1, 2. Wahu tohrohr dahieu me Sounkadehdehn Siohwa kan ahneki? Ia omw pepehm ong met?

 ARAMAS kin alehdi wahu ni arail ale kisakis pwehki re wiahda mehkot kesempwal. Karasepe, ekei kin wahula ahnsou me re sewese wehi riau en ahneki popohl nanpwungara. Ahpw wahu me laudsang met iei ni Koht eh ketin poaronekitailla rehn aramas akan pwehn sewese irail en ahneki popohl reh.

² Nin duwen Sounkadehdehn Siohwa kan, kitail kelehpw me ahneki wahu tohrohr wet. Koht oh Krais ketin kaweid atail doadoahk en sewese aramas akan ren “wekila sang ni imwintihti ong ni kompoakepahn Koht.” (2 Kor. 5:20) Eri, Siohwa ketin doadoahngki kitail pwehn kainangihedo aramas akan reh. Imwilahn met, aramas rar kei nan sahpw tohtohsang 235 wiahlahr kompoakepahn Koht oh ahneki koapworopwor en mour soutuk. (Taitus 2:11) Kitail kin kasalehda ngoang nan atail doadoahk en kalohk oh luke “mehmen me men” sukuhlki padahk mehlel. (Kaud. 22:17) Kitail kin “ngoangkihte wiewia me mwahu,” me wehwehki, kitail perenki dahme kitail wiewia ong Siohwa oh kin wia uwen atail kak en kaperenda ih. (Taitus 2:14) Met kitail pahn sukuhlki ia duwen atail ngoang eh kak sewese meteikan ren esehla Siohwa. Ehu ahl iei atail doadoahk en kalohk.

3. Dahme kahrehda Siohwa eh “ketin ngoangki kowahlap” kin kihong kitail koapworopwor?

³ Aiseia 9:7 padahkihong kitail me sapwellimen Koht Ohl pahn ketin wiahla Nanmwarki oh e pahn ketin wiahda soahng mwahu kan ong aramas akan. Mepwukat koaros kin wiawi pwehki “KAUN-O, Wasa Lapalahpie, ketin ngoangki kowahlap mepwukat koaros en pweida.” En ahneki ngoang kin wehwehki en uhdahn men wia mehkot. Eri lepin lokaia kan nan iretikitik wet kihong kitail koapworopwor me  Siohwa uhdahn kupwurki aramas akan ren mourla. Kitail anahne perenki oh ngoangki doadoahk en kalohk pwehki Siohwa Koht ketin sapwellimanki ngoang. Nin duwen emen sapwellime tohndoadoahk, ke kin wia uwen omw kak koaros pwehn kalohki rongamwahwo?​—1 Kor. 3:9.

4. Ia duwen Sises eh ketikihda mehn kahlemeng unsek duwen en kolokolte ngoang nan doadoahk en kalohk?

⁴ Sises ketikihda mehn kahlemeng unsek duwen en kolokolte ngoang nan doadoahk en kalohk. Mendahki me tohto uhwongada ih oh men kemehla, e ketin kasalehda ngoang lao imwin sapwellime mour nin sampah. (Sohn 18:36, 37) Pwehki e mwahngih me ahnsou keren e pahn ketin lokolok oh kamakamla, e ketin doadoahk laud pwehn sewese aramas akan ren esehla Siohwa.

5. Ia duwen Sises eh ketin rasehng tohndoadoahko nan karasaras en tuhkehn piko?

⁵ Nan pahr 32, Sises ketikihda karasaras en ohl emen me ahneki tuhke pik ehu me sohte kin wa. Mwurin sounpar siluh, ohlo ndaiong nah tohndoadoahko en pelehdi tuhkeo, ahpw tohndoadoahko peki en kihong ekis ahnsou pwe en song apwalih tuhkeo en kak wa. (Wadek Luk 13:6-9.) Ni Sises eh ketin mahsanih met, me malaulaute me wia sapwellime tohnpadahk kan. Ahpw sapwellimen Sises karasaraso kasalehda me e ketin kupwurki doadoahk laud erein ahnsou mwotomwot mwohn eh pahn pwoula. Eri e ketin kalohk ni ngoang laud nan Sudia oh Peria mpen sounpwong weneu. Rahn kei mwohn eh ketin pwoula, Sises ketin tentenihr pwehki pali laud en aramas ako sohte men rong sapwellime padahk.​—Mad. 13:15; Luk 19:41.

6. Dahme kahrehda kitail anahne song kalaudehla atail doadoahk en kalohk?

⁶ Kitail anahne song kalaudehla atail doadoahk en kalohk pwehki kitail uhdahn kerenlahng ni imwio. (Wadek Daniel 2:41, 42, 44, 45.) Atail wia emen Sounkadehdehn Siohwa kin wia pwais uhdahn kaselel ehu! Kitail kelehpw nan sampah me kak padahkihong meteikan ia duwen kahpwal kan en aramas pahn mwahula. Me keren, sounnting en doaropwehn nuhs ehu koasoia me sohte me kak ese kahrepen soahng suwed kan ar kin wiawihong aramas mwahu kan. Ahpw Paipel padahkihong kitail dahme kahrehda oh atail pwukoa oh pwais kaselel nin duwen Kristian kei iei en padahkihong meteikan. Kitail anahne ‘poadidiong papah Siohwa sang nan kapehdatail unsek.’ (Rom 12:11) Siohwa pahn ketin kapaiada atail doadoahk, oh kitail kak sewese aramas akan ren esehla oh poakohng ih.

7, 8. Ia duwen atail tounmetei kan kin kawauwih Siohwa?

⁷ Wahnpoaron Pohl kin dadaurete pahn kahpwal tohto ni eh kalohk. E kin “pepehd nipwong oh kaisihsol.” (2 Kor. 6:5) Riatail Kristian kan pil kin wiahda soangen tounmetei duwehte met nan doadoahk en kalohk. Pioneer kan kin kilangwohng doadoahk en kalohk nin duwen doadoahk me keieu kesempwal, ahpw me tohto rehrail pil anahne ahneki doadoahk en mwohni. Pil medewehla misineri kan me kin doadoahk laud pwehn sewese aramas nan sahpw teikan. (Pil. 2:17) Ekei pak elder kan sohte kin mwenge de sohte kin meir pwehn apwalih tohnmwomwohdiso. Me mah kan oh me soumwahu kan nan mwomwohdiso kin wia uwen arail kak en towehda mihting kan oh kohla kalohk. E wia mehn kangoang en kilang duwen sapwellimen Koht ladu pwukat ar kin men wiahda tounmetei kan ong doadoahk en kalohk. Aramas akan likin mwomwohdiso pil kin kilang uwen atail kesempwalki doadoahk en kalohk.

⁸ Sounwadawad en doaropwehn nuhs ehu nan United Kingdom, me kaidehn Sounkadehdehn Siohwa men, koasoia: ‘Aramas akan solahr pwoson pelien sarawi kan. I sehse dahme kaun en sarawi kan kin wiewia. Re sohte kin kohla oh tuhwong aramas akan duwehte me Krais  ketin wia. Pelien lamalam ehute me mwomwen nsenohki iei Sounkadehdehn Siohwa kan, me kin kohla tuhwong aramas akan oh kalokalohki padahk mehlel.’ Pali laud en aramas akan nin sampah sohte men wiahda tounmetei kan ong meteikan. Ahpw pwehki kitail men wiahda tounmetei kan ong kalohk, kitail kin kawauwih Siohwa Koht.​—Rom 12:1.

9. Dahme kak sewese kitail en ngoangkihte wiewia me mwahu nan atail doadoahk en kalohk?

⁹ Dahme kitail anahne wia ma kitail sohla ahneki ngoang ong doadoahk en kalohk duwehte mahs? Kitail anahne medemedewe soahng mwahu koaros me kohsang doadoahk wet me Siohwa ketikihong kitail en wia. (Wadek Rom 10:13-15.) Pwe aramas akan en komourala, re anahne pwoson Siohwa oh likweriong mware. Ahpw re sohte kak wia met ma kitail sohte kalohk ong irail. Atail ese met anahne kamwakid kitail en men ngoangkihte wiewia me mwahu oh wia uwen atail kak en kalohki rongamwahu en Wehio.

10. Ia duwen atail wiewia mwahu eh kak kahrehiong aramas ren men esehla Koht?

¹⁰ Atail ngoangki doadoahk en kalohk sohte itar pwehn kahrehiong aramas akan ren men esehla Koht. Keriaun ahl me sewese irail iei atail wiewia mwahu en Kristian. Wahnpoaron Pohl kawehwehda dahme kahrehda atail wiewia kin kesempwal ni eh koasoia: “Se sohte men aramas emen en kahdsuwedih at kohwa doadoahk, ihme se sohte kin men kedirapwahki emen.” (2 Kor. 6:3) Atail lokaia mwakelekel oh wiewia mwahu ele kak kahrehiong aramas teikan en men kaudokiong Siohwa. (Taitus 2:10) Ni mehlel, kitail kalapw rong me aramas akan kin mwekidki padahk mehlel ni arail kilang duwen atail kin alasang Krais.

11. Dahme kahrehda kitail anahne medemedewe oh kapakapki duwen atail wiewia eh kin kamwakid meteikan?

¹¹ Duwehte atail wiewia mwahu eh kak kahrehiong aramas ren men sukuhlki padahk mehlel,  wiewia suwed kak kahrehiong aramas akan ren sohte men esehla Siohwa. Eri, sohte lipilipil ma kitail mi wasahn doadoahk, nan imwatail, de nan sukuhl, kitail anahne tehk mwahu en dehr wiahda mehkot me pahn kahrehda emen en kahng esehla Siohwa. Ma kitail kin “nsenkihte wiewia dihp,” kitail pahn luhs sang atail nanpwungmwahu rehn Siohwa kohkohlahte. (Ipru 10:26, 27) Met anahne kahrehiong kitail en medemedewe kanahieng oh kapakapki duwen atail wiewia oh ia duwen eh kin kamwakid meteikan. Ni wiewiahn sampah wet eh kin susuwedla, e pahn mengei ong aramas akan ren kilang wekpeseng en irail ‘me kin papah Koht oh me sohte kin papah ih.’ (Mal. 3:18) Ei, atail wiewia mwahu kan en Kristian iei ahl kesempwal ehu en sewese aramas akan ren men wiahla kompoakepahn Koht.

12-14. Ia duwen atail kin dadaur pahn uhwong eh kamwakid en meteikan ar kilangwohng padahk mehlel? Menlau kihda ehu karasaras.

¹² Nan keriau en nah kisinlikou ong Kristian en Korint ko, Pohl kawehwehda me e lelohng kalokolok, wowoki, oh selidi nan imweteng pwehki aramas kin uhwong eh doadoahk en kalohk. (Wadek 2 Korint 6:4, 5.) Ni atail kin dadaur pahn uhwong, meteikan ele kak mwekidki oh alehda padahk mehlel. Sounpar kei samwalahr ko, ekei nan Angola men kihsang Sounkadehdehn Siohwa kan koaros nan wasao. Sounkadehdehn Siohwa meh 2 oh me mwahuki rong padahk mehlel meh 30 alehdi wowoki sang aramas ako lao kilirail ko ohla oh nta keredi. Aramas ako pil wokih lih akan oh seri kan. Re men meteikan en masakala rong Sounkadehdehn Siohwa kan, eri re idingkihong ren kilang. Ahpw mwuhr, aramas tohto sang wasao peki rehn Sounkadehde kan en onop Paipel rehrail. Imwilahn met, doadoahk en kalohk pousehlahte wiawi, tohtohla aramas iangala padahk mehlel, oh brother ko alehdi kapai tohto.

¹³ Karasaras wet kasalehda me ni aramas akan ar kilang me kitail kin eimah pahn kasongosong, re kakete pilada en alehda padahk mehlel. Eimah en Piter oh wahnpoaron teikan ele kangoange ekei ren wiahla kompoakepahn Koht. (Wiewia 5:17-29) Iengetail tohnsukuhl, tohndoadoahk de tohn peneinei ele pahn alehda padahk mehlel pwehki re kilang me kitail kin eimah ni atail lelohng uhwong.

¹⁴ Kalokolok kin pousehlahte wiawi ong ekei riatail Kristian kan. Karasepe, ahnsou wet riatail brother meh 40 nan Armenia wie sensel nan imweteng pwehki ar soupoupali. Oh riatail me tohto nan sahpwo ele pil pahn selidi nan imweteng ni ahnsou kohkohdo. Nan Eritrea, Sounkadehde meh 55 mihmi nan imweteng oh ekei irail dauliher sounpar 60. Nan palieir en Korea, mpen Sounkadehdehn Siohwa meh 700 mihmi nan imweteng pwehki ar soupoupali. Erein sounpar 60, riatail brother kan wasao kin selidi nan imweteng. Kitail anahne pousehlahte kapakapki me lelepek en brother pwukat me lelohng kalokolok pahn kawauwih Koht oh sewese meteikan ren alehda padahk mehlel.​—Mel. 76:8-10.

15. Menlau kihda ehu karasaras me kasalehda ia duwen atail kin mehlel eh kak kahrehiong meteikan ren men esehla padahk mehlel.

¹⁵ Atail kin mehlel ele pil kahrehiong aramas akan ren men sukuhlki padahk mehlel. (Wadek 2 Korint 6:4, 7.) Karasepe, emen sister onopadahngehr en pwainla pweinen eh dake ehu bus ni emen ienge lih eh padahkihong me e sohte anahne pwain pwehki wasa me e pahn kohla ie me keren. Sistero kawehwehda me e konehng en pwain mendahki eh keren. Mwurin mwo, iengeo doudi sang buso. Soun tangahki buso eri idek rehn sistero, “Kowe emen Sounkadehdehn Siohwa?” Sistero nda “Ei. Dahme kahrehda ke idengki?” Ohlo sapeng: “I rong amwa koasoakoasoipene duwen omw pwainla ticketo, oh I ese me Sounkadehdehn Siohwa kan iang nanpwungen aramas malaulaute me kin pwainla ticket kan oh kin mehlel ni soahng koaros.” Sounpwong kei mwuhr nan ehu mihting, ohl  emen kohla rehn sistero oh nda, “Ke ese ie? Ngehi ohl me tangahki buso me koasoiong uhk duwen omw pwainla ticketo. Mwurin ei kilang uwen omw mehlel, I pilada ien tepida onopki Paipel rehn Sounkadehdehn Siohwa kan.” Ni aramas akan ar kilang atail kin mehlel, re kin likih rongamwahwo me kitail kalohki.

16. Dahme kahrehda kanengamah, limpoak oh kadek kin sair mohngiong en aramas akan? Menlau kihda ehu karasaras en dahme kaunen pelien lamalam kan kin wiewia.

¹⁶ Ni atail kin kanengamah, limpoak oh kadek, kitail kakete kahrehiong aramas akan ren men sukuhlki duwen Siohwa, kupwure kan oh duwen sapwellime aramas akan. Madamadau oh wiewia en Kristian mehlel kan kin kawauwih Koht. Ekei kaunen pelien lamalam akan kin mwomwehda ahneki madamadau mwahu oh wiewia mwahu. Ahpw re kin pitih tohn arail sarawio oh kin kihsang neirail mwohni. Ekei pil kin doadoahngki mwohni pwukat pwehn pwainda imwarail oh wararail sidohsa pweilaud kan. Emen pil wiahda imwen nah kidio en mie aircon loale. Re sohte kin idawehn sapwellimen Krais kehkehlik en “kihwei nin sohte pweipwei.” (Mad. 10:8) Ahpw re duwehte samworo suwed ko en Israel. Re “kin ale pweinen” ar padahk oh padahki padahk sapwung kan duwen Koht. (Maika 3:11) Ni ar wia met, re sohte kin sewese emen en wiahla kompoakepahn Koht.

17, 18. (a) Ia duwen atail wiewia eh kak kawauwihala Siohwa? (b) Dahme kahrehda ke men ngoangkihte wiewia me mwahu?

¹⁷ Ahpw aramas akan kin men wiahla kompoakepahn Koht ni arail pohnese me kitail kin padapadahki dahme mehlel oh pil kilang me kitail kin kasalehda kadek ong mehn mpatail. Karasepe, emen pioneer koasoiong lih mah men ni eh wenihmwo ahpw liho mwadang ndaiong me e sohte men rong. Liho nda me ni ahnsou me brothero letelet ni eh wenihmwo, e mihmi pohn kehndake ehu songosong en wilian nah dengkio. Brothero nda, “ E keper ken kelehpw wia men.” Brothero eri wilianda nah dengkio oh doula ni ehu ihmw ko. Ni ahnsou me nein liho pwutako esehda dahme wiawi, e uhdahn pwuriamweikihla me kahrehiong en kohla rapahki brothero pwehn kalahnganki dahme e wiahda. Kedekedeo, nein liho pwutako tepida onop Paipel.

¹⁸ Dahme kahrehda ke men ngoangkihte wiewia me mwahu? Mwein pwehki ke ese me ma ke kin ngoangki doadoahk en kalohk oh ahneki wiewia mwahu, ke pahn kawauwih Siohwa oh sewese meteikan en komourla. (Wadek 1 Korint 10:31-33.) Pil ehu kahrepen atail ngoangki kalohk oh ahneki wiewia mwahu iei pwehki kitail uhdahn men kasalehda atail limpoak ong Koht oh meteikan. (Mad. 22:37-39) Ma kitail kin ngoangkihte wiewia me mwahu, kitail pahn ahneki peren oh nsenamwahu mehlel met. Oh kitail kak kasik ahnsowo me tohnsampah koaros pahn perenki kaudokiong oh kawauwih Sounkapikpatail, Siohwa.