1, 2. Elao patyi enene Onombangi mba Jeova vena? Oñgeni ulitehelela konthele yelao olio?

 OVANYINGI vahambukwa unene tyina vapewa ondyambi mokonda yokualinga otyipuka tyimwe tyakolela. Mongeleka, vamwe vahivilikwa tyina vakuatesako ovilongo vivali ankho vilwa okukala nombembwa. Mahi, onthue tuhivilikwa vali unene mokonda Huku wetutuma opo tukuateseko ovanthu okukala nombembwa Nae!

² Mokonda Tunombangi mba Jeova, onthue vala tuna elao olio liakolela. Huku na Kristu vetutuma tukuateseko ovanthu opo “vakondoke moupanga na Huku.” (2 Coríntios 5:20) Jeova ukahi nokutuundapesa opo tukuateseko ovanthu okufuena kwe. Moluotyo, ovanthu ovanyingi movilongo vilamba po 235 vakala omapanga a Huku, nokuna ekevelelo liomuenyo wahapu. (Tito 2:11) Tuundapa nombili movilinga viokuivisa opo tukonge “una wahanda” okulilongesa otyili. (Revelação 22:17) Mokonda tupanda otyilinga tyetu, nokutyilinga nombili, tuihanwa okuti ovanthu “vokuna ombili novilinga oviwa.” (Tito 2:14) Matulilongesa oñgeni okukala nombili novilinga oviwa, tyitukuatesako okufuena ku Jeova. Onkhalelo imwe, ovilinga vietu viokuivisa.

3. Omokonda yatyi “ombili ya Jeova” itukalesa nonthumbi?

³ Omukanda wa Isaías 9:7 utupopila okuti Omona wa Huku makala Ohamba iya malingila ovanthu ovipuka oviwa. Atyiho otyo tyilingwa mokonda “yombili ya Jeova wonongombo mbovita.” Ombili, okukala nehando enene liokulinga otyipuka tyimwe. Moluotyo, onondaka mboversikulu oyo mbutukalesa nonthumbi yokuti tyotyili Jeova uhanda okuyovola ovanthu. Tuesukisa okuivisa noundyandyi, nombili mokonda Jeova Huku una ombili. Mokonda uundapela kumwe na Huku, okuti ukahi nokulinga ononkhono mbokuivisa onondaka onongwa?​—1 Coríntios 3:9.

4. Oñgeni Jesus aavele ongeleka ongwa yokutualako nombili movilinga viokuivisa?

 ⁴ Tupu Jesus waava ongeleka ongwa yokutualako nombili movilinga viokuivisa. Namphila ankho vemulinga onya nokuhanda okumuipaa, watuaileko nombili alo kononkhia. (João 18:36, 37) Mokonda ankho utyii okuti mamoneswa ononkhumbi nokuipawa, waundapele unene opo akuateseko ovanthu okunoñgonoka Jeova.

5. Omonkhalelo patyi Jesus ankho elifwa nomuundapi mongeleka yomukuyu?

⁵ Menima 32 P.K., Jesus wapopile ongeleka yomulume ankho una omukuyu wahaimi. Etyi palamba omanima etatu omulume atumu omuundapi wae eutyokepo, mahi, omuundapi aiti vali omuvo opo eupake ombumbi. (Tanga Lucas 13:6-9.) Etyi Jesus etyipopia, ovalongwa vae ankho kavehi. Mahi, ongeleka ya Jesus yalekesile okuti ankho wesukisa okuundapa nombili momuvo ankho wahupapo. Moluotyo, waivisile nombili onene mo Judeia nomo Pereya mokueenda kuonohanyi epandu. Etyi ankho nkhele kuakambela ononthiki mbumwe opo aipawe, Jesus walilile mokonda ovanyingi ‘kavetavelele etyi ankho alongesa.’​—Mateus 13:15; Lucas 19:41.

6. Omokonda yatyi tuesukisila okuundapa nombili movilinga viokuivisa?

⁶ Tuesukisa okulinga ononkhono mbokuundapa nombili movilinga viokuivisa, mokonda onthyulilo ikahi popepi. (Tanga Daniel 2:41-45.) Okukala Onombangi mba Jeova elao limwe enene! Pano pohi, onthue vala tupopila vakuetu oñgeni ovitateka viovanthu mavikatetululwa. Omuhoneki umwe wo jornale wapopia okuti, ketyivili okunoñgonoka “omokonda yatyi ovanthu onondalawa vamonena ononkhumbi.” Mahi, Ombimbiliya itupopila omokonda yatyi, iya onthue Vakristau tuna otyilinga, nelao enene liokutyipopila vakuetu. Tuesukisa okukala “nombili onene mospilitu” putyina tulinga ovilinga via Jeova. (Romanos 12:11) Jeova metuyambe opo tutyivile okukuatesako ovanthu okumunoñgonoka nokukala nohole nae.

7, 8. Oñgeni ononkhono tulinga mbuhivilika Jeova?

⁷ Paulu wakoleleyile ovitateka ovinyingi movilinga viokuivisa, “okuhalala kounthiki, nondyala.” (2 Coríntios 6:5) Hono, ovakuatate vetu no nomphange navo vakala novitateka ngovio tyina vafuisapo ovilinga viokuivisa. Kovakokoli-ndyila otyilinga tyakolela vali, okuivisa onondaka onongwa, mahi ovanyingi puvo vetupu ovilinga. Tupu, soka konomisionaliu vaundapa nombili onene movilongo ovikuavo opo vakuateseko ovanthu. (Filipenses 2:17) Ovakulu vomawaneno pamwe kavali ine kavalala opo vakuateseko ovakuatate mewaneno. Vokuakulupa, novokuvela mewaneno, valinga ononkhono mbokuenda komaliongiyo, no movilinga viokuivisa. Tyitupameka unene tyina tutala ovaumbili ovo va Huku valinga ononkhono ononene movilinga viae. Alo umwe ovanthu vehe Nombangi, vetyii okuti ovilinga viokuivisa kuonthue viakolela unene.

⁸ Ko Reino Unido, omulume umwe wehe Mbangi ya Jeova, wahonekelele o jornale imwe okuti: ‘Ekolelo liovanthu mo nongeleya likahi nokutepuluka. Hityii oityi ononkhalamutwe mbonongeleya mbukahi nokulinga. Kavaovola ovanthu ngetyi tyalingile Kristu. Ongeleya isuka novanthu, oyo Nombangi mba Jeova vala, vaovola ovanthu, nokulongesa otyili.’ Mouye, ovanthu ovanyingi kavahande okukuatesako vakuavo. Mahi, mokonda tulinga ononkhono  mbokuivisa, tuhivilika Jeova Huku.​—Romanos 12:1.

9. Oityi matyitukuatesako okukala nombili novilinga oviwa movilinga vietu viokuivisa?

⁹ Oityi tuesukisa okulinga, inkha ombili yetu movilinga viokuivisa ikahi nokutepuluka? Tuesukisa okusoka koviwa vitundilila kovilinga viokuivisa tuapewa na Jeova. (Tanga Romanos 10:13-15.) Opo ovanthu vayovolwe, vesukisa okukala nekolelo mu Jeova, nokuivisa enyina liae. Mahi, inkha katuvelongesa, kamavetyivili. Okunoñgonoka otyo, tyitulunda okukala nombili novilinga oviwa, nokulinga ononkhono mbokuivisa nombili onondaka onongwa Mbouhamba.

10. Oñgeni ovituwa vietu oviwa vikalesa ovanthu nehando liokunoñgonoka Jeova?

¹⁰ Okuundapa nombili movilinga viokuivisa hatyo vala tyesukisa opo ovanthu vakale nehando liokunoñgonoka Huku. Otyipuka otyikuavo tyivekuatesako, ovituwa vietu oviwa. Paulu wahangununine omokonda yatyi tuesukisila okukala novituwa oviwa, etyi ati: “Tuhalingei natyike tyipundukisa vakuetu, opo ovilinga vietu viokuivisa vihapopiwe omapita.” (2 Coríntios 6:3) Okupopia ovipuka oviwa, nokukala novituwa oviwa, tyipondola okukalesa vakuetu nehando liokufenda Jeova. (Tito 2:10) Tyotyili, apeho tuiva konthele yovanthu vetavela otyili mokonda vatala okuti tuhetekela Kristu.

11. Omokonda yatyi tuesukisila okusoka nokulikuambela konthele yoñgeni ovituwa vietu vikalesa vakuetu?

¹¹ Ngetyi ovituwa oviwa vipondola okukalesa ovanthu nehando liokulilongesa otyili, tupu ovituwa ovivi vipondola okulingisisa ovanthu okuhetavela okunoñgonoka Jeova. Moluotyo, tyilinge tukahi kovilinga, meumbo, ine okosikola, tuesukisa okuliyunga opo tuahalinge natyike tyityilika omunthu okufuena ku Jeova. Inkha tukahi nokulingila tyawina  onkhali, kamatukala vali omapanga a Jeova apeho. (Hebreus 10:26, 27) Otyo tyitulunda okusoka nawa, nokulikuambela konthele yovituwa vietu, noñgeni vikalesa vakuetu. Putyina ovituwa ovivi viouye uno vitualako nokuliyawisa, tyina okukala tyayanduluka okuti ‘una uumbila Huku welikalela na una uhemuumbila.’ (Malaquias 3:18) Tyotyili, okukala novituwa oviwa, tyakolela unene opo tukuateseko ovanthu okukala omapanga a Huku.

12-14. Oñgeni okukoleleya tyina tumoneswa emone tyipondola okukalesa vana vetutala? Ava ongeleka.

¹² Momukanda wavali Paulu ahonekelele ova Korintu, wahangununine okuti wamonesilwe emone, nokuvetwa, nokupakwa mokaleya. (Tanga 2 Coríntios 6:4, 5.) Okukoleleya tyina tumoneswa emone tyipondola okulingisa ovanthu okutavela otyili. Mongeleka, kohale, vamwe ko Angola vahandele okumanako Onombangi mba Jeova. Vavetele Onombangi vevali vambatisalwa, novanthu 30 ankho velilongesa, alo ohitu yavo yatandauka avamomaisa onohonde. Vavetele alo umwe ovakai novana. Opo ovanthu ovakuavo vakale nowoma wokutehelela Onombangi mba Jeova, aveveihana veye okutala tyina vavetwa. Mahi, konyima ovanyingi povanthu ovo avakaita ko Nombangi opo vevelongese Ombimbiliya pomaumbo avo! Moluotyo, ovilinga viokuivisa avitualako, ovanthu ovanyingi avetavela otyili, iya ovakuatate avayambwa.

¹³ Ongeleka oyo ilekesa okuti tyina ovanthu vamona okuti tukakatela movitumino Viombimbiliya namphila tumoneswa emone, navo vapondola okutavela otyili. Mokonda Petulu nono apostolu ononkhuavo vakalele nomutima wakola, tyakuatesileko vakuavo okukala omapanga a Huku. (Atos 5:17-29) Vana tulongeswa navo kosikola, na vana tuundapa navo, nombunga yetu, vapondola okutavela otyili tyina vamona okuti tutualako nomutima wakola tyina tumoneswa emone.

¹⁴ Apeho kuna ovakuatate vamwe vekahi nokumoneswa emone. Mongeleka, ko Armênia ovakuatate 40 vekahi mokaleya mokonda kavetavela okulipaka motolopa. Iya ovanyingi kotyilongo otyo nkhele mavapakwa mokaleya. Ko Eritreia Onombangi 55 vekahi mokaleya, iya vamwe puvo vena omanima alamba po 60. Ko Coréia do Sul, Onombangi 700 vekahi mokaleya mokonda kavetavela okulipaka motolopa. Vekahiale motyitateka otyo mokueenda kuomanima 60. Tuesukisa okutualako nokulikuambela opo ekolelo liovakuatate ovo vekahi nokumoneswa emone, lihivilike Huku, nokukuatesako ovanthu ovakuavo okutavela otyili.​—Salmo 76:8-10.

15. Popiapo ongeleka ilekesa oñgeni oukuatyili wetu upondola okukalesa vakuetu nehando liokulilongesa otyili.

¹⁵ Tupu, inkha tukala ovakuatyili, tupondola okukalesa vakuetu nehando liokulilongesa otyili. (Tanga 2 Coríntios 6:4, 7.) Mongeleka, omphange umwe walandele ombiyete yomekalela, epanga liae emutolela opo ahafete mokonda watulukila popepi. Omphange emupopila okuti una okufeta, namphila atulukila popepi. Konyima, epanga liae atulukamo. Omutahi wekalela emupulu okuti, ‘ove Umbangi ya Jeova?’ Ati, “eenga. Omokonda yatyi wamphulila?” Ati, “etyi ankho mukahi nokutomphola konthele yokufetela ombiyete, netyiiva, iya ndyityii okuti Onombangi mba Jeova ovakuatyili movipuka aviho.” Etyi palamba onohanyi mbumwe, omulume oo eya pomphange meliongiyo, ati: “Undyi? Ame mutahi wekalela wahipululile nae konthele yokufetela ombiyete yomekalela. Mokonda  youkuatyili wove, natokola okulongeswa Ombimbiliya no Nombangi mba Jeova.” Tyina ovanthu vatala okuti tuvakuatyili, vetavela otyili tuivisa.

16. Oityi tyimonekapo tyina tukala noumphwa-lundo, noluembia, nokankhenda? Popiapo ongeleka yetyi ononkhalamutwe mbonongeleya mbomatutu valinga.

¹⁶ Tyina tukala noumphwa-lundo, noluembia, nokankhenda, tupondola okulunda ovanthu vakuetu okukala nehando liokulilongesa konthele ya Jeova, nomavangelo ae, novanthu vae. Ovituwa oviwa Viovakristau votyotyili vihivilika Huku. Ononkhalamutwe ononyingi mbonongeleya velilekesa ngoti vena ovituwa oviwa, mahi vakemba ovanthu vavo, nokuvevaka onombongo. Vamwe vaundapesa onombongo ombo pala okulilandela onondyuo ononene mbulanda onombongo ononyingi, nomatuku-tuku. Umwe alo umwe watungila ovimbwa viae ondyuo imwe ongwa, ine omakina yokutendesamo. Kavalandula otyitumino tya Kristu “tyokuava otyali.” (Mateus 10:8) Mahi, vekahi ngovanakwa ovakalavi vo Isilayeli ankho valongesila “vala okufetwa,” nokulongesa ovipuka viahaviukile konthele ya Huku. (Miquéias 3:11) Mokonda yokulinga ngotyo, kavetyivili okukuatesako ovanthu okukala omapanga a Huku.

17, 18. (a) Oñgeni tupondola okuhivilika Jeova novituwa vietu? (b) Omokonda yatyi uhandela okukala nombili novilinga oviwa?

¹⁷ Mahi, tyina ovanthu vaimbuka okuti tukahi nokulongesa otyili, nokutala ovipuka oviwa tulingila ovomunthele yetu, navo vakala nehando liokukala omapanga a Huku. Mongeleka, omukokoli-ndyila umwe, ankho ukahi nokutomphola nomukulukai umwe omuhepe, mahi emupopila liwa okuti kesukile. Wati etyi atotola pepito ankho ukahi motyitelekwa walonda kosikata opo apingiyepo olamba yae yapia. Omukuatate ati, “mahi kupondola okutyilinga awike.” Omukuatate emukuatesako, iya aende peumbo ekuavo. Etyi omukai oo etyipopila omona wae, ahuvu, akaovola omukuatate opo emupandule. Konyima, omukuendye oo etavela okulongeswa Ombimbiliya.

¹⁸ Omokonda yatyi uhandela okutualako nombili novilinga oviwa? Hamwe omokonda utyii okuti inkha uundapa nombili movilinga viokuivisa, nokukala novituwa oviwa, mohivilika Jeova nokukuatesako vakuenyi opo vayovolwe. (Tanga 1 Coríntios 10:31-33.) Ehunga ekuavo liokukala nombili movilinga viokuivisa, novituwa oviwa, omokonda tuhanda unene okulekesa okuti tuhole Huku, navakuetu. (Mateus 22:37-39) Inkha tuna ombili novilinga oviwa, matukala nehambu, nomuenyo omuwa hono. Iya tupondola okukevelela omuvo ovanthu aveho mavakahambukilwa okufenda nokuhivilika Omutungi wetu, Jeova.