1, 2. Ko e heigoa e lilifu pauaki kua moua he Tau Fakamoli a Iehova? Fēfē e logonaaga haau ke he mena ia?

 KUA logona he tau tagata e lilifu ka age ki a lautolu e palepale he taute e taha mena pauaki. Ma e fakatai, falu ne tuku age e lilifu ka lagomatai e lautolu e tau motu ne ua ke mafola. Ka kua mua e lilifu ke fakafano atu he Atua ke lagomatai e tau tagata ke mafola mo ia!

² Ha ko e Tau Fakamoli a Iehova, ko tautolu ni e tau tagata ne moua e lilifu pauaki ia. Ne takitaki he Atua mo Keriso e gahua ha tautolu ke lagomatai e tau tagata ke ‘fakafeilo mo e Atua’ ke eke ai mo tau kapitiga haana. (2 Kori. 5:20) Ti fakaaoga e Iehova a tautolu ke futiaki e tau tagata ki a ia. Ko e fua, totou miliona he molea e 235 e motu ne eke mo tau kapitiga he Atua mo e moua e amaamanakiaga he moui tukulagi. (Tito 2:11) Fakakite e fakamakutu ha tautolu he gahua fakamatala mo e uiina a ‘ia kua manako’ ke fakaako e kupu mooli. (Fakakite. 22:17) Ha ha ia tautolu e “fakamakutu ke he tau gahua mitaki,” he fiafia ai ke he mena ne taute e tautolu ma Iehova ti taute e tau mena oti kua maeke ia tautolu ke fakafiafia a ia. (Tito 2:14) To fakaako e tautolu mogonei e puhala ka lagomatai he fakamakutu ha tautolu e falu ke iloa a Iehova. Taha puhala ko e gahua fakamatala ha tautolu.

3. Ko e ha ne foaki he “fakamalolo a Iehova” e mauokafua ki a tautolu?

³ Talahau he Isaia 9:7 ki a tautolu ko e Tama he Atua to Patuiki mo e to taute e ia e tau mena mitaki ma e tau tagata. Maeke e tau mena oti nei ha ko e “fakamalolo a Iehova Sapaota.” Ko e fakamakutu ko e manako lahi mahaki ke taute taha mena. Ti ko e tau kupu he tohi ia kua foaki ki a tautolu e mauokafua kua manako mooli a Iehova ke fakahao e tau tagata. Kua lata ia tautolu ke hakahakau mo e fakamakutu ke he gahua fakamatala ha kua makutu a Iehova ko e Atua. Ha ko e taha he tau ekegahua  he Atua, kua taute nakai e koe e tau mena oti ke fakamatala e tala mitaki?​​—1 Kori. 3:9.

4. Maeke fēfē a Iesu ke fakatoka e fifitakiaga mitaki katoatoa he fakamakutu tumau ke he gahua he fonua?

⁴ Ne fakatoka e Iesu e fifitakiaga mitaki katoatoa he fakamakutu tumau ke he gahua he fonua. Pete ne totoko e tokologa ki a ia mo e manako ke tamate ai, ne fakamakutu a ia ke hoko ke he mate haana he lalolagi. (Ioane 18:36, 37) Ha kua iloa e ia to nakai leva ti matematekelea ti mate, ne lahi e gahua fakamalolō haana ke lagomatai e tau tagata ke iloa a Iehova.

5. Tatai fēfē a Iesu ke he tagata gahua he fakataiaga he akau ko e mati?

⁵ He tau 32, ne talahau e Iesu e fakataiaga hagaao ke he tagata ne fai akau mati ne nakai fua. He mole e tolu e tau, ne tala age e tagata ke he tagata gahua ke hio ai ki lalo, ka e tala age e tagata gahua ke toka ke fai magaaho ke lali ke taute e akau ke fai fua. (Totou Luka 13:6-9.) He talahau e Iesu e mena nei, tote ai e numera ne eke mo tau tutaki haana. Ka e fakakite he fakataiaga ha Iesu kua manako a ia ke gahua fakamalolō he magaaho kū ato mate a ia. Ti fakamatala a ia mo e fakamakutu i Iutaia mo Perea kavi ke he ono e mahina. Fai aho ato mate a Iesu, ne momoko a ia he tokologa ne nakai talia e ogo haana.​​—Mata. 13:15; Luka 19:41.

6. Ko e ha kua lata ia tautolu ke lali ke lahi e mena ke taute he gahua he fonua?

⁶ Kua lata ia tautolu ke lali ke lahi e mena ka taute he gahua he fonua ha kua tata lahi a tautolu ke he fakaotiaga. (Totou Tanielu 2:41-45.) Ko e lilifu lahi ke eke mo Tau Fakamoli a Iehova! Ko tautolu ni e tau tagata he lalolagi ka tala age ke he falu e puhala ka fakamafola e tau lekua he tau tagata. Nakaila leva he talahau he tagata tohi nusipepa kua nakai maeke ke iloa e kakano ne hohoko e tau mena kelea ke he tau tagata mitaki. Ka e talahau he Tohi Tapu ki a tautolu e kakano, ti ko e matagahua mo e lilifu ha tautolu ko e tau Kerisiano ke tala age ke he falu. Kua lata a tautolu ke “malolo e loto” he taute e tautolu e gahua ha Iehova. (Roma 12:11) To fakamonuina e Iehova e gahua ha tautolu, ti maeke a tautolu ke lagomatai e tau tagata ke iloa mo e fakaalofa ki a ia.

7, 8. Fakaheke fēfē he tau foakiaga ha tautolu a Iehova?

⁷ Ne fakauka a Paulo ke he loga e tau lekua he fakamatala a ia, tuga e “tau mataalaaga” mo e “tau fakakanopogi.” (2 Kori. 6:5) Taute pihia he tau matakainaga ha tautolu e tau foakiaga ma e gahua he fonua. Ne onoono e tau paionia ke he gahua he fonua ko e gahua aoga lahi ki a lautolu, ka e tokologa ia lautolu ne lata foki ke gahua tupe. Manamanatu foki ke he tau misionare ne gahua malolō ke lagomatai e tau tagata he tau motu kehe. (Filipi 2:17) Ko e tau motua he falu magaaho ne nakai kai po ke momohe ha ko e levekiaga he tau matakainaga he fakapotopotoaga. Ko lautolu ne momotua mo e gagao he fakapotopotoaga ne taute e tau mena oti kua maeke ia lautolu ke o atu ke he tau feleveiaaga mo e gahua he fonua. Kua mafanatia ke kitia e makai he tau fekafekau nei he Atua ke taute e tau foakiaga ke lata mo e gahua he fonua ha lautolu. Ka ko lautolu foki i fafo he fakapotopotoaga ne mailoga e aoga lahi he gahua he fonua ki a tautolu.

⁸ He tohi ke he nusipepa he tau Kautu Kaufakalataha, ko e tagata nakai ko e Fakamoli ne pehē: ‘Kua galo fakahaga e tua he tau tagata ke he tau lotu. Nakai iloa e au e mena ne taute he tau takitaki lotu. Ne nakai o atu lautolu ke feleveia mo e tau tagata tuga ne taute he Keriso. Ko e lotu ni ne liga fakakite e fakaalofa ko e Tau Fakamoli a Iehova, ne o atu mo e feleveia mo e tau tagata ti fakamatala e kupu mooli.’ Laulahi he tau tagata he lalolagi ne nakai makai ke taute e tau foakiaga ma e falu. Ka kua makai a tautolu ke taute e tau foakiaga ke fakamatala, ne fakaheke e tautolu a Iehova ko e Atua.​​—Roma 12:1.

9. Ko e heigoa ka lagomatai a tautolu ke makutu ke he tau gahua mitaki he gahua he fonua ha tautolu?

 ⁹ Ko e heigoa kua lata ia tautolu ke taute ka nakai makutu a tautolu ke tuga fakamua he gahua he fonua ha tautolu? Kua lata ia tautolu ke manamanatu ke he tau mitaki kua fua mai he gahua ne foaki e Iehova ki a tautolu ke taute. (Totou Roma 10:13-15.) Ke maeke he tau tagata ke hao, kua lata ia lautolu ke tua ki a Iehova mo e ui ke he higoa haana. Ka e nakai maeke a lautolu ke taute e mena ia ato fakamatala a tautolu ki a lautolu. He iloa e mena nei kua lata ke taute a tautolu ke manako ke makutu ke he tau gahua mitaki mo e taute e tau mena oti kua maeke ia tautolu ke fakamatala e tala mitaki he Kautu.

10. Taute fēfē he mahani mitaki ha tautolu e tau tagata ke manako ke iloa e Atua?

¹⁰ Ko e makutu ha tautolu ma e gahua he fonua kua nakai lahi ke taute e tau tagata ke manako ke iloa e Atua. Ko e mena ke uaaki kua lagomatai a lautolu ko e mahani faka-Atua ha tautolu. Ne fakamaama e Paulo e kakano ne aoga e mahani ha tautolu he pehē: “Kua nakai tuku atu e mautolu kia taha ha mena ke tupetupe ai, neke talahaua kelea e gahua.” (2 Kori. 6:3) Ko e vagahau meā ha tautolu mo e mahani mitaki ka taute e falu tagata ke manako ke tapuaki ki a Iehova. (Tito 2:10) Fa logona e tautolu e tau tali he tau tagata ke he kupu mooli ka kitia e lautolu e puhala ne fifitaki e tautolu e Keriso.

11. Kua lata he ha ia tautolu ke manamanatu mo e liogi ke he puhala kua lauia e falu he tau mahani ha tautolu?

¹¹ Tuga ne mahani mitaki ha tautolu kua taute e tau tagata ke manako ke fakaako e kupu mooli, taute he mahani kelea e tau tagata ke nakai manako ke iloa a Iehova. Ti ka haia a tautolu he gahuaaga, kaina, po ke aoga, kua lata ia tautolu ke mailoga kua nakai fai mena kua taute e tautolu ke fuluhi  kehe e taha tagata mai ia Iehova. Kaeke kua “hala a tautolu mo e loto ki ai,” to galo tukulagi e fakafetuiaga ha tautolu mo Iehova. (Hepe. 10:26, 27) Kua lata he mena nei ke taute a tautolu ke manamanatu fakamitaki mo e liogi hagaao ke he mahani ha tautolu mo e puhala kua lauia e falu. He matutaki ni e mahani he lalolagi ke au atu e kelea, kua lata ke mukamuka lahi ma e tau tagata ke kitia e kehe “a ia kua fekafekau ke he Atua, mo ia kua nakai fekafekau kia ia.” (Mala. 3:18) E, ko e mahani faka-Atua ha tautolu ko e puhala aoga ke lagomatai e tau tagata ke manako ke eke mo tau kapitiga he Atua.

12-14. Maeke fēfē he puhala kua fakauka a tautolu ke he totokoaga ke lauia e onoonoaga he falu ke he kupu mooli? Foaki e fakataiaga.

¹² He tohi ha Paulo ke uaaki ke he tau Korinito, ne fakamaama e ia kua hoko ki a ia e tau matematekelea, tau fahiaga, mo e tuku ke he fale puipui ha kua totoko he tau tagata e gahua he fonua haana. (Totou 2 Korinito 6:4, 5.) Ka fakauka a tautolu ke he totokoaga, liga to omoomoi e falu ke talia e kupu mooli. Loga e tau he mole, ne manako e falu i Angola ke utakehe oti e Tau Fakamoli a Iehova he matakavi ha lautolu. Ne fahi e lautolu tokoua e Fakamoli papatiso ti 30 e tagata ne manako, ato mahelehele e tau vala kakano ha lautolu ti toto. Ne fahi foki e lautolu e tau fifine mo e tau tama. Ne manako a lautolu ke matakutaku e falu ke fanogonogo ke he Tau Fakamoli a Iehova, ti fakaohooho e lautolu e tau tagata he matakavi ke takahao. Ka ko e mogo fakamui ne tokologa e tau tagata nei ne ole ke he Tau Fakamoli ma e fakaako Tohi Tapu he kaina! Ti ko e fua, ne matutaki e gahua fakamatala, tokologa e tagata ne o mai ke he kupu mooli, mo e kua fakamonuina e tau matakainaga.

¹³ Fakakite he fakataiaga nei ka kitia he tau tagata kua loto malolō a tautolu he mogo ka kamatamata, liga fifili a lautolu ke talia e kupu mooli. Ko e loto malolō ha Peteru mo e falu aposetolo kua liga fakamafana e falu ke eke mo tau kapitiga he Atua. (Gahua 5:17-29) Ko e ha tautolu a tau kapitiga aoga, tau kapitiga gahua, po ke tau tagata he magafaoa ne liga talia e kupu mooli ha kua kitia e lautolu kua loto malolō a tautolu ka fehagai mo e totokoaga.

¹⁴ Kua fai matakainaga tumau a tautolu ne kua favale ki ai. He mogo tonu nei, ma e fakatai, kavi ke he 40 e matakainaga i Amenia he fale puipui ha ko e ha lautolu a tuuho. Ti tokologa atu he motu ia ka liga tuku foki he fale puipui he tau mogo i mua. I Eritrea, 55 e Fakamoli he fale puipui, ti falu ia lautolu kua molea e 60 e tau he moui. I Korea Toga, kavi ke he 700 e Fakamoli he fale puipui ha ko e ha lautolu a tuuho. Kua 60 e tau ne tuku e tau matakainaga ha tautolu he fale puipui. Kua lata ia tautolu ke liogi tumau ko e mahani fakamooli he tau matakainaga nei kua favale ki ai ka fakaheke e Atua mo e lagomatai e falu ke talia e kupu mooli.​​—Sala. 76:8-10.

15. Fakamaama e mena ne tupu ke fakakite e puhala he mahani fakamooli ha tautolu ka taute e falu ke manako ke iloa e kupu mooli.

¹⁵ Ko e fakamooli ha tautolu kua liga taute foki e tau tagata ke manako ke fakaako e kupu mooli. (Totou 2 Korinito 6:4, 7.) Ma e fakatai, ko e matakainaga fifine ne tuku e tupe he matini tiketi he pasi he mogo ne tala age e kapitiga ki a ia kua nakai lata a ia ke totogi e tiketi ha kua kū e heke haana. Ne fakamaama he matakainaga fifine ko e mena hako ke taute ko e totogi e tiketi, pete ne taha e tū. He mole e mena ia, ne hopo e kapitiga haana he pasi. Ti hūhū e tagata fakaholo pasi ke he matakainaga fifine, ‘Ko koe kia taha he Tau Fakamoli a Iehova?’ Ne pehē a ia ‘E. Ko e ha ne hūhū pihia a koe?’ ‘Logona e au e fakatutala haau hagaao ke he totogi e tiketi pasi, ti iloa e au ko e Tau Fakamoli a Iehova e tau tagata tokogahoa ne totogi e tau tiketi mo e fakamooli ke he tau mena oti kana.’ Fai mahina he mole, ne fina atu e tagata taane  ke he matakainaga fifine he feleveiaaga mo e pehē, ‘Iloa nakai e koe au? Ko e tagata fakaholo pasi au ne tutala ki a koe hagaao ke he totogi e tiketi. He mole e kitia e au e fakamooli haau, ne fifili au ke kamata ke fakaako e Tohi Tapu mo e Tau Fakamoli a Iehova.’ Ka kitia he tau tagata a tautolu kua fakamooli, kua falanaki a lautolu ke he tala mitaki ne fakamatala e tautolu.

16. Ko e heigoa ka tupu ka fakamanavalahi, fakaalofa, mo e totonu a tautolu? Fakakite e fakataiaga ne taute he tau takitaki lotu fakavai.

¹⁶ Ka fakamanavalahi, fakaalofa, mo e totonu a tautolu, kua liga taute e tautolu e falu tagata ke manako ke fakaako hagaao ki a Iehova, haana tau finagalo, mo e haana tau tagata. Ko e aga mo e mahani he tau Kerisiano mooli kua fakaheke e Atua. Falu he tau takitaki lotu ne fakatupua ke aga mitaki mo e mahani mitaki. Ka e pikopiko a lautolu ke he tau tagata ha lautolu mo e uta e tau tupe ha lautolu. Falu ne fakaaoga foki e tupe ia ke fakatau aki e tau kaina mo e tau motokā tauuka ma lautolu ni. Taha foki ne tā e fale kulī ne fai matini fakahauhau! Nakai muitua e lautolu e poakiaga he Keriso ke “foaki noa atu.” (Mata. 10:8) Ka e tuga e tau ekepoa kelea i Isaraela a lautolu. Kua fakaako e lautolu “he fia eke taui” mo e fakaako e tau manatu hepe hagaao ke he Atua. (Mika 3:11) He mahani pihia a lautolu, kua nakai lagomatai e lautolu ha tagata ke eke mo kapitiga he Atua.

17, 18. (a) Maeke fēfē a tautolu ke fakaheke a Iehova ke he tau mahani ha tautolu? (e) Ko e ha kua manako a koe ke fakamakutu tumau ke he tau gahua mitaki?

¹⁷ Ka e manako e tau tagata ke eke mo tau kapitiga he Atua ka mailoga e lautolu kua fakaako e tautolu e kupu mooli ti kitia kua mahani totonu atu ke he tau katofia ha tautolu. Ma e fakatai, taha e paionia ne tutala ke he takape fuakau he gutuhala, ka e mafiti a ia ke tala age ki ai kua nakai manako a ia. Ne pehē a ia to fakatagi he paionia e logo he gutuhala, ko ia he papahi he peito ne lali ke fakafoou he fua molī. “Nakai mitaki ke taute tokotaha e koe e mena ia,” he ui e ia. Ti hiki he matakainaga taane e fua molī ti fano a ia ke he taha gutuhala foki. He iloa he tama taane he fifine e mena ne tupu, ne nava lahi a ia ti lali ai ke kumi e matakainaga ke fakaaue ki a ia. Fakahiku ti talia he tama taane e fakaako Tohi Tapu.

¹⁸ Ko e ha kua manako a koe ke fakamakutu tumau ke he tau gahua mitaki? Liga ha kua iloa e koe ka fakamakutu a koe ke he gahua he fonua ti mitaki e mahani, to fakaheke e koe a Iehova mo e lagomatai e falu ke momoui. (Totou 1 Korinito 10:31-33.) Ko e taha kakano ma e makutu ha tautolu he fakamatala mo e mahani mitaki kua manako mooli a tautolu ke fakakite e fakaalofa ma e Atua mo e falu. (Mata. 22:37-39) Ka makutu a tautolu ke he tau gahua mitaki, to moua e tautolu e fiafia mooli mo e makona mogonei. Ti onoono atu a tautolu ke he magaaho ka fiafia oti e tau tagata ke tapuaki mo e fakaheke ha tautolu a Tufuga ko Iehova.