison dan bann mois ki pé vini. En Érythrée, 55 serviteur Jéhovah dan prison, certain ena plus ki 60 an. Dan Corée du Sud, apepré 700 Témoins dan prison a cause zot la foi. Sa situation-la finn duré pendant 60 an. Anou prié pou ki fidelité nou bann frere ki gagne persecution dan different pays, amenn la gloire lor Bondié ek aide bann dimoune ki content la justice pou prend position pou vrai l’adoration.​—Ps. 76:8-10.

15. Donne enn l’exemple ki montré couma enn conduite honnete kapav attire bann dimoune vers la verité.

¹⁵ Seki kapav aussi attire bann dimoune vers la verité c’est kan nou amenn enn la vie honnete. (Lire 2 Corinthiens 6:4, 7.) Par exemple, anou guette sa l’experience-la: Enn soeur ti pé mette l’argent dan enn boite pou gagne so ticket bus, kan enn dimoune ki konn li, ti dire li ki pa vaut la peine paye enn carte bus pou enn ti trajet coumsa. Soeur-la ti explik li ki li bon nou paye bus, mem si c’est zis pou enn sel bus-stop. Apré sa, so camarade ti desann dan bus. Lerla, chauffeur bus-la ti demann soeur-la: “Eski ou enn Témoin de Jéhovah?” Soeur-la ti reponn: “Oui, kifer ou pé demann moi sa?” Chauffeur-la ti dire li: “Mo finn tann conversation ki ou finn gagné concernant si bizin paye bus, ek mo koné ki bann Témoins de Jéhovah zot  parmi bann tigit dimoune ki faire sa, ek zot honnete dan tou kitsoz.” Deux-trois mois plitar, enn missié ti approche sa soeur-la dan enn reunion ek ti dire li: “Eski ou konn moi? Mo-mem sa chauffeur ki ti koz ar ou concernant paye bus-la. Kan mo ti remark ou conduite, mo ti decidé pou etudié la Bible avek bann Témoins de Jéhovah.” Kan bann dimoune trouvé ki nou honnete, sa kapav attire zot vers la bonne nouvelle.

16. Kifer bann qualité couma patience, l’amour ek bonté touche leker bann dimoune? Donne enn l’exemple.

¹⁶ Kan nou manifesté bann qualité couma patience, l’amour, ek bonté, sa aussi kapav attire bann dimoune vers Jéhovah. Li possible ki certain ki pé observe nou pou envie aprann pou konn Jéhovah, so projet, ek so bann serviteur. L’attitude ek conduite bann vrai Chretien bien different ar l’apparence certain dimoune ki faire croire ki zot bien attaché ar Bondié, alors ki souvent, zot adore Bondié dan enn fason hypocrite. Certain chef religieux finn vinn bien riche parski zot inn faire malhonnete ar l’argent bann membre zot religion. Zot inn servi enn bon partie sa l’argent-la pou acheté bann lakaz ek bann l’auto ki coute cher ek dan enn cas, zot inn mem acheté enn lakaz li-chien ki ena climatiseur. Oui, beaucoup ki pretann suive Christ pena okenn desir pou “donne gratis.” (Mat. 10:8) Au contraire, pareil couma bann pretre rebelle ki ti vive en Israël dan le passé, zot “enseigne pou l’argent”​—ek la plupart kitsoz ki zot enseigné pa en accord avek la Bible. (Mika 3:11) Enn conduite hypocrite coumsa pa reconcilié personne avek Bondié.

17, 18. (a) Couma nou donne l’honneur Jéhovah kan nou reflete so bann qualité dan nou la vie? (b) Ki pousse ou pou contigne faire bann bon action?

¹⁷ De lot coté, bann l’enseignement ki vrai-mem biblik ek bann bon action ki nou faire envers nou prochain touche leker bann dimoune. Par exemple, kan enn pionnier ti pé preché, enn veuve agé ti refuse pou ecoute li. Li ti dire pionnier-la ki, kan li ti tann sonné, li ti lor enn l’escabeau dan so la cuisine pou essaye change enn globe. Pionnier-la ti dire li: “Li dangereux ki ou faire sa tousel.” Lerla, pionnier-la ti change sa globe-la pou li ek apré li’nn allé. Kan garson sa madame-la ti aprann seki ti’nn passé, li ti tellement impressionné ki li ti al rod frere-la pou remercié li. Finalement, garson-la ti accepté enn l’etude la Bible.

¹⁸ Kifer ou bien decidé pou contigne faire bann bon action? Kitfois parski ou koné ki, kan nou zelé dan nou ministere ek nou faire kitsoz en accord avek volonté Bondié, nou honore Jéhovah ek nou kapav aide lezot pou gagne la vie sauve. (Lire 1 Corinthiens 10:31-33.) Kan nou ena enn grand desir pou montré nou l’amour pou Bondié ek pou nou prochain, nou pou zelé dan predication la bonne nouvelle ek nou pou ena enn bon conduite. (Mat. 22:37-39) Si nou zelé pou bann bon action, nou pou gagne la joie ek satisfaction asterla-mem. En plus, nou kapav ena l’espoir pou trouve jour kot tou dimoune pou zelé pou vrai l’adoration ek pou donne l’honneur nou Createur, Jéhovah.