1, 2. Ki onor Testigunan di Yehova tin, i kiko abo ta pensa di esaki?

HOPI hende ta sinti nan masha onrá ora nan risibí rekonosementu pa un logro spesial. Algun hende, por ehèmpel, a risibí Premio Nobel pasobra nan a yuda dos nashon ku tabata enemigu di otro sera pas. Pero hende por risibí un onor muchu mas grandi ainda: e onor di por sirbi komo representante di e Kreador, yudando hende rekonsiliá, òf sera pas, kuné.

² Komo Testigunan di Yehova, nos ta e úniko pueblo ku tin e onor spesial ei. Bou di liderato di Yehova i Kristu, nos ta hasi tur nos esfuerso pa yuda hende “rekonsiliá ku Dios,” esta, bira amigu di Dios. (2 Kor. 5:20) Pues, Yehova ta usa nos pa hala hende serka dje. Komo resultado di esei, awe tin miónes di hende den mas ku 235 pais ku a bira amigu di Dios i ku tin e speransa di bida eterno. (Tito 2:11) Ku zelo nos ta invitá ‘esnan ku ta deseá pa bin tuma e awa di bida pòrnada.’ (Rev. 22:17) I debí ku nos ta balorá e asignashon presioso akí i ta kumpli kuné diligentemente, nos por ser yamá un pueblo ku “zelo pa obranan ekselente.” (Tito 2:14) Laga nos analisá awor kon nos por demostrá zelo pa obranan ekselente pa asina hala hende serka Yehova. Un manera ta mediante nos trabou di prediká.

3. Ki garantia ‘e zelo di Yehova’ ta duna nos?

³ Den un deskripshon di loke e Yu di Dios lo logra pa humanidat bou di su gobernashon, Isaías 9:7 ta bisa: “E zelo di e SEÑOR di ehérsitonan lo hasi esaki.” Siendo ku zelo ta un deseo ardiente pa hasi algu, e palabranan di Isaías ta garantisá nos ku nos Tata selestial realmente ta deseá pa hende ser salbá. Anto si Yehova ta desplegá zelo, esei ta un indikashon ku nos tambe tin ku hasi e trabou di prediká e Reino ku zelo, òf entusiasmo. Sí, nos deseo ardiente pa yuda hende siña konosé Dios ta un  refleho di Dios su zelo. I manera Beibel ta bisa, nos ta kompañero di trabou di Dios. Awor kiko di abo? Bo ta hasiendo bo máksimo esfuerso pa prediká e bon notisia?—1 Kor. 3:9.

4. Kon Hesus a pone un ehèmpel di perseveransia i zelo den su sirbishi kristian?

⁴ Awor kiko di Hesus? El a pone e ehèmpel perfekto: El a keda semper zeloso den su sirbishi na Dios. Sí, apesar di oposishon kruel, el a keda prediká ku zelo te na fin di su bida riba tera. (Huan 18:36, 37) Es mas, segun ku e dia pa el a sufri i muri tabata yega serka, e tabata aun mas determiná pa yuda hende siña konosé Yehova.

5. Den ki sentido Hesus tabata meskos ku e trahadó den su ilustrashon di e palu di figu?

⁵ Den hèrfst di aña 32 di nos era, Hesus a konta un ilustrashon di un hòmber ku den su kunuku di wendrùif tabatin un palu di figu ku tabatin tres aña sin duna fruta. E hòmber a manda su trahadó kap e palu basha abou. Pero e trahadó a pidié pa dun’é chèns di koba rònt di e palu i pone mèst pa wak si e ta pari. (Lesa Lukas 13:6-9.) Tempu ku Hesus a konta e ilustrashon akí ta un grupo chikitu di hende so tabata su disipel. Pero manera e ilustrashon a mustra, Hesus a usa e tiki tempu ku a sobra promé ku e muri—un seis luna asina—pa e hasi mas den su sirbishi na Hudea i Perea. Pero un par di dia promé ku su morto, Hesus a yora pasobra mayoria di hende ku ‘a tende su mensahe no a reakshoná’ positivamente.—Mat. 13:15; Luk. 19:41.

6. Dikon ta importante pa nos hasi mas den e trabou di prediká?

⁶ Awe nos ta masha serka di e fin, p’esei ta masha importante pa nos hasi mas den e trabou di prediká. (Lesa Daniel 2:41-45.) Kòrda ku nos tin e gran privilegio di ta Testigu di Yehova! Nos ta e úniko hendenan na mundu ku ta bisa hende kiko ta berdadero solushon pa e problemanan di humanidat. Resientemente, un reportera di korant a bisa ku no tin kontesta pa e pregunta, “Dikon kos malu ta sosodé ku bon hende?” Pero Beibel tin kontesta pa preguntanan asina. P’esei komo kristian, nos tin e deber i privilegio di mustra e kontestanan na tur hende ku ke skucha. Pues, nos tin tur motibu pa “bria ku e spiritu di Dios” segun ku nos ta kumpli zelosamente ku e asignashon ku Dios a duna nos. (Rom. 12:11) I ku Yehova su bendishon, nos por yuda otro hende konos’é i stim’é.

7, 8. Kon un spiritu di sakrifisio propio ta duna onor na Yehova?

⁷ Apòstel Pablo a bisa ku el a pasa ‘anochinan sin drumi’ i “vários biaha sin kuminda” pa motibu di e bon notisia. (2 Kor. 6:5) Ora nos ta prediká e bon notisia, nos tambe por haña nos ku problemanan similar. Sí, nos tin ehèmpel di pioneronan ku, aunke nan tin ku traha pa mantené nan mes finansieramente, ta pone nan sirbishi kristian na promé lugá den nan bida. Pensa tambe riba nos misioneronan kendenan, na moda di papia, zelosamente ta ‘basha nan mes manera un ofrenda di bibida’ pa sirbi hende den estranheria. (Flp. 2:17) I kiko di nos ansianonan kendenan ta traha duru? Tin biaha nan ta keda sin kome òf ta pèrdè soño pa kuida Yehova su karnénan. Ademas, nos tin nos rumannan di edat i esnan malu ku ta hasi nan bèst pa asistí na e reunionnan i pa partisipá den sirbishi di vèlt. Nos tin masha apresio pa tur e rumannan akí ku ta hasi hopi sakrifisio pa sirbi Yehova. Nan esfuersonan ta yuda esnan pafó di e kongregashon kristian mira kon importante sirbishi na Yehova ta pa nos.

⁸ Un persona ku no ta Testigu a skirbi un karta na Boston Target, un korant den Reino Uní (Gran Bretaña i Nort Irlanda), den kua el a bisa: ‘Hende a kuminsá pèrdè fe den religion. Mi tin gana di sa kiko e lidernan  religioso ta hasi henter dia. Un kos ta sigur: Nan no ta sali bai serka hende manera Kristu a hasi. Ta Testigunan di Yehova ta e úniko religion ku ta parse di ta interesá den hende. Nan ta sali bai serka hende; nan sí ta hasi e trabou di prediká e bèrdat.’ Hopi hende den mundu en bèrdat no ta dispuesto pa hasi sakrifisio na benefisio di otronan. Pero e echo ku nos sí ta hasi sakrifisio pa prediká e bon notisia sigur ta duna onor na Yehova Dios.—Rom. 12:1.

9. Kiko por motivá nos pa sigui hasi obranan ekselente den nos sirbishi na Yehova?

⁹ Awor, kiko nos mester hasi si nos zelo pa e sirbishi kristian a kuminsá mengua? Wèl, nos tin ku reflekshoná riba loke Yehova ta logrando pa medio di e trabou di prediká. (Lesa Romanonan 10:13-15.) Pa hende por ser salbá, nan mester tin fe i nan mester invoká e nòmber di Yehova. Pero pa nan por tin fe i invoká e nòmber di Yehova, nos mester prediká na nan. Ora nos realisá esei, nos lo sinti nos motivá pa sigui hasi obranan ekselente i pa ta diligente den e trabou di proklamá e bon notisia di Reino.

10. Dikon nos por bisa ku nos bon kondukta ta atraé hende na Yehova?

¹⁰ Aunke ta importante pa nos tin zelo pa nos sirbishi, esei so no ta sufisiente pa atraé hende na Dios. Nos mester tin bon kondukta tambe. Pues, un otro manera ku nos por demostrá zelo pa bon obra ta mediante nos bon kondukta. Pablo a mustra bon kla pakiko esei ta importante ora el a skirbi: “Nos no ke hasi nada ku ta duna otro hende motibu pa trompeká, pa hende no kritiká nos sirbishi.” (2 Kor. 6:3) Ora nos ta papia kosnan edifikante i ta komportá nos mes bon, esakinan lo sirbi komo un adorno pa Dios su siñansanan i lo atraé mas hende na e adorashon di Yehova. (Tito 2:10) De echo, hopi bes nos ta tende relatonan animante di hende ku a aseptá e bèrdat debí na nos kondukta kristian.

11. Dikon nos mester hasi orashon i pensa seriamente riba nos kondukta i e efekto ku esaki tin riba otro hende?

 ¹¹ Pero nos tin ku rekonosé ku meskos ku bon kondukta por tin bon influensia riba otro hende, mal kondukta tambe por tin mal influensia riba nan. P’esei, sea ku nos ta na trabou, na kas òf na skol, nos mester komportá nos mes di tal manera ku hende no ta haña motibu pa kritiká nos sirbishi ni nos kondukta. Beibel ta mustra ku si nos ta praktiká piká deliberadamente, e konsekuensianan lo ta desastroso pa nos. (Heb. 10:26, 27) Esaki mester motivá nos pa hasi orashon i pensa seriamente riba nos kondukta i e efekto ku esaki tin riba otro hende. Segun ku e moral di e mundu akí ta sigui degenerá, mas i mas hende sinsero lo ‘distinguí esun ku ta sirbi Dios for di un ku no ta sirbié.’ (Mal. 3:18) Sí, nos kondukta ta hunga un papel importante den yuda hende rekonsiliá ku Dios.

12-14. Ki efekto e echo ku nos ta para firme durante prueba tin riba otro hende? Duna un ehèmpel.

¹² Den su di dos karta na e Korintionan, Pablo a skirbi ku el a pasa den tribulashon, difikultat, ku el a wanta gòlpi i ku el a ser enkarselá. (Lesa 2 Korintionan 6:4, 5.) Ora nos ta pasa den prueba, nos perseveransia por yuda opservadónan aseptá e bèrdat. Algun aña pasá, algun hende a purba di eliminá e Testigunan di Yehova ku tabata biba den un área na Angola. Nan a gara un pareha Testigu i 30 otro persona interesá ku tabata asistí na nos reunionnan i a suta nan te habri nan kurpa na sanger. Sí, asta hende muhé i mucha nan a suta. I pa intimidá tur hende pa nan no skucha e Testigunan di Yehova, nan a fòrsa e pueblo pa bin wak kon nan tabata maltratá e personanan inosente akí. Pero e resultado tabata nèt kontrali, pasobra despues di a mira e trato kruel akí, hopi hende den e komunidat a aserká e Testigunan i pidi un estudio di Beibel. Desde e tempu ei, e trabou di prediká e Reino a sigui avansá; mas i mas hende a bini den e bèrdat, i e rumannan a risibí hopi bendishon.

¹³ E ehèmpel akí ta mustra ku ora nos para firme durante prueba, esaki por tin un bon efekto riba otro hende. P’esei, nos por imaginá nos mes ku hopi hende lo a rekonsiliá ku Dios debí na e kurashi ku Pedro i e otro apòstelnan a demostrá. (Echo. 5:17-29) Den nos kaso, kompañeronan di skol, koleganan di trabou òf miembronan di nos famia lo por aseptá e bèrdat ora nan mira ku nos ta para firme pa loke ta korekto.

¹⁴ Semper lo tin algun di nos rumannan ku ta ser persiguí. Na Armenia, por ehèmpel, un 40 ruman hòmber ta den prizòn pa motibu di nan neutralidat. I probablemente, hopi ruman mas den e pais ei lo ser enkarselá den e binidero lunanan. Na Eritrea, tin 55 Testigu, tantu hòmber komo muhé, den prizòn, i algun di nan tin mas ku 60 aña di edat. Na Sur Korea, alrededor di 700 Testigu di Yehova ta den prizòn pa motibu di nan fe. E situashon akí ta andando pa 60 aña kaba. P’esei, laga nos sigui hasi orashon pa nos rumannan ku ta ser persiguí na diferente parti di mundu por keda fiel i asina duna gloria, òf onor, na Dios i yuda stimadónan di hustisia aseptá adorashon berdadero.—Sal. 76:8-10.

15. Konta un eksperensia ku ta mustra kon e echo ku nos ta hende onesto por atraé hende na e bèrdat.

¹⁵ E echo ku nos ta hende onesto tambe por atraé otro hende na e bèrdat. (Lesa Hebreonan 13:18.) At’akí un ehèmpel: Un ruman muhé ku tabata den bùs tabata preparando pa paga e shofùr ora ku un konosí di dje a bis’é pa warda su sèn pasobra e no tin nodi di paga pa e ruta kòrtiku ku el a kore den e bùs. E ruman muhé a bis’é ku ta korekto pa paga asta si ta un ruta kòrtiku. Despues ku e konosí a baha for di e bùs, e shofùr di bùs a puntra e ruman: “Testigu di Yehova bo ta?” E ruman muhé a kontest’é: “Sí, dikon mener ta puntra?” E shofùr a bis’é: “Mi a skucha boso kòmbersashon tokante pagamentu di bùs, i mi sa ku Testigunan di Yehova ta un di e poko gruponan ku ta hasi esei i  ku nan ta onesto den tur kos.” Un par di luna despues, un hòmber a aserká e ruman muhé na reunion i a puntr’é: “Bo ta kòrda mi? Mi ta e shofùr di bùs ku a papia ku bo tokante pagamentu di bùs. Bo bon kondukta a pone mi disidí di kuminsá studia Beibel ku Testigunan di Yehova.” Sí, ora hende mira ku nos ta hende onesto, nan ta pone konfiansa tambe den e bon notisia ku nos ta prediká.

16. Kon bini kualidatnan manera pasenshi, amor i bondat ta konmové kurason di hende? Duna un ehèmpel di loke lidernan religioso falsu ta hasi.

¹⁶ Un otro manera ku nos por yuda atraé hende na Yehova ta desplegando kualidatnan manera pasenshi, amor i bondat. Ademas, kristiannan berdadero no ta hipókrita; nan aktitut i kondukta ta onra Dios. P’esei, algun di e hendenan ku ta opservá nos ta haña gana di siña di Yehova, di su propósito i di su pueblo. Di otro banda, algun lider religioso ta pretendé di tin bon aktitut i un bon kondukta. Pero en realidat, nan ta gaña nan siguidónan i ta ranka plaka for di nan. Algun di nan a asta usa e plaka ei pa kumpra kas i outo luho pa nan mes. Un lider religioso a asta traha un kouchi ku èrko pa su kachó. Sí, hopi hende ku ta pretendé di ta siguidó di Kristu no ta obedesé e mandamentu pa “duna pòrnada.” (Mat. 10:8) Mas bien, nan “ta instruí pa un preis,” meskos ku e saserdotenan infiel di Israel di antigwedat tabata hasi. Ademas, hopi kos ku nan ta siña hende no ta basá riba Beibel. (Mik. 3:11) Ku e kondukta hipókrita ei, nan no por yuda niun hende rekonsiliá ku Dios.

17, 18. (a) Kon nos por onra Yehova ku nos kondukta? (b) Kiko ta motivá abo pa perseverá den obranan ekselente?

¹⁷ Di otro banda, ora hende mira ku nos ta siña nos próhimo e bèrdat i ta trata nan bon, esaki por motivá nan pa bira amigu di Dios. Tuma por ehèmpel e kaso di un biuda di edat avansá. Ora ku un pionero a yama na su kas, mesora el a bisa nos ruman ku e no ta interesá pa skucha. Ademas, e señora a bis’é ku ora el a yama na su kas e tabata riba trapi den kushina, purbando di kambia un pera di lus. E ruman pionero a bis’é ‘ku ta peligroso pa e hasi esei su so.’ Nos ruman hòmber a kambia e pera di lus p’e i a sigui su kaminda. Ora e yu hòmber di e señora a tende kiko e ruman a hasi, el a purba di haña kontakto ku nos ruman pa gradisié. Ku tempu, e yu hòmber di e señora a kuminsá studia Beibel.

¹⁸ Dikon abo ta determiná pa perseverá den obranan ekselente? Kisas bo ta hasi esei pasobra bo sa ku ora bo demostrá zelo den bo sirbishi na Dios i aktua na armonia ku su boluntat, bo ta onra Yehova i yuda otronan haña salbashon. (Lesa 1 Korintionan 10:31-33.) Un otro motibu pakiko nos ta zeloso den e trabou di prediká i ta desplegá bon kondukta ta pasobra nos ke demostrá nos amor pa Dios i pa nos próhimo. (Mat. 22:37-39) Ademas, si nos tin zelo pa obranan ekselente, for di aworakí kaba nos lo tin goso i satisfakshon. Es mas, nos por antisipá e tempu ora ku henter humanidat lo mustra zelo pa adorashon berdadero i onra nos Kreador, Yehova.